Ɛsɩdɩrasɩ sor jɔfʋ sɛbɛ a ha Ɩjɩrayɛl bɩsana fɛʋ
8
1 Dɩ tɩbɩla fɛw kpar a gbɛbɩ kha pa bɩɛl a ho tɩɩ bɩɛl lõfonʋɔraakɛ wɩ n wenɩ ɲɔ lõfonɔɔ ƴɛbʋrɔ, sa so Ɛsɩdɩrasɩraakɛ dʋɔnɩ jɔfʋ dɩɩrdaar, aa, a pɔna Mʋɩjɩ jɔfʋ sɛbɛɛkɛ Thãgba Kɔ̃tɩn kɔɔ kherenɩ, a ha Ɩjɩrayɛl bɩsana. 2 Dɩ yɩɛrɩ sɩpora makoɲɔdaarɩ caca wirǝ, Ɛsɩdɩrasɩ bonɩ jidaar pɔnanɛ jɔfʋ sɛbɛra tɩbɩlaa ƴɛra, kɛ kpanɩ kha a jɛ: kona na khɛra, na wɩrɛ fɛʋʋkɛ dʋɔnɩ wa punone a na jɩ gɩrɛ wɩ n nɩɛnɩ kɩrʋ.3 Dɩ Ɛsɩdɩrasɩ sor sɛbɛra, kona na khɛraa ƴɛra, na wɩrɛ fɛʋʋkɛ dʋɔnɩ wa punone a na jɩ gɩrɛ wɩ n nɩɛnɩ kɩrʋ, a fʋna duuro a dana ʋlkhɔɔ, lõfonʋɔraakɛ wɩ n wenɩ ɲɔ lõfonɔɔ ƴɛbʋrɔ. Tɩbɩla fɛw kɔɔ pɛr nũu bɔɔbɔɔ jɔfʋ sɛbɛ soraale. 4 Wɩ kɔɔ gbɛbɩrɛ jɩɩl paar na thɩra ga irǝ, dɩ Ɛsɩdɩrasɩ jɔfʋ dɩɩrdaar jɩɩlɔ. Dɩ Matɩtɩa na Sema na Anaya na Urɩ na Hɩlkɩya na Maaseya hale ɔɔ kɩrɔ a jɩɩl ɲɔ̃bɔɔra; dɩ Pedaya na Mɩkayɛl na Malkɩya na Hasum na Hasebadana na Jakarɩ na Mesulam jɩɩl ɲɔ̃bɩlana. 5 Dɩ Ɛsɩdɩrasɩ phubire sɛbɛra, dɩ tɩbɩla fɛw yɩɛ, gɩdonɩ a har ƴũu a jɔ tɩbɩla. Dɩ mɔ̃ a na phubini, tɩbɩla fɛw ɩɩrɛ a jɩɩl. 6 Dɩ Ɛsɩdɩrasɩ fʋɔrɛ Thãgba Kɔ̃tɩn, kɛ dʋɔnɩ Thãgba kpɩɛ; dɩ tɩbɩla fɛw ti ɲɛ̃ɛ ƴũu sa tu aa: Amɛn! Amɛn! Agɩpɩ dɩ wɩ gburõkhu a gʋɛna ƴɩɛ thɩɩra Thãgba Kɔ̃tɩnɩ ƴɛra, a fʋɔrʋ. 7 Dɩ Yesua na Banɩ na Serebɩa na Yamɩn na Akubɩ na Sebetaɩ na Hodɩa na Maaseya na Kelɩta na Ajarɩa na Yojabadɩ na Hanan na Pelaya, kɛ dɔnɩ Levɩɩ məlsɔ mar dɩ wa n mɩɛ tɩbɩla jɔfʋ kɩrʋ, sɩ dɩ tɩbɩla jɩɩl ƴũu. 8 Wɩ n sor Thãgbaa jɔfʋ sɛbɛra wala wala, dɩ wɩ tinǝ kɩrʋ a na 'laa, gɩ cʋʋ tɩbɩla n jɩ gɩrɛ wɩ n sonɩ kɩrʋa.
9 Dɩ tɩbɩla fɛw n khɩɩlɛlɛ mɔ̃ wɩ nɩɛnɩ jɔfʋ sɛbɛɛkɛ wɩ sonɩ. Dɩ Nehemɩ, kɛ dʋɔnɩ Gobanɛr na Ɛsɩdɩrasɩɩkɛ dʋɔnɩ bonɩ jidaar, a dona jɔfʋ dɩɩrdaar na Levɩɩ məlsɔɔkɛ n mɩɛnɛnɩ tɩbɩla kɩrʋ so warɛ fɛw aa: Wireekɛra, Thãgba Kɔ̃tɩn, anɩ Thãgbaa wi gɩ. Na n do haar n kʋɛ nɩ, na n khɩɩla'. 10 Dɩ Ɛsɩdɩrasɩ so war aa: Nɩ kɔna a khɔ dikor bʋɔ, a ɲɔna ta bɔbʋɔ, sa ɛna hana wɩrɛɛkɛ na hananɩ thɩ̃ɛ a gbɛba', gɩdonɩ wireekɛra, asɩ Kɔ̃tɩ̃ɩ wi gɩ. Na n do haar n kʋɛ na', gɩdonɩ daʋʋkɛ dʋɔnɩ Thãgba Kɔ̃tɩnɩda dʋɔn anɩ fãga. 11 Dɩ Levɩɩ məlsɔ n bɩɛlɛ tɩbɩla fɛw dɩ wa n so war aa: Nɩ pɩra nʋɔ! Gɩdonɩ wireekɛra Thãgbaa wi gɩ, gɛr gɩ na n do haar n kʋɛ na'. 12 Dɩ tɩbɩla fɛw kʋɔn a kho dikor, a ɲɔna, sa pɔna a ha wɩrɛɛkɛ na hananɩ thɩ̃ɛa'. Wɩ n kãkarɛ gɩdonɩ thɩmɩaakɛ wɩ mɩɛ wɩnɩ, wɩ jɩrɛ kɩrʋ.
Ɩjɩrayɛl bɩsana cʋʋrɛ wa too fɛtɩ
13 Dɩ balaɲɔ wirera wɩrɛ dʋɔnɩ cɔdaar kona Ɩjɩrayɛl bɩsanaa thɩ̃thɩɩn fɛw na bonɩ jidara na Levɩɩ mǝlsɔ kpar a jɛ Ɛsɩdɩrasɩraakɛ dʋɔnɩ jɔfʋ dɩɩrdaar, wɩ jɩɩ pɛ jɔfʋ thɩmɩɩra nũu bɔɔbɔɔ. 14 Dɩ wɩ yɩ gɛr le jɔfʋraakɛ Thãgba Kɔ̃tɩn kɔɔ hanɩ Mʋɩjɩ dɩ 'laa; dɩɩ khere ayɩ, Ɩjɩrayɛl bɩsana teenanɛ wa n cɔ waʋsɔ yɩɛrɩ ɲɛ̃be makoɲɔ sɩporɩ fɛtɩ cʋʋ bɔɔ. 15 Aa wɩ teenanɛ wɩ mɩa ga thɩmɩɩ gɩ kpaar, a sɔ awɩ dʋɔsɔ fɛw na Jerujalɛm dɩɩra ayɛ: Nɩ jala gɔ̃gʋɔna a ɛna olɩvɩ thɩr jɛ̃ɛ na faa na hɔ̃ olɩvɩ thɩr jɛ̃ɛ na faa na mɩrtɩ thɩr jɛ̃ɛ na faa na kalã jɛ̃ɛ na faa na thɩr jɛ̃ gɩrɛ hananɩ faa, a dɔna waasɔ mɔ̃kɛra gɩ kherenɩ. 16 Dɩ Ɩjɩrayɛl bɩsana jaal a pɔna thɩr jɛ̃ɛsɔra na faa. Dɩ wɩ dʋrɛ waasɔra awɩ cɔ nãsʋrɔsɔ na awɩ cɔ gbasasɔra na Thãgbaa cɔ gbasasɔra na ɲɔ lõfonɔ khʋra gbasara na Efɩrayɩmɩ mǝlsɔɔ lõfonɔ khʋra gbasara. 17 Dɩ tɩbɩla fɛʋʋkɛ kɔɔ thɛnɩ dee dʋʋra a kɛr bir, wɛr fɛw kɔɔ dʋrɛ waasɔ dɩ wa n cɔrɔ. A fʋna Nunɩ bikuun Jojuee bɔɔ, Ɩjɩrayɛl bɩsana na kɔɔ bir cʋʋ ga ca thale bã. Da kɔ̃tɩ̃ɩ kɔɔ hale na sobɔr.
18 Wire wo wire, a fʋna caca wire a dana pɩpɩɩ wire wɩ n sor Thãgbaa jɔfʋ sɛbɛ. Wɩ cʋʋrɛ fɛtɩɩle a dana wire makoɲɔ. Wire makõther wirera, dɩ wɩ cʋʋ kpa jɛ kɔ̃tɩ̃ɩ mɔ̃kɛra jɔfʋ sonɩ.