Nabɔtɩɩ thɩmɩ na Akabɩ na ɔɔ khɛr Jejabɛl
21
1 Mɔ̃ thɩ̃ɛsɔɔle kanɩ pɩ, yɛkɛ gɩrɛ dananɩ: Kuun bɩɛl kɔɔ hale Jɩjɩreyɛl dɩɩra da n do Nabɔtɩ. A hananɛ dɩvɛ̃ thɩr lɩɛ dɩɩ wɔrɔna Akabɩɩ cɔ, kɛ dɔnɩ Samarɩ jamana. 2 Dɩ Akabɩ mɩɩnanɛ Nabɔtɩ wi bɩɛl aa: «Hana mɩ afɩ dɩvɛ̃ thɩr lɛɛkɛra ɩ̃ cʋʋ nãkʋɔr bi diir paar, gɩdonɩ gɩ wɔrɔnanɛ ɩ̃ cɔ jɔɔ. Sɩ ma ha fɛr dɩvɛ̃ thɩr lɛ kpɩɩkɛ bʋɔnɔnɩ a jʋɔ. Agɩbo, ado fɩ n ƴaalɛ wo, mɩ punone ha fɩ war mɔ̃ ɔɔ the nɔ hanɩ.» 3 Sɩ Nabɔtɩ birsere Akabɩ aa: «Thãgba Kɔ̃tɩn n bulo mɩ ma n gba ɩ̃ thɩ kɔ̃tɩ̃sɔɔ khĩdi thɩ̃ a ha fa'.» 4 Dɩ Akabɩ jamana kʋɔn ɔɔ cɔ na ƴɛ gbur. Dɩ ɔɔ kpɩɛr fɛw kʋɛrɛ gɩrɛraakɛ Nabɔtɩɩkɛ thɛnɩ Jɩjɩreyɛl mɩgʋʋnɩ aa, Thãgba Kɔ̃tɩn n bulo nɩ ɩna n gba ɩnɩ thɩ kɔ̃tɩ̃sɔɔ khĩdi thɩ̃ a haa ga. Dɩ a lʋʋn a phɩ̃ ɔɔ phɩ̃ para, a fi ƴɩɛ pɛ gʋʋra sa bo dikor. 5 Dɩ ɔɔ khɛr Jejabɛl lõ a bulee: «Aɲe gɩ dɩ fɩ gbu ƴɩɛ a bona dɩko khor?» 6 Dɩ birse ɔɔ khɛr aa. «Nabɔtɩɩkɛ thɛnɩ Jɩjɩreyɛl, ɔrra mɩ so a hana mɩ ɔɔ dɩvɛ̃ thɩr lɛ sɩ ɩ̃ haa war, agɩbo ado a n ƴaalɛ ɩ̃ haa dɩvɛ̃ thɩr lɛ kpɩɩ olee kara, dɩ so ɩna ha mɩ ɩnɩ dɩvɛ̃ thɩr la'.» 7 Le ɔɔ khɛr Jejabɛl sʋʋraa: «Sɩɩ do fɛr dʋɔn jamana Ɩjɩrayɛlla ger bɛ? Ɩrɛ khɔ dikor a hanana daw. Mɛr na hana fɩ Jɩjɩreyɛl Nabɔtɩɩ dɩvɛ̃ thɩr lɛra.»8 Dɩ a kherere sɛbɛsɔ na Akabɩɩ i, a dʋrɔ jɩɩn na Akabɩɩ jẽ dʋda. Agɩpɩ dɩ thɔna sɛbɛsɔɔra a ha dʋɔ kɔ̃tɩna na sogʋʋrdaraakɛ hanɩ kha dɩ bɩɛl na Nabɔtɩ. 9 Gɩrɛɛkɛ a sonɩ ɔɔ sɛbɛsɔɔrara dʋɔn: «Nɩ gbɛba kha a le nʋɔ, sa te Nabɔtɩ a too tɩbɩlaa ƴɛbʋrɔ. 10 Agɩpɩ nɩ te tɩɩ puunə yeɲɔ wɩ too ɔɔ ƴɛbʋrɔ, wɩ pɩɛraa so khɩɩ wɩ sʋʋraa a sʋɔn Thãgba, a sɔna jamana. Agɩpɩ nɩ thɛnaa dɩ khuirə a dʋrɛɛ na bokana a kɔ.»
11 Dɩ Nabɔtɩɩ dɩdaraakɛ dɔnɩ dʋɔ kɔ̃tɩna na sogʋʋrdaraakɛ hanɩle dɩɩra cʋʋrɛ mɔ̃kɛra Jejabɛl sonɩ, mɔna gɩ kɔɔ kherenɩ sɛbɛsɔɔraakɛ a kɔɔ thɔnanɩ ha wɩ. 12 Wɩ gbɛbɩrɛ kha a li nʋɔ, sa ti Nabɔtɩ dɩ too tɩbɩlaa ƴɛbʋrɔ. 13 Dɩ tɩɩ puunə yeɲɔ pɔr a too Nabɔtɩɩ ƴɛbʋrɔ, a ma dɩ wa n pɩɛraa so khɩɩ tɩbɩlaa ƴɛra, a sʋʋraa: «Nabɔtɩ sʋɔn Thãgba a sɔna jamana.» Agɩpɩ wɩ thenaanɛ dɩ khuirə a dʋʋrʋ na bokana a kʋ. 14 Agɩpɩ wɩ thʋɔn so Jejabɛlla aa: «Wɩ dʋʋrɛ Nabɔtɩra na bokana a kʋ.»
15 Ɔbɔɔkɛ Jejabɛl nɩɛnɩ aa, wɩ dʋʋrɛ Nabɔtɩ na bokana a kʋ, a sor Akabɩra: «Nabɔtɩɩkɛra thɛnɩ Jɩjɩreyɛl na hale bã; a khire. Jala gba ɔɔ dɩvɛ̃ thɩr lɛra a kɔɔ bonɩ ɩna ha fɩ sɩ fɩ haa wara', a hɩna.» 16 Mɔ̃ Akabɩ nɩɛnɩ dɩɩ do Nabɔtɩ khire, a ther da n jal Nabɔtɩɩ dɩvɛ̃ thɩr lɔɔra ɩnɩ n gba ɩnɩ n hɩ̃.
Akabɩ 'lɛr sor ɔɔ puu cʋʋra
17 Le Thãgba Kɔ̃tɩn mɩɩna ɔɔ mɩmɩɩ Eli, kɛ thɛnɩ Tisebe ayɩ: 18 «Ɩrɛ jala caanɛ Akabɩɩkɛ dɔnɩ Ɩjɩrayɛl jamanaakɛ thɛnɩ Samarɩ. Ɔr ha ole Nabɔtɩɩ dɩvɛ̃ thɩr lɔɔ, da n gba a hɩ̃. 19 Sʋɔraa aa mɛr Thãgba Kɔ̃tɩn sor wɔɔ: “Fɩ kʋrɛ tibil, sɩ fɩ bir fɩ gba ɔɔ thɩ̃ bɛɛ?” Agɩpɩ birə sʋɔraa wo, aa mɛr Thãgba Kɔ̃tɩn sor wɔɔ: Paarɩkɛra bena dɛlɛnɩ Nabɔtɩɩ tɔmɩn, liirə wa dɛlɛ̃ ɔɔ thɛthɛɛ tɔmɩn.» 20 Dɩ Akabɩ sor Elɩra: «Fɛr ɩ̃ lãlaardaar, fɩ yɩ mɛr koe!» Dɩ Eli sʋʋra: «Ɔɔ, mɩ yɩ fɛr. Gɩdonɩ fɛr faa afɩbara dɩ fa n cʋʋ gɩrɛ puuronɩ Thãgba Kɔ̃tɩnɩ ƴɛra. 21 Gɛr gɩ Kɔ̃tɩn sor wɔɔ: “Ma pɛ farɛ thɩlkɩɩr. Ma bũburõ fer, fɛrɛ na kuuminə fɛw fɛr Akabɩɩ toora Ɩjɩrayɛl dɩɩra na dee kona na waya ɓibi.
22 Ma cʋʋrɛ fɛr Akabɩɩ cɔka mɔ̃ mɩ cʋʋnɩ Nebatɩɩ bikuun Jeroboamɩ cɔka, na Ahɩyaa bikuun Baesaa cɔka. Gɩdonɩ fɩ cʋʋrɛ dɩ nĩkhii fʋ mɩ, a tɔna Ɩjɩrayɛl bɩsana a pɛr dɩ wɩ cʋʋ puure." 23 Thãgba Kɔ̃tɩn sor dakha Jejabɛlɩdara ayɩ: “Bena na khɔ Jejabɛl Jɩjɩreyɛl dɩ bɛr go kɩrɔ”. 24 Akabɩɩ tibilikɛ na khenɩ dɩɩra, bena na khʋɔ. Ʋrɛɛkɛ na khenɩ hʋɔnɔ, 'lominə ƴũu na khʋɔ.»
25 Tibil bɩɛllakɛ na kɔɔ hale a thʋ̃ faa ɔɔbara, a cʋʋ puure Thãgba Kɔ̃tɩnna a hona Akaba'. Sɩ ɔɔ khɛr Jejabɛl n tʋɔ da n pɛr. 26 A thʋnɛ cʋʋ puure dɩɩ kar, da n fʋɔrakɛ thɩlasɔ ɓoɓo mɔ̃kɛra Amɔɔr məlsɔ n kɔɔ cʋʋnɩ dɩ Thãgba Kɔ̃tɩn weele wɩ, sa gba dɩɩ ha Ɩjɩrayɛl bɩsana.
27 Mɔ̃ Akabɩ nɩɛnɩ Elii thɩmɩsɔɔle, a ɓəəre ɔɔ kə̃kə̃sɔ dɩbara sa to bɔrɔ kẽkena, a linə nʋɔ, da n phɩna bɔrɔ kẽkenana, da n ɩɩrna hɛlɛlɛlɛ. 28 Dɩ Thãgba Kɔ̃tɩn mɩɩnanɛ Eli, kɛ thɛnɩ Tisebe a sʋʋraa: 29 «Fɩ yɩrɛ mɔ̃ Akabɩ wurnɩ ɔɔbara ɩ̃ ƴɛra bɛ? Gɩdonɩ a wure ɔɔbara thale ɩ̃ ƴɛra, ma pɛ thɩlkɩɩr ɔɔ cɔkara ɔɔ yi hana bɔɔ 'lo bã, sɩ ɔɔ bikuuni jamana do bɔɔ ma pɛr thɩlkɩɩr ɔɔ cɔkara.»