Akabɩ 'lɛr kəəre Siiri jamanana
20
1 Bɛn-Hadadɩɩkɛ dɔnɩ Siiri jamana ɩɩrɛ a kpa ɔɔ sɔrasɩsɔ fɛw a jɛ. Dɩ jamana kpelẽ yʋɔr yeɲɔ ɓaanaanɛ. Wɩ hananɛ gãgona na koke hotorosɔ. Dɩ Bɛn-Hadadɩ jaal a sɔbɩ Samarɩ dɩɩ, ɩnɩ n kenaa kʋʋr. 2 Dɩ a thʋɔn thɔ̃thɔna Akabɩ jamanaa pa, kɛ dɔnɩ Ɩjɩrayɛl jamana, Samarɩ dɩɩra. 3 Aa wɩ sʋɔraa ayɛ: «Mɛr Bɛn-Hadadɩ sɔ wɔɔ: “Hana mɩ afɩ dɛ bulo na afɩ dɛ, a hana mɩ afɩ khɛrsɔ na afɩ bɩsã wɩrɛ ɓɔnanɩ”». 4 Dɩ Ɩjɩrayɛl jamana birsee aa: «Ɩ̃ kɔ̃tɩ̃ jamana, mɩ ture gɩrɛ fɩ sonɩ. Mɩ n ha fɛr ɩ̃bara na thɩ̃ɛ fɛʋʋkɛ mɩ hananɩ.» 5 Dɩ thɔ̃thɔnaale kɛrɛ bir wo a mɩɩ Akabɩ gɩrɛɛkɛ Bɛn-Hadadɩ sonɩ aa: «Mɩ kɔɔ thʋɔn a so far, fɩ hana mɩ afɩ dɛ bulo na afɩ dɛ na afɩ khɛrsɔ na afɩ bɩsãsɔ. 6 Gɛr gɩ cʋɔ wɛ̃ɛbɔɔkɛ, ma thʋɔn ɩ̃ thɔ̃dara afɩ pa, dɩ wa wɩɛsɩ afɩ cɔ, na afɩ thɔ̃darasɔɔ cɔsɔ wɩ khɩɩ thɩ̃ɛ fɛʋʋkɛ dɔ farnɩ thɩ̃ bɔy wɩ ɩna.»7 Dɩ Ɩjɩrayɛl jamana wer dʋɔ kɔ̃tɩna fɛw a so war aa: «Nɩ jɛ gɩ do thɩmɩɩr kuunɩkɛra n ƴaal sɩ. Gɩdonɩ a kɔɔ thʋɔn a so mar, ɩ̃ hana nɩ ɩ̃ khɛrsɔ na ɩ̃ bikũusɔ, ɩ̃ dɛ bulo na ɩ̃ dɛ, dɩ ma tʋ̃ɔ thɩ̃ bɩɛllaka'.» 8 Dɩ kɔ̃tɩnaale fɛw na tɩbɩla fɛw so Akabɩra: «Fa n pɩɛ nũuə', fa n tuə'.» 9 Dɩ Akabɩ birse Bɛn-Hadadɩɩ thɔ̃thɔ̃sɔ aa: «Nɩ sɔ ɩ̃ kɔ̃tɩ̃ jamanana ayɛwɔɔ: “Gɩrɛ fɛʋʋkɛ a kɔɔ thɔnɩ a so mɛr ɔɔ thɔ̃daara cacaraale, ma cʋʋrɛ, sɩ nɛnɛ̃daakɛ wer a sonɩ, ma punoə'.”» Dɩ thɔ̃thɔnaale kɛrɛ bir a mɩɛ awɩ kɔ̃tɩn gɩrɛ a sonɩ.
10 Dɩ Bɛn-Hadadɩ bir thɔ̃ a so Akabɩra : «Ado Samarɩ dɩɩ hana thɩlãkobe dɩɩ hi tɩbɩlaakɛ n kpaanɛ marnɩɩ ɲɔ̃korʋ, thãgbasɔ n pɛ mar sor gɩ puuro na sobɔr:» 11 Sɩ Ɩjɩrayɛl jamana birsere aa: «Nɩ sɔ Bɛn-Hadadɩra wɔɔ: “Tibilikɛ n jalanɩ kʋʋra na n kpãga ɔɔbara mɔ̃ ʋrɛ thɛnɩ kʋʋra da n kɔ̃ n cʋʋna'”»
12 Dabɔɔle Bɛn-Hadadɩ n nɩɛnɩ thɩmɩɩrɩle, kẽkẽ waʋsɔ a kɔɔ ha da n ɲɔ taan na jamanasɔɔkɛra n kpaaraanɩ. Dɩ a sor ɔɔ sɔrasɩsɔɔra aa: «Nɩ gbɛba koke gbɛbɩrɛ!» Dɩ wɩ gbɛbɩrɛ a jɛ Samarɩ ƴɛbʋrɔ wɩ kenaa.
Kəəreekɛ Akabɩ jamana 'lɛnɩ
13 Sɩ hɩnɛ Thãgbaa mɩmɩɩ bɩɛl pɔr Akabɩra, kɛ dɔnɩ Ɩjɩrayɛl jamana a sʋʋraa: «Fɩ yɩrɛ tɩɩ jɔjɔ caarɩlera fɛʋaa? Ma gba wɛr na dʋ fɩ ɲɔ̃kɔɔ nĩikɛra, dɩ mɛ̃ fa jɩ mɛr dʋɔn Thãgba Kɔ̃tɩn.» 14 Dɩ Akabɩ bule: «Amɛ fa kana? / Na amɛɛ fãga ? » Dɩ Thãgba mɩmɩɩ so aa: «Thãgba Kɔ̃tɩn sor: «Sɔrasɩ daɓolaakɛ gobanɛrsɔ gbanɩ dɩ gbulonasɔɔra gɩ.» Dɩ Akabɩ bir bule: «Amɛ na kɔɔ ɩrɛna kʋʋr?» Dɩ Thãgbaa mɩmɩɩ so aa: «Fɛrɛ thɛthɛ gɩ.» 15 Dɩ Akabɩ there sɔrasɩ daɓolaakɛ gobanɛrsɔ gbanɩ dɩ gbulonəsɔɔra dɩ wɩ ha tɩbɩla taaɲɔ na kpelẽ yʋɔr yeɲɔ (232). Agɩpɩ dɩ ther Ɩjɩrayɛl sɔrasɛ fɛw, dɩ wɩ ha tɩbɩla gbɩlanɩ makoɲɔ (7.000).
16 Akabɩ na ɔɔ sɔrasɩsɔ ther ʋlkhɔɔ wɩ kena wɩ. Ɔbɔɔlera Bɛn-Hadadɩ hale kẽkẽ waʋsɔ a ɲɔ taan dɩ ga n kʋʋ na jamana kpelẽ yʋɔr yeɲɔ (32), kɛ n kpaaraanɩ. 17 Dɩ sɔrasɩ daɓolaakɛ gobanɛrsɔ gbanɩ dɩ gbulonəsɔɔra gbaar ƴɛkʋʋlɛ. Dɩ Bɛn-Hadadɩ thʋɔn a bule, dɩ wɩ sʋʋraa aa: «Samarɩdara thɛ.» 18 Dɩ Bɛn-Hadadɩ so aa: «Ado ha ɩɩ wɩ the wɩ ƴaal yoo, nɩ fʋlɛnɛ wɩ na yire, ado kʋʋr wɩ the wɩ ke yoo, nɩ fʋlɛnɛ wɩ na yire.» 19 Dɩ sɔrasɩ daɓolaakɛ gobanɛrsɔ gbanɩ dɩ gbulonəsɔɔra na sɔrasɛɛkɛ n kpaanɛ warnɩ ther dɩɩra. 20 Dɩ wɛr fɛw bɩɛlbɩɛl kʋrɛ tɩɩ bɩɛlbɩɛl. Dɩ Siiridara caalɛlɛ, dɩ Ɩjɩrayɛl sɔrasɛ weele wɩ. Dɩ Bɛn-Hadadɩɩkɛ dɔnɩ Siiri jamana jʋʋnɛ gãgo bɩɛla a fuu, ɔr na gãgo jʋʋn sɔrasɛsɔ. 21 Dɩ Ɩjɩrayɛl jamana ther a kʋʋr gãgona, a kʋɛna koke hotorosɔ, a pɩ Siiridara fãga koo.
22 Le Thãgbaa mɩmɩɩlera pɔ Ɩjɩrayɛl jamanana a sʋʋraa: «Pɩɛr 'lar. Jɛna gɩ, a gbɛba mɔ̃kɛ fa cʋʋnɩ, gɩdonɩ kɩɛr na nayɩɛr, Siiri jamana na kɛrɛ na ɩ̃ a na kena fɩ.»
Akabɩɩ balaɲɔ kəə Siiridarara
23 Le Siiri jamanaa thɔ̃dara sʋʋraarɛ aa: «Ɩjɩrayɛl bɩsanaa Thãgba dor gɔ̃gɔ̃ thãgba, gɛr gɩ dɩ wɩ puno sɩ. Sɩ birə jala a kɛna wɩ bə̃ faana, sa puno wer baalɛ na hala'.» 24 Gɩrɛ fa cʋʋnɩ wo dʋɔn: «Tiire jamanasɔɔkɛ ɓana farnɩ a faa, sa pɩɛr gobanɛrsɔ awɩ kara. 25 Dɩ fɛrɛ dakha, te sɔrasɛ wɩ jɔr wɩ ho wɩrɛɛkɛ wɩ kɔɔ kʋʋrnɩ, a ƴaalɛ gãgona na koke hotorosɔ wɩ mãkhana cacadaa. Agɩpɩ, sɩ bir sɩ jal sɩ kena wɩ bə̃ faana, sa puno wer baalɛ na hala'.» Dɩ Bɛn-Hadadɩ tu awɩda, a cʋʋ mɔna wɩ sonɩ.
26 Mɔ̃ yɩɛr fini, Bɛn-Hadadɩ there Siiri sɔrasɛ, a kpa wɩ jalna Afɛkɩ dɩɩra wɩ kɛna Ɩjɩrayɛl bɩsana. 27 Dɩ wɩ there dakha Ɩjɩrayɛl sɔrasɛ a ha wɩ dɩkɔ, dɩ wa n caan wɩ kena Siiri sɔrasɛ. Dɩ wɩ vaarɛ gbulona yeɲɔ yɩra yɩra a jɛ Siiri sɔrasɛɛ ƴɛbʋrɔ a ho bɔ, sɩ Siiri sɔrasɛ hi dɩɩ fɛw.
28 Le Thãgbaa tibilile pɔ a so jamanana aa: «Thãgba Kɔ̃tɩn sor ayɩ: “Gɩdonɩ Siiridara sor gɔ̃gɔ̃ thãgba mɛr Thãgba Kɔ̃tɩn do, ma do ɓɛlɛ̃ thãgba ga, ma gbaar tɩɩ jɔjɔ caarɩkɛra fɛw a na dʋ fɩ ɲɔ̃kɔɔ, dɩ mɛ̃ na jɩ mɛr dʋɔn Thãgba Kɔ̃tɩn.» 29 Dɩ wɩ jɛr a pɛ kha ƴɩɛ a cʋʋna wire makoɲɔ. Dɩ kʋʋr khar makoɲɔ wireraale, dɩ Ɩjɩrayɛl sɔrasɛ puno Siiri sɔrasɛ, a kʋʋr wɩ sɔrasɩ nɛdara gbɩlanɩ der paar tamaa (100.000) wi bɩɛl. 30 Sɩ wɩrɛɛkɛ kɔɔ sɛnɩ caalɛlɛ a lõ Afɛkɩ dɩɩra, dɩ dɩ bɛr gʋʋ ji a kʋʋr tɩbɩla gbɩlanɩ kpelẽ makoɲɔ (27.000) wɩrɛraakɛra kɔɔ sɛnɩ.
Sɩ Bɛn-Hadadɩ jamana wer kɔɔ car kɔ̃ dɩɩra, a lõ cʋɔrɔ a wʋ̃ɔ duusɔ da n kpaarna. 31 Dɩ ɔɔ thɔ̃dara sʋʋraa: «Hɩnɛ, sɩ nɩɛrɛ dɩ wɩ so Ɩjɩrayɛl jamanasɔ dor bɔjɩ tɩbɩla na sobɔr. Dɔ sɩ to bɔrɔ kẽkena, sɩ linə pɛ̃ɛ yʋɔ sɩ jal sɩ yɩ Ɩjɩrayɛl jamana. Agakpaan, a na sɩ farɛ na yire. 32 Dɩ wɩ tor bɔrɔ kẽkena, a linə pɛ̃ɛ yʋɔ a jal yɩ Ɩjɩrayɛl jamana, a sʋʋraa: «Afɩ thɔ̃daar Bɛn-Hadadɩ thɔna sɩ sɩ sɔ far, ɩnɩ n bɩɛl fɛr, fɩ sɛ nar na yire.» Dɩ Akabɩ so aa: «A ka hale 'lo na yire ya? Ɩ̃ õkuun a do.» 33 Mɔ̃ tɩbɩlaale yɩɛnɩ dɩɩ do thɩmɩɩra pɛr ƴɛ bʋɔ, wɩ phananɛ a fʋʋ na ɔɔ thɩmɩɩ birə aa: «Afɩ õkuun ha Bɛn-Hadadɩ sobɔr!» Dɩ Akabɩ so war: «Nɩ jala kpaa ɛna.» Le Bɛn-Hadadɩ the a pɔ Akabɩɩ pa, dɩ gbaa pɛ ɔɔ jamana koke hotorora. 34 Dɩ Bɛn-Hadadɩ so Akabɩra: «Ma faarɛ dɩɩsɔɔkɛ ɩ̃ thɩ kɔɔ teenɩ afɩ thɩra a na ha fɩ. Dɩ fa hananɛ dakha thɩ̃ dolõ paarsɔ Damasɩ dɩ bɩnɔ mɔna ɩ̃ thɩ kɔɔ hana gɩnɩ Samarɩ dɩ bɩnɔ.» Dɩ Akabɩ sʋʋraa: «Mɛrɛ dakha, ma ʋlfɛna fɛr nɔ bɩɛl ʋlfɛrɛ agɩpɩ ɩ̃ faa fɩ fɩ kɔ̃.» Dɩ a ʋlfɛnaanɛ nɔ bɩɛl ʋlfɛrɛra sa fagʋʋ dɩ kɔ̃.
Thãgbaa mɩmɩɩ bɩɛl phaanɛ Akabɩ
35 Dabɔɔlera, tɩɩ bɩɛl Thãgbaa mɩmɩaa gbulona sor ɔɔ alãkha bɩɛlla gɩrɛ Thãgba Kɔ̃tɩn sonɩ aa: «Mɩ n bɩɛl fɛr, bɩrɛ mɩ.» Sɩ ɔɔ alãkhaale bor ɩna bɩɩrʋa'.» 36 Dɩ sʋʋraa: «Fa yɩ gaa, gɩdonɩ fa nɩ nũu Thãgba Kɔ̃tɩnɩ nɔka thɩmɩɩra ga, ɔbɔɔkɛ fa faa mɩnɩ sɩ fa n jal, sidũ'ũu na kʋ fɛr.» Dɩ bɔɔkɛ a fagʋʋnɩ sɩ da n jal, sidũ'ũu thɩɩraarɛ a kʋʋ.
37 Dɩ Thãgbaa mɩmɩɩlera jaal wo a yɩ kuun bɩɛl a sʋʋraa: «Mɩ n bɩɛl fɛr, bɩrɛ mɩ.» Dɩ kuunile bɩɩrʋ a pɩɛraa khoo.
38 Dɩ Thãgbaa mɩmɩɩle gbaar kẽkẽ gborõ bire a li ƴɩɛra sa jal jɩɩl jamanaa hʋra.
39 Mɔ̃ jamana n kanɩ, Thãgbaa mɩmɩɩle hulene a sʋʋraa: «Mɛr afɩ thɔ̃daar kɔɔ har ko thɩ̃thɩɩn, dɩ kuun bɩɛl thena kuun ʋkha a pɔna ha mɩ sa so mar: “Na hɩnɛ kuunɩkɛ. A fɩ fagʋʋ dɩ bu, fɛr na lona ɔɔ kara, agɩbo fa lɩmɩnɛ dɛ bulo be gbɩlanɩ yẽther (3.000)”. 40 Dɩ mɔ̃ mɛr afɩ thɔ̃daar hanɩ ma n cʋʋ thɔ̃ yɩra yɩrasɔ, dɩɩ do kuuna bure.» Dɩ Ɩjɩrayɛl jamana sʋʋraa: «Dɩ kɩɩlʋʋkɛra teana fɩnɩ, gɛrra fɩ cãale na afɩ thɛthɛɛ nɔ kɛ!» 41 Dapaara Thãgbaa mɩmɩɩle fʋrɛ kẽkẽ gborõbire ƴɩɛra a ti. Liir Ɩjɩrayɛl jamana jɩ dɩɩ do Thãgbaa mɩmɩɩ bɩɛl gɩ. 42 Dɩ le a so jamanana: «Thãgba Kɔ̃tɩn sor: “Gɩdonɩ fɩ faarɛ sɔ̃ tibilikɛ mɩ kɔɔ thɩɩnɩ bũburõ thɩɩnʋ dɩ the afɩ ɲɔ̃kɔɔ, fɛr na lona ɔɔ kara, afɩ too n lõ ɔɔ too kara.”» 43 Dɩ Ɩjɩrayɛl jamana jaal da n kɔ̃ ɔɔ cɔ Samarɩ dɩɩra, sa gbu ƴɩɛ dɩ ɔɔ kpɩɛr kʋɛ.