Ɲɛ̃ɛ khiire Eli
19
1 Akabɩ jamana mɩɛrɛ ɔɔ khɛr Jejabɛl gɩrɛ fɛʋʋkɛ Eli kɔɔ cʋʋnɩ, na mɔ̃ Elira kɔɔ kʋʋrnɩ Baalɩ mɩmɩasɔ fɛw na bajɩna. 2 Dɩ Jejabɛl thɔnanɛ thɔ̃thɔ̃ bɩɛl Elira, a sʋɔraa ayɛ: «Thãgbasɔ n pɛ mar sor gɩ puuro na sobɔr, ado kɩɛr na cʋɔ wɛ̃ɛbɔɔkɛ ma cʋʋ fɩ mɔ̃kɛra fɩ cʋʋnɩ wɛr fɛw dakha ga.» 3 Mɔ̃ Eli nɩɛnɩ gele, a fuure gɩ do nɔɔ a taa ɔɔbara. Dɩ a daan Bɛɛr-Seba dɩɩkɛ hanɩ Juda bəənnə, a faa le ɔɔ thɔ̃daar. 4 Sɩ ɔɔ thɛthɛ wer ɩɩrɛ a cʋʋna dɩwɩl bɩɛl a jal bə̃ kparara, a too jenɛtɩ thɩr bu bɩɛlɩ kɩrɔ. Dɩ le a n bɩɛl khir ayɩ: «Gɩ thʋnɛ dã mɛ̃! Nɛnɛ̃ dɩphã, Thãgba Kɔ̃tɩn, te ɩ̃ yi. Gɩdonɩ ma ba ɩ̃ thɩ kɔ̃tɩ̃sɔa'.» 5 Agɩpɩ, a phɩnɛ a daar jenɛtɩ thɩr bu kɩrɔra. Dɩ dapaara thɔ̃thɔ̃ thu bɩɛl pɔr a thaara sa sʋʋraa: «Ɩrɛ khɔ dikor.» 6 Dɩ mɔ̃ a ɩɩrnɩ a yɩrɛ gatookɛ wɩ hɩnɩ boka phʋɛsɔɔra, na ɲʋɔn na bʋla bir dɩ wɩ thɩɩn ɔɔ yʋɔ. Dɩ a gbaar a kho, a gba ɲʋɔn a ɲɔ sa bir phɩ̃. 7 Dɩ Thãgba Kɔ̃tɩnɩ thɔ̃thɔ̃ thurə bir pɔ balaɲɔdaa wo, a thaaraa sa so: «Ɩrɛ khɔ dikor, gɩdonɩ hʋɛɛkɛ fa gbanɩ gbaanɛ ka.» 8 Dɩ Eli ɩɩrɛ a kho dikor, a gba ɲʋɔn a ɲɔ. Dɩ dikorɩle haarɛ fãga, dɩ ɩɩr dɩwɩlɔ na dɩtɩnɛ fɛw a dana wire kpalaɲɔ, sa dã Thãgbaa gɔ̃gɔ̃ɔkɛ wɩ n wenɩ Orɛbɩ.9 Dɩ liir, a lʋʋn boka kaara a cɔ le. Dapaara, Thãgba Kɔ̃tɩn mɩɩnaanɛ a bulee aa: «Eli, Aɲe fɩ n cʋʋ kɩɛr?» 10 Dɩ Eli so: «Mɩ thʋnɛ na fɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ jɔɔ ka gɛr gɩ. Sɩ Ɩjɩrayɛl bɩsana kuure afɩ nɔ bɩɛl ʋlfɛ na wɛr. Wɩ wɩɛrɛ afɩ bonɩ ji pasɔ, a kʋʋrna afɩ mɩmɩɩsɔ na bajɩna. Mɛr bɩɛlla sɛ dɩbara, dɩ wa n ƴaal wɩ kʋ mɩ.» 11 Dɩ Thãgba Kɔ̃tɩn sʋʋraa: «Thɛ jɩlɛ gɔ̃gɔ̃ yʋɔ mɛr Thãgba Kɔ̃tɩnɩ ƴɛbʋrɔ.» Dɩ Thãgba Kɔ̃tɩn n pɔr. Dɩ jɛ kɔ̃tɩ̃ khɩɩ kʋʋlɛ Thãgba Kɔ̃tɩn ƴɩɛ, da n ɓɩɛl gɔ̃gɔna, da n cʋɔrna bokana. Sɩrakɛ Thãgba Kɔ̃tɩn na kɔɔ hale jɩɛraala'. Mɔ̃ jɩɛɛle kanɩ na pɩ, thɩ jɩɩn kɔɔ hale sɩrakɛ, Thãgba Kɔ̃tɩn na kɔɔ hale thɩ jɩɩnaala'. 12 Mɔ̃ thɩ jɩ̃ɩle kanɩ na pɩ, dɔɔ kɔɔ hale. Sɩrakɛ, Thãgba Kɔ̃tɩn na kɔɔ hale dɔɔraala'. Pɩpɩɩ paar, mɔ̃ dɔɔle kanɩ na pɩ, wire hale dɩ ga n bʋ̃bʋʋn hɛlɛlɛlɛ. 13 Ɔbɔɔkɛ Eli nɩɛnɩ, a thire ƴɩɛ na ɔɔ gbɔɔlɔ̃, sa the jɩɩl boka ka nʋɔra. Dɩ wire mɩɩnaanɛ a bulee aa: «Eli, aɲe fɩ n cʋʋ kɩɛr?» 14 Dɩ Eli sor: «Mɩ thʋnɛ na fɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ jɔɔ ka gɛr gɩ. Sɩ Ɩjɩrayɛl bɩsana kuure afɩ nɔ bɩɛl ʋlfɛ na wɛr. Wɩ wɩɛrɛ afɩ bonɩ ji pasɔ, a kʋʋrna afɩ mɩmɩɩsɔ na bajɩna. Mɛr bɩɛlla sɛ dɩbara, dɩ wa n ƴaal wɩ kʋ mɩ.» 15 Dɩ Thãgba Kɔ̃tɩn sʋʋraa: «Kɛra birə na bə̃ kpara hʋɛra, a jala Damasɩ dɩɩra. Ado fɩ dã le, pɩɛr niin Hajayɛla, a pɩɛraa a do jamana Siiri dɩɩra. 16 Pɩɛr niin Jehura, kɛ dɔnɩ Nɩmɩsɩɩ bikuun, a pɩɛraa a do jamana Ɩjɩrayɛl. Pɩɛr niin dakha Elijera, kɛ dɔnɩ Safatɩɩ bikuun, kɛ thɛnɩ Abɛl-Mehola dɩɩra, a pɩɛraa a do Thãgbaa mɩmɩɩ afɩ kara. 17 Dɩ thale, tibil wo tibilikɛ na foranɩ Hajayɛlɩ bajɩnana, Jehu na kʋʋrɛ. Dɩ tibil wo tibilikɛ na foranɩ Jehuu bajɩnana, Elije na kʋʋrɛ. 18 Sɩ ma sɩrɔrɛ kona gbɩlanɩ makoɲɔ (7.000) Ɩjɩrayɛl dɩɩra, kɛ dɔnɩ wɩrɛ fɛʋʋkɛ na kɔɔ gburõkhunenɩ Baala ga. Wa kɔɔ palʋʋ a fʋɔrʋa'.»
Eli phiire Elije dɩ do ɔɔ dedee
19 Mɔ̃ Eli thenɩ le a jal, a yɩrɛ Elijeekɛ dɔnɩ Safatɩɩ bikuun da n kʋʋl. Na kokola kpelẽ yenã hale, kɛ wɩ kperenɩ yeɲɔ yeɲɔ. Dɩ Elijee thɛthɛ hananɛ yẽbe yʋɔr yeɲɔdara da n kʋʋlna. Dɩ Eli pɔr da n ka ɔɔ gɛlɔ, sa dʋnanaa ɔɔ gbɔɔlɔ̃. 20 Dɩ Elije faa ɔɔ nasɔ, sa ca kpaan Elirə a sʋʋraa: «Dɔ ɩ̃ kɔ̃, ɩ̃ fʋɔr ɩ̃ thɩ na ɩ̃ nɩ, agɩpɩ ma ɩnɛ ma n kpa far.» Dɩ Eli sʋʋraa: «Kɔna sa ɩna gɩ do gɩrɛra mɩ cʋʋ farnɩ dɔ kɩrʋ.» 21 Ɔbɔɔkɛ Elije faanɩ Eli, a kɛrɛ bir a fʋlɛ na yeɲɔ a jinə bonɩɛ. Dɩ a gbaar na fɔ barãbɩ thɩrasɔ na kokol sũgburia fɛw a gbɔɔ, a thɩɩna nʋʋn a ha tɩbɩla dɩ wɩ kho. Agɩpɩ dɩ jal da n kpa Elirə, a do ɔɔ thɔ̃daar.