Yɛna yẽther thãgba ɲɔ kureekɛ Elɩ maanɩ mɩɩrɛ
17
1 Thãgbaa mɩmɩɩ Elɩɩkɛ thɛnɩ Tɩsɩbɩtɩ, Galaadɩ bəənnə sor Akabɩ jamanana ayɩ: «Na Thãgba Kɔ̃tɩn Ɩjɩrayɛlɩ Thãgba, kɛ dɔnɩ yidaar, ʋrɛɛkɛ mɩ n doronɩ thɔma, thãgba ɲʋɔn na dã yɛnasɔraakɛ, dɩ mɩ̃ɛ gɩ a na ji, a ga do mɛr bɩɛlnaa ga.» 2 Agɩpɩ Thãgba Kɔ̃tɩn sor Elirə aa: 3 «Thɛ kɩɛr a telene kɩrɔ, a jala wɔna Kerɩtɩ ɲɔ kɔlɔ̃ khʋra, kɛ hanɩ Jʋrdɛ̃ mɩɩr ƴɛbʋrɔ. 4 Le fa n ɲɔ ɲʋɔn kɔlɔna. Mɩ pɛrɛ sɩkpaasɔ wa n haanɛ fɩ lele.» 5 Dɩ Eli jaal a cʋʋ mɔna Thãgba Kɔ̃tɩn kɔɔ sʋʋraanɩ. A jaal a too Kerɩtɩ kɔlɔ̃ khʋrara, kɛ hanɩ Jʋrdɛ̃ mɩɩr ƴɛbʋrɔ. 6 Dɩ sɩkpaasɔ n jalnanɛ dikor na nʋʋn dɩ wa n haa duuro na dʋɔrɔ, sɩ da n ɲɔ ɲʋɔn kɔlɔna. 7 Sɩ bɔ bɩɛl daan dɩ kɔlɔ̃ khɩ, gɩdonɩ thãgba ɲʋɔn na n kɔɔ dã thɩɩra bã.Thãgba thʋɔn Eli Sarɛpɩta khikhɛr bɩɛlɩ cɔ
8 Le Thãgba Kɔ̃tɩn mɩɩna Eli ayɩ: 9 «Ɩrɛ jala Sarɛpɩta dɩɩraakɛ hanɩ Sɩdɔ̃ bəənnə a tɔɔ le. Mɩ pɛrɛ khikhɛr bɩɛla le a haanɛ fɩ.» 10 Dɩ Eli ɩɩrɛ a jal Sarɛpɩta. Mɔ̃ a na danɩ dɩ lõfonʋɔra, a yɩrɛ khikhɛr bɩɛl da n uul dɛ ƴelə̃be. Dɩ a wɩɩrɛ a sʋʋraa: «Mɩ n bɩɛl fɛr, jala ƴaalɛ ɲʋɔn gbe a ɛna ha mɩ ɩ̃ ɲɔ.» 11 Dɩ khɛrɩle jal a pɔna. Dɩ Eli bire wɩɩ wo aa: «Mɩ n bɩɛl fɛr, ƴaalɛ dikor gbe a ɛna ha mɩ.» 12 Dɩ khɛrɩle sʋʋraa: «Na Thãgba Kɔ̃tɩn afɩ Thãgbaakɛ dɔnɩ yidaar, ma hana dikora'. Mɩ̃ɩ hãale gborora ɲɔ̃kor bɩɛl na niin fɩɩʋ bilẽsiro. Gɛr mɩ n uulo dɛ ƴelə̃be yeɲɔɔkɛ ɩ̃ kɔna ɩ̃ cʋʋna dikor sɩ kho na ɩ̃ bikuun, agɩpɩ sɩ khiir.» 13 Dɩ Eli sʋʋraa : «Fa n do maar n fʋ fa', jala cʋɛ mɔna fɩ sonɩ. Thɩ̃ bɩɛl dʋɔn, fɩ kɔɔ cʋɛ gato fɩʋ a ɛna hana mɩ ɓo, agɩpɩ fɩ gbɛbɩ afɩda na afɩ bikuunɩda. 14 Gɩdonɩ Thãgba Kɔ̃tɩn Ɩjɩrayɛlɩ Thãgba sor ayɩ: “Mɩɩn na 'lee gbororaala', niin dakha na pɩ bilẽsiroola', phaphapha gɩ dana wireekɛ Thãgba Kɔ̃tɩn na 'laanɩ thãgba ɲʋɔn thɩɩra”» 15 Dɩ khɛrɩle jaal a cʋʋ mɔna Eli sonɩ. Dɩ ɔr na ɔɔ cɔdara na Eli, wɩ 'lɛr dikor a kho a pʋɔrna ƴɛrr. 16 Mɩ̃ɩ na 'lee gborora ga, niin dakha na pɩ bilẽsiroə', dɩɩ ha mɔna Thãgba Kɔ̃tɩn kɔɔ pɛrnɩ Eli dɩ mɩɩ.
Eli jaarɛ Sarɛpɩta khikhɛrʋʋ bikuun khirera
17 Mɔ̃ thɩ̃ɛsɔɔle kanɩ pɩ, cɔ khɛrɩlee bikuun jire khoo. Dɩ ɔɔ khora puurore, a ba jalnaa waa dɩ khi. 18 Dɩ khikhɛrʋʋle sor Elira : «Aɲee so ca sɩ ha kha na fɛr Thãgbaa tibil? Fɩ ɩnɛ ɩ̃ cɔ fɩ khɩɛl ɩ̃ dɩpasɔ, fɩ kʋ ɩ̃ bikuun ya ?» 19 Dɩ Eli sʋʋraa : «Hana mɩ afɩ bikuunna.» Dɩ Eli teguure ɔɔ nɩɩ ɲɛna a jʋʋna ɔɔ duukɛ a n cɔnɩ, lɩ̃gana ƴũu a pɩɛ ɔɔ phɩ̃ para. 20 Agɩpɩ dɩ bɩɛl Thãgba Kɔ̃tɩn ayɩ: «Thãgba Kɔ̃tɩn ɩ̃ Thãgba, khikhɛrʋʋkɛ tea mɩnɩ kpakpaalɛ thaa, fa cʋgʋʋrɛ puure wo, fɩ kʋ ɔɔ bikuun ya?» 21 Agɩpɩ a phɩnɛ ƴẽbe balãther a lãasɛ ɔɔ tomɩr fɛw bɩsaana, a bɩɛl Thãgba Kɔ̃tɩn aa: «Thãgba Kɔ̃tɩn ɩ̃ Thãgba wei ! Mɩ n bɩɛl fɛr, cʋɛ bɩsaanɩkɛɛ fesu n bir gɩ lʋʋnaa.» 22 Dɩ Thãgba Kɔ̃tɩn ture Elɩɩ bɩɛl, dɩ bɩsaanɩ fesu kɛr bir a lʋʋnaa, dɩ bir hana yire. 23 Dɩ Eli gbaarɛ lɩ̃gã duu a gbunə a ha ɔɔ nɩ sa so : «Yɛ afɩ bikuuna, a hananɛ yire.» 24 Dɩ khɛrɩle so Elɩra: «Nɛnɛ̃ dɩphã, mɩ jɩrɛ Thãgbaa tibil ha fɩ. Mɩ jɩrɛ dɩ Thãgba Kɔ̃tɩnɩ thɩmɩɩkɛ n thɛnɩ afɩ nɔra, sobɔr gɩ.»