1 JAMANASƆ 16

1 Thãgba Kɔ̃tɩn mɩɩnanɛ Jehuukɛ dɔnɩ Hananɩɩ bikuun, a sɔ Baesara ayɛwɔɔ: 2 «Mɩ kɔɔ ɩɩr fɛr thɩlãkobera, a pɛ far dɩ fɩ do ɩ̃ too Ɩjɩrayɛlɩ thɔthɔɔdaar. Sɩ Jeroboamɩ hʋra fɩ n jalna, a tɔ ɩ̃ too Ɩjɩrayɛl pɛr dɩ wɩ cʋʋ sopuu, a cʋʋ mɩ nĩkhii n fɔ mɩ, gɩ do awɩ sopuusɔ dɔ nɔɔ. 3 Dɩ gɛr gɩ ma kpabɩrɛ fɛr Baesa na afɩ cɔdara, ɩ̃ cʋʋ nɩ mɔ̃ mɩ kɔɔ cʋʋnɩ Nebatɩɩ bikuun Jeroboamɩ cɔdara. 4 Afɩ tibil ʋrɛ na khenɩ dɩɩra, bena na khʋɔ. Ʋrɛ na khenɩ hʋɔnɔ, 'lominə ƴũu na khʋɔ.»

5 Baesaa thɩmɩɩ gɩrɛ sɛnɩ, thɩ̃ɛɛkɛ a cʋʋnɩ, na ɔɔ kuun kha do, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 6 Agɩpɩ Baesa khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ Tɩɩrsa dɩɩra, sɩ ɔɔ bikuun Ela gba ɔɔ too pa a do jamana. 7 Sɩrakɛ Thãgba Kɔ̃tɩn kɔɔ thʋɔn ɔɔ mɩmɩɩ Jehu, kɛ dɔnɩ Hananɩɩ bikuun dɩ mɩɩna Baesa na ɔɔ cɔdara, puu caaraakɛ fɛw a cʋʋnɩ na ɔɔ ɲɛ̃ dɩ nĩkhii fʋ ɔr Thãgba Kɔ̃tɩn, gɩdonɩ Jeroboamɩ cɔdaraa khara a kɔɔ cʋʋ. A mɩɩnaanɛ dakha wo gɩdonɩ a kɔɔ kʋʋrɛ Jeroboamɩ cɔdara.

Ɩjɩrayɛl jamana Elaa thɩmɩɩ

8 Aja donɩ Juda jamana dɩ ga cʋʋ yɛna kpelẽ maadõ, gɛr Elaakɛ dɔnɩ Baesaa bikuun do jamana Tɩɩrsa dɩɩra Ɩjɩrayɛl bəənnə. Dɩ a dor jamana a cʋʋna yɛna yeɲɔ.

9 Elaa thɔ̃daar Jɩmɩrɩ, kɛ dɔnɩ koke hotoro gbulõ kur bɩɛlɩ kɔ̃tɩ̃, ƴaalɛ a kʋ jamana. Sɩ Ela kɔɔ hale Tɩɩrsa dɩɩra, Arsaakɛ dɔnɩ jamanaa cɔ hɩ̃ɩdaarɩ cɔ a ɲɔ taan dɩ ga n kʋʋ. 10 Dɩ Jɩmɩrɩ lʋʋn le a kʋʋ. Ɔbɔɔle Ajaakɛ dɔnɩ Juda jamana cʋʋrɛ yɛna kpelẽ makoɲɔ jamana dʋʋra. Agɩpɩ Jɩmɩrɩ gbaar Elaa too pa a do jamana. 11 Dapaara Jɩmɩrɩ donɩ jamana, a too ɔɔ jamana too para, a kʋʋrɛ Baesaa cɔdara fɛw. Aa faaraarakɛ kũubir bɩɛl 'lẽ'lẽ, kɛ dɔnɩ ɔɔ tibil bɩnɔ, dɩ ɔɔ kuun ga. 12 Jɩmɩrɩ kʋʋrɛ Baesaa cɔdara ɓib, mɔ̃kɛra Thãgba Kɔ̃tɩn kɔɔ thɔnɩ ɔɔ mɩmɩɩ Jehu dɩ mɩɩ Baesaadara. 13 Gɩrɛ fɛʋʋkɛ daan dɩɩ do sopuusɔɔkɛra Baesa na ɔɔ bikuun Ela kɔɔ cʋʋnɩ, a tɔ Ɩjɩrayɛl bɩsana dakha pɛr dɩ wɩ cʋʋ, dɩ wa n fʋɔrna mɔlɔ thɩ̃ɛsɔ, dɔ nɔɔ. Dɩ nĩkhii fʋ Thãgba Kɔ̃tɩn, Ɩjɩrayɛlɩ Thãgba.

14 Elaa thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.

Ɩjɩrayɛl jamana Jɩmɩrɩɩ thɩmɩɩ

15 Aja donɩ Juda jamana dɩ ga cʋʋ yɛna kpelẽ makoɲɔ, gɛr Jɩmɩrɩ do jamana Tɩɩrsa dɩɩra a cʋʋna wire makoɲɔ. Ɩjɩrayɛl sɔrasɛ kɔɔ hale a sɔbɩ Gibetɔ̃ dɩɩkɛ Fɩlɩsɩtɛ̃sɔ kɔɔ teenɩ a tooro. 16 Mɔ̃ Ɩjɩrayɛl sɔrasɛ hanɩ le, wɩ nɩɛrɛ aa, Jɩmɩrɩ ƴaalɛ a kʋ jamana. Dɩ a kʋʋrɛ. Dɩ Ɩjɩrayɛl sɔrasɛ fɛw ɩɩrɛ le ko jɛw dawiilera a pɛr Omɩrɩɩkɛ dɔnɩ Sɔrasɛɛ kɔ̃tɩ̃ dɩ do Ɩjɩrayɛl jamana. 17 Dɩ Omɩrɩ na ɔɔ sɔrasɩsɔ fɛʋʋkɛ hanɩ kha na ɔr faarɛ Gibetɔ̃ dɩɩ, sa kɛr bir a sɔbɩ Tɩɩrsa dɩɩ. 18 Ɔbɔɔkɛ Jɩmɩrɩ yɩɛnɩ dɩɩ do wɩ sɔbɩrɛ dɩɩ, a lʋʋn du bɩɛlla jamana cʋɔrɔ a pɛr dɔɔ, a thii jamana cʋɔr a kʋ ɔɔbara. 19 Thale a khi dɩɩ do sopuusɔɔkɛ a kɔɔ cʋʋnɩ dɔ nɔɔ. A cʋʋrɛ gɩrɛ puuronɩ ka Thãgba Kɔ̃tɩnna, mɔ̃ a kpaanɩ Jeroboamɩ hʋra, a faana ɔɔbara da n cʋʋ sopuukɛra Jeroboam kɔɔ cʋʋnɩ, a tɔ Ɩjɩrayɛl bɩsana dakha a pɛr dɩ wɩ cʋʋ.

20 Jɩmɩrɩɩ thɩmɩɩ gɩrɛ sɛnɩ na mɔ̃ a ƴaalnɩ a kʋ jamana, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda.

21 Le Ɩjɩrayɛldara tɩnɛ gbulona yeɲɔ: dɩ gbulõ bɩɛl na n kpa Gɩnatɩɩ bikuun Tɩbɩnɩna, dɩ wa n ƴaal ɔr n dɔ jamana, sɩ gbulõ bɩɛlɩle na n kpa Omɩrɩra. 22 Sɩ wɩrɛ kpaanɛnɩ Omɩrɩra punone wɩrɛ kpaanɛnɩ Gɩnatɩɩ bikuun Tɩbɩnɩna. Dɩ Tɩbɩnɩ khire sɩ Omɩrɩ do jamana.

Ɩjɩrayɛl jamana Omɩrɩɩ thɩmɩ

23 Aja donɩ Juda jamana dɩ ga cʋʋ yɛna kpelẽ yʋɔr bɩɛl, gɛr Omɩrɩ do Ɩjɩrayɛl jamana. Dɩ a dor jamana a cʋʋna yɛna yʋɔr yeɲɔ. Sɩ a kɔɔ dor jamana a cʋʋna yɛna maadõ Tɩɩrsa dɩɩra. 24 Agɩpɩ a ther Samarɩ gɔ̃gʋɔn kuun bɩɛlakɛ wɩ n wenɩ Semɛɛr, dɛ bulo be gbɩlanɩ maadõ (6.000). Dɩ a kure dɩɩ gɔ̃gʋɔnana ƴũu a mɩ, a dʋʋ ire Samarɩ mɔna Semɛɛr, kɛ dɔnɩ gɔ̃gɔ̃daa, kɔɔ dʋʋnɩ.

25 Omɩrɩ cʋʋrɛ puure ka Thãgba Kɔ̃tɩnɩ ƴɛra. A cʋʋrɛ puurerakɛ a jɔ wɩrɛ fɛʋʋkɛ kɔɔ kʋlɛɛnɩ ƴɩɛ. 26 Nebatɩɩ bikuun Jeroboamɩ hʋra a n jalna fɛw. A faarɛ ɔɔbara da n cʋʋ sopuukɛra Jeroboam kɔɔ cʋʋnɩ, a tɔ dakha Ɩjɩrayɛl bɩsana a pɛr dɩ wɩ cʋʋ, dɩ wa n fʋɔrna mɔlɔ thɩ̃ɛsɔɔkɛ dɔnɩ thɩla, a cʋʋ dɩ nĩkhii fʋ Thãgba Kɔ̃tɩn, Ɩjɩrayɛlɩ Thãgba.

27 Omɩrɩɩ thɩmɩɩ gɩrɛ sɛnɩ, gɩrɛɛkɛ a cʋʋnɩ, na kuun kha dʋʋrɩkɛ a nɩnanɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 28 Agɩpɩ Omɩrɩ khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ Samarɩ dɩɩra, sɩ ɔɔ bikuun Akabɩ gba ɔɔ too pa a do jamana.

Ɩjɩrayɛl jamana Akabɩɩ thɩmɩ

29 Akabɩɩkɛ dɔnɩ Omɩrɩ bikuun na donɩ jamana Ɩjɩrayɛlla, gɛr Aja kɔɔ do Juda jamana dɩɩ cʋʋ yɛna kpelẽ yʋɔr makõther. Dɩ Akabɩ dor Ɩjɩrayɛl jamana Samarɩ dɩɩra a cʋʋna yɛna kpelẽ yeɲɔ. 30 Omɩrɩɩ bikuun Akabɩ cʋʋrɛ puure ka Thãgba Kɔ̃tɩnɩ ƴɛra a jɔrakɛ wɩrɛ fɛʋʋkɛ kɔɔ kʋlɛɛnɩ ƴɩɛ. 31 Nebatɩɩ bikuun Jeroboamɩ sopuusɔɔkɛ Akabɩ faarɔnɩ ɔɔbara da n cʋʋ, gɩ hor gelerakɛ na dãa pa', dɩ bir jal a he Jejabɛl, Sɩdɔ̃daraa jamanaakɛ wɩ n wenɩ Ɛtɩbaal, ɔɔ bikhɛr gɩ. Dɩ a n gburõkhurerakɛ da n fʋɔr Baal. 32 Akabɩ mɩrɛ Baalɩ fʋɔr cɔ Samarɩ dɩɩra, a mɩna Baalɩ bonɩ ji pa le fʋɔr cɔ bɩnɔ. 33 Akabɩ puure dakha Aseraa thɩl gã. A cʋʋrɛ thɩ̃ɛɛkɛrakɛ kɔnɩ Thãgba Kɔ̃tɩn, Ɩjɩrayɛlɩ Thãgba nĩkhii a jɔ Ɩjɩrayɛl jamanasɔ fɛʋʋkɛ kɔɔ kʋlɛɛnɩ ƴɩɛ.

34 Akabɩɩ bɔɔ, gɛr Hɩɛlɩkɛ thɛnɩ Betɛl dɩɩra bir mɩ Jeriko dɩ bɛr gʋʋsɔ. Dɩ bɔɔkɛ a na kpɛɛnɩ go kʋʋ, ɔɔ caca bikuunɩkɛ wɩ n wenɩ Abɩram khire. Dɩ mɔ̃ a n pɛrnɩ lõosɔɔ, dɩ ɔɔ bikuun dĩikɛ wɩ n wenɩ Segubi khi, dɩɩ ha mɔ̃kɛra Thãgba Kɔ̃tɩn kɔɔ pɛrnɩ ɔɔ thɔ̃daar Nunɩɩ bikuun Jojue dɩ mɩɩ.