1 JAMANASƆ 15

Juda jamana Abɩyamɩ thɩmɩɩ \ref 2Ch. 13. 1-2,23

1 Nebatɩɩ bikuun Jeroboam na cʋʋnɩ yɛna yʋɔr makõther jamana dʋʋra, gɛra Abɩyam do Juda jamana. 2 Dɩ a dor jamana a cʋʋna yɛna yẽther Jerujalɛm dɩɩra. Ɔɔ nɩɩ i n dʋɔn Maakaakɛ dɔnɩ Abɩsalɔ̃ɔ bikhɛr. 3 Abɩyam faarɛ ɔɔbara da n cʋʋ sopuu ca bɩɛlsɔɔkɛra ɔɔ thɩɩkɛ kʋlɛɛnɩ ƴɩɛ kɔɔ cʋʋnɩ. Aa na Thãgba Kɔ̃tɩn, ɔɔ Thãgba na haar fɛw ɔɔ thɩ kɔ̃tɩ̃ Davɩdɩɩ kha ga. 4 Sɩ Davɩdɩ dɔ kɩrʋ Thãgba Kɔ̃tɩn, ɔɔ Thãgba haanɩ məleekɛ na deaanɩ jamana dʋʋra le Jerujalɛm, a pɛna ɔɔ bikuun dɩ do jamana bɔɔkɛ Abɩyam na hanɩle bã, a sɩrɔna dakha Jerujalɛm dɩɩ dɩɩ hale. 5 Gɩdonɩ Davɩdɩ kɔɔ cʋʋrɛ gɩrɛ telenenɩ Thãgba Kɔ̃tɩnɩ ƴɛra ; ɔɔ yi hanana fɛw, aa lɛ̃ sa faa ɔɔ nɔka thɩmɩɩ, a ga do Hɛtɩɩ məl Iirɩɩ thɩmɩra dɩbara gaa ga. 6 Kʋʋr kɔɔ hale Roboam na Jeroboamɩ thɩ̃thɩɩn bɔɔ fɛʋʋkɛ Roboam hananɩ yire. \Ref 2Chr 13.22-23

7 Abɩyamɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda. Kʋʋr kɔɔ hale Abɩyam na Jeroboamɩ thɩ̃thɩɩn. 8 Agɩpɩ Abɩyam khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ ka wɩ dʋnɩ ɔɔ thɩ kɔ̃tɩ̃sɔ Davɩdɩɩ dʋɔ, sɩ ɔɔ bikuun Aja gba ɔɔ too pa a do jamana.

Juda jamana Ajaa thɩmɩɩ \ref 2Ch. 14. 1-3; 15. 16-18; 16. 1-6, 12-14

9 Jeroboam na cʋʋnɩ yɛna kpelẽ jamana dʋʋra Ɩjɩrayɛl dɩɩra, gɛra Aja do jamana Juda bəənnə. 10 Dɩ a dor jamana a cʋʋna yɛna kpalaɲɔ bɩɛl Jerujalɛm dɩɩra. Ɔɔ nɩɩ i n dʋɔn Maaka, Abɩsalɔ̃ɔ bikhɛr gɩ.

11 Aja cʋʋrɛ gɩrɛɛkɛ telenenɩ Thãgba Kɔ̃tɩnɩ ƴɛra, mɔ̃kɛ ɔɔ thɩ kɔ̃tɩ̃ Davɩdɩ kɔɔ cʋʋnɩ. 12 A weelele thɩl ji bɔdɛl cʋʋdara dɩɩra a faa, a bũburona thɩlasɔɔkɛ ɔɔ thɩ kɔ̃tɩ̃sɔ kɔɔ mɩnɩ. 13 Aja teererakɛ ɔɔ nɩ kɔ̃tɩ̃ Maakara fãgaakɛ a kɔɔ hananɩ mɔ̃ a donɩ jamanaa nɩ, gɩdonɩ a kɔɔ cʋʋrɛ Asera thɩl. Dɩ Aja kʋɛrɛ thɩlɩle, a thisuu Sedʋrɔ̃ kɔlɔna. 14 Aja nanɩ Thãgba Kɔ̃tɩnnakɛ na ɔɔ ha fɛw ɔɔ yi hanana fɛw, sɩrakɛ aa bũburõ sãasɩ paarsɔa'. 15 A gbaar gɩrɛɛkɛ ɔɔ thɩ kɔɔ pɛnɩ Thãgba ƴɔɔ na gɩrɛɛkɛ ɔɔ thɛthɛ pɛnɩ Thãgba ƴɔɔ, kɛ dɔnɩ dɛ bulo na dɛ na thɩ̃ caar dɩɩdɩɩ a jalna Thãgba Kɔ̃tɩnɩ cɔ.

16 Kʋʋr kɔɔ hale Aja na Ɩjɩrayɛl jamana Baesaa thɩ̃thɩɩn awɩ yi hanana fɛw. 17 Baesaakɛ dɔnɩ Ɩjɩrayɛl jamana jaal Juda bəənnə a kena wɩ. Dɩ a mɩrɛ dɩ bɛr gʋʋ a dii Rama dɩɩra, gɩ do nɔɔ a pɩɛr Juda jamanaakɛ dɔnɩ Ajaa too wa n yɩ ka paara'. 18 Dɩ Aja gbaar dɛ bulo fɛw na dɛ fɛʋʋkɛ sɛnɩ lẽle thɩ̃ɛsɔɔraakɛ kɔɔ hanɩ le Thãgba Kɔ̃tɩnɩ cɔ, na jamanaa cɔ a ha ɔɔ thɔ̃dara. Agɩpɩ a thɔ̃ wɛr, wɩ jalana hana Tabɩrɛmonɩ bikuun Bɛn-Hadadɩɩkɛ dɔnɩ Siiri jamana sɩ ɔɔ thɩ kɔ̃tɩ̃ na n do Hejɩ̃ɔ, kɛ hanɩ Damasɩ dɩɩra. A thɔ̃ wɛr wɩ sʋɔraa ayɛ: 19 «Sɩ ʋlfɛnɛ kha nɔ bɩɛl ʋlfɛrɛ mɔ̃kɛ ɩ̃ thɩ na afɩ thɩ kɔɔ cʋʋnɩ. Gba khaardaa, dɛ bulo na dɛɛkɛ mɩ n thɔna farnɩ, sa kuure nɔ bɩɛl ʋlfɛrɛɛkɛ fɩ kɔɔ ʋlfɛnanɩ Baesaakɛ dɔnɩ Ɩjɩrayɛl jamana, gɩ do nɔɔ a jal sɩ a faa mɩ.» 20 Dɩ Bɛn- Hadaadɩ ture gɩrɛ Aja jamana sonɩ, a ti ɔɔ sɔrasɩ kɔ̃tɩ̃sɔ pɛ Ɩjɩrayɛl dɩɩsɔɔra. Dɩ wɩ jaal a puno Ɩyɔ̃ dɩɩ na Dã dɩɩ na Abɛl-Bɛtɩ-Maaka dɩɩ, a punona dɩɩsɔɔkɛ fɛw hanɩ Kinerɔtɩ bəənnə, a gbana Nɛfɩtalɩɩ məlsɔɔ dɩ fɛw. 21 Ɔbɔɔkɛ Baesa nɩɛnɩ gele, a khure dɩ bɛr go mɩr Rama dɩɩra, sa kɛr bir Tɩɩrsa dɩɩra. 22 Dɩ Aja jamana kpar Juda dʋɔdara ɓibi aa sɩ tibil bɩɛllaka', dɩ wɩ jaal a khɩɩ bokana na thɩraakɛ Baesa n kɔɔ mɩnanɩ Rama dɩ bɛr gʋʋ. Aja khɩɩrɛ fɛw a jalna mɩna Geba dɩɩkɛ hanɩ Bɛ̃jamɛ̃ɛ məlsɔɔ dʋɔ, na Mɩsɩpa dɩɩ.

23 Ajaa thɩmɩɩ, ɔɔ kuun kha do fɛw, na thɩ̃ɛ fɛʋʋkɛ a cʋʋnɩ, na dɩɩsɔɔkɛ a mɩnɩ, gɩ hale dɩ wɩ khere pɛ sɛbɛraakɛ n mɩanɩ Juda jamanasɔɔda. Sɩ ɔɔ tɩ̃ bɔɔ, nɛ khoo fʋʋrɛ. 24 Agɩpɩ Aja khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ ka wɩ dʋnɩ ɔɔ thɩ kɔ̃tɩ̃sɔ ɔɔ thɩ kɔ̃tɩ̃ Davɩdɩɩ dʋɔ, sɩ ɔɔ bikuun Jojafatɩ gba ɔɔ too pa a do jamana.

Ɩjɩrayɛl jamana, Nadabɩɩ thɩmɩ

25 Aja donɩ Juda jamana dɩ ga cʋʋ yɛna yeɲɔ, gɛr Jeroboamɩ bikuun Nadabɩ do Ɩjɩrayɛl jamana. Dɩ a dor jamana Ɩjɩrayɛl dɩɩra a cʋʋna yɛna yeɲɔ. 26 Nadabɩ cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Ɔɔ thɩɩ hʋra a n jalna dakha, a faana ɔɔbara da n cʋʋ sopuu gɩrɛra ɔɔ thɩ kɔɔ tɔnɩ Ɩjɩrayɛl bɩsana pɛr dɩ wɩ cʋʋ. 27 Dɩ Ahɩyaa bikuun Baesaakɛ thɛnɩ Ɩsakaarɩ məllə ƴaalɛ a kʋ Nadabɩ. Dɩ a kʋʋrɛ Gibetɔ̃ dɩɩra, kɛ dɔnɩ Fɩlɩsɩtɛ̃sɔɔ dɩ, ɔbɔɔkɛ ɔr na Ɩjɩrayɛl fɛw sɔbɩnɩ dɩɩle. 28 Ajaa balãther yɛra a donɩ jamana Juda bəənnə, gɛr Baesa kʋrɔ Nadabɩ sa gba ɔɔ too pa a do jamana. 29 Ɔbɔɔkɛ Baesa donɩ jamana, a kʋʋrɛ Jeroboamɩ cɔdara fɛw. Aa sɩ Jeroboamɩ tibil bɩɛlalakɛ na yirə'. A kʋʋrɛ tɩbɩla ɓib mɔ̃kɛra Thãgba Kɔ̃tɩn kɔɔ pɛrnɩ ɔɔ mɩmɩɩ Ahɩyaakɛ thɛnɩ Sɩlo dɩ mɩɩ. 30 Sopuusɔɔkɛra Jeroboam kɔɔ cʋʋnɩ, a tɔ Ɩjɩrayɛl bɩsana dakha pɛr dɩ wɩ cʋʋ, gɛr gɩ dɩ nĩkhii fʋ Thãgba Kɔ̃tɩnɩkɛ dɔnɩ Ɩjɩrayɛlɩ Thãgba thale.

31 Nadabɩɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 32 Kʋʋr kɔɔ hale Aja na Ɩjɩrayɛl jamana Baesaa thɩ̃thɩɩn awɩ yi hanana fɛw.

33 Aja dor Juda jamana dɩɩ cʋʋ yɛna yẽther, sɩ Baesaakɛ dɔnɩ Ahɩyaa bikuun do jamana Tɩɩrsa dɩɩra Ɩjɩrayɛldarara fɛw. Dɩ a dor jamana a cʋʋna yɛna kpelẽ yenã. 34 A cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Jeroboamɩ hʋra a n jalna, a faana ɔɔbara da n cʋʋ sopuu gɩrɛra Jeroboam kɔɔ tɔnɩ Ɩjɩrayɛldara pɛr dɩ wɩ cʋʋ.