Jeroboamɩ bikuun khire
14
1 Wi bɩɛl Jeroboamɩ bikuun Ahɩya jire khoo. 2 Dɩ Jeroboam so ɔɔ khɛra: «Ɩrɛ deba afɩbara gɩ do nɔɔ wa n jɩ ɩ̃ khɛr ha fa', a jala Sɩlo dɩɩra. Gɩdonɩ lele Thãgbaa mɩmɩɩkɛ wɩ n wenɩ Ahɩya ha. Ɔr kɔɔ sɔ mar ma dor tɩbɩlaakɛɛ jamana. 3 Gba buru yʋɔr, a gbana gato na thʋʋr na gborbir a jala ɔɔ pa. A na mɩɛ fɛr gɩrɛ na dananɩ bɩsaana.» 4 Dɩ Jeroboamɩ khɛr cʋʋrɛ ɔmɛ̃. A ɩɩrɛ jal Sɩlo, a lõ Ahɩyaa cɔ. Ahɩya na n yɩ 'lo bã, gɩdonɩ a tɩnɛ dɩ yinə pɩ. 5 Sɩ Thãgba Kɔ̃tɩn kɔɔ sʋʋraarɛ aa: «Hɩnɛ, Jeroboamɩ khɛr hale da n ɩ̃ a bule fɩ thɩ̃ɛ ɔɔ bikuunidara, gɩdonɩ gɩ n khʋʋrɛ. Mɩɛnɛɛ gɩrɛ na gɩrɛ. A a dã kɛ, a na debire ɔɔbara a na ho tɩɩ kpɩɩ.» 6 Mɔ̃ Ahɩya nɩɛnɩ ɔɔ nɛ bɩ̃ mɔ̃kɛ a n lonɩ lõfonʋɔra, a sʋʋraarɛ aa: «Lona yaa Jeroboamɩ khɛr! Aɲe gɩ dɩ fɩ debi afɩbara fɩ ho tɩɩ kpɩɩ? Wɩ ha mɛr thɩmɩɩr puu ɩ̃ mɩɛnɛ fɩ. 7 Kɛra birə sɔ Jeroboamna aa, Thãgba Kɔ̃tɩn, Ɩjɩrayɛlɩ Thãgba sor ayɩ: “Mɛr thɩnɛ fɛr Jeroboam Ɩjɩrayɛlɩ thɩ̃thɩɩn, a pɛ far fɩ dɔ ɩ̃ too Ɩjɩrayɛlɩ thɔthɔɔ. 8 Mɩ taarɛ jamana dɩɩ Davɩdɩɩ toora a ha fɩ. Sɩ fa ho ɩ̃ thɔ̃daar Davɩdɩɩkɛ kɔɔ fʋɔnɩ ɩ̃ nɔ thɩmɩsɔa'. Ɔr, a kɔɔ nɩ mɛr nũu na haar fɛw. A cʋʋrɛ gɩrɛ saranɩ dɩbara ɩ̃ ƴɛbʋrɔ. 9 Fɩ cʋʋrɛ puure a jɔ wɩrɛ fɛʋʋkɛ kɔɔ kʋlɛ fɩnɩ ƴɩɛ. Fɩ cʋʋrɛ thãgba kpɩɩsɔɔkɛ dɔnɩ thɩlaakɛ wɩ hɩlnɩ ther a cʋʋna, gɩ cʋʋ nĩkhii n fʋ mɩ. Fɩ dʋna mɛr faa. 10 Gɛr dɔ kɩrʋ ma tor bɔ gaarɛ fɛr Jeroboamɩ cɔkara. Ma bũburone kuuminə ɓib afɩ toora Ɩjɩrayɛl dɩɩra, a gbana dee kona na waya fɛw. Ma kpabɩrɛ fɛr Jeroboamɩ cɔka cacaca mɔ̃ wɩ n kpabɩnɩ sɔ̃sʋɔnɛ a khɩɩ faa. 11 Afɩ cɔka tibilikɛ na khenɩ dɩɩra, bena na khʋɔ. Ʋrɛɛkɛ na khenɩ hʋɔnɔ, 'lominə ƴũu na khʋɔ. Mɛr Thãgba Kɔ̃tɩn sɔ!» 12 Gɛr gɩ, ɩrɛ kɔna afɩ cɔ. Ɔbɔɔkɛ fa n lonɩ dɩɩra, bɩsaana na khire. 13 Dɩ Ɩjɩrayɛldara fɛw na bɩrɛ bɩsaanɩle sɩ na dʋ. Ɔr bɩɛlla dɩbara na dʋɔn tibilikɛ wa dʋnɩ kaw Jeroboamɩ cɔkadarara. Gɩdonɩ Jeroboamɩ cɔ, ɔr bɩɛl dɩbara dʋɔn tibilikɛ Thãgba Kɔ̃tɩn, Ɩjɩrayɛlɩ Thãgba yɩrɔnɩ dɩkha bʋɔ. 14 Agɩpɩ, Thãgba Kɔ̃tɩn na pɛrɛ ɔɔ jamana Ɩjɩrayɛl dɩɩra, kɛ na bũburonenɩ Jeroboamɩ cɔkadara. Owirə ha ʋrɛ! Ɔɔ, gɩ daan pɩ! 15 Thãgba Kɔ̃tɩn na ber Ɩjɩrayɛl bɩsana wa n jẽ mɔ̃ kalbii na n khəəfəni ɲʋɔnɔ. A na ti wer dɩ bɔbʋɔraakɛ a kɔɔ hanɩ awɩ thɩ kɔ̃tɩ̃sɔ. A na bɩ̃bɩlã wɛr na faa Efɩratɩ mɩɩr billo, gɩdonɩ wɩ gar Arsera thɩl gãa, a cʋʋ nĩkhi dɩɩ fʋ ɔr Thãgba Kɔ̃tɩn. 16 A na bor Ɩjɩrayɛl bɩsana na faa, gɩ do Jeroboamɩ sopuukɛ a cʋʋnɩ dɔ nɔɔ, na sopuukɛ a tɔ wɩnɩ dakha pɛr dɩ wɩ cʋʋ.»17 Jeroboamɩ khɛr ɩɩrɛ a kɛr bir. Dɩ mɔ̃ a danɩ Tɩɩrsa dɩɩra, a dã lõfonʋɔ, a yɩ ɩnɩ lona cʋɔrɔ, dɩɩ do bɩsã kũubirə khiri. 18 Dɩ Ɩjɩrayɛl bɩsana fɛw bɩɩrɛ sa dʋʋ mɔ̃kɛra Thãgba Kɔ̃tɩn kɔɔ gbanɩ ɔɔ mɩmɩɩ Ahɩya a mɩɩna.
Jeroboam khiri
19 Jeroboamɩ thɩmɩɩ gɩrɛ sɛnɩ, kʋʋrsɔɔkɛ a kenɩ, na mɔ̃ a donɩ jamana, gɩ hale dɩ wɩ khere sɛbɛraakɛ n mɩanɩ Ɩjɩrayɛl jamanasɔɔda. 20 Yɛ nʋɔɔkɛ Jeroboam cʋʋnɩ jamana dʋʋra har yɛna kpelẽ yeɲɔ. Agɩpɩ a khire a gbũ ɔɔ thɩ kɔ̃tɩ̃sɔɔra, sɩ ɔɔ bikuun Nadabɩ gba ɔɔ too pa a do jamana.
Juda jamana Roboamɩ thɩmɩ
21 Roboamɩkɛ dɔnɩ Salomɔ̃ɔ bikuun kɔɔ dor jamana Juda bəənnə. Yɛna kpalaɲɔ bɩɛl a kɔɔ hana, sa do jamana. Dɩ a dor jamana a cʋʋna yɛna yʋɔr makoɲɔ Jerujalɛm dɩɩraakɛ Thãgba Kɔ̃tɩn kɔɔ phiirni Ɩjɩrayɛl caarsɔ fɛʋʋ thɩ̃thɩɩn, wa n wɛ le ɩnɩɩ i. Roboamɩ nɩɩ i n dʋɔn Naama, kɛ dɔnɩ Amɔ̃ɔ məl.
22 Juda bə̃dara cʋʋrɛ gɩrɛ puuronɩ ka Thãgba Kɔ̃tɩnɩ ƴɛra. Wɩ car ɔɔ nĩkhi na awɩ sopuusɔɔkɛ wɩ cʋʋnɩ a jɔ awɩ thɩ kɔ̃tɩ̃sɔ. 23 Wɛr dakha mɩrɛ sãasɩ paarsɔ, a hana bokanasɔɔkɛ wɩ gbuunɩ, na Aseraa thɩl gãsɔɔkɛ wɩ ganɩ gɔ̃gɔ̃ gbã yʋɔsɔ fɛw, na thɩr hu kɔ̃tɩ̃ balɔsɔ fɛw. 24 Dɩrakɛ tɩbɩla hale dɩɩra dɩ wa n cʋʋ thɩl ji bɔdɛl thɔma. Wɩ n phɛlɛ cʋʋ pa puunəsɔɔkɛ caarsɔɔkɛ kɔɔ hanɩle dɩɩra n kɔɔ cʋʋnɩ, dɩ Thãgba Kɔ̃tɩn ti wɩ sa ha Ɩjɩrayɛl bɩsana dɩɩ.
25 Roboam donɩ jamana dɩ ga cʋʋ yɛna yemɔy, gɛr Ejipiti jamanaakɛ wɩ n wenɩ Sɩsakɩ pɔ a kena Jerujalɛmdara kʋʋr. 26 Dɩ a khɩɩrɛ lẽle thɩ̃ɛ fɛʋʋkɛ hanɩ Thãgba Kɔ̃tɩnɩ cɔ na lẽle thɩ̃ɛɛkɛ hanɩ jamanaa cɔ. A khɩɩrɛ fɛw, a khɩɩnanakɛ tomɩ phidaasɔɔkɛa Salomɔ̃ kɔɔ pɛrnɩ dɩ wɩ cʋʋ. 27 Dɩ Roboam jamana pɛrɛ dɩ wɩ cʋʋ tomɩ phidaasɔɔkɛ dɔnɩ ther sɛdaa a to agɩ kara, dɩ ha jamanaa bɛbɛr sɔrasɛɛ kɔ̃tɩ̃sɔɔkɛ n bɛranɩ jamanaa cɔ lõfonɔ. 28 Bɔɔ wo bɔɔkɛ jamana n jalnɩ Thãgba Kɔ̃tɩnɩ cɔ, bɛbɛraale n gbaar tomɩ phidaasɔɔle a to. Agɩpɩ, dɩ wɩ kɛrna birnə bɛbɛraa duu a thɩɩn.
29 Roboamɩ thɩmɩɩ gɩrɛ sɛnɩ na thɩ̃ɛ fɛʋʋkɛ a cʋʋnɩ, gɩ hale dɩ wɩ khere sɛbɛraakɛ n mɩanɩ Juda jamanasɔɔda.
30 Kʋʋr kɔɔ hale bɔɔ fɛw Roboam na Jeroboamɩ thɩ̃thɩɩn.
31 Agɩpɩ Roboam khire a gbũ ɔɔ thɩ kɔ̃tɩ̃sɔɔra. Dɩ wɩ dʋʋrɛ ka wɩ dʋnɩ ɔɔ thɩ kɔ̃tɩ̃sɔ Davɩdɩɩ dʋɔ, sɩ ɔɔ bikuun Abɩyam gba ɔɔ too pa a do jamana. Ɔɔ nɩɩ i n dʋɔn Naama, kɛ dɔnɩ Amɔ̃ɔ məl.