1 JAMANASƆ 13

Sorɩkɛ Jeroboam 'lɛnɩ ɔɔ sopuurə

1 Thãgba Kɔ̃tɩn thʋɔn ɔɔ tibil bɩɛl dɩ the Juda bəənnə a jal Betɛl. Ɔbɔɔlera Jeroboam kɔɔ hale a jɩɩl bonɩ ji pa kɩrɔ da n ji latɩkolo bonɩɛ. 2 Dɩ Thãgbaa tibilile hulene a pɛ bonɩ ji paaraale mɔna Thãgba Kɔ̃tɩnɩ thɩmɩɩ hanɩ aa: «Bonɩ jipaar! Bonɩ jipaar! Thãgba Kɔ̃tɩn sor aa: “Hɩnɛ wa kʋɔn kũubir Davɩdɩɩ toora, a na n do Jojɩasɩ. Dɩ bonɩ jidaraakɛ hanɩ sãasɩ paarsɔ, kɛ n jeni latɩkolo bonɩɛ fɛrɛra, wɛr a na jinə bonɩɛ afɩ yʋɔ. Wa thiire tɩɩ khubə afɩ yʋɔ”.» 3 Dɩ ga wiilera Thãgbaa tibilile 'laarɛ jɩɩnɩkɛ na nɛrɔnɩ dɩ Thãgba Kɔ̃tɩn mɩa ayɩ: «Bonɩ jipaara na lɩɛrɛ, dɩ thookɛ harɔnɩ ƴũu na deere thɩɩra.»

4 Ɔbɔɔkɛ Jeroboam jamana nɩɛnɩ gɩrɛ Thãgbaa tibilile mɩɩnɩ, mɔ̃ a hulenɩ pɛ Betɛl bonɩ ji paara, a 'laarɛ ɲɔ̃ɔ le bonɩ ji paara ƴũu sa phã aa: «Nɩ fʋɔnɛɛ!» Dɩ ɲɔ̃ɔkɛ a 'laanɩ Thãgbaa tibiləəle tã, aa puno na kɛrna bã. 5 Dɩ bonɩ ji paara lɩɛrɛ, dɩ thookɛ harɔnɩ ƴũu deer thɩɩra mɔ̃kɛ jɩɩnɩkɛ Thãgbaa tibil kɔɔ 'laanɩ hanɩ mɔna Thãgba Kɔ̃tɩnɩ thɩmɩɩ kɔɔ sonɩ. 6 Dɩ jamana sor Thãgbaa tibiləəle aa: «Mɩ n bɩɛl fɛr, ƴɛa Thãgba Kɔ̃tɩn afɩ Thãgba, a bɩɛlnɛɛ pɛ mar, ɩ̃ puno ɩ̃ gbunə ɲɔ̃ɔ.» Dɩ Thãgbaa tibil ƴɛɛrɛ Thãgba Kɔ̃tɩn, dɩ jamana puno a gbunə ɲɔ̃ɔ dɩɩ ha mɔ̃kɛra gɩ kɔɔ hanɩ cacara. 7 Dɩ jamana so Thãgbaa tibiləəle aa: «Sɩ kɔna kha cʋɔrɔ fɩ kho dikor, agɩpɩ ɩ̃ ha fɩ khaardaa.» 8 Dɩ Thãgbaa tibilile so jamanana: «Adorakɛ fa ha mɩ dakuru afɩ lẽle thɩna, sɩ ma kɔ̃ le afɩ cɔa'. Ma kho dɩkha ga, ma ɲɔ ɲʋɔnakɛ paarɩka'. 9 Gɩdonɩ Thãgba Kɔ̃tɩn kɔɔ kpãkpãa marɛ aa ma n kho thɩ̃a', ma n ɲɔ ɲʋɔna'; aa ɩ̃ kɛr bɔɔ, ma n gba hʋɛɛkɛ mɩ kɔɔ jalnana'» 10 Dɩ Thãgbaa tibilile faarɛ hʋ ʋrɛɛkɛ a kɔɔ jalnanɩ Betɛl, sa gba hʋ kpɩɩ da n kɔ̃.

Dɩpaarɩkɛ Thãgbaa tibil cʋʋnɩ

11 Sɩ Thãgbaa mɩmɩɩ kuun kɔ̃tɩ̃ bɩɛl kɔɔ hale Betɛl dɩɩra. Dɩ ɔɔ bikũusɔ kʋɔn a mɩgʋʋ thɩ̃ɛ fɛʋʋkɛ Thãgbaa tibilile kɔɔ cʋʋnɩ dawiilera le Betɛl, na thɩmɩaakɛ a kɔɔ mɩɩnɩ jamana. Wɩ mɩɛrɛ awɩ thɩ fɛw. 12 Dɩ a bule wer aa: «Ʋmɔ̃ɔ hʋ a kɔna?» Ɔɔ bikũusɔ kɔɔ yɩrɛ hʋ ʋrɛɛkɛ Thãgbaa tibilile thɛnɩ Juda bəənnə kɔɔ gbanɩ. 13 Dɩ a sor ɔɔ bikũusɔɔra: «Nɩ gbɛba kũkə̃ə a ha mɩ. Dɩ wɩ gbɛbɩrɛ kũkə̃ə a haa dɩ jʋʋn. 14 Dɩ a kpaanɛ a 'li Thãgbaa tibilile dɩ too terebɛ̃tɩ thɩr kɩrɔ. Dɩ a buleele: «Fɛr dʋɔn Thãgbaa tibilikɛ thɛnɩ Juda bəənnə ya?» Dɩ tu aa: «Ɔɔ, mɛr gɩ.» 15 Dɩ kuun kɔ̃tɩ̃ɩle sʋʋraa: «Sɩ kɔna kha ɩ̃ cɔ a khɔ dikor.» 16 Dɩ Thãgbaa tibilile sʋʋraa aa: «Ma puno na kɛr afɩ pa, a na ba lõ afɩ cɔa'.» Ma kho dɩkha dɩ ɲʋɔn gɩrakɛ dɩ ma ɲɔ nakha fɛrɛ paarɩka'.» 17 Gɩdonɩ Thãgba Kɔ̃tɩn kɔɔ kpãkpãa marɛ aa: «Fa n kho dikora', fa n ɲɔ le ɲʋɔna'. Afɩ kɛr bɔɔ, fa n gba hʋɛɛkɛ fɩ kɔɔ jalnana'.» 18 Dɩ kuun kɔ̃tɩ̃ɩle sʋʋraa: «Mɛrɛ dakha, Thãgbaa mɩmɩɩ ha mɩ afɩ kha. Thɔ̃thɔ̃ thu bɩɛl mɩɩna mɛr gɩrɛ Thãgba Kɔ̃tɩn sonɩ aa, ɩ̃ kpa fɩ birənə ɩ̃ cɔ fɩ kho dikor fɩ ɲɔna ɲʋɔn.» Sɩrakɛ sõsor a kur haa. 19 Dɩ Thãgbaa tibilile kɛrɛ bir kha na ɔr, a kho dikor ɔɔ cɔ a ɲɔna ɲʋɔn.

So heeneekɛ Thãgbaa tibil 'lɛnɩ

20 Mɔ̃ wɩ toonɩ dɩko kho paar, Thãgba Kɔ̃tɩn mɩɩnanɛ Thãgbaa mɩmɩɩ kuun kɔ̃tɩ̃ɩlera kɔɔ kpaanɩ a kɛrna birnə ɔɔ cɔ. 21 Dɩ a hulene a so Thãgbaa tibiləəlera thɛnɩ Juda bəənnə aa: «Thãgba Kɔ̃tɩn sor ayɩ: "Fɩ nʋʋrɛ nũu ɩnɛr Thãgba Kɔ̃tɩnɩ nɔka thɩmɩra, fa cʋʋ gɩrɛɛkɛ ɩnɛr Thãgba Kɔ̃tɩn afɩ Thãgba kɔɔ so farna'. 22 Fɩ kɛrɛ bir a kho dikor a ɲɔna ɲʋɔn paarɩkɛ ɩnɛr Thãgba Kɔ̃tɩn kɔɔ so farnɩ ayɩ, fa n kho dikor liirə', fa n ɲɔ le ɲʋɔna', gɛr dɔ nɔɔ, wa dʋ afɩ khi afɩ thɩ kɔ̃tɩ̃sɔɔ kaʋa'»

23 Mɔ̃ Thãgbaa mɩmɩɩlera a kɔɔ kɛrnanɩ birnə ɔɔ pa khonɩ dikor a ɲɔ ɲʋɔn pɩ, kuun kɔ̃tɩ̃ɩle gbɛbɩrɛ kũkə̃ə a haa. 24 Dɩ a jaal da n kɔ̃, dɩ sidũ'ũu thɩɩraa hʋɛra a kʋʋ. Dɩ ɔɔ khi phɩnɛ hʋɛra, dɩ kũkə̃ə jɩɩl bɛraa dɩ sidũ'uunə hale dakha a jɩɩl khirii kɩrɔ. 25 Dɩ hʋ kadara yɩrɛ khiri phɩnanɩ hʋɛra na sidũ'ũu jɩlɛnɩ khirii kɩrɔ. Dɩ mɔ̃ wɩ danɩ dɩɩraakɛra Thãgbaa mɩmɩɩ kuun kɔ̃tɩ̃ɩle hanɩ, wɩ mɩɩ gɛr. 26 Dɩ Thãgbaa mɩmɩɩ kuun kɔ̃tɩ̃ɩlera kɔɔ kpaanɛnɩ hʋɛra a kpaa birnə nɩɛrɛ a so aa: «Thãgbaa tibililera kɔɔ nʋrɛnɩ nũu Thãgba Kɔ̃tɩnɩ nɔka thɩmɩɩra, ɔr gɩ. Gɛr gɩ dɩ Thãgba Kɔ̃tɩn ti sidũ'ũu a pɩɛraa dɩ dʋɔnʋ a kʋ mɔna Thãgba Kɔ̃tɩn kɔɔ sʋʋraanɩ.» 27 Agɩpɩ a sor ɔɔ bikũusɔɔra: «Nɩ gbɛba kũkə̃ə a ha mɩ.» Dɩ wɩ gbɛbɩrɛ kũkə̃ə a haa. 28 Dɩ a jaal a 'li khirera phɩnanɩ hʋɛra na kũkə̃ə na sidũ'uunə dɩ wɩ jɩɩl bɛr khirera. Sidũ'ũunə na kho khirə', aa kʋ kũkə̃ə dakha woa'. 29 Dɩ Thãgbaa mɩmɩɩ kuun kɔ̃tɩ̃ɩle ɓar Thãgbaa tibililee khi a dɛ̃ɛ kũkəənə a kɛrna birnə. Mɔ̃ Thãgbaa mɩmɩɩ kuun kɔ̃tɩ̃ɩle danɩ dɩɩra, a cʋʋrɛ bɩɩ sa dʋ Thãgbaa mɩmɩɩle. 30 A dʋʋrɛ ɔɔ thɛthɛɛ kara. Dɩ wɩ n waalɛ bʋɔ dɩ wa n sona: «Gɩ pɩrɛ yaa ɩ̃ omɩ bɔ!» 31 Mɔ̃ a dʋʋnɩ pɩ, a sor ɔɔ bikũusɔɔra: «A mɩ khi, nɩ dɔ mɩ kaaraakɛ wɩ dʋnɩ Thãgbaa tibilikɛ. Nɩ thɩnɛ ɩ̃ khubisɔ a khonə ɔɔ khubisɔ.» 32 Baalɛ na hala', gɩdonɩ thɩmɩɩrɩkɛra thɛnɩ Thãgba Kɔ̃tɩnna, kɛ a hulenɩ a mɩɩ pɛ Betɛl bonɩ ji paara na sãasɩ cɔnasɔraakɛ hanɩ Samarɩ dɩɩsɔɔra, ga daan otirə.

33 Mɔ̃ thɩ̃ɛɛle kanɩnakɛ thale, sɩ Jeroboam na kɛr sa faa ɔɔ hʋ puuə'. A bire pɛr sãasɩ paarsɔɔra wo bonɩ jidaraakɛ a tini caar fɛʋʋ thɩ̃thɩɩn. Wɩrɛ fɛʋʋkɛ n ƴaalɛnɩ wɩ do bonɩ jidara a n pɛ warɛ wɩ dɔ bonɩ jidara sãasɩ paarsɔɔra. 34 Dɩ gelela thɔɔnɛ Jeroboamɩ cɔdara a pɛ sopuu cʋʋrɛra. Gɛr dɔ kɩrʋ dɩ ɔɔ cɔka bũburõ a hɛllɔ thɩɩra.