ƖJƖRAYƐL JAMANA DƖƖ VAARƐ \ref 2Chr. 10; 11. 1-12; Oj. 13. 11
Roboam na Sɩsɛmdaraa thʋ̃ kha
12
1 Roboam jaal Sɩsɛm, gɩdonɩ le Ɩjɩrayɛldara fɛʋʋkɛ hanɩ ka wire na n jalnɩ dɩ pɛ ɲɔ̃bɔɔ kɔɔ caan wɩ pɩɛraa a do jamana. 2 Dɩ ɔbɔɔkɛ Nebatɩɩ bikuun Jeroboamɩkɛ kɔɔ hanɩ Ejipiti, ka a kɔɔ canɩ Salomɔna a jal too, nɩɛnɩ gbɛbɩ khaale, a toore lera Ejipiti. 3 Dɩ wɩ thʋɔn wɩɩ dɩ pɔ na Ɩjɩrayɛl fɛʋʋkɛ hanɩ ka wire na n jalnɩ dɩ pɛ ɲɔ̃bɔɔ. Dɩ wɩ sor Roboamna aa: 4 «Afɩ thɩ kɔɔ heen ser hẽeda dʋbʋʋkɛ hɔnɩ kpelele. Nɛnɛ̃, sɩ n ƴaalɛ fɩ wurə dee thɔ̃ khenaakɛra a kɔɔ pɛ sarnɩ. Hea sɩ hẽeda dʋbʋʋkɛ a kɔɔ hẽe sɩnɩ kɛ hɔnɩ kpelele, gɩ haba sar dɩ sa dor afɩ thɔ̃.» 5 Dɩ Roboam so warɛ aa: «Nɩ kɔna sa kɛra ɩna kɩɛr na wire yẽther.» Dɩ wɩ kɛrɛ kɔ̃.6 Dɩ Roboam jamana yaalɛ fɩlɛ kɔ̃tɩnanaakɛ kɔɔ dɔnanɩ kha ɔɔ thɩ Salomɔ̃ thɔma, bɔɔkɛ a kɔɔ hananɩ yire. A bule wer aa: «Aɲe dɔ fɩlɛɛkɛ nɩ n ha mɩnɩ ɩ̃ puno ɩ̃ 'laa tuur tɩbɩlalaakɛra?» 7 Dɩ wɩ mɩgʋʋ ayɩwɔɔ: «Nĩikɛ, ado fɩ fi a ho tɩbɩlaakɛɛ thɔ̃daar, ado fɩ tu fɩ do war thɔma, ado fɩ ha wɩ tuur na thɩmɩɩ bɔy, wa dor afɩ thɔ̃dara dakha khorr.» 8 Sɩ Roboam na therna fɩlɛɛkɛ kɔ̃tɩna haana'. Bɩsanaakɛ dɔnɩ ɔɔ alãkhasɔɔkɛ wɩ khɔnanɩ kha, kɛ dɔnɩ ɔɔ totoosɔ, awɩ fɩl a gba. 9 A bule wer dakha aa: «Aɲe dɔ fɩlɛɛkɛ nɩ n ha mɩnɩ ɩ̃ puno ɩ̃ 'laa tuur tɩbɩlalaakɛra sɔ marnɩ, ɩ̃ hea wɩ hẽeda dʋbʋʋkɛ hɔnɩ kpelele, kɛ ɩ̃ thɩ kɔɔ hẽe wɩnɩ? 10 Dɩ bɩsanaakɛ wɩ kɔɔ khɔnanɩ kha sʋʋraa: «Tɩbɩlaakɛra sɔ farnɩ afɩ thɩ kɔɔ heen ner hẽeda dʋbʋʋkɛ hɔnɩ kpelele, aa fɩ wurə gɩ haba war, sɔ war aa, afɩ ɲɔ̃bi bu curore a jɔ afɩ thɩɩ pel. 11 Sɔ war aa afɩ thɩ kɔɔ hẽe wer hẽeda dʋbʋʋkɛ hɔnɩ kpelele, sɩ fa ka jɩɛ dɛbɩrɔ hẽeda dʋbʋra wo. Afɩ thɩ n kɔɔ ciil wer na ciləmũu, sɩ fe wer, lanaa fa n naarna wɩ.»
12 Dɩ Jeroboam na tɩbɩla fɛw pɔr Roboamna balãther wirera mɔna jamana kɔɔ so warnɩ aa wɩ kɛra pɔ balãther wirera. 13 Dɩ jamana ha wɛr tuurikɛ khɩɩnɔnɩ ka. Aa therna fɩlɛɛkɛ kɔ̃tɩna kɔɔ haana'. 14 A mɩɩna wɛr mɔna daɓola kɔɔ haanɩ fɩlɛ a so war: «Ɩ̃ thɩ kɔɔ heen ner hẽeda dʋbʋʋkɛ hɔnɩ kpelele, dɩ mɛrɛ ma ka jɩɛ dɛbɩrɔ hẽeda dʋbʋra wo. Ɩ̃ thɩ n kɔɔ ciil ner na ciləmũu, sɩ me wer lana ma n naarna nɩ.» 15 Thale jamana bo tɩbɩlaale nũ pɛrɛ, gɩdonɩ Thãgba Kɔ̃tɩn fien thɩɛna thale. Thãgba Kɔ̃tɩn cʋʋrɛ mɛ̃ gɩ do nɔɔ thɩmɩɩrɩkɛ a kɔɔ gbanɩ ɔɔ mɩmɩɩ Ahɩya, kɛ thɛnɩ Sɩlo dɩɩra a mɩɩna Nebatɩɩ bikuun Jeroboamna, gɩ dã oti.
16 Mɔ̃ Ɩjɩrayɛl wɩrɛ hanɩ ka wire na n jalnɩ dɩ pɛ ɲɔ̃bɔɔ yɩɛnɩ dɩɩ do jamana na pɛ wɩ nũuə', wɩ birseere aa:
«Aɲe sɩ ha kha na Davɩdɩ?
Sa n kɔɔ gba kha khĩdi thɩ̃ɛ na Ɩjaɩɩb bikuunaa do!»
Nɩ kɔna anɩ cɔsɔ lee Ɩjɩrayɛl !
Nɛnɛ̃, na hɩnɛ wɩrɛ dɔnɩ afɩ too yaa Davɩdɩɩ bikuun! Thale Ɩjɩrayɛl bɩsã wɩrɛ hanɩ ka wire na n jalnɩ dɩ pɛ ɲɔ̃bɔɔ bɩlã a kɔ̃ awɩ cɔsɔ.
17 Ɩjɩrayɛl bɩsã wɩrɛɛkɛ hanɩ Juda bəənə, wɛra Roboam do jamana. 18 Dɩ Roboam jamana thʋɔn Adoramɩkɛ n hɩnɛnɩ dee thɔma Ɩjɩrayɛl wɩrɛraakɛ hanɩ ka wire na n jalnɩ dɩ pɛ ɲɔ̃bɔɔ, dɩ wɩ dʋʋrʋ na bokana a kʋ. Sɩ Roboam 'lɛr nɔbɔɔ a fuu, a jʋʋn gãgʋʋ a ca kɔ̃ Jerujalɛm. 19 Thale Ɩjɩrayɛl wɩrɛ hanɩ ka wire na n jalnɩ dɩ pɛ ɲɔ̃bɔɔ ɩɩrna lãʋ Davɩdɩɩ məlsɔra a dana nĩikɛ.
20 Mɔ̃ Ɩjɩrayɛlda wɩrɛ fɛʋʋkɛ hanɩ ka wire na n jalnɩ dɩ pɛ ɲɔ̃bɔɔ nɩɛnɩ dɩ Jeroboam kɛrɛ bir pɔ, wɩ pɛr gbɛbɩkha a wɩɩ dɩ pɔ. Dɩ wɩ pɩɛraarɛ dɩ do jamana wɛr fɛʋraakɛ hanɩ ka wire na n jalnɩ dɩ pɛ ɲɔ̃bɔɔ. Judaa məlsɔ dɩbara dɔ wɩrɛ kpaanɛnɩ Davɩdɩɩ məlsɔra.
21 Mɔ̃ Roboam danɩ Jerujalɛm, a kpar sɔrasɩ bɔy fɛw gbɩlanɩ tamaa na gbɩlanɩ kpalanã (180.000), kɛ thɛnɩ Judaa məlsɔɔra na Bɛ̃jamɛ̃ɛ məlsɔɔra a jɛ, gɩ do nɔɔ wɩ jal wɩ kena Ɩjɩrayɛlɩ too wɩrɛ kurəni, wɩ bir wɩ jo ɔr Roboamnaakɛ dɔnɩ Salomɔ̃ɔ bikuun. 22 Sɩ Thãgba mɩɩnanɛ ɔɔ tibil Semaya ayɩwɔɔ: 23 «Mɩana Salomɔ̃ɔ bikuun Roboamɩkɛ dɔnɩ Juda jamana, a sɔna Judaa toora fɛw na Bɛ̃jamɛ̃ɛ toora na tɩbɩla fɛʋraakɛ sɛnɩ aa: 24 “Mɛr Thãgba Kɔ̃tɩn sor: Na n jal kena Ɩjɩrayɛldarasɔɔkɛ dɔnɩ anɩ omɩsɔa'! Nɛrɛ fɛw bɩɛlbɩɛl, nɩ kɛra kɔna anɩ cɔsɔ, gɩdonɩ ɩ̃ pa thɩ̃ɛɛle the” ». Dɩ wɩ nɩrɛ nũu Thãgba Kɔ̃tɩnɩ thɩmɩɩraale a kɛr bir mɔna Thãgba Kɔ̃tɩn kɔɔ mɩɩnɩ.
Gɩrɛ Jeroboam cʋʋnanɩ Ɩjɩrayɛl jamana dɩɩ
25 Jeroboam kɔɔ mɩrɛ dɩ bɛr gʋʋ a kpala Sɩsɛm dɩɩraakɛ hanɩ Efɩrayɩmɩ məlsɔɔ gɔ̃gɔ̃ bənnə a too le. Pɩpɩɩ paar dɩ the le a jal mɩ dɩ bɛr gʋʋ a dii Penʋɛl dɩɩra.
26 Jeroboam sor ɔɔ hara aa: «Ɩ̃ jamana dɩdaraakɛra punone a bir kɛr Davɩdɩɩ toora dɩkhõo dɛ! 27 Ado wɩ kɛr na jal Jerujalɛm Thãgba Kɔ̃tɩnɩ cɔ bonɩ jii, awɩ ha punone a bir kɛr Roboamɩnaakɛ dɔnɩ Juda jamana, kɛ kɔɔ dɔnɩ awɩ kɔ̃tɩ̃. Dɩ wa kʋ mɛr sɩ na kɛr na bir Roboamɩnaakɛ dɔnɩ Judaa məlsɔɔ jamana.» 28 Dɩ jamana ƴaalɛ fɩlɛ, a phebɩ na ɓol thɩla yeɲɔ na dɛ, sa so ɔɔ toora aa: «Gɩ thʋnɛ dã mɛ̃ mɔ̃ nɩ n jalnɩ Jerujalɛm! Ɩjɩrayɛl wei, yɛkɛ afɩ thãgbasɔɔkɛra te fɩnɩ Ejipiti dɩɩra a thena! 29 Dɩ a thɩɩnɛ bɩɛl betɛl dɩɩra, a thɩɩn bɩɛl Dãa məlsɔɔ dʋɔ. 30 Dɩ gelela thɔɔnɛ tɩbɩla a pɛ sopuu cʋʋrɛra. Tɩbɩla cʋrrɛ a gbana na ɓol thɩl bɩɛl ƴɩɛ a thɔgʋʋ a jalna dana Dã. 31 Dɩ Jeroboam mɩrɛ sãasɩ paarsɔ, a ti bonɩ jidara caar fɛʋraakɛ na thɛnɩ Levɩɩ məllə ga a pɛr.
32 Jeroboam pɛrɛ fɛtɩ yɩɛrɩ ɲẽbe makõther sɩporɩ wire yʋɔr yemɔy wirə mɔ̃kɛ fɛtɩ ʋrɛ wɩ n cʋʋnɩ Judaa dʋɔ hanɩ. Dɩ a jire bonɩɛsɔ dɩbara bonɩ ji paara. Thalera a cʋʋ dakha Betɛl, a ji bonɩɛsɔ na ɓol thɩlalaakɛ a kɔɔ cʋʋnɩ. Dɩ a pɛrɛ le dakha bonɩ jidara sãasɩ paarsɔraakɛ a mɩnɩ. 33 Dɩ yɩɛrɩ ɲẽbe makõther sɩporɩ wire yʋɔr yemɔy wirə, kɛ dɔnɩ wireekɛ Jeroboam kɔɔ phiirni na ɔɔ thɛthɛɛ kpɩɛr, a jaal bonɩ ji paaraakɛ a kɔɔ mɩnɩ Betɛl. Dɩ a pɛrɛ fɛtɩ cʋʋrɛ Ɩjɩrayɛl bə̃darara ; dɩ a jʋʋnɛ bonɩ ji paara ɩnɩ n ji latɩkolo bonɩɛ.