SOGƲƲRDARA 8

Efɩrayɩmɩ caa cɩ̃cɩma Jedeɔna

1 Dɩ Efɩrayɩmɩ ca ɩɩrnanɛ cɩ̃cɩmanɛ Jedeɔna ayɩ: Aɲe dɔ kɩrʋ dɩ fɩ cʋʋ sɩ thaa? Aɲe dɔ kɩrʋ fa we sɩnɩ dɩ sɩ bul fɩ ɔbɔɔkɛ fɩ jalnɩ fɩ kena Madɩ̃adara ga? Dɩ wɩ ɩɩrnaanɛ sʋʋ dɩɩ khɩɩr ka. 2 Dɩ Jedẽɔ birse wɩ ayɩ: Nɛr Efɩrayɩmɩ ca, aɲe mɩ cʋʋ dɩɩ hona anɩda ado wɩ n mɩɛrɛ? Anɩ gbeekɛra nɩ cʋʋnɩ na ka jɔ Abɩejɛɛrɩ məlsɔ dajɔɔkɛ wɩ cʋʋnaa? 3 Anɩ ɲɔ̃kɔɔ Thãgba to Orɛbɩ na Jɛbɩ kɛ dɔnɩ Madɩ̃a kɔ̃tɩna. Dɩ aɲe birǝ hale dɩ̃ puno a cʋʋ dɩɩ hona anɩda ado wɩ n mɩɛrɛ? Mɔ̃ Jedẽɔ mɩɩna wɩnɩ thale dɩɩ do awɩ nĩkhiikɛ wɩ gbanaanɩ wure.

Jedẽɔ weelele Madɩ̃a sɔrasɛ a seerna Jʋrdɛ̃

4 Dɩ Jedẽɔ daan Jʋrdɛ̃ mɩɩr a iir ɔr na kona tãatherɩkɛ (300) hanɩ kha na ɔr. Wɩ kɔɔ vɔɔrɛ ka, sɩ dɩ wa n weelerakɛ lãlara dɩ wa n kpaan. 5 Ɔbɔɔkɛ a danɩ Sukɔtɩ dɩɩra, a sor dɩdarara ayɩ: Mɩ n bɩɛl nɛr nɩ hana tɩbɩlaakɛ hanɩ kha na mɛrɛ dikor gɩdonɩ Jeba na Salmunaakɛ dɔnɩ Madɩ̃a kɔ̃tɩna mɩ n wee sɩ dɩ wɩ vɔɔ ka. 6 Dɩ Sukɔtɩ kɔ̃tɩna birse Jedẽɔ ayɩ: Fɩ punone Jeba, na Salmunana a pɛr ɲɔ̃kɔɔ pɩ dɩ sa ha afɩ sɔrasɩsɔ dikor ya? 7 Dɩ Jedẽɔ birse wɩ aa: Mɛ̃ gɩɩ! Ɔbɔɔkɛ Thãgba Kɔ̃tɩn na dʋ mɩnɩ Jeba na Salmuna ɲɔ̃kɔɔ na pɩ, ma ciil ner na sãabo, na u bulo nɩ jɩ. 8 Dɩ a kpãasɛrɛ le a jal Penʋɛl dɩɩra a bɩɛl Penʋɛldarara bɩɛlbɩɛlɩlera wo. Dɩ Penʋɛldara dakha birsee Sukɔtɩdaraa khara. 9 Dɩ Jedẽɔ so war dakha aa: A mɩ 'lɛ kəərə pɩ sɩ na kɛr, ma wɩɛllɛ cɔ gbãakɛ.

10 Dabɔɔle Jeba na Salmuna har Karkɔɔr bǝǝnnǝ na awɩ sɔrasɩsɔ gbɩlanɩ yʋɔr yemɔɩsɔ dɩbara. Wele koo dɔ wɩrɛ sɛnɩ bedʋyɛ̃sɔɔra kɛ thɛnɩ wi phã pa bilo, awɩ sɔrasɩ jɔjɔraakɛ wɩ kɔɔ hananɩ; gɩdonɩ awɩ sɔrasɛɛkɛ jɛnɩ khal kɩɩr, wɩ kɔɔ kʋʋr wɛr gbɩlanɩ kpalmaadõ (120.000). 11 Dɩ Jedẽɔ gbaar hʋɛkɛ nʋ̃ khɛɛkɛ n cʋɔnɩ kẽkẽ waasɔra n kananɩ, kɛ n thɛnɩ Noba, na Yogboha dɩ wi phã pa khʋra. Dɩ a tinǝne lãlaara le jɛw kɛ na n kɔɔ dɛnanɩ thɩ̃ɛ bã. 12 Dɩ Jeba na Salmuna caalɛ, dɩ Jedẽɔ weele wer a kpaan a fʋlɛ Madɩ̃a jamana yeɲɔɔlera kɛ dʋɔnɩ Jeba na Salmuna, sa bɩ̃bɩlã sɔrasɛ fɛw.

Sukɔtɩ na Penʋɛldaraa so 'lɛ

13 Agɩpɩ, Joasɩɩ bikuun Jedẽɔ ther kʋʋra da n bir, a gba hʋɛɛkɛ dɔnɩ jʋʋnʋ, kɛ n thɛnɩ Hɛrɛsɩ dɩɩra. 14 Dɩ a fʋrɛ Sukɔtɩ daɓolbir bɩɛl a bulee, dɩ khere Sukɔtɩ kɔ̃tɩna, na cɔdaar konaa isɔ fɛw a haa; dɩ wɩ har fɛw tɩbɩla kpalãther yʋɔr makoɲɔ (77). 15 Agɩpɩ dɩ gba jal Sukɔtɩdarara a so war: Nɩ yɛ Jeba na Salmunaakɛra nɩ kɔɔ nɩɩr marnɩ aa, mɩ puno wer a pɛ ɲɔ̃kɔɔ pɩ dɩ na ha ɩ̃ tookɛ vɔɔnɩ dikor ya? Wɛr ha wɩrɛ 16 Agɩpɩ dɩ fʋlɛ Sukɔtɩ cɔdaar konana a ciil wɩ na sãabo na u bulo. 17 Dɩ a wɩɛllɛ dakha Penʋɛl cɔ gbaana sa kʋʋr dɩdara.

18 Agɩpɩ a bulele Jeba na Salmuna ayɩ: Konaakɛ nɩ kɔɔ kʋʋrnɩ Tabɔɔr gɔ̃gʋɔna, mɔ̃ wɩ ha? Dɩ wɩ sʋʋraa: Afɩ khaakɛ wɩ ha. Wɛr fɛʋʋ ƴɛ n honanɛ jamanaa bikũusɔɔ ƴɛ. 19 Dɩ Jedẽɔ so war: Ɩ̃ õkũusɔ kɔɔ gɩ, kɛ dɔnɩ ɩ̃ nɩɩkɛ kɔna mɩnɩɩ bikũusɔ. Na Thãgba Kɔ̃tɩnɩkɛ dʋɔnɩ yidaarɩ i, ado nɩ kɔɔ faa wɛr na yire, ma kɔɔ kʋʋr nɩ dakha ga. 20 Agɩpɩ dɩ so ɔɔ bikuun kɔ̃tɩ̃ Yetɛɛra ayɩ: Ɩrɛ a kʋrɛ wɩ! Sɩ daɓolbirile na 'la na phe bajɩna na kʋʋr wa', gɩdonɩ a dor daɓolbir, dɩ maar fʋʋ. 21 Dɩ Jeba na Salmuna so Jedeɔna ayɩ: Fɛrɛ thɛthɛ n ɩrɛ dɩbara a kʋrɛ sɩ, gɩdonɩ mɔ̃ tibil hanɩ, mɛ̃ ɔɔ fãga n ha. Dɩ Jedẽɔ ɩɩrɛ a kʋʋr wɩ sa fʋʋr ɓoldaarsɔɔkɛ kɔɔ hanɩ awɩ ɲɔɔmɛ̃sɔɔ fɔra.

Jedẽɔ 'lɛr jamana dʋʋr sa bo

22 Mɔ̃ gele pɩnɩ, Ɩjɩrayɛl bɩsana sor Jedeɔna ayɩ: Dɔ asɩ jamana. A fa hala', afɩ bikuun na afɩ bikuuni bikuun n dee fɩ. Gɩdonɩ fɩ taa sɛr Madɩ̃adaraa ɲɔ̃kɔɔ. 23 Sɩ Jedẽɔ birse wɩ ayɩ: Ma puno na do anɩ jamana, dɩ ɩ̃ bikuun gɩrakɛ dakha ga. Thãgba Kɔ̃tɩn na dʋɔn anɩ jamana.

24 Agɩpɩ dɩ so war: Thɩ̃ bɩɛl mɩ n ka ƴaal ɩ̃ bɩɛl. Nɛrɛ fɛw bɩɛlbɩɛl n ha mɩ dɛ ɓɔ̃ɓɔ bɩɛlbɩɛl sodaraa thɩnakɛ nɩ tagɩnɩ kʋʋrra. Madɩ̃adaraale n kɔɔ tor ɓɔ̃ɓɔna mɔ̃ Ɩsɩmayɛlɩ mǝlsɔ n tonɩ; gɩdonɩ nʋ̃ khɛ wɩ do. 25 Dɩ wɩ sʋʋraa: Sa 'laarɛ na haar fɛw. Dɩ wɩ bele gbɔɔlɔ̃ thɩɩra dɩ wɛr fɛw bɩɛlbɩɛl kpɛɛrɔrɛ dɛ ɓɔ̃ɓɔ̃ bɩɛlbɩɛl sodaraa thɩnaakɛ wɩ tagɩnɩ kʋʋrra. 26 Dɩ dɛ ɓɔ̃ɓɔnaakɛra Jedẽɔ bɩɛlnɩ, ga dʋbɩ fɛw har Sikile gbɩlanɩ taamakoɲɔ (1700) kilo kpelẽsɔ sɩ wa therna ɓoldaarsɔ, na nũ todaasɔ, na kẽkẽ ɓɔ̃ sɛnaakɛ Madɩ̃a jamanasɔ n tona'. Wa therna dakha lɛ̃biisɔɔkɛ wɩ tonɩ awɩ ɲɔɔmɛ̃sɔɔ fɔra ga. 27 Dɩ Jedẽɔ gbaar dɛɛlera a cʋʋna efoodɩ ^aa thɩɩn le ɔɔ dʋɔ Ofɩra dɩɩra. Dɩ Ɩjɩrayɛl bɩsana mar dɩ wa n fʋɔr. Dɩ efoodɩɩle fire a do pheru Jedeɔna na ɔɔ cɔdarara.

Jedẽɔɔ yi pɩ pa

28 Le Madɩ̃adara wur a jo Ɩjɩrayɛl bɩsanana wa n gǝ̃ yʋʋ 'lo bã. Dɩ dɩɩ ier dɩphã bɔɔ fɛʋʋkɛ Jedẽɔ hananɩ yire dɩɩ dana yɛna kpalaɲɔ.

29 Dɩ Joasɩɩ bikuun Yerubaal, kɛ n dɔnɩ Jedẽɔ kɛrɛ a bir ɔɔ cɔ mɛ̃ a too. 30 Dɩ a kʋɔn bikona kpalãther yʋɔrɩkɛ thɛnɩ ɔɔ tɔmɩna gɩdonɩ ɔɔ khɛrsɔ kɔɔ jɔrrɛ ka. 31 Dɩ ɔɔ khɛr bɩɛlɩkɛ a hananɩ Sɩsɛm dɩɩra kʋɔn dakha Jedẽɔɔ bi, dɩ haa ire Abɩmelɛkɩ. 32 Joasɩɩ bikuun Jedẽɔ tɩnɛ a hi na daw agɩpɩ dɩ khi. Dɩ wɩ dʋʋrɛ ɔɔ thɩ Joasɩɩ kara le Ofɩra dɩɩra, kɛ dʋɔnɩ Abɩejɛɛrɩ mǝli dʋɔ.

33 Ɔbɔɔkɛ Jedẽɔ khini pɩ, Ɩjɩrayɛl bɩsana bire ma wo wa n ƴɔ̃ƴɔɔ awɩbara, dɩ wa n fʋɔr Baal thãgbasɔ, dɩ wɩ gbaar Baal-Berɩtɩ dɩ do awɩ thãgba. 34 Ɩjɩrayɛl bɩsana na bir jɩna Thãgba Kɔ̃tɩn, awɩ Thãgbaakɛ kɔɔ taa wɩnɩ awɩ lãlaardarasɔra fɛw, kɛ kɔɔ diǝ warna'. 35 Dɩ wa hananakɛ bɔ cʋʋrɛ Jedẽɔnaakɛ wɩ n wenɩ Yerubaalɩ cɔdarara, dɩɩ do bɔɔkɛ a kɔɔ cʋʋnɩ fɛw wɛr Ɩjɩrayɛl bɩsanana dɔ nɔa'.