SOGƲƲRDARA 7

Jedẽɔ punone Madɩ̃adara

1 Duuro phiphiphi, Jedẽɔɔkɛ wɩ n wenɩ Yerubaal ɩɩrɛ na ɔɔ sɔrasɩsɔkɛ hanɩ kha na ɔr a jal jɛ ɲɔ bu ka khʋra, kɛ wɩ n wenɩ Harɔdɩ. Madɩ̃a sɔrasɛ dakha hale a jɛ ka wire phanɩ dɩ pɛ ɲɔ̃bɔɔ, a fʋ Moore gɔ̃gɔ̃ bilo a jalna dana ɓɛlɛnɔ. 2 Dɩ Thãgba Kɔ̃tɩn sor Jedeɔna: Ma puno na ha fɩ kǝǝre Madɩ̃adarara na tɩbɩlaakɛ fɩ hanana', gɩdonɩ wɩ jɔrɛ ka. A mɛ̃ ga Ɩjɩrayɛl bɩsana na ber kũkune wɩ kpɩɛr awɩ thɛthɛɛ fãga wɩ 'lɛna kǝǝre, wɩ tee mar i dʋbɩrɛ. 3 Sɔ afɩ toora fɛw thɩmɩɩrɩkɛ ayɛ wɔɔ: Ntɛɛkɛ maar fʋnɩ, da n jẽ a maanɔ a hʋnɔnɛna Galaadɩ gɔ̃gʋ̃ɔ a kɔna. Dɩ kona gbɩlanɩ kpelẽ yeɲɔ (22.000) kɛr a kɔ̃, sa sɩ gbɩlanɩ yʋɔr (10.000).

4 Dɩ Thãgba Kɔ̃tɩn so Jedeɔna wo: Tɩbɩla jɔrɛrakɛ 'lo. Kpa wɩ gbunonǝ ɲɔ nʋɔra, ɩ̃ phiir ɩ̃ ha fɩ. Ntɛraakɛ ma sonɩ a jalla kha na fɛrɛ, a na jaal, sɩ tibil wo tibilǝǝkɛ ma sonɩ a na n jal kha na fɛrɛa', ntɛ na jala'. 5 Dɩ a kpar tɩbɩlala a gbunǝ ɲɔ nʋɔra, dɩ Thãgba Kɔ̃tɩn sʋʋraa: Wɩrɛ fɛʋʋkɛ n kǝbǝni ɲʋɔn dɩ wa n caba na delẽbire, mɔ̃ bɩɩn n cabanɩ, lea wɩ kpɩɩ na wɩrɛ gulẽganɛnɩ dɩ wa n ɲɔ. 6 Dɩ wɩrɛ n kǝbǝni ɲʋɔn na ɲɛ̃ɛ dɩ wa n caba har kona tãather (300). Sɩ wɩrɛɛkɛ sɛnɩ gulẽgarɛ fɛw dɩ wa n ɲɔ. 7 Dɩ le Thãgba Kɔ̃tɩn so Jedeɔna ayɩ: Kona tãatherɩkɛra cabanɛnɩ ɲʋɔn, wɛr ma gba na taana nɩ, ɩ̃ hana fɩ kǝǝre Madɩ̃adarara. Sɩ tibil wɩrɛ sɛnɩ fɛw, ntɛ n kɛra birǝ, a kɔna ɔɔ cɔ. Dɩ wɩ teere tɩbɩlalee dɩkosɔ, na awɩ tutuusɔkɛ wɩ kɔɔ hananɩ. 8 Agɩpɩ, Jedẽɔ bɩlanɛ Ɩjɩrayɛl bɩsã wɩrɛ sɛnɩ dɩ wɛr fɛw kɛr bir awɩ cɔ bɩɛlbɩɛl, sɩ dɩ fʋrɔ kona tãatherra. Madɩ̃a sɔrasɛɛ jɛ pa hale tɩɛr ɓɛlɛnɔ.

Madɩ̃a sɔrasɩ kuun bɩɛlɩ dǝǝl.

9 Dɩtɩnɔɔlera, Thãgba Kɔ̃tɩn sor Jedeɔna ayɩ: Ɩrɛ a gbuno Madɩ̃a sɔrasɛɛ jɛw, gɩdonɩ mɩ bo wer a to fɩ ɲɔ̃kɔɔ. 10 Ado maar fʋ fɛr gbuunǝ, nɩ gbuno kha na Pura afɩ thɔ̃daar le awɩ jɛw. 11 Pɛ nũu gɩrɛ wɩ n mɩɩnɩ agɩpɩ ga ha fɛr 'lar. Gɛr gɩ gbuno le jɛw. Dɩ a gbune ɔr na Pura ɔɔ thɔ̃daar a dã jɛ pa nʋɔra. 12 Dɩ Madɩ̃a sɔrasɛ na Amalɛkɩɩ mǝlsɔ na Beduyɛ̃sɔ, caarɩkɛ dɔnɩ nʋ̃ khɛ, le wi phã pa bilo, kɔɔ hale a mala ɓɛlɛ̃na mɔ̃ toosõ jɔjʋɔ n hanɩ. Dɩ wɩ hananɛ dakha awɩ ɲɔɔmɛ̃sɔ dɩɩ vǝ̃vĩǝ, a ho gbalãkothɩnɩkɛ n hanɩ laɲɔ̃ nʋɔra. 13 Dɩ mɔ̃ Jedẽɔ na danɩ, dɩɩ do kuun bɩɛl harrɛ da n mɩɛ ɔɔ alãkha bɩɛl dǝǝle. A n mɩɛrɛ aa: Hɩnɛ, mɩ dǝǝle dɩɩ do ɔɔjɩ buru gɩ da n kpuro sɛr Madɩ̃a sɔrasɛɛ jɛw. Dɩ a jaal a be kẽkẽ wa bɩɛl dɩ ji. Dɩ fiirǝkɛ a gbãgaa dɩ yʋʋ gbuu tɩɛr dɩ ƴɛlɛ̃ba. 14 Dɩ ɔɔ alãkhaale birsee: Ga phǝ'. Jedẽɔɔkɛ dɔnɩ Joasɩ Ɩjɩrayɛl bɩsaanɩ bikuun, ɔɔ bajɩna gɩ. Thãgba bo sɛr Madɩ̃a sɔrasɛ fɛw a tʋʋ ɲɔ̃kɔɔ. 15 Ɔbɔɔkɛ Jedẽɔ nɩɛrnɩ dǝǝleele na ɔɔ kɩr a pɩ a gburõkhure a fʋɔr Thãgba. Agɩpɩ dɩ ɩɩr a kɛr bir Ɩjɩrayɛl bɩsanaa sɔrasɩ jɛw a so war: Nɩ ɩrɛ, Thãgba Kɔ̃tɩn gbaar Madɩ̃a sɔrasɛ a to nɩ ɲɔ̃kɔɔ !

Mɔ̃ Jedẽɔ punoni Madɩ̃a sɔrasɛ

16 Dɩ Jedẽɔ tɩnɛnɛ kona tãatherɩlera (300) gbulona yẽther (3). Agɩpɩ a ha wɛr fɛw bɩɛlbɩɛl tutuu na bʋlabi khɩna, a hana wɩ hɔ̃ le na dɔ lɩnanɛ wɩ tɔ bʋlabirsɔrara.

17 Agɩpɩ dɩ so war: Na n hɩnɛ mɔ̃ mɩ n cʋʋnɩ, sɩ na cʋɛ ɩ̃ kha. Ɔbɔɔkɛ ma danɩ jɛ pa nʋɔra, gɩrɛ ma cʋʋnɩ nɩ cʋɛ otirǝ. 18 A mɩ ʋ̃ tutuu, mɛrɛ na wɩrɛ fɛʋʋkɛ hana mɩnɩ kha, nɩ ʋna dakha anɩ tutuusɔ ner bilǝ bilǝ a fena jɛʋra sa hulene ayɛ: Thãgba Kɔ̃tɩnɩda gɩ na Jedẽɔɔda. 19 Dɩ dɩnɩr khʋra Jedẽɔ daan Madɩ̃a sɔrasɛɛ jɛ nɔra na kona tamaakɛra (100) hanɩ kha na ɔr; dɩɩ do gɛr wɩ debiro bɛrbɛra debi phaa. Dɩ wɩ ʋnɛ tutuusɔ sa cʋɔr bʋlabirsɔɔkɛ wɩ fʋrɔnɩ ɲɔ̃kɔɔ. 20 Gbulona yẽtherɩle ʋ̃ awɩ tutuusɔ sa cʋɔr awɩ bʋlabirsɔra. Agɩpɩ dɩ wɩ jã hɔ̃ lera ƴũu na ɲɔ̃bɩlã sa fʋrɔ tutuusɔ na ɲɔ̃bɔɔ sɩ dɩ wa n hulẽ aa: Thãgba Kɔ̃tɩnɩ bajɩna gɩ, na Jedẽɔɔ bajɩna! 21 Sɩ ntɛ jɩɩl ɔɔ pa wɛr fɛw bɩɛlbɩɛl a dii jɛw. Dɩ wɩrɛ fɛw hanɩ jɛw mar dɩ wa n caalɛ dɩ wa n hulena. 22 Dɩ mɔ̃ kona tãatherɩle n (300) ʋnɩ tutuu, Thãgba Kɔ̃tɩn cʋʋrɛ dɩ le jɛʋra fɛw, Madɩ̃a sɔrasɛ bir tɛ kha awɩ ha, dɩ wa n kʋʋr kha na bajɩna. Pɩpɩɩ paar dɩ wɩrɛ sɛnɩ caalɛ a jal Bɛtɩ-Sɩta dɩɩra, kɛ hanɩ Sereda dɩ khʋra, foo a jal danakɛ Abɛl-Mehola dɩɩra, kɛ hanɩ Tabatɩ dɩ nʋɔra.

23 Dɩ Ɩjɩrayɛl bɩsanaa sɔrasɩsɔ, kɛ thɛnɩ Nɛfɩtalɩɩ cara na Ajɛɛrɩ cara na Manasee cara ɓibi kpar a weele Madɩ̃a sɔrasɛ dɩ wa n kpaan. 24 Dɩ Jedẽɔ thɔnanɛ thɔ̃thɔna Efɩrayɩmɩ mǝli gɔ̃gɔ̃ dɩsɔra fɛw a so war aa: Nɩ kʋlɛ ƴɩɛ a gbuno a vara Madɩ̃a sɔrasɛ ɲɔ ɲɔ paarsɔ, a jala danana Bɛtɩ-Bara bǝǝnnǝ, na Jʋrdɛ̃ mɩɩr thɛlɛ̃ paarsɔ fɛw. Dɩ kona fɛw Efɩrayɩmɩ cara gbuni a var Madɩ̃a sɔrasɛ ɲɔ ɲɔ paarsɔ, a jala dana Bɛtɩ-Bara bǝǝnnǝ na Jʋrdɛ̃ mɩɩr thɛlɛ̃ paarsɔ fɛw. 25 Dɩ wɩ fʋlɛlɛ Madɩ̃a kɔ̃tɩna yeɲɔɔkɛ bɩɛl n donɩ Orɛbɩ, sɩ bɩɛl na n do Jɛbɩ. Dɩ wɩ kʋrɛ Orɛbɩ, Orɛbɩ bokaarra sa kʋ Jɛbɩ, Jɛbɩɩ dɩvɛ̃ ti pa. Dɩ wɩ weelele Madɩ̃adara a kpaan, sa jalna Orɛbɩɩ yʋ na Jɛbɩɩ yʋ a ha Jedẽɔ, le Jʋrdɛ̃ mɩɩr iiro.