Caar makonyɔɔkɛ sɛnɩɩ thɩ \ref Joj 14.1-5; Ther 33.53
18
1 Ɔbɔɔkɛ Ɩjɩrayɛl bɩsana teenɩ dɩɩ fɛw a pɛ ɲɔ̃kɔɔ, wɩ kpar fɛw a jɛ Silo dɩɩra, a dʋ Thãgbaa kẽkẽ wa. 2 Caar makoɲɔ Ɩjɩrayɛl bɩsanaa thɩ̃thɩɩn, kɔɔ sɩrɛ wa 'lɛ awɩ thɩsɔ pa'. 3 Dɩ Jojue so Ɩjɩrayɛl bɩsanana: «Ka na mǝmǝlǝ̃ na dana sɩ na too dɩɩraakɛra Thãgba Kɔ̃tɩnɩkɛ dɔnɩ anɩ thɩthɩsɔɔ Thãgba ha nɩnɩ? 4 Nɩ phire anɩ thɩ̃thɩɩn caar wo caara tɩbɩla yẽther yẽther, ɩ̃ thɔ̃ wɩ, wɩ kpaar Kanãa dɩɩra wɩ finǝ, wɩ hɩɩn paarsɔra wɩ ha wɩnɩ agɩpɩ, wɩ ɩ̃ wɩ mɩɛ mɩ. 5 Wa tɩnɛnɛ dɩɩra tɩnɛ paar makoɲɔ. Judaa mǝlsɔ na toore wi phã paar ɲɔ̃bɩlana awɩ thɩra, Jojɛfɩɩ mǝlsɔ n too awɩ thɩra wi phã paar ɲɔ̃bɔɔra. 6 Nɛrɛ, nɩ jalla hɩnɛ mɔ̃ paara hanɩ, a tɩnɛnɛɛ tɩnɛ paar makoɲɔ, a ɛna nɛna mɩ. Ma lɩrɛ lɩɩ na anɩ i, kɩɛra Thãgba Kɔ̃tɩn asɩ Thãgbaa ƴɛra. 7 Sɩ Levɩɩ mǝlsɔ wer na 'lɛ thɩɩ anɩ thɩ̃thɩɩna'. Thãgba Kɔ̃tɩnɩ bonɩ ji thɔ̃ na dɔ awɩda. Gadɩɩ mǝlsɔ na Ribɛ̃ɛ mǝlsɔ na Manasee ca kur wer 'lɛr awɩ thɩ Jʋrdɛ̃ mɩɩr iiro wi phã paar. Thãgba Kɔ̃tɩnɩ thɔ̃daar Mʋɩjɩ kɔɔ hana wɩ. 8 Dɩ tɩbɩlaale gbaar jal. Jojue kɔɔ so warɛ, wɩ jalla kpaarɛ dɩɩra a fenǝ, a hɩnɛ mɔ̃ thɩ̃ɛ hanɩ fɛw sa kɛrra pɔ nar, ɩnɩ n lɩ lɩɩ na awɩ i Thãgba Kɔ̃tɩn ƴɛra Silo dɩɩra, sɩ ɩnɩ tɩnɛ wɩ. 9 Dɩ tɩbɩlaale jaal a kpaar dɩɩra fɛw a finǝ, a tɩnɛɛ tɩnɛ paar makoɲɔra a khere pɛ thɩ̃ɛna na agɩ dɩsɔ a kɛrna birnǝ Jojuera Silo jɛw. 10 Dɩ Jojue lɩrɛ lɩɩ na awɩ i Thãgba Kɔ̃tɩnɩ ƴɛra sa tɩnɛ wɩ paarsɔ mɔna ca dɔɔ teenanɩ a 'lɛ.Bɛ̃jamɛ̃ɛ mǝlsɔɔ thɩɩkɛ lɩɩ nɩrɔnɩ \ref Dǝt 33. 12
11 Caca paarɩkɛ lɩɩ nɩrɔnɩ dʋɔn Bɛ̃jamɛ̃ɛ mǝlsɔɔ thɩ mɔ̃kɛra awɩ thɩ kɔ̃sɔ hanɩ. Dɩ awɩ thɩ har Judaa məlsɔɔ thɩ na Jojɛfɩɩ mǝlsɔɔ thɩɩ thɩ̃thɩɩn. 12 Wi phã paar ɲɔ̃bɔɔra, awɩ pɛl fʋrɛ Jʋrdɛ̃ mɩɩra, a jʋʋnna Jeriko gɛlʋ wi phã paar ɲɔ̃bɔɔra, a kpãasɛ jʋʋn gɔ̃gʋɔnnɔ wi lõ pa khɔra a jal cu Bɛtɩ-Avã bǝ̃ kparara. 13 Pɛl ther liir a ka Luuji. A kar na Luuji gɛllʋ wi phã paar ɲɔ̃bɩlana. Luujira wɩ n kɔɔ we dakha Betɛl. Pɛlla jʋʋnɛ gɔ̃gʋɔnnaakɛ hanɩ Bɛtɩ-Horɔ̃ dɩɩraakɛ hanɩ tɩɛr, wi phã paar ɲɔ̃bɩlana a gbũ Atɩrɔtɩ-Adaar dɩɩra. 14 Wi lõ paar, pɛl kɛrɛ liir a jal wi phã paar ɲɔ̃bɩlana, a jal gɔ̃gʋɔnnaakɛ pɛnɩ Bɛtɩ-Horɔ̃ ƴɩɛ a jal cu Kɩrɩyatɩ-Baal dɩɩra kɛ wɩ n wenɩ wo Kɩrɩyatɩ-Yearɩm kɛ dɔnɩ Judaa mǝlsɔɔ dɩ. Thale dɔ awɩ pɛl wi lõ paar. 15 Wi phã paar ɲɔ̃bɩlana, pɛl fʋrɛ Kɩrɩyatɩ-Yearɩm, a ka wi lõ pa khɔra, a jal dã Nɛfɩtʋa ɲʋɔnsɔ, 16 a kpaasɛ a gbũ gɔ̃gɔ̃ khu paar, kɛ pɛnɩ ƴɩɛ Hɩnɔmɩ ɓɛlɛna, Refayɩmɩ mǝlsɔ ɓɛlɛnɔ wi phã paar ɲɔ̃bɔɔra, a gbunǝ Hɩnɔm ɓɛlɛ̃ Jebusɩdaraa gɔ̃gɔ̃ hor wi phã paar ɲɔ̃bɩlana a jal thʋ En-Rogɛl. 17 Gɩ kɛrnanɛ wi phã pa ɲɔ̃bɔ bilo a jal thʋ En-Semɛsɩ, a pho jal Gelɩlɔtɩ kɛ pɛnɩ ƴɩɛ Adumɩm jʋʋn paar, a the liir a gbũ Bohanɩ boka khɔra. Ribɛ̃ɛ bikuun bɩɛl n dʋɔn Bohan. 18 Gɩ kar na gɔ̃gɔ̃ horʋ wi phã paar ɲɔ̃bɔɔra kɛ pɛnɩ ƴɩɛ Jʋrdɛ̃ ɓɛlɛna a gbũ ɓɛlɛnɔ, 19 a pho jalna Bɛtɩ-Hogɩla gɛl khʋʋ, wi phã paar ɲɔ̃bɔɔra, a jal khu thɩɩraakɛ gɔnɩ lõ laɲɔ̃ khirera wi phã paar ɲɔ̃bɔɔra, a jalna ka Jʋrdɛ̃ mɩɩr ɲʋɔn n lonanɩ laɲʋɔnnɔ wi phã paar ɲɔ̃bɩlana. Thale dɔ khɩɛrʋ wi phã paar ɲɔ̃bɩlana. 20 Wi phã paar, Jʋrdɛ̃ dɔ pɛl. Thale dɔ Bɛ̃jamɛ̃ɛ mǝlsɔɔ thɩɩkɛ wɩ 'lɛnɩ mɔna awɩ thɩ kɔ̃sɔ hanɩ. Thale awɩ pɛl ka fi bilo bilo.
21 Dɩɩsɔɔkɛ dɔnɩ Bɛ̃jamɛ̃ɛ mǝlsɔ dɩ mɔna awɩ thɩ kɔ̃sɔ hanɩ ha gɩrɛ: Jeriko, Bɛtɩ-Hogɩla, Emɛkɩ-Kesɩ, 22 Bɛtɩ-Araba, Semarayɩm, Betɛl, 23 Avɩm, Para, Ɔfɩra, 24 Kefaar-Amona, Ɔfɩnɩ, na Geba; dɩɩ yʋɔr yeɲɔ gɩ na agɩ dɩ bisɔ. 25 Gabaɔ̃, Rama, Beerɔtɩ 26 Misipe, Kefɩra, Mosa, 27 Rekɛm, Ɩɩrpeyɛl, Tarala, 28 Sela, Elɛfɩ, Jerujalɛm, kɛ dɔnɩ Jebusɩdaraa dɩ, Gɩbea na Kɩrɩyatɩ; dɩɩ yʋɔr yenã gɩ na agɩ dɩ bisɔ. Thale dɔ Bɛ̃jamɛ̃ɛ mǝlsɔɔ thɩ, mɔ̃ awɩ thɩ kɔ̃sɔ hanɩ.