Mɔ̃ wɩ tɩnɛnɩ Kanãa dɩɩ Jʋrdɛ̃ wi lõ paar \ref Ther 26. 52-56; 34.
14
1 Yɛkɛ thɩɩkɛ Ɩjɩrayɛl bɩsana 'lɛnɩ Kanãa dɩɩra, Jʋrdɛ̃ wi lõ paar kɛ dɔnɩ gɩrɛ bonɩ jidaar Eleajaar na Nunii bikuun Jojue na Ɩjɩrayɛl bɩsana cɔdaar kõsɔ ha wɩnɩ dɩ wɩ tɩnɛ. 2 Mɔna Thãgba Kɔ̃tɩn kɔɔ sonɩ Mʋɩjɩra, lɩɩ wɩ lɩ sa tɩnɛ caar yʋɔr phe bireele na dakuruukɛ sɛnɩ, awɩ thɩ. 3 Mʋɩjɩ kɔɔ tɩnɛnɛ caar yeɲɔ na dakuru thɩɩ Jʋrdɛ̃ iiro wi phã paar sɩ aa kɔɔ ha Levɩɩ ca thɩɩ awɩ thɩ̃thɩɩna'. 4 Jojɛfɩɩ bikũusɔ kɔɔ ha caar yeɲɔ: Manasee ca na Efɩrayɩmɩ ca. Sɩ Levɩɩ ca wer, wa ha wɩ thɩɩ le dɩɩra ga. Dɩɩsɔɔkɛ wa tooronɩ wɩ ha wɩ dɩbara na agɩ dɩ khuisɔ, ka awɩ nʋ̃sɔ na awɩ thɩ̃ ɩkhasɔ na toonɩ. 5 Dɩ mɛ̃ Ɩjɩrayɛl bɩsana tɩnɛ dɩɩra mɔna Thãgba Kɔ̃tɩn kɔɔ sonɩ Mʋɩjɩra.Jojue har Kalɛbɩ Ebʋrɔ̃ dɩɩ
6 Wi bɩɛl, Judaa mǝlsɔ tɔr dã Jojuee pa le Gɩlgal. Dɩ Yefuneekɛ dɔnɩ Kenaajɩ mǝl, ɔɔ bikuun Kalɛbɩ so Jojuera: «Fɛrɛ, fɩ jɩnanɛ gɩrɛ Thãgba Kɔ̃tɩnɩ thɔ̃daar Mʋɩjɩ, kɛ dɔnɩ Thãgbaa tibil kɔɔ sonɩ Kadɛsɩ-Baarnea mɛrɛ na fɛrɛɛdara. 7 Le Kadɛsɩ-Baarnea dɩɩra, ɔbɔɔkɛ Thãgba Kɔ̃tɩnɩ thɔ̃daar Mʋɩjɩ n kɔɔ thɔ̃ mɩnɩ Kanãa dɩɩ gɩɩl pa, yɛna kpalaɲɔ mɩ kɔɔ hana. Dɩ bɔɔkɛ mɩ kɛrnɩ bir, mɩ mɩɩ ɛr sobɔr gɩrɛ fɛʋraakɛ mɩ yɩnɩ. 8 Ɩ̃ omɩsɔɔkɛ sɩ kɔɔ jalanɩ kha, kɔɔ tor tɩbɩla maar. Sɩ mɛrɛ, mɩ kpar Thãgba Kɔ̃tɩn, ɩ̃ Thãgbaa hʋra mɔ̃ teananɩ. 9 Dɩ Mʋɩjɩ ʋlfɛrɛ ga wiilera aa dɩɩkɛ mɩ kpaarnɩ finǝ, ɔr na dɔ ɩ̃ dɩ, na ɩ̃ mǝlsɔɔda bɔɔ khor, gɩdonɩ mɩ kpar Thãgba Kɔ̃tɩn ɩnɩ Thãgbaa hʋra mɔ̃ teananɩ. 10 Dɩ nɛnɛ̃ Thãgba Kɔ̃tɩn cʋʋ mɛr dɩ mɩ hana yire mɔna a kɔɔ sonɩ. Yɛna kpalaɲɔ yemɔy gɩ cʋʋ gɩrɛ Thãgba Kɔ̃tɩn mɩɩnɩ Mʋɩjɩ gelela ɔbɔɔkɛ Ɩjɩrayɛl bɩsana kɔɔ hanɩ bə̃ kparara dɩ wa n jal. Dɩ nĩ gɩrɛ, mɛr ha ʋ, yɛna kpalanã yemɔy mɩ hana. 11 Mɩ hananɛ fãga 'lo a ho bɔɔkɛra Mʋɩjɩ kɔɔ thɔ̃ mɩnɩ. Dɩ nɛnɛnakɛ 'lo fãga ha marɛ a ho mɔna mɩ kɔɔ hana gɩnɩ, a ko kɩɩra gɩ, a thɔ̃ ɩkhara gɩ. 12 Gɛr gɩ hana mɩ gɔ̃gɔ̃ bǝǝnnɩkɛ Thãgba Kɔ̃tɩn sonɩ ga wiilera. Fɩ nɩɛrɛ ga wirǝ dɩ Anakɩɩ mǝlsɔ hãa le; dɩ dɩ kɔ̃tɩna hãa le dɩ wɩ mɩ gʋʋ a kpalalɔ. Ado Thãgba Kɔ̃tɩn har kha na mɛrɛ, ma weele wer, sɩ na taa dɩɩ mɔna a sonɩ.
13 Dɩ Jojue bɔnanɛ Kalɛbɩ Yefune bikuun, sa haa Ebʋrɔ̃ dɩɩ. 14 Thale gɩ dã sɩ Yefune kɛ dɔnɩ Kenaajɩ mǝl, ɔɔ bikuun Kalɛbɩ 'lɛ Ebʋrɔ̃ dɩɩ, dɩɩ dana nĩ gɩdonɩ a kɔɔ kpar Thãgba Kɔ̃tɩn, Ɩjɩrayɛl Thãgbaa hʋra mɔ̃ teananɩ.» 15 Ɔbɔɔkɛ Kalɛbɩ na kɔɔ teenɩ Ebʋrɔ̃ dɩɩ pa', Kɩrɩyatɩ-Arba dɩɩra n kɔɔ do. Arba kɔɔ the ire Anakɩɩ mǝlsɔra a jɔ wɩ fɛw. A fʋna ga bɔɔle dɩɩ ie, kʋʋr na hala'.