Kanãa dɩ gɩrɛ sɛnɩ teerera. \ref So 3.1-5; 1. 27-36; The 32.
13
1 Jojue kɔɔ tɩnɛ waa gel. Dɩ Thãgba Kɔ̃tɩn sʋʋraa: «Hɩnɛ, fɩ tɩnɛ waa gel, sɩ dɩɩsɔɔkɛ sɛnɩ teerera jɔr ka. 2 Yɛkɛ dɩɩsɔɔkɛ sɛnɩ teerera: Fɩlɩsɩtɛ̃sɔ dɩsɔ fɛw na Gesuurdaraa dɩsɔ; 3 fɔnɩ Sɩhɔɔr mɩɩraakɛ n celanɩ ka Ejipiti dɩɩ pɛnɩ ƴɩɛ a jal dã Ekʋrɔ̃ pɛlla wi phã paar ɲɔ̃bɔɔra, bǝ̃ǝle fɛw wɩ n hɩɩnɩ dɩɩ ho Kanaadara bǝ̃, ka Fɩlɩsɩtɛ̃sɔ kɔ̃tɩ̃sɔ yemɔy hanɩ kɛ dɔnɩ Gaja dɩɩ na Asɩdɔdɩ dɩɩ na Asɩkalɔ̃ dɩɩ na Gatɩ dɩɩ, na Ekʋrɔ̃ dɩɩ na Avadara dɩ wi phã pa ɲɔ̃bɩlana. 4 Dɩ gɩrɛ sɛnɩ dakha teerera wo dʋɔn, Kanãadaraa dɩ fɛw, na Araakɛ dɔnɩ Sɩdɔ̃daraa dɩ, a jal dã Afɛkɩ kɛ hanɩ Amɔɔr məlsɔ pɛlla, 5 Gebal bə̃, na Lɩbã fɛw jalananɩ wi phã paar fɔnɩ Baal-Gad Hɛrmɔ̃ gɔ̃gɔ̃ nɔɔra a jal dã mɔ̃ fa n lonɩ Lebo-Hamatɩ dɩɩra; 6 na dakha wɩrɛ hanɩ gɔ̃gɔ̃ bəənnə fɔnɩ Lɩbã a jal thʋ Misirefɔtɩ-Mayɩm kɛ dɔnɩ Sɩdɔ̃dara fɛw. Ma weelele ga bǝ̃daraale fɛw Ɩjɩrayɛl bɩsanaa ƴɛra. Lɛ lɩɩ sa tɩnɛnɛ Ɩjɩrayɛl bɩsana dɩɩra fɛw mɔna mɩ kɔɔ so farnɩ. 7 Nɛnɛ̃ɛkɛ, tɩnɛnɛ dɩɩsɔɔle caar yʋɔr phe bireele na Manasee ca kur.»Mɔ̃ wɩ tɩnɛnɩ dɩ gɩrɛ sɛnɩ Jʋrdɛ̃ wi phã paar.
8 Ribɛ̃ɛ məlsɔ, na Gadɩɩ məlsɔ, na Manasee ca kur bɩɛl, kɔɔ 'lɛr thɩɩsɔ Jʋrdɛ̃ iiro wi phã paar wɩ tɩnɛ. Thãgba Kɔ̃tɩnɩ thɔ̃daar Mʋɩjɩ kɔɔ hana wɩ. 9 A fʋ Aroyɛɛr dɩɩra, Arnɔ̃ kɔlɔ̃ nʋɔra, na fɔnɩ dɩɩkɛ hanɩ ɓɛlɛ̃ thɩ̃thɩɩn, na Medeba bə̃ fãa fɛw a jal thʋ Dɩbɔ̃ dɩɩ; 10 na dakha Sɩhɔ̃ɔkɛ dɔnɩ Amɔɔr məlsɔ jamana kɛ kʋmadɩnɛnɩ Hɛsɩbɔ̃ɔ dɩɩra, ɔɔ dɩsɔ fɛw a jal thʋ Amɔ̃ɔ bikũusɔ pɛlla. 11 Na Galaadɩ bəən, na Gesuurdara na Maakadaraa bə̃, na Hɛrmɔ̃ gɔ̃gʋ̃ɔ fɛw, na Basã bǝ̃ǝ fɛw a jal dã Salka dɩɩ; 12 na Ɔgɩɩ jamana dɩ fɛw Basã bəənnə. Ɔgɩra dʋɔn bɩɛl Refayɩmɩ mǝlsɔɔraakɛ sɛnɩ; ɔr n kʋmadɩnɛ Asɩtarɔtɩ na Edireyi dɩɩ. Mʋɩjɩ kɔɔ kʋrɛ wɩ sa taa dɩɩsɔ. 13 Sɩ Ɩjɩrayɛl bɩsana na kɔɔ weele Gesuurdara na Makatɩdara ga. Gɛr dɔ nɔɔ dɩ wɩ too Ɩjɩrayɛl bɩsanaa thɩ̃thɩɩn a dana nĩ.
14 Levɩɩ ca dɩbara wa kɔɔ ha thɩa'. Bonɩɛ fɛʋʋkɛ wɩ n thiini dɔɔra Thãgba Kɔ̃tɩnnaakɛ dɔnɩ Ɩjɩrayɛlɩ Thãgba gɛr dɔ awɩda mɔna Thãgba kɔɔ so warnɩ.
15 Mʋɩjɩ kɔɔ har Ribɛ̃ɛ məlsɔ thɩɩ mɔna awɩ cɔ kasɔ hanɩ. 16 Wɩ 'lɛr awɩ dɩ dɩɩ fʋ Aroyɛɛr dɩɩraakɛ hanɩ Arnɔ̃ kɔlɔ̃ nʋɔra a gbana dɩɩkɛ hanɩ ɓɛlɛ̃ thɩ̃thɩɩn, na bə̃ fãakɛ fɛw khonǝni Medeba. 17 A gba Hɛsɩbɔ̃ dɩɩ na ɔɔ dɩsɔ fɛʋʋkɛ hanɩ bə̃ faana: Dɩbɔ̃ na Bamɔtɩ-Baal, na Bɛtɩ-Baal-Meɔ̃, 18 na Yahasɩ, na Kedemɔtɩ na Mefaatɩ, 19 na Kɩrɩatayɩm, na Sɩbɩma, na Seretɩ-Sahaar kɛ hanɩ gɔ̃gʋɔnaakɛ hanɩ le ɓɛlɛnɔ; 20 na Bɛtɩ-Peɔr, na Pɩsɩga gɔ̃gɔ̃ horʋsɔ, na Bɛtɩ-Yesɩmɔtɩ. 21 Wɩ 'lɛr dakha dɩɩsɔɔkɛ hanɩ bə̃ faana fɛw, na Sɩhɔ̃ɔkɛ dɔnɩ Amɔɔr məlsɔ jamanaa dɩɩsɔ fɛw. Sɩhɔna n kɔɔ kʋmãdɩnɛ Hɛsɩbɔ̃. A kɔɔ cʋʋrɛ Madɩ̃a kɔ̃tɩna dɩ wɩ wurrəə. Sɩ Mʋɩjɩ kɔɔ kʋʋrɛ ɔr na Madɩ̃a kɔ̃tɩnaalera dɔnɩ Evɩ, na Rekɛm, na Suur, na Huur, na Reba. 22 Bewɔɔrɔ bikuun Balamɩkɛ dɔnɩ bobon kɔɔ har dakha wɩrɛraakɛ Ɩjɩrayɛl bɩsana kʋʋrnɩ. 23 Ribɛ̃ɛ mǝlsɔɔ pɛl wi lõ paar khɩɛrɛ Jʋrdɛ̃. Gɛr dɔ Ribɛ̃ɛ mǝlsɔ thɩ, mɔ̃ awɩ cɔ kasɔ hanɩ; awɩ dɩ na awɩ dɩ bisɔ.
24 Mʋɩjɩ kɔɔ har Gadɩɩ məlsɔ thɩɩ mɔna awɩ thɩ kɔ̃sɔ hanɩ. 25 Wɩ kɔɔ 'lɛr Yajɛɛr dɩɩ, na Galaadɩ dɩɩsɔ fɛw, na Amɔ̃ɔ mǝlsɔ dɩ ɓɛl a jal thʋ Aroyɛɛr Raba dɩ nʋɔra. 26 Agɩpɩ pɛl ther Hɛsɩbɔ̃ dɩɩra a jal dã Ramatɩ-Misipe na Betonɩm dɩɩ, a fʋ Mahanayɩm dɩɩra a jal thʋ Lo-Dabaar bəənnə. 27 Dɩ Jʋrdɛ̃ pobãʋ, wi phã paar, dɩɩsɔɔkɛ hanɩ le dʋɔn: Bɛtɩ-Haram, Bɛtɩ-Nɩmɩra, Sukɔtɩ, Safɔ̃. Gɛr dʋɔn Hɛsɩbɔ̃ jamana Sɩhɔ̃ɔ dɩsɔ na dɩ gɩrɛ hanɩ Jʋrdɛ̃ wi phã paar a jal thʋ Kɩnerɛtɩ laɲɔ̃ khu paar. 28 Gɛr dɔ Gadɩɩ mǝlsɔɔ dɩsɔ mɔ̃ awɩ thɩ kɔ̃sɔ hanɩ: awɩ dɩ, na awɩ dɩ bisɔ.
29 Mʋɩjɩ kɔɔ har Manasee ca kur thɩɩ mɔna awɩ thɩ kɔ̃sɔ hanɩ. 30 Wɩ 'lɛr awɩ dɩ, fɔnɩ Mahanayɩm, Basã fɛw, Basã jamana Ɔgɩɩ jamana dɩ fɛw, na Yayɩɩr dɩ bi kpalãtherɩkɛ hanɩ Basã bǝǝnnǝ. 31 Wɩ har Manasee bikuun Makɩɩrɩ məlsɔ mɔna awɩ thɩ kɔ̃sɔ hanɩ Galaadɩ bə̃ kuruu, na Asɩtarɔtɩ na Edireyikɛ dɔnɩ Ɔgɩɩ jamana dɩ, le Basã bǝǝnnǝ.