Mʋɩjɩ mɩɛrɛ Ɩjɩrayɛl caar yʋɔr yeɲɔ bɔna thɩmɩaakɛ thɛnɩ Thãgbaa pa \ref Jen 49:1-28; Ther 28:17-21, 29-30.
33
1 Yɛkɛ bɔna thɩmɩaakɛ Mʋɩjɩɩkɛ dɔnɩ Thãgbaa tibil mɩɩnɩ pɛ Ɩjɩrayɛl bɩsanana sa khi. 2 A sor: Thãgba Kɔ̃tɩn ther Sɩnayɩ gɔ̃gʋɔnna.Seyɩɩ dɩɩra a phã mɔ̃ wire n phanɩ a carã wɩ.
Parã gɔ̃gʋɔnna a ha a carã ɔɔ too.
Thɔ̃thɔ̃ thu phuusɔ tǝ̃tǝ̃tǝ̃ǝ thɩ̃thɩɩn a kɔɔ ha,
sa ha ɔɔ too jɔfʋʋkɛ n caranɛnɩ dɔ khaa na ɔɔ ɲɔ̃bɔ.
3 Sobɔr gɩ, a nar tɩbɩla,
ɔɔ tɩɩ phusɔ fɛw har ɔɔ ɲɔ̃kɔɔ.
Wɩ har ɔɔ kalƴɔɔ dɩ wa n pɛ ɔɔ thɩmɩɩsɔ nũu.
4 Mʋɩjɩ ha sɛr jɔfʋ,
kɛ dɔnɩ Jakɔbɩ mǝlsɔɔ thɩ̃ ɓɔ̃.
5 Thãgba Kɔ̃tɩn kɔɔ dɔ Yesurun jamana,
dabɔɔkɛ Ɩjɩrayɛl bɩsanaa kɔ̃tɩ̃sɔ kɔɔ gbɛbɩnɩ kha na Ɩjɩrayɛl caar fɛw.
6 Dɩ Mʋɩjɩ so : "Ribɛ̃ɛ məlsɔ n hanana yire wa n khiir yuuǝ'
Wa kpɛrnɩnaka', sɩ wa n tǝ'."
7 Judaa məlsɔɔdara a so ayɩ :
Thãgba Kɔ̃tɩn, pɛ Judaa məlsɔɔ bɩɛl nũu,
cʋɛ wɩ 'likha kha na awɩ omɩsɔɔ
wɩ tee wa n pɛ awɩbarara na awɩ ɲɛ̃,
sɩ fɩ do awɩ bubul
fɩ tee fa n pɛ war awɩ lãlaardarara.
8 Dɩ Levɩɩ məlsɔɔdara a sor:
Thãgba, fɩ gbaar Tumɩm na Urɩm, kɛ wɩ n gbanɩ a jɩna afɩ tuur, a ha tibilikɛ telene farnɩ,
kɛra fɩ benɩ bɩnɛ Masa, a jʋʋrʋ hɩɩn Meriba ɲɔ̃ nʋɔra.
9 Wɩ na fɛr
a jɔ mɔ̃ wɩ nanɩ awɩ kɔ̃tɩ̃sɔ na awɩ õkũusɔ na awɩ bɩsãsɔ,
wɩ hɩɩnɛ afɩ jɔfʋ,
a fʋrɔ afɩ nɔ bɩɛl ʋlfɛ.
10 Wɩ n dɩɩrɛ Jakɔbɩ too gɩrɛ fɩ n sonɩ,
dɩ wɩ dɩɩr Ɩjɩrayɛl bɩsana afɩ jɔfʋsɔ.
Wɩ n thiire latɩkolo, kɛ n hʋna fɩnɩ daw,
dɩ wɩ ji bonɩ thiinə afɩ bonɩ ji para.
11 Thãgba Kɔ̃tɩn, bɔna wɩ a dɛba war fagã !
Bɔna awɩ ɲɛ̃ thɔ̃ fɛw!
Kʋɛa wɩrɛ n kɛ̃kɛrɛna wɩnɩɩ fagã,
wɩrɛra n laarɛ wɩnɩ, na n puno ɩɩr bã.
12 Bɛ̃jamɛ̃ɛ məlsɔɔdara Mʋɩjɩ sor:
Thãgba Kɔ̃tɩn nar Bɛ̃jamɛ̃ɛ məlsɔ.
Wɩ toore ɔɔ kɩrɔ da n bɛr wɩ.
Thãgba Kɔ̃tɩn n kɛɛ warɛ wire wo wire.
Bɛ̃jamɛ̃ɛ məlsɔɔ thɩ̃thɩɩn a n cɔ.
13 Jojɛfɩɩ məlsɔɔdara a so:
Thãgba Kɔ̃tɩn n bɔna Jojɛfɩɩ məlsɔɔ dɩ
Na thãgba ɲʋɔn na mɩ̃ɛ na ɲʋɔnɩkɛ n thɛnɩ thɩɩra tɩɛr,
14 na lɛ thɩ̃ɛsɔɔkɛ ɩtʋɛ n cʋʋnɩ dɩɩ phu,
na thɩ̃ɛsɔɔkɛ n dananɩ sɩpor wo sɩpor,
15 na thɩ̃ ɓɔnaakɛ hanɩ gɔ̃gɔ̃ mãmãmãnana na khorr gɔ̃gɔ̃ biisɔra,
16 na lẽle thɩɛ̃sɔɔkɛ hanɩ thɩɩra na thɩ bɩnɔ.
Dɔ ʋrɛɛkɛ nɛnanɩ ɔɔbara thɩr bi dɔ lɩnanɛna,
ɔɔ bɔna n dɛ̃ɛ Jojɛfɩɩ yʋɔ,
gɩ dɛ̃ɛ ɔrkɛ wɩ phiirni ɔɔ omɩsɔɔ thɩ̃thɩɩnɩ kubirǝ.
17 Jojɛfɩ 'lɛr i dʋbɩrɛ.
A hananɛ fãga a ho caca nakɩɩrɩkɛ wɩ kɔnɩ.
Ɔɔ ʋ̃sɔ hananɛ fagã a ho lar ʋma.
Gɛr a n weelena ca kpɩɩsɔ,
dɩ dana thɩ khu paar.
Ɔɔ ʋ̃ bɩɛl dor Efɩrayɩmɩ məlsɔɔkɛ jʋɔnɔnɩ a və̃vĩə,
dɩ bɩɛl do Manasee məlsɔɔkɛ jʋɔnɔnɩ.
18 Jabʋlɔ̃ɔ məlsɔɔdara na Ɩsakaarɩ məlsɔɔdara Mʋɩjɩ sor:
Nɛr Jabʋlɔ̃ɔ məlsɔ nɩ hanana daw anɩ ƴaƴabɩ thɔna,
Nɛr Ɩsakaarɩ məlsɔ, nɩ hanana daw anɩ hɩɩr pa anɩ kẽkẽ wasɔɔra.
19 Na wer tɩbɩla gɔ̃gʋɔna,
nɩ ji liir bonɩɛsɔ mɔ̃ jɔfʋ sonɩ,
gɩdonɩ na 'lɛr lẽle thɩ̃ɛ laɲʋɔnɔ jɔɔ,
nɩ 'lɛna lẽle thɩ̃ɛɛkɛ keranɩ gbalãkothɩnna.
20 Gadɩɩ məlsɔɔdara a sor:
Ʋrɛ hananɩ Gadɩɩ məlsɔ dɩ pɩɛ,
n hɩna i dʋbɩrɛ.
Gadɩ məlsɔ hor sidũ'ũu, kɛ nɔnɩ
nʋmɩ dɩ cɛcɛbɛɛ nɛɛ dɩ dana yʋʋ.
21 Gadɩɩ məlsɔ phiire pa bʋɔ dɩɩra,
wɩ 'lɛr paarɩkɛ dɔnɩ kɔ̃tɩnaada.
Wɩ gbanana tɩbɩla ƴɩɛ,
a cʋʋ Thãgba Kɔ̃tɩnɩ jɔfʋsɔ na gɩrɛra
a gbɛbɩnɩ Ɩjɩrayɛlla dɩɩ dã.
22 Dãa məlsɔɔdara a sor:
Dãa məlsɔ hor Sidũ'ũ ɓollʋʋkɛ
thɛnɩ Basã bəənnə da n bɩ̃.
23 Nɛfɩtalɩɩ məlsɔɔdara a sor:
Nɛr Nɛfɩtalɩɩ məlsɔ, nɩ 'lɛr Thãgba Kɔ̃tɩnɩ bɔna na ɔɔ bɔ cʋʋ dɩɩ kar,
Nɩ gba dɩɩkɛ hanɩ wi lõ paar, na wi phã paar ɲɔ̃bɩlanɔ a hɩna.
24 Ajɛɛrɩ məlsɔɔdara a sor:
Ajɛɛrɩ məlsɔ n 'lɛ bɔnanɛ Jakɔbɩɩ bikũusɔɔ thɩ̃thɩɩn!
Awɩ omisɔ n na wɩ
Awɩ olivi thɩra na n hana wɩ niin jɔɔ.
25 Awɩ lõ kpaladasɔ n dɔ ther na ther sɛdaa.
A wɩ tɩnakɛ mɔ̃, sɩ awɩ fãga na n pa'.
26 Agɩpɩ dɩ Mʋɩjɩ so:
Thãgba bɩɛllakɛ na hale a hona afɩ Thãgba ga yaa Yesurun!
Ɔɔ dawabɩ dora, a n the thãgbara ƴũu na ndɔlɔpanana dɩ gbũ na fãga dɩ taa fɩ.
27 Thãgbaakɛ hanɩle khorr, dʋɔn afɩ wɔ̃ pa.
Ɔɔ ɲɛ̃ɛkɛ hananɩ fãga bɔɔ khorr hale dɩ ga n bul fɩ.
Ɔr n te afɩ sodara dɩ pɛ ƴɔɔ,
sɩ dɩ yɩ fɩ kʋrɛ wɩ.
28 Ɩjɩrayɛl bɩsana toore na tu jɩɩr
Jakɔbɩɩ mǝlsɔ toore ɩtɩrɔ, dɩɩraakɛ bile na dɩvɛ̃ phuni
dɩɩ the mɩɛnaakɛ n jeni jɔɔ.
29 Gɩ da nɛr Ɩjɩrayɛl bɩsanana!
Ʋmɔ̃ ca hana le a hona nɩ,
nɛrkɛra Thãgba Kɔ̃tɩn n teenɩ dɩ pɛ?
Thãgba Kɔ̃tɩn dʋɔn tomɩr phidaakɛ n kɛa narnɩ,
na khalgbãakɛ n hana nɩnɩ kǝǝre.
Anɩ sodara na ɩnɛ na fɩɩl nɩ, sɩ na wɩɛlɛ awɩ sãasɩ pasɔ.