Mʋɩjɩɩ nɩ \ref Jɔb 36:2-3; Neh 9:7-31; Khɩ 105;106; Dan 9:4-14; Nɩr 3:17-19
32
1 Ƴũu, pɛ nũu gɩrɛ ma sonɩ.Thɩɩ, pɛ ɩ̃ nɔ thɩmɩɩsɔ nũu.
2 Ɩ̃ dɩɩrsɔ na n cella thãgba ɲɔ khaa,
Ɩ̃ thɩmɩɩ na n je mɔ̃ mɩ̃ɛ n jini,
Ga n cella mɔ̃ thãgba wa jɛ n pɛnɩ thɩ̃ phulolela,
Gɩ ho mɔ̃ mɩ̃ɛ n hanɩ hʋɔnna.
3 Ma kpagarɛ Thãgba Kɔ̃tɩnɩ i.
Nɩ dɩba asɩ Thãgba.
4 Bɛbɛr nãabʋ̃ʋ a do; ɔɔ thɔ̃ na hana sɩpaara'.
Ɔɔ hʋsɔ fɛw sarɛ.
Thãgba gɩɩkɛ dɔnɩ sobɔrdaar, gõgolone na haaraa ga.
Ɔr dʋɔn ʋrɛ saranɩ a telena.
5 Nɛr Ɩjɩrayɛl bɩsana, ado nɩ kʋɛ
Ga do Thãgbaa dɩpa ga, anɩ yicur gɩ
Nɩ dor caarɩkɛ puuronɩ a dona sɔ̃sʋ̃ɔdara.
6 Thãgba Kɔ̃tɩn nɩ n ha dɩɩ ya ?
Nɛr caarɩkɛ 'leanɩ fɩlɛ na kpɛsɛrɛ,
Ga do ɔr dɔ anɩ thɩ na anɩ tidaaraa?
Ga do ɔr cʋɛ nɩ, a gbɛbɩ nɩ dɩ nɩ toa' ?
7 Nɩ kpɩɛrɛna wiresɔɔkɛ kɔɔ kanɩ,
Nɩ jɛna mɔ̃ yɛnasɔ kanɩ məlle wo məllela fɛw,
Nɩ bulene anɩ thɩsɔ, wa mɩɛ nɛr,
Nɩ bulene tɩɩ kpɛɛnasɔ wa so narɛ.
8 Ɔbɔɔkɛ Ƴũu Pǝrdaar n kɔɔ tɩnɛnɩ caarsɔ thɩɩ,
Ɔbɔɔkɛ a n leenɩ Adãa məlsɔ dɩɩdɩɩ,
a pɛr pɛlsɔ tɩbɩlaa thɩ̃thɩɩn
a mɩɛna yemɔ̃ Ɩjɩrayɛlɩ bikũusɔ hanɩ,
9 Gɩdonɩ Thãgba Kɔ̃tɩnɩɩ too dʋɔn ɔɔ thɩ̃ɩkɛ a hɩnɩ,
Jakɔbɩɩ məlsɔɔ dɔ ɔɔ too.
10 Bǝ̃ kparara Thãgba Kɔ̃tɩn yɩɩ,
Hɔ̃ nʋ̃ khɩaa thɩ̃thɩɩn;
A kɛɛraarɛ a hɩɩnʋʋ.
A bɛrʋʋrɛ dɩɩ ho ɔɔ yi bi gɩ.
11 Mɔ̃ɔkɛ sɩgbʋra n cʋʋnɩ ɔɔ bisɔ tɩɛllɔ wɩ ubo,
Dɩ dɛ da n dii war,
Dɩ pɛ gbɛla,
dɩ gba wɩ dɩ dɛɛnɔ, ɔmɛ̃ a cʋʋna wɩ.
12 Thãgba Kɔ̃tɩn dɩbara kɔɔ thɔa ɔɔ too
Thãgba kpɩɩ na kɔɔ ha kha na ɔrra'.
13 A ha wɛr gɔ̃gɔ̃ dɩɩsɔ dɩ wɩ tooro,
A haan wɩ na lɛ thɩ̃ɛsɔ.
A n ha wɛr thʋʋr, kɛ n hanɩ nãabʋ̃ kanana,
Na niinikɛ n thɛnɩ olivi thɩraraakɛ n hanɩ boka thɩɩra,
14 A n haan wɛr na naƴɩlɛ̃ niin na bʋ ɩlɛ̃,
Na bana niin,
Na banakenaakɛ khʋɔnɛnɩ na bʋkenaakɛ khʋɔnɛnɩ,
Na bile ɓɔna.
Wɩ n ɲɔr dɩvɛ̃.
15 Yesuruna bɩsãsɔ khor a hi a ɩɩrna lãʋ Thãgbara,
Wɩ khʋɔnɛ, a nɩ, a pɩɛr,
A dʋna Thãgba awɩ tidaar a faa.
Wɩ beesire nãabʋ̃ʋkɛ dɔnɩ ɔɔ tataa.
16 Wɩ gbaar thãgba kpɩɩsɔ a cʋʋ gbugi n fʋɔnɛɛ,
Wɩ n caarɛ nĩkhii na cʋʋ pa kpalla,
17 Wɩ n jire bonɩɛ thɩlalaakɛ na dɔnɩ Thãgba ga,
Na thãgbasɔraakɛ wa jɩna',
kɛ ɩnanɩ ɩ̃ phaa kɛ awɩ thɩ kɔ̃tɩ̃sɔ na n kɔɔ fʋɔrna'.
18 Ɩjɩrayɛl bɩsana, na therna nãabʋ̃ʋkɛ hana wɩnɩ yirə',
wɩ diinǝne Thãgbaakɛ kɔna wɩnɩ.
19 Thãgba Kɔ̃tɩn yɩrɛ gelela, dɩɩ do beesire gɩ,
gɩdonɩ ɔɔ bikũusɔ na ɔɔ bikhɛrsɔ n kʋʋrɛ nĩkhii.
20 Gɛr gɩ dɩ so: "Ma firi khiru na pɛ war,
Sɩ ɩ̃ hɩɩn gɩrɛ na dana wɩnɩ pɩpɩɩ paar;
gɩdonɩ tɩbɩla wɛɛkɛ na bʋɔnɔna',
fa dɛ̃ɛ war ha pɛra'
21 Wɩ cʋʋrɛ dɩ gbugi fʋ mɩ, thɩ̃ɛnaakɛ na dɔnɩ Thãgba ga,
A kʋ mɩ nĩkhii na thɩlaakɛ dɔnɩ mɔlɔ thɩ̃ɛsɔ.
Gɛr gɩ, mɛrɛ dakha ma cʋʋrɛ gbugi n fʋ wɩ, tɩbɩlalaakɛ na dɔnɩ ca bɔɩa',
Ɩ̃ kʋ wɩ nĩkhii na caarɩkɛ na jɛnɩ fɩla'.
22 Ɩ̃ nĩkhiikɛ hɔnɩ dɔɔ mar,
ga hɩnɛ a na gbuno khĩdi dɩɩra tɩɛr,
ga hɩnɛ thɩɩ, na gɩrɛ fɛʋʋkɛ a n senɩ,
ga hɩnɛ na gbuno gɔ̃gɔ̃ bɩnɔsɔ tɩɛr.
23 Ma pɛ warɛ thɩlke caar dɩɩdɩɩ,
Ɩ̃ thaar wɩ, ɩ̃ sẽ n pɩ fɛw.
24 Ɔbɔɔkɛ kɔmɛr na jɔ warnɩ,
Tomɩr kporre na kho mananɛsɔ n pɩ wɩnɩ fãga fɛw
Ma tire nʋ̃ puunǝ na pɛ war,
na siisɔ,
25 Dɩ khuirə, bajɩna na n kʋʋr wɛr bɩsana,
Dɩ dɩ bɩnɔ, fɛw na n khire, gɩ do maar dɔ nɔɔ.
Ɔmɛ̃ ga ha daɓolala na khebirərə,
bibɔrɔsɔɔra na kɔ̃tɩ̃ yʋsũu bulodarara.
26 Mɩ kɔɔ ƴaalɛ ɩ̃ bũburõ wɩ fɛw,
Tibil na jɩna awɩda kpɩɩrakɛ bã.
27 Sɩ a mɩ cʋʋ mɛ̃ mɩ kpɩɛrnanɛ mɔ̃ awɩ sodara na ɓoɓoro marnɩ.
Awɩ sodara na kpɩɛrɛ ɩnɛr cʋɛ na ɩnɩɩ puno,
Ga do mɛr Thãgba Kɔ̃tɩn ga.
28 Caar gɩɩkɛ na n kpɩɛrɛnɩ ƴɔa',
Aa hana kpɛsɛra'.
29 Ado wɩ kɔɔ kpɛsɛrɛ, wa kɔɔ jɩrɛ,
Wɩ kpɩɛrna gɩrɛ n pɩɛrɛ wɩnɩ.
30 Mɔ̃ tɩɩ bɩɛl 'lẽ'lẽ na puno na n wee Ɩjɩrayɛl bɩsana gbɩlanɩ (1000),
Tɩbɩla yeɲɔ na n wee gbɩlanɩ yʋɔr (10 000) ,
A ga do awɩ bɛbɛr nãabõ faa wa?
A ga do mɛr Thãgba Kɔ̃tɩn gbaan wɩ a dʋ lãlaraa ɲɔ̃kɔa'?
31 Lãlaraa thɛthɛrakɛ
jɩrɛ dɩ awɩ bɛbɛr nãabõ na hona asɩ bɛbɛr nãabõa'.
32 Wa ba sodɔmdara na gomɔɔrdara ga.
Wɩ hʋrɛ dɩvɛ̃ thɩrʋʋkɛ sɛnɩ bi khaa,
kɛ hananɩ kpalʋ
33 Agɩ dɩvɛ̃, si kpalʋ gɩ,
Kpal puu gɩ a ho dɔ̃phãa kpalʋ.
34 Awɩ cʋʋ paakɛra ma gbanɩ na kɩɩlna wɩ hale a ker ɩ̃ pa dɩ̃ dʋrɔ jɩɩn.
35 Mɛr dʋɔn hel tiidaar, mɛr na tire awɩ hel
wireekɛ wa lɛnɩ hʋɛra.
Awɩ thɩlke wirə n wɔrɔnɛ,
Dɩ awɩ khu pa na n phana daan.
\ref Jer 50:51; Eje 30:18-19, 60
36 Thãgba Kɔ̃tɩn na teere na pɛ ɔɔ toora,
a na jɩrɛ ɔɔ thɔ̃dara bʋɔra.
Aa yɩ mɔ̃ awɩ fãga pɩnɩ
sɩ wa hana kpɩɛr dɛ̃ɛ paara'
wa hana bubulə'.
37 Sɩ a na bule wer: "Kana anɩ thãgbasɔɔra ha ?
Kana wɩrɛɛkɛra kɔɔ dɔnɩ anɩ bɛbɛr nãabõsɔ ha?
38 Kana thãgbasɔɔkɛra n kɔɔ khɔnɩ anɩ bonɩ ji nʋ̃ nĩ ha ?
Kana wɩrɛra n kɔɔ ɲʋɔnɩ anɩ bonɩ ji tã ha ?
Wɩ ɩrɛ taa nɩ, a bɛra nɩ.
39 Nɩ yɛ gɩ nɛnɛ̃ a jɛ dɩ mɛrɛ, mɛr bɩɛl 'lẽ'lẽ'lẽ dʋɔn Thãgba,
Dɩ Thãgba na hale a do mɛr gaaga'.
Mɛrɛ, mɛr n cʋɛ tibil dɩ hana yire, mɛr n cʋɛ tibil dɩ khi.
Mɛr n pɩɛr tibil khoo, mɛr n kpɛɛnɛ.
Tibil na n puno dɩ taa tibil ɩ̃ ɲɔ̃kɔa'.
40 Mɩ 'laarɛ ɲɔ̃ɔ thãgbara ƴũu
Sa so ayɩ: "Mɛrɛ, mɩ hananɛ yireekɛ na n pɛna'!"
41 A mɩ lee ɩ̃ bajɩna dɩ ga hɩl ƴãaƴãaƴãa,
ma kɩɩlnanɛ ɩ̃ sodara,
Ma tiir warɛ helu,
Ma pɛr wɩrɛ n laarɛ mɩnɩ sor.
42 Ɩ̃ sẽsɔ na dor tɔmɩn haa.
Ɩ̃ bajɩna na kʋʋrɛ ɩ̃ sodara fɛw
koken bɩɛllakɛ na fuə'
Wɩrɛ 'lɛnɩ kho sɩɛ na wɩrɛ wɩ fʋlɛnɩ na khiire fɛw.
43 Ca kpɩɩsɔ na n kãkanɛ kha na Thãgbaa too,
Gɩdonɩ Thãgba Kɔ̃tɩn n tiire ɔɔ thɔ̃daraa tɔmɩn hel,
A n tiire ɔɔ sodarara helu, sɩ a phʋɔl ɔɔ too thɩ. \ref Dǝt 31:28-30; 30:15-20; 1 Tes 2:11-12.
44 Dɩ Mʋɩjɩ na Nunii bikuun Jojue jaal tɩbɩlaa ƴɛra dɩ Mʋɩjɩ so nɩ be fɛʋʋkɛ na nɔ kheu wɩ nɩɛnɛ.
45 Ɔbɔɔkɛ Mʋɩjɩ mɩɩnɩ thɩmɩa fɛʋʋkɛ Ɩjɩrayɛl bɩsanana fɛw a pɩ, 46 a so warɛ: Nɩ gba thɩmɩa fɛʋʋkɛ mɩ so narnɩ nĩ gɩ do nar thɩ̃ kokʋʋ. Nɩ mɩa anɩ mǝlsɔ, gɩ do nɔɔ wa n hɩɩn wa n cʋʋna gɩrɛ fɛʋʋkɛ jɔfʋ sonɩ. 47 Thɩmɩɩrɩkɛra na do mɔlɔ thɩmɩa ga, sɩ anɩ yi gɩ. Gɛr na cʋɛ dɩ anɩ yi na pʋɔr dɩɩraakɛ na iirni Jʋrdɛ̃ mɩɩr sɩ na gba na hɩ̃.
Thãgba mɩɩrɛ Mʋɩjɩɩ khida \ref Dǝt 34:1-6; Khɩ 99:8-9.
48 Ga wiilera Thãgba Kɔ̃tɩn sor Mʋɩjɩra ayɩ: 49 "Jʋnɛ Abarɩm gɔ̃gɔnana, a jʋnɛ Nebo gɔ̃gɔ̃ yʋɔ, kɛ hanɩ Moabɩ dɩɩra ka Jeriko dɩɩ pɛnɩ ƴɩɛ sa hɩnɛ Kanãa dɩɩkɛra mɩ n hanɩ Ɩjɩrayɛl bɩsana wɩ hɩna. 50 Gɔ̃gʋɔnaalera fa khi fɩ gbũ afɩ kɔ̃tɩ̃sɔɔra mɔ̃ afɩ õkuun Aarɔ̃ khini Hɔɔr gɔ̃gʋɔna a gbũ ɔɔ kɔ̃tɩ̃sɔɔra. 51 Gɩdonɩ Aarɔ̃ na fɛrɛ nɩ kɔɔ nʋʋr marɛ nũu Meriba ɲɔ̃ nʋɔra Ɩjɩrayɛl bɩsanaa ƴɛra Sɩn bǝ̃ kparara, Kadɛsɩ dɩɩra. Ga wiile na kɔɔ nɩna wɩ dɩ mɛr dʋɔn Thãgbaakɛ teroni a ha kpɩɩa'. 52 Fa yɩrɛ dɩɩkɛra na yire mɩ n hanɩ Ɩjɩrayɛl bɩsana, sɩ fa lõ la'.