MƲƖJƖƖ PƖPƖƖ THƖMƖƖ NA ƆƆ KHI
Thãgba phiire Jojue dɩ do Mʋɩjɩɩ dedee \ref Joj 1:1-9; 1 Kor 16:13; Ebi 13:20-21
31
1 Mʋɩjɩ gbaar jal a mɩɩna Ɩjɩrayɛl bɩsana fɛw ayɩwɔɔ: 2 Nɛnɛ̃, yɛna tamaa na kpelẽ mɩ hana. Ma hana punone ma n thɔɔ nɩ bã. Dɩrakɛ Thãgba Kɔ̃tɩn so marɛ aa ma iir Jʋrdɛ̃ mɩɩrɩka'. 3 Thãgba Kɔ̃tɩn, anɩ Thãgbaa thɛthɛ na gbana nɛr ƴɩɛ a bũburõ caarsɔɔkɛ nɩ pɛrnɩ ƴɩɛ, nɩ ti wɩ awɩ dʋɔ. Dɩ Jojue na dɔ anɩ kɔ̃tɩ̃ mɔna Thãgba Kɔ̃tɩn kɔɔ sonɩ. 4 Thãgba Kɔ̃tɩn na bũburone caarsɔɔle mɔ̃ a bũburonɩ Amɔɔr məlsɔɔ jamanasɔ: Sɩhɔ̃ na Ɔgɩ na awɩ dɩsɔ. 5 Thãgba Kɔ̃tɩn na gba wɛr na dʋnɩ ɲɔ̃kɔɔ dɩ na cʋʋna wɩ mɔna jɔfʋ fɛʋʋkɛ mɩ ha nɩnɩ sonɩ. 6 Nɩ hanana 'lar na n do ɲɛ̃ɛ n khiir na', na n ma wa', na n jẽa' gɩdonɩ Thãgba Kɔ̃tɩn anɩ Thãgbaa thɛthɛ na gbaana nɩ ƴɩɛ. A na fi khiru na pɛ nara', a na faa nɩ kpɩɩa'. 7 Agɩpɩ Mʋɩjɩ wer Jojue, Ɩjɩrayɛl bɩsana fɛʋʋ ƴɛra a sʋʋraa: Hanana 'lar, fa n do ɲɛ̃ɛ n khiir fa'; gɩdonɩ fɛr na lonana tɩbɩlaakɛ dɩɩraakɛ Thãgba Kɔ̃tɩn ʋlfɛnanɩ awɩ thɩsɔ ɩnɩ n ha wɩ. Dɩ fɛr na tɩnɛnɛ wɩ dɩɩrra. 8 Thãgba Kɔ̃tɩn na gbana fɛr ƴɩɛ, a ha kha na fɛrɛ, a na fi khiru na pɛ fara', a na faa fɩ kpɩɩraka'. Fa n do maar n fʋ fa', fa n do haar n phaa fa'.Jɔfʋ sɛbɛ sor yɛna makoɲɔ wo yɛna makonyɔra. \ref 2 Kur 34:29-32; Neh 8:1-8; Th 2:39.
9 Dɩ Mʋɩjɩ kherere Thãgbaa jɔfʋra a ha bonɩ jidaraakɛ dɔnɩ Levɩɩ mǝlsɔ kɛ n gbaanɩ Thãgba Kɔ̃tɩnɩ ʋlfɛ khɛɛsʋ, na Ɩjɩrayɛl bɩsanaa kɔ̃tɩ̃sɔ fɛw. 10 Dɩ Mʋɩjɩ so warɛ ayɩ: yɛna makoɲɔ wo yɛna makoɲɔ yɩɛrra, yɛnasɔɔraakɛ dɔnɩ hel faa yɛna, wa too fɛtɩ bɔɔsɔ, 11 ɔbɔɔkɛ Ɩjɩrayɛl bɩsana fɛw na kpanɩ na jɛ Thãgba Kɔ̃tɩn anɩ Thãgbaa ƴɔɔ, paaraakɛ a na phiirni, na n sɔ jɔfʋʋkɛ Ɩjɩrayɛl bɩsana fɛʋʋ ƴɛra wa n nɩɛ. 12 Nɩ kpa tɩbɩla fɛw a dera: Kona na khɛra na bɩsana na kpakpalaakɛ na hanɩ anɩ thɩ̃thɩɩn gɩ do nɔɔ wɩ nɩɛ jɔfʋʋlera na sonɩ, wɩ dɩɩr wa n ma Thãgba Kɔ̃tɩn anɩ Thãgba wa n cʋʋna gɩrɛ fɛʋʋkɛ gɩ sonɩ. 13 Dɩ anɩ bɩsãsɔɔkɛ na jɛnɩ jɔfʋra pa', na nɩɛrɛ, wɩ dɩɩr wa n ma Thãgba Kɔ̃tɩn anɩ Thãgba bɔɔ fɛʋkɛ na toonɩ dɩɩraakɛ na iirni Jʋrdɛ̃ sɩ na tee na hɩ̃.
Thãgba Kɔ̃tɩn mɩɩrɛ mɔ̃ Ɩjɩrayɛl bɩsana na hanɩ dikhõo. \ref Ther 27:18-23; Dan 9:5-14; Dǝt 32; Th 20:25-31; 2 Pɩɛr 1:12-15
14 Thãgba Kɔ̃tɩn sor Mʋɩjɩra: "Afɩ khi bɔ n wɔrɔnɛ, wɛ Jojue nɩ pɔ kha mɛr Thãgba cãa waw, ɩ̃ haa ɩ̃ jɔfʋsɔ." Dɩ Mʋɩjɩ na Jojue gbaar jal Thãgba cãa waw. 15 Dɩ Thãgba Kɔ̃tɩn nɩna wɛr ɔɔbara, ndɔlɔ̃paara le Thãgba cãa wa lõfonʋɔra. 16 Dɩ Thãgba Kɔ̃tɩn sor Mʋɩjɩra: "Hɩnɛ fa khire kɛ na gbe. A fɩ khi pɩ, tɩbɩlaakɛ na ɩɩrɛ wa n fʋɔr thãgbasɔɔkɛ hanɩ dɩɩraakɛ wa lonɩ. Wa bo mer, wɩ kuur nɔ bɩɛl ʋlfɛrɛɛkɛ mɩ ʋlfɛna wɩnɩ. 17 Dɩ ma ɩɩrna warɛ nĩkhii ga bɔɔlera. Ma bo wer, ɩ̃ fi khiru ɩ̃ pɛ war. Ca kpɩɩsɔ na n kpoo warɛ. Thɩlke jɔjʋɔ na ha kʋɛrɛ na 'li wer. Dɩ wa n sor aa ɩnɩ Thãgba na ha kha na ɩnɛra' gɛr gɩ dɩ thɩlke ca gɩrɛ 'li nɩ. 18 Sɩ mɛrɛ, ga wiile, ma firi khiru a na pɛ war, gɩ do puure fɛʋkɛ wɩ cʋʋnɩ dɩ wa n fʋɔr Thãgba kpɩɩsɔ dɔ kɩrʋ. 19 Nɛnɛ̃ nɩ khera nɩɛɛkɛ a dɩrɛ Ɩjɩrayɛl bɩsana wa n khɩ̃ ; nɩɛle n do sojɩdaar mɛrɛ na Ɩjɩrayɛl bɩsanaa thɩ̃thɩɩn. 20 Ma thɔɔrɛ tɩbɩlaakɛ na lona dɩɩraakɛ thʋʋr na naƴɩlɛ̃ n celnɩ, kɛ dɔnɩ dɩɩkɛ mɩ ʋlfɛnanɩ awɩ thɩ kɔ̃tɩ̃sɔ ɩ̃ ha wɩ; wa khor thɩ̃ɛ na hi a na khʋɔn, sɩ wa bo mer, sɩ na fi wa n fʋɔr gɩ̃ thãgbasɔ. Wa n beesi mer, wɩ kuur ɩ̃ nɔ bɩɛl ʋlfɛ. 21 Dɩ ɔbɔɔkɛ thɩlkena jɔɔ na ha kʋɛrɛ na 'li wɩnɩ, nɩɛɛlera na pɛ war sor, gɩdonɩ awɩ mǝlsɔ na diinǝ ga, wa n khɩɩnɛ 'lo. Kpɩɛrɛɛkɛ hanɩ awɩ bɩnɔ nĩ mɩ kɔɔ jɩ gɛr sɩ ma lona wɩ dɩɩraakɛ mɩ ʋlfɛnɩ ɩ̃ ha wɩ pa'. 22 Dɩ ga wiilera, Mʋɩjɩ kherere nɩɛra a dɩɩr Ɩjɩrayɛl bɩsana. 23 Agɩpɩ Thãgba Kɔ̃tɩn mɩɩnanɛ Nuni bikuun Jojue thakɛ ayɩ wɔɔ: "Hanana 'lar, fa n do ɲɛ̃ɛ n khiir fa'. Fɛr na lonana Ɩjɩrayɛl bɩsana dɩɩraakɛra mɩ ʋlfɛnɩ ɩ̃ ha wɩ. Dɩ mɛrɛɛ thɛthɛ na ha kha na fɛrɛ.
24 Ɔbɔɔkɛ Mʋɩjɩ kherenɩ jɔfʋ fɛʋʋle sɛbɛra a pɩ, 25 a sor Levɩɩ mǝlsɔɔraakɛ n gbaanɩ Thãgba Kɔ̃tɩn ʋlfɛ khɛɛsʋʋ ayɩ: 26 "Nɩ gba jɔfʋ sɛbɛɛkɛ a thɩnɛ Thãgba Kɔ̃tɩn anɩ Thãgbaa ʋlfɛ khɛɛsʋ kɩrɔ, a too le a do Ɩjɩrayɛl bɩsanana so pɛdaar. 27 Mɩ jɩrɛ bɔɔbɔɔ anɩ nũ nʋʋr na anɩ lã. Ado na ɩɩr na lãʋ Thãgba Kɔ̃tɩnna ɔbɔɔkɛ mɩ hananɩ yire gɩrɛ anɩ thɩ̃thɩɩn, mɔ̃ na jɩɩ lã na pɔna a mɩ khi pɩ ? 28 Nɩ kpa wɩrɛ dɔnɩ ƴɛkʋla anɩ casɔɔra na anɩ sɔrasɩ kɔ̃tɩ̃sɔ a jɛ ɩ̃ ƴɛra, ɩ̃ mɩɩ wɩ thɩmɩasɔɔkɛ, thãgbara ƴũu na thɩɩ ƴɛbʋrɔ wɩ nɩɛ. 29 Gɩdonɩ mɩ jɩrɛ dɩ a mɩ khi pɩ, na lʋʋn puu cʋʋrɛra nɩ faa hʋɛɛkɛ mɩ nɩ narnɩ. Dɩ ɔbɔɔkɛ na cʋʋnɩ gɩrɛ puuronenɩ Thãgba Kɔ̃tɩnɩ ƴɛra, dɩ nĩkhii na fʋʋ, puure na dã nɛr bɔɔraakɛ na kpaanɛnɩ.
30 Dɩ Mʋɩjɩ sor nɩ beele fɛw a dana khu paar dɩ Ɩjɩrayɛl bɩsana fɛw nɩɛ.