Bɔnanɛɛkɛ Ɩjɩrayɛl bɩsana na 'lɛnɩ ado wɩ kɛr bir Thãgbara \ref Lev 26:40-45; Jer 29:10-14; Esd 1; Jer 30, 35; Eje 36, 37
30
1 Ɔbɔɔkɛ bɔna thɩmɩa na sɔ̃ thɩmɩasɔɔkɛ mɩ mɩɩ nɩnɩ na daanɩ oti, ado na kpɩɛrna gɩ ca kpɩɩsɔɔ thɩ̃thɩɩn, ka Thãgba Kɔ̃tɩn, anɩ Thãgba bɩ̃bɩlanɩ nɩ dɩ na ha, 2 ado nɩ kɛr bir ɔrra nɛrɛ na anɩ bɩsãsɔ, ado na nɩɩ nũu na anɩ ha fɛw na anɩ bɩ̃ fɛw, ado na kpa ɔɔ jɔfʋsɔɔraakɛ mɩ mɩɛnɩ nɩ fɛw nĩkɛ, 3 Thãgba Kɔ̃tɩn anɩ Thãgba na ti ner anɩ nɩwɛra. A na nɩna nɛr ɔɔ naw; a na bire na ti nɩ ca kpɩɩsɔɔ fɛʋʋ thɩ̃thɩɩn, kãkɛ a kɔɔ bɩ̃bɩlã nɩnɩ dɩ nɩ ha a birnə a gbɛbɩ pa bɩɛl. 4 Adorakɛ wɩ jala nɩ ƴɔɔ fĩi thɩ khu paar, sɩ Thãgba Kɔ̃tɩn anɩ Thãgba na kpaanɛ le a na kpa nɩ na ɩna dɩ na gbɛbɩ pa bɩɛl. 5 Thãgba Kɔ̃tɩn anɩ Thãgba na kɛrna nɛr na birnǝ anɩ thɩ kɔ̃tɩ̃sɔɔ dʋɔ dɩ na gba na hɩ̃. A na cʋʋ nɛr bɔɔ, a cʋʋ nɩ nɩ ler nɩ jɔ anɩ thɩsɔ. 6 Thãgba Kɔ̃tɩn anɩ Thãgba na phʋɔlɛ anɩ ha na anɩ mǝlsɔɔ ha, nɩ puno nɩ na Thãgba Kɔ̃tɩn anɩ Thãgba na anɩ ha fɛw na anɩ bɩ̃ fɛw, gɩ do nɔɔ nɩ hana yire. 7 Thãgba Kɔ̃tɩn anɩ Thãgba na gbaar thɩlkena fɛʋʋkɛ mɩ mɩɩ nɩnɩ a na pɛ anɩ lãlaardarara na wɩrɛ fɛʋraakɛ n laarɛ nɩnɩ dɩ wa n kpoo nar. 8 Sɩ nɛrɛ, na bire na n nɩ Thãgba Kɔ̃tɩn nũu na n cʋʋna ɔɔ jɔfʋsɔɔkɛ mɩ ha nɩnɩ nĩ. 9 Thãgba Kɔ̃tɩn anɩ Thãgba na cʋʋ nɛr bɔɔ a bɔna gɩrɛ fɛʋʋkɛ nɩ n cʋʋnɩ. A na ha nɛr bɩsana jɔɔ, anɩ nʋ̃sɔ n ler wɩ jɔr, a ha nɩ lɛ thɩ̃ɛ jɔɔ. Mɔ̃ɔkɛ Thãgba Kɔ̃tɩn n kɔɔ ƴaalnɩ anɩ thɩ kɔ̃tɩ̃sɔɔ dabɔ mɛna a na bir a na n ƴaal anɩ dabɔ. 10 Dɩ gɛr gɩ na n nɛ Thãgba Kɔ̃tɩn anɩ Thãgba nũu, a na hɩnɛ ɔɔ jɔfʋsɔ na ɔɔ sosɔɔkɛ kheranɩ kɩɛr jɔfʋ sɛbɛraakɛ, a kɛra birə Thãgba Kɔ̃tɩn anɩ Thãgbara, a naanɛɛ na anɩ ha fɛw na anɩ bɩ̃ fɛw. \ref Dǝt 11:26-28; Sok 8:1-5,32-36.11 Dɩ Mʋɩjɩ bir so: Jɔfʋsɔɔkɛ mɩ n ha nɩnɩ nĩ, na kǝǝ anɩ fãgara ga, ga hʋnɔna ga'. 12 Ga do thãgbara ƴũu gɩ ha nɩ so: "Amɛ na jʋnɛ na gba na gbuno a na mɩɩ sɩ, sɩ puno sa n kpa gar ya fɛ?" 13 Dɩ ga ha ʋlẽe laɲɔ̃ iiro, nɩ so: "Amɛ na iire na gba na ɩna a na ha sɩ, sɩ puno sa n kpa gar ya?" 14 Sɩ thɩmɩɩ gɩɩkɛ hanɩ anɩ kɩrɔ, a ha anɩ nɔɔra na anɩ hara gɩ do nɔɔ nɩ puno na n pɛ gɩ cʋʋrɛra.
Yire na khir
15 Nɩ hɩnɛ, mɩ n thɩɩnɛ nĩ anɩ ƴɛra yire na bɔnanɛ, khir na sʋɔn. 16 Mɩ n so narɛ nĩ gɩrɛ, nɩ na Thãgba Kɔ̃tɩn anɩ Thãgba, a na ɩɩrɛ ɔɔ hʋsɔra, a na nɛna ɔɔ jɔfʋsɔ na ɔɔ sosɔ nũu a na kpa ɔɔ dɩɩrsɔɔra gɩ do nɔɔ nɩ hana yire, nɩ ler, Thãgba Kɔ̃tɩn anɩ Thãgba n bɔna nɩ dɩɩraakɛra na gbanɩ na hɩ̃. 17 Sɩ ado nɩ kɛr sa faa gɩ, ado nɩ nʋʋrɔ nũu, a kɛr a gburõkhu a na fʋɔr thãgba kpɩɩsɔ, 18 mɩ so narɛ nĩ, na khiire, na pʋɔr dɩɩraakɛ na iirni Jʋrdɛ̃ sɩ na gba na hɩ̃a'. 19 Thãgbara ƴũu na thɩɩ ƴɛra mɩ thɩɩnɛ anɩ ƴɛbʋrɔ yire na khir, bɔnanɛ na sʋɔn. Nɩ phire yire gɩ do nɔɔ nɛrɛ na anɩ mǝlsɔ n hana yire. 20 Nɩ na Thãgba Kɔ̃tɩn anɩ Thãgba a na nɩɛnɛɛ nũu, a tɔɔ ɔrra, ɔr dɔ anɩ yi. Ɔr na hananɩ yire nɩ pʋɔr dɩɩraakɛra Thãgba Kɔ̃tɩn ʋlfɛnɩ ɩnɩ n ha anɩ thɩ kɔ̃tɩ̃sɔ Abɩraham na Ɩjakɩ na Jakɔbɩ.