Mʋɩjɩ bire mɩɩ mɔ̃ Thãgba teenɩ pɛ Ɩjɩrayɛl bɩsanana
29
1 Dɩ Mʋɩjɩ wer Ɩjɩrayɛl bɩsana fɛw a so war: «Nɩ tore yire Ejipiti dɩɩra gɩrɛra Thãgba Kɔ̃tɩn cʋʋnɩ Faarɔ̃ na ɔɔ thɔ̃dara na ɔɔ dɩra fɛw. 2 Nɩ yɩrɛ bɔgaar kɔ̃tɩnaakɛ a pɛr warnɩ na jɩ̃ɩsɔ na ma kʋ thɩ̃ caasɔɔkɛ a cʋʋnɩ. 3 Sɩ a dana nĩ, Thãgba Kɔ̃tɩn na jaa nɩ kpɩɛrɛ nɩ jɩ kɩrʋ gɩrɛra kanɩ, nɩ yɩ gɩ nɩ nɩɛna ga. 4 Mɩ thɔɔ nɛr a cʋʋna yɛna kpalaɲɔ bə̃ kparara; anɩ kẽkẽsɔ na ɓǝǝr nɩ tomɩra dɩ anɩ nɛfaa gɩ a sɛlɛ nɩ nɛɛra ga. 5 Ga do buru nɩ kɔɔ kho, dɩ dɩvɛ̃ gɩ dɩ ta khaa gɩ dɩ nɩ ɲɔ sa hana yirə', sɩ Thãgba Kɔ̃tɩn haanɛ nɩ nɩ jɩ dɩ ɔr dʋɔn anɩ Thãgba.6 Dɩ mɔ̃ sɩ danɩ kɩɛr, Sɩhɔ̃ɔkɛ dɔnɩ Hɛsɩbɔ̃ jamana na Ɔgɩɩkɛ dɔnɩ Basã jamana ther ɩnɩ n kena sɩ, dɩ sɩ puno wer. 7 Agɩpɩ sɩ teere awɩ dɩ a ha Ribɛ̃ɛ mǝlsɔ na Gadɩɩ mǝlsɔ na Manasee ca kur. 8 Dɩ gɛr gɩ na n hɩnɛ nɔ bɩɛl ʋlfɛrɛɛkɛɛ thɩmɩsɔ fɛʋʋkɛ a na cʋɛna gɩ, gɩ do nɔɔ thɩ̃ɛ fɛʋʋkɛ nɩ n cʋʋnɩ na n bɔ nar.
9 Ɩjɩrayɛl bɩsana, nɩ jɩɩlɛ nĩkɛ nɛrɛ fɛw Thãgba Kɔ̃tɩn anɩ Thãgbaa ƴɛra, nɛrɛ fɛw: anɩ thɔthɔdara na anɩ kɔ̃tɩ̃sɔ na ƴɛkʋʋldara, na sɔrasɩ kɔ̃tɩna, na Ɩjɩrayɛl kona fɛw, 10 na anɩ bɩsãsɔ na anɩ khɛrsɔ, narakɛ kpakpalaakɛ hanɩ anɩ dɩsɔɔra, a gbana wɩrɛ n khanɩ dɛɛ na wɩrɛ n cɛnɩ ɲʋɔn dɩ wa n hanɩ. 11 Thãgba Kɔ̃tɩn anɩ Thãgba ʋlfɛna nɛr nĩ nɔ bɩɛl ʋlfɛrɛ, dɩ a we ner nɩ ʋlfɛ a nɩ ture, 12 a gba nɩ nĩkɛ nɩ do ɔɔda ɔr thɛthɛ n do anɩ Thãgba mɔna a kɔɔ so narnɩ na mɔ̃ a kɔɔ ʋlfɛnanɩ anɩ thɩ kɔ̃tɩ̃sɔ: Abɩraham na Ɩjakɩ na Jakɔbɩ. 13 Ga do nɛr dɩbara mɩ n ʋlfɛna nɔ bɩɛl ʋlfɛrɛɛkɛ na nɔ sora', 14 sɩ na wɩrɛɛkɛ hanɩ kɩɛr nĩ a jɩɩl Thãgba Kɔ̃tɩn asɩ Thãgbaa ƴɛra gɩ, na asɩ məlsɔɔkɛ na hanɩ kha na sɛrɛ kɩɛr nǝ'. \ref 1 Fãg 9:6-9; Dan 9:11-14; Gal 6:7-8.
15 Nɩ jɩrɛ mɔ̃ thɩ̃ɛ kɔɔ ha sarnɩ ɔbɔɔkɛ sɩ kɔɔ hanɩ Ejipiti, na ɔbɔɔkɛ sɩ kɔɔ lonɩ ca kpɩɩsɔɔ thɩ̃thɩɩn a the. 16 Nɩ yɩrɛ awɩ kpɔ̃kpɔrɔ̃ thɩ̃sɔ na awɩ thɩlsɔɔkɛ wɩ n jini kɛ dɔnɩ thɩlasɔɔkɛ wɩ cʋʋnanɩ thɩrʋ na bokana na dɛ bulo na dɛ. 17 Dɩ gɛr gɩ, wa n yɩ tibil anɩ thɩ̃thɩɩn, kuun agɩbo khɛr, cɔ kaar agɩbo caar, a faa Thãgba Kɔ̃tɩn asɩ Thãgba sɩ a na n fʋɔr waa caasɔɔle thãgbasɔa'. Tibil bɩɛl na n ha anɩ thɩ̃thɩɩn a ho thɩr nɔɔkɛ dɔnɩ kpalʋ na dakhaa ga. 18 Dɩ tibilikɛ na nɩɛnɛnɩ nɔ bɩɛl ʋlfɛrɛɛkɛɛ thɩmɩɩsɔ na n do ɔɔ ha n fɩɩlʋʋ a so aa: « Ma 'lɛr ha ɩɩ ado ma jallakɛ mɔ̃kɛ ɩ̃ kpɩɛr n thɔɔ mɩnɩ. Gɩdonɩ thɩɩkɛ huronenɩ na hana ɲɔ ƴaalɛ bã.» 19 Thãgba Kɔ̃tɩn na tu na faa na haa ga. Sɩ Thãgba Kɔ̃tɩn nĩkhi na ɔɔ gbugi na lɩrɛ dɔ khaa tibil ca olela, dɩ sɔ̃ caar fɛʋʋkɛ kheranɩ sɛbɛraakɛ na 'lii, dɩ Thãgba Kɔ̃tɩn na pɩɩnɛ ɔɔ i thɩɩra tibil na jɩna gɩ kpɩɩ bã. 20 Thãgba Kɔ̃tɩn na leguure Ɩjɩrayɛl caar fɛʋʋ thɩ̃thɩɩn a pɩɛraa thɩlkɩɩr, gɩ ha mɔna sʋ̃ɔ fɛʋʋkɛ kheranɩ nɔ bɩɛl ʋlfɛ jɔfʋ sɛbɛraakɛ sonɩ.
21 Ɔbɔɔkɛ anɩ mǝlsɔɔkɛ na kpaanɛnɩ, kɛ dɔnɩ anɩ bisɔ, na kpakpalaakɛ na thɛnɩ dɩ bãʋ ƴɔɔ fĩi na ɩ̃, wa yɩrɛ thɩlkhena na khoosɔɔkɛ Thãgba Kɔ̃tɩn pɛnɩ anɩ dʋɔ. 22 Dɩ ɔbɔɔkɛ wa yɩɛnɩ dɩ girbi na laan na dɔɔ kʋɛrɛ thɩ̃ɛ fɛw, dɩ thɩɩ na do dakʋʋlna a na se thɩ̃a', dɩ ga do hɔ̃ dɩkharakɛ na punone na phuroǝ', dɩɩ hona Sodɔm na Gomɔɔr na Adɩma na Seboyɩm dɩɩsɔɔkɛ Thãgba Kɔ̃tɩn kʋɛnɩ dɩɩ the ɔɔ nĩkhi khera, 23 caarsɔɔle fɛw na bulele awɩbara: Aɲe gɩ dɩ Thãgba Kɔ̃tɩn thʋ̃ kʋɛ dɩɩkɛ thaa ɓoɓo? Aɲee nĩkhi kɔ̃tɩ̃ ca gɩ thaa ɓoɓo ! 24 Dɩ wa birse wer aa: Gɩdonɩ wɩ faarɛ nɔ bɩɛl ʋlfɛrɛɛkɛ Thãgba Kɔ̃tɩn, kɛ dɔnɩ awɩ thɩ kɔ̃tɩ̃sɔɔ Thãgba ʋlfɛna wɩnɩ ɔbɔɔkɛ a ti wɩnɩ Ejipiti dɩɩra; 25 gɩdonɩ wɩ jaal wa n fʋɔr thãgba kpɩɩsɔɔkɛ wa kɔɔ jɩna', kɛ Thãgba na ha wɩnɩ hʋɛ wɩ fʋɔra'. 26 Gɛr gɩ dɩ Thãgba Kɔ̃tɩnɩ nĩkhi lɩ dɩɩraakɛ dɔ khaa, dɩ pɩɛraa thɩlkenaakɛ kheranɩ sɛbɛraakɛ. 27 Thãgba Kɔ̃tɩn tiir wer awɩ dʋɔ na nĩkhi khɩɩ na cɩ̃cɩmanɛ, a dʋʋrna dɩ kpɩɩra ka wɩ hanɩ nĩ gɩrɛ 'lo. 28 Thɩ̃ɛsɔɔkɛ keranɩ Thãgba Kɔ̃tɩn asɩ Thãgbaada gɩ do, sɩ gɩrɛ yɩranɩ sɛrɛ na asɩ bisɔɔda gɩ do bɔɔ khorr, gɩ do nɔɔ sa n pɛ jɔfʋsɔɔkɛ cʋʋrɛra.