SƲƆN NA BƆNANƐ
Jɩ̃jɩna bokanaakɛ Ɩjɩrayɛl bɩsana kpebini Ebal gɔ̃gʋɔnna. \ref Joj 8:30-32; Jer 31:33
27
1 Mʋɩjɩ na Ɩjɩrayɛl bɩsanaa kɔ̃tɩ̃sɔ kɔɔ hana kha dɩ Mʋɩjɩ ha Ɩjɩrayɛl bɩsana jɔfʋ thakɛ ayɩ wɔɔ: «Na n nɛ nũu jɔfʋ fɛʋraakɛ mɩ ha nɩnɩ nĩ. 2 Wireekɛ na iirni Jʋrdɛ̃ sɩ na lõ dɩɩraakɛ Thãgba Kɔ̃tɩn anɩ Thãgba n ha nɩnɩ, nɩ kpeba boka kɔ̃tɩna a calla gɩ dabulo. 3 Nɩ kherarɔ jɔfʋ fɛʋʋkɛra ɔbɔɔkɛ na n lonɩ dɩɩraakɛra Thãgba Kɔ̃tɩn anɩ Thãgba n ha nɩnɩ, ka naƴɩlɛ̃ na thʋʋr n celnɩ mɔna Thãgba Kɔ̃tɩnɩɩkɛ dɔnɩ anɩ thɩ kɔ̃tɩ̃sɔɔ Thãgba so narnɩ. 4 Ɔbɔɔkɛ na iirni Jʋrdɛ̃, nɩ kpeba bokanaakɛra mɩ so narnɩ nĩ gɩrɛ Ebal gɔ̃gʋɔnna, a calla gɩ dabulo. 5 Agɩpɩ nɩ mɛ liirǝ bonɩ ji paar Thãgba Kɔ̃tɩn anɩ Thãgbara, na bokanaakɛ na thelnanɩ thera'. 6 Nɩ mɛ Thãgba Kɔ̃tɩn anɩ Thãgbaa bonɩ ji paar na bokanaakɛ wa thelna', a jero bonɩ thiinǝsɔ Thãgba Kɔ̃tɩn anɩ Thãgbara, 7 na dakha 'likha bonɩɛsɔ, a khɔ le a kãkanɛna Thãgba Kɔ̃tɩnɩ anɩ Thãgba ƴɔɔ. 8 Nɩ khera jɔfʋ fɛʋʋkɛra bokanaale, a cɛ gɩ ɲɩr bɔɔbɔɔ. 9 Agɩpɩ Mʋɩjɩ, kɛ kɔɔ hanɩ kha na bonɩ jidaraakɛ dɔnɩ Levɩɩ mǝlsɔ so Ɩjɩrayɛl bɩsanana fɛw ayɩ: «Nɛr Ɩjɩrayɛl bɩsana, nɩ pɩra kɩrkɩr sa pɛ nũu. Nɩ debire nĩ a do Thãgba Kɔ̃tɩn anɩ Thãgbaa bɩsãsɔ. 10 Na n nɛ Thãgba Kɔ̃tɩn anɩ Thãgbaa nɔ ka nũu, a na cʋɛ gɩrɛra ɔɔ jɔfʋsɔ na ɔɔ sookɛ mɩ n ha nɩnɩ nĩ, sonɩ.» \ref Dǝt 11:26-30; Joj 8:33-35; Gal 3:10,13.11 Ga wiilera Mʋɩjɩ so Ɩjɩrayɛl bɩsanana thakɛ ayɩ: 12 «Ɔbɔɔkɛ na iirni Jʋrdɛ̃ mɩɩr, Simeyɔ̃ɔ ca na Levɩɩ ca na Judaa ca na Ɩsakaarɩ ca na Jojɛfɩɩ ca na Bɛ̃jamɛ̃ɛ ca na jɩɩlɛ Garɩjɩmɩ gɔ̃gʋɔnna wɩ so gɩrɛ na dɔnɩ bɔnanɛsɔ. 13 Sɩ Ribɛ̃ ca na Gadɩɩ ca na Ajɛɛrɩ ca na Jabʋlɔ̃ɔ ca na Dãa ca na Nɛfɩtalɩɩ ca n jɩɩl Ebal gɔ̃gʋɔnna wɩ so gɩrɛ na dɔnɩ sʋ̃ɔsɔ.
Sʋ̃ɔɔkɛ na 'leni nũ nʋʋrdara
14 Levɩɩ mǝlsɔ n gba thɩmɩa a sɔ Ɩjɩrayɛl bɩsanana fɛw na nɔ kheu a yɛ: 15 «Sʋɔn n 'le tibilikɛ na thelanɩ thɩl agɩbo na hɩlanɩ ther a be dɩkha a ker a wolõ a na n fʋɔr. Thãgba Kɔ̃tɩn n ƴʋɔnɛ ga thɩ̃ casɔɔle tibili ɲɛ̃ɛ cʋʋnɩ.» Tɩbɩla fɛw n deere: «Amɛn!» 16 «Sʋɔn n 'le tibilikɛ na n buonɩ ɔɔ thɩ na ɔɔ na'.» Tɩbɩla fɛw n dee: «Amɛn!» 17 «Sʋɔn n 'le tibilikɛ na kãasɩnɛnɩ ɔɔ pɛlla sɩ na gɔ na lõ ɔɔ alãkha tibili thɩra.» Tɩbɩla fɛw n dee: «Amɛn!» 18 «Sʋɔn n 'le tibilikɛ na cʋɛnɩ yaarʋ da bu hʋɛra.» Tɩbɩla fɛw n dee: «Amɛn!» 19 «Sʋɔn n 'le tibilikɛ na bɔnɩ kpalkpal na khilǝ̃buu na khikhɛrʋʋ hʋ hana.» Tɩbɩla fɛw n dee: «Amɛn!» 20 «Sʋɔn n 'le tibilikɛ na phɩnananɩ ɔɔ thɩɩ khɛr, gɩdonɩ ɔɔ thɩra a pɛr yicuru.» Tɩbɩla fɛw n dee: «Amɛn!» 21 «Sʋɔn n 'le tibilikɛ na phɩnananɩ nʋm wo nʋm.» Tɩbɩla fɛw n dee: «Amɛn!» 22 «Sʋɔn n 'le tibilikɛ na phɩnananɩ ɔɔ õkhɛrɩkɛ a donɩ thɩ bɩɛl sɩ nɛ ha dɩɩdɩɩ agɩbo nɩ bɩɛl sɩ thɛ ha dɩɩdɩɩ.» Tɩbɩla fɛw n dee: «Amɛn!» 23 «Sʋɔn n 'le tibilikɛ na phɩnananɩ ɔɔ thɛɛ khɛr.» Tɩbɩla fɛw n dee: «Amɛn!» 24 Sʋɔn n 'le tibilikɛ na woloneni na kʋ tibil. Tɩbɩla fɛw n dee: «Amɛn!» 25 «Sʋɔn n 'le tibilikɛ na teanɩ lɩmɩnɛ sɩ a kʋ tɩɩ sarrʋ.» Tɩbɩla fɛw n dee: «Amɛn!» 26 «Sʋɔn n 'le tibilikɛ na n hɩnɛnɩ Thãgbaa jɔfʋsɔ da n cʋʋna gɩrɛra gɩ n sona'.» Tɩbɩla fɛw n dee: «Amɛn!»