Caca thɩ̃ɛ \ref Thɩ 23:19; Dǝt 5:15 7:18-19; 1 Tim 4:4-5.
26
1 Ɔbɔɔkɛ na lonɩ dɩɩraakɛ Thãgba Kɔ̃tɩn anɩ Thãgba n ha nɩnɩ, nɩ hɩna, dɩ ɔbɔɔkɛ na toonɩ, 2 tibil wo tibil n te caca thɩ̃ɛ, thɩ̃ɛ fɛʋraakɛ a na kʋʋlnɩ dɩɩraakɛra Thãgba Kɔ̃tɩn anɩ Thãgba na ha nɩnɩ, a pɛ kpʋʋnɔ a jalana paaraakɛra Thãgba Kɔ̃tɩn na phiirni na tooro. 3 Ntɛ jala yɛ bonɩ jidaarɩkɛ hanɩ thɔmana ga wisɔɔrale a sʋɔraa: «Mɩ sor nĩikɛ Thãgba Kɔ̃tɩn afɩ Thãgbaa ƴɛra, mɩ lʋʋn dɩɩraakɛra Thãgba Kɔ̃tɩn ʋlfɛnanɩ asɩ thɩsɔ ɩnɩ n ha sɩ.» 4 Bonɩ jidaar n tea kpʋʋnɩɩle ntɛɛ ɲɔ̃kɔɔ a thɩnɛ Thãgba Kɔ̃tɩnɩ bonɩ ji paa ƴɛra. 5 Agɩpɩ ntɛ bir a gba thɩmɩɩr Thãgba Kɔ̃tɩn anɩ Thãgbaa ƴɛra a sɔ wo: «Aramɛ̃ caar ɩ̃ thɩ kɔ̃tɩ̃ do da n kpaar a gbũ Ejipiti dɩɩra na tɩbɩla gbe ɩnɩ n too. Dɩ le a ler a do ca kɔ̃tɩ̃ɩ a jɔr a hana punone dɩɩ kar. 6 Sɩ Ejipitidara pɛ sarɛ dee thɔma, a gaar sɩ, a kpoo sar dɩɩ kar. 7 Dɩ sɩ hulene Thãgba Kɔ̃tɩn asɩ thɩ kɔ̃tɩ̃sɔ Thãgbara, dɩ Thãgba Kɔ̃tɩn nɩrɛ asɩ hulẽbi a yɩna asɩ nɩwɛ na asɩ gaar na kpooreekɛ sɩ n yɩnɩ. 8 Dɩ Thãgba Kɔ̃tɩn ti ser Ejipiti dɩɩra na ɔɔ fãga ɲɔ̃. A pɛ warɛ ma kɔ̃tɩ̃ɩ, a cʋʋna nɔ kpaa thɩ̃ɛ na hǝrǝ thɩ̃ɛsɔ. 9 Agɩpɩ, a ɩna sɛr paarɩkɛ, a ha sɩ dɩɩkɛ naƴɩlɛ̃ na thʋʋr n celnɩ. 10 Nɛnɛ̃ mɛr ha ʋ, mɩ ɩnanɛ thɩɩkɛ fɩ ha mɩnɩɩ caca thɩ̃sɔ, yaa Thãgba Kɔ̃tɩn!» Agɩpɩ ntɛ n thɩɩn kpʋʋna Thãgba Kɔ̃tɩn anɩ Thãgbaa ƴɛra sɩ a gburõkhu a fʋɔr Thãgba Kɔ̃tɩn anɩ Thãgba. 11 A gele pɩ, nɩ kãka na Levɩɩ mǝlsɔ, na kpakpalaakɛ hanɩ anɩ dʋɔ thɩ̃ɛ fɛʋraakɛ Thãgba Kɔ̃tɩn anɩ Thãgba hanɩ nɩ na ɔɔ cɔdara. \ref Dǝt 14:22-29; Thɩ 19:4-8; 1 Pɩɛ 2:9.12 Ɔbɔɔkɛ na tini bɩɛl yʋɔra fɛw anɩ thɩ̃sɔra balãther yɩɛraakɛ dɔnɩ bɩɛl yʋɔr yɩɛr, nɩ hana Levɩɩ mǝlsɔ, na kpakpala na khilǝ̃bii na khikhɛraakɛ hanɩ dapa nɩ hanɩ wɩ kho wɩ hi. 13 Agɩpɩ ntɛ sɔ Thãgba Kɔ̃tɩn anɩ Thãgbaa ƴɛra wɔɔ: «Mɩ tire gɩrɛ dɔnɩ Thãgba Kɔ̃tɩnɩda a ha Levɩɩ mǝlsɔ, na kpakpala na khilǝ̃bii na khikhɛra mɔna jɔfʋ fɛʋʋkɛ fɩ ha mɩnɩ sonɩ. Ma kʋɛ jɔfʋ bɩɛl, dɩ bɩɛl gɩ dɩ sɩ diinǝ ga. 14 Ma kho dɩkha ga thɩnaale ɩ̃ yilǝ̃bi bɔa'; ma ti gɩ 'laa ɔbɔɔkɛ mɩ bisenɩ jɔfʋ hʋɛra ga, dɩ ma tiro a ha khirə'. Mɩ nɩrɛ Thãgba Kɔ̃tɩn ɩ̃ Thãgbaa nɔ nũu, a cʋʋ mɔ̃kɛra ɔɔ jɔfʋsɔ fɛʋʋkɛ fɩ ha mɩnɩ sonɩ. 15 Le thãgbara ƴũu afɩ cɔ phurǝ, hɩnɛ sa bɔna sɩ, sɛr afɩ too Ɩjɩrayɛl bɩsana na thɩɩkɛ fɩ ha sɩnɩ mɔna fɩ kɔɔ ʋlfɛnanɩ asɩ thɩ kɔ̃tĩsɔ, kɛ dɔnɩ dɩɩkɛ naƴɩlɛ̃ na thʋʋr n celnɩ.
Nũ nɩɩr na haar fɛʋ Thãgbara
16 Nĩkɛ Thãgba Kɔ̃tɩn anɩ Thãgba yɩ na n cʋɛ ɩnɩ so na ɩnɩ jɔfʋsɔ. Na n hɩnɛ gɩ, a na pɛ gɩ cʋʋrɛra na anɩ ha fɛw na anɩ bɩ̃ fɛw. 17 Nĩikɛ nɩ cʋʋrɛ dɩ Thãgba Kɔ̃tɩn so a yɩ ɩna dor anɩ Thãgba, dɩ na n ɩɩrɛ ɔɔ hʋsɔɔra, na n kpana ɔɔ jɔfʋ kherenana, na n cʋʋna ɔɔ so, na n kpana ɔɔ jɔfʋsɔra, na n nɩna ɔɔ nɔ nũu. 18 Dɩ Thãgba Kɔ̃tɩn cʋʋ nɛr nĩ dakha dɩ nɩ so nar dor caarɩkɛ a hɩnɩ kpefɩ mɔna a so narnɩ, na n ɔ ɔɔ jɔfʋsɔɔra fɛw, 19 dɩ a na cʋʋ nɛr nɩ 'lɛ kǝǝre na i dʋbɩrɛ, na ire na cʋʋr, nɩ jɔ caar fɛʋʋkɛ a tini, nɩ do caarɩkɛ phonɩ Thãgba Kɔ̃tɩn anɩ Thãgbara mɔna a so narnɩ.