Khɛr faarɛ
24
1 Ɔbɔɔkɛ kuun henɩ khɛr dɩɩ ɩ̃ na too dɩ yɩraa dɩkhaakɛ na bʋɔnɔna' dɩ aa daaraa bã, a kherene he kuur sɛbɛ a dʋɔ ɲɔ̃kɔɔ, agɩpɩ a wegaa faa. 2 Dɩ a khɛrɩle jal a punone he kuun kpɩɩ. 3 Ado kuun kpɩɩle gbaanɛɛnɩ ɩ̃ aa naa bã, a khere he kuur sɛbɛ a haa, sa weguu a faa, agɩbo a kuunile khire, 4 caca kuunile na hana hʋɛ a gbaa a bir a dʋʋraa khɛr bã', gɩdonɩ jɔfʋ hʋɛra, khɛr bise a dʋʋraa. Kpɔ̃kpɔrɔ̃ thɩ̃ɛ gɩ Thãgba Kɔ̃tɩnna. Na n to sopuu dɩɩraakɛ Thãgba Kɔ̃tɩn anɩ Thãgba n ha nɩna'.Tibiliikɛ hɛnɩ khɛr he phaa, na n jal kʋʋra ga \ref Dǝt 20:7; Thɩ 21:16
5 Tibilikɛ hɛnɩ khɛr he phaa, a na jal kʋʋra ga, wa n pɩɛraa thɔ̃ bɩɛllaka'. A na toore yɛ bɩɛl gɩ do ɔɔ cɔ ka thɩmɩɩ dɔ nɔɔ, a cʋʋ gɩ da khɛraakɛra a henɩ.
6 Na n tee naan na nãbire agɩborakɛ nãbi haar gɩ dɔ barãdaa ga. A nɩ cʋʋ thale ga dor ntɛɛ yi nɩ gba dɩɩ do barãdaa.
7 A nɩ yɩ tibil dɩ yu tibil ɔɔ omɩ Ɩjɩrayɛl bɩsanaa thɩ̃thɩɩn, a cʋgʋʋ dɩ do ɔɔ dee agɩbo a dolõo, nɩ kɔ yu caarɩle. Dɩ mɛ̃ na ti puure anɩ thɩ̃thɩɩn.
8 Na n dɔ bʋrɛ gbuul khoora gɩ do nɔɔ na n jɩɩ hɩɩn na n cʋʋna gɩrɛ fɛʋʋkɛ bonɩ jidaraakɛ dɔnɩ Levɩɩ mǝlsɔ n dɩɩr nɩnɩ. Na n hɩnɛ a na cʋɛna jɔfʋsɔɔkɛ mɩ ha wɩnɩ. 9 Nɩ jɛna gɩrɛ Thãgba Kɔ̃tɩn anɩ Thãgba cʋʋnɩ Mɩrɩyamɩna hʋɛra ɔbɔɔkɛ nɩ thenɩ Ejipiti. \ref Mal 3:5, Lev 19:9-10; Khɩ 68:6
10 Ado anɩ omɩ pemi nar thɩ̃ɛ, na n lõ ɔɔ cɔ a tee barãdaa ga; 11 nɩ jɩlɛ le phɩɩlo ntɛra pemanɩ thɩ̃doora n thena le barãdaa a ha nɩ. 12 A bɔdaar ha nɩ ɔɔ kẽkẽ gɩ dɔ barãdaa, na n cɔna ɔɔ barãda ga, 13 nɩ birǝnǝ wi lõ bɔɔ a hanaa a puno a thi, dɩ a na bɔna nɛr. Dɩ ga dor fɩl sar thɔma nɩ cʋʋ Thãgba Kɔ̃tɩn anɩ Thãgbaa ƴɛra.
14 Na n hʋɔl baadeeraakɛ dɔnɩ bɔdaar na bɔ kʋdaar, a anɩ omɩ a do, a kpakpal gɩɩkɛ tɔɔnɩ kha na nɛrɛ anɩ dʋa'. 15 Na n hanaa ɔɔ lɩmɩ wire fɛw. Nɩ dʋɔɔ ɲɔ̃kɔɔ sɩ wire na n lõa'; gɩdonɩ aa hana thɩ̃ɛa' gɩ n pʋɔrʋʋrɛ mɔ̃ a na 'lɛ gɩnɩ. A na cʋʋ mã', a na hulene Thãgba Kɔ̃tɩnna anɩdara, dɩ sor na hẽe ner.
16 Na n kʋ thɛ gɩ do awɩ bisɔɔ sopuu dɔ nɔa', dɩ na n kʋ be gɩ do awɩ thɩsɔɔ sopuu dɔ nɔa'. Nɩ kɔ ntɛ ɔɔ thɛthɛɛ sopuurǝ.
17 Na n bo kpakpalɩɩ hʋ hana dɩ khilǝ̃buuda ga. Dɩ na n tee khikhɛrʋʋ kẽkẽ gɩ dɔ barãdaa ga. 18 Nɩ jɛna gɩ dɩ nɩ kɔɔ dor dea Ejipiti dɩ Thãgba Kɔ̃tɩn anɩ Thãgba taa nɩ; gɛrra dɔ nɔɔ dɩ mɩ so nar na n nɛ jɔfʋsɔɔkɛra nũu.
19 Ado na kha jɔ anɩ lɔɔ a diinǝ jʋ lire a faa, na n kɛr bir gba ga. Nɩ faa gɩ do kpakpal na khilǝ̃bu na khikhɛrʋʋda, ga dor nɔɔ Thãgba Kɔ̃tɩn anɩ Thãgba n bɔna nɩ anɩ ɲɛ̃ thɔna fɛw. 20 Ado nɩ yɛɛ anɩ olɩvɩsɔ pɩ, na n kɛr bir a khʋʋn gɩrɛ sɛna'. Nɩ faa gɩrɛ sɛnɩ gɩ do kpakpal na khilǝ̃bu na khikhɛrʋʋda. 21 Ado nɩ khʋ̃ anɩ dɩvɛ̃ bisɔ anɩ dɩvɛ̃ lɔɔ pɩ, na n kɛr bir a khʋʋn dɩvɛ̃ jaarɛsɔɔkɛ nɩ diinǝnǝ. Nɩ faa gɩrɛ sɛnɩ gɩ do kpakpal na khilǝ̃buu na khikhɛrʋʋda. 22 Nɩ jɛna gɩ dɩ nɩ kɔɔ dor dea Ejipiti dɩɩra, gɛrra dɔ nɔɔ dɩ mɩ so nar na n nɛr jɔfʋsɔɔkɛra nũu.