Nʋma na thɩ̃ɛsɔɔkɛ buurenii thɩmɩɩ
22
1 Ado nɩ yɩ anɩ omɩɩ na agɩbo ɔɔ bana agɩbo ɔɔ bʋ dɩɩ do a bure, na n faa a jala'. Nɩ kpaa a birǝnǝ hana dadaar. 2 Dɩ ado dɩbãʋ ntɛ ha, agɩborakɛ na jɩɩa', nɩ kpa nʋ̃ dɔɔ a fɔrɔ gɩ dana bɔɔkɛ ntɛ na n ƴaalnɩ, nɩ kpa nɩ haa. 3 Nɩ cʋɛ ɔmɛna a ɔɔ kũkǝ̃ bo dɩ nɩ yɩɩ, a ɔɔ kẽkẽ gɩ agɩborakɛ thɩ̃ɛ wo thɩ̃ɛɛkɛ dɔnɩ anɩ omɩɩda kɛ bonɩ dɩ nɩ yɩɛ, na n jal sa faga'. 4 Ado nɩ yɩ anɩ omɩɩ kũkǝ̃ agɩbo na dɩ ji hʋɛra, na n jal sa faga'. Nɩ bulo dadaa a khǝi nʋ̃ dɔɔ a ɩɩr.Gɩ̃ɩ jɔfʋsɔ \ref Lev 22:27-28, Ther15:38-40; 1 Kor14:33,40
5 Khɛr na hana hʋɛ a to kuun kẽkena ga, kuun na hana hʋɛ a to khɛr kẽkena ga. Tibil wo tibilikɛ n cʋɛnɩ gele, a n kʋrɛ Thãgba Kɔ̃tɩn anɩ Thãgba ƴɔ̃ƴʋɔnɛ. 6 Ado na ka a yɩ 'lomɩ̃ tɩɛl thɩrʋra agɩbo thɩɩra dɩ dabii har agɩbo pana dɩ danɩɩ phɩnɔ, na n fʋ danɩɩ a khɩɩna pana agɩbo dabiǝ'. 7 Nɩ sɛ danɩɩra a jal sɩ nɩ fʋlɛ dabii, dɩ mɛ̃ na hana yire na pʋɔr dɩɩra, gɩ da far.
8 Ado nɩ the cɔ phaa a pǝ, nɩ ɩɩrɛ go kpõ. Ga dor nɔɔ anɩ thɩmɩɩ na har a tibil the le nãsʋrɔ a ji khǝ'. 9 Na n diir thɩ̃ kpɩɩ anɩ dɩvɛ̃ lɔa', a mɛ̃ ga thɩ̃doolera na gbanɩ, na dɩvɛ̃ beekɛ na khʋnɩ, Thãgbaa da ga do. 10 Na n kperẽ na na kũkǝ̃ǝ a pɛ war sũgbure a na kʋʋlna ga. 11 Na n to kẽkɩɩnɩɩkɛ wɩ lenanɩ lɛn na lɛ̃ a ɲaɲaana'. 12 Nɩ lɛ kẽkẽ wiir jʋɔljʋɔl a pɛ kẽkẽ nɩɩsɔɔraakɛ nɩ n thini nʋɔ yenana.
Khebiriikɛ kɔɔ jɛnɩ kuun sa he kuun na ʋrɛ na jɛnɩ kuunaada
13 Ado kuun gba khɛr a he a phɩnaa sɩ aa bir naa bã, 14 a ɩɩr a na pɩɛraa sɔ, a kʋɛgʋʋ ire na kpaarna, aa ɩnɩ gbaar khɛrɩkɛ a phɩnaa, sɩ a yɩɛ dɩɩ do a kɔɔ jɩrɛ kuun. 15 A thɩ̃ɛ ha thale, khebiriilee thɩ na ɔɔ nɩ n gba gɩrɛ na nɛnanɩ dɩ aa kɔɔ jɩ kuunna a jalna kɔ̃tɩnaa ƴɛra dɩ lõfonɔɔ a nɛna wɩ. 16 Dɩ khebiriilee thɩ n sɔ kɔ̃tɩnana wɔɔ : « Mɩ har kuunɩɩkɛ ɩ̃ bikhɛr dɩ he, sɩ aa naa bã, 17 da n pɩɛraa sɔ aa a kɔɔ jɩrɛ kuun, sɩ nɩ yɛ gɩrɛra n nɛnanɩ dɩ aa kɔɔ jɩ kuunna'»; sɩ wɩ bel phɩ̃ pa kẽkɩɩn kɔ̃tɩnaa ƴɛra, kɛ wɩ phɩnɔnɩ caca wire dɩ tɔmɩn pɛr. 18 Dɩ dɩɩlee kɔ̃tɩ̃sɔ na fʋrɛ kuuniile a na be, 19 sɩ gɩdonɩ a kʋɛrɛ Ɩjɩrayɛl khebiriikɛ na kɔɔ jɛnɩ kuunnaa ire, wa pɩɛraarɛ alɩmã a lɩmɩ warbe tamaa, wɩ ha khebirii thɩ; sɩ ɔɔda khebiriile do bɔɔ fɛʋʋkɛ a hananɩ yire aa hana hʋɛ na fagʋa'.
20 Sɩ ado sobɔr thɩ̃ɛɛlera do, dɩɩ do khebireele kɔɔ jɩrɛ kuun, 21 wa fʋʋrɛ na jalna ɔɔ thɩɩ cɔ lõfonɔra, ɔɔ dɩdaraa n dʋʋrʋʋ na bokana wɩ kʋ gɩdonɩ a cʋʋrɛ khaarkhaar ɔɔ thɩɩ cɔ a to yicuru Ɩjɩrayɛl dɩɩra. Dɩ mɛ̃ na ti puure anɩ thɩ̃thɩɩn.
22 A wɩ fʋ kuun dɩ phɩna khɛrɩɩkɛ dɔnɩ kũudaar, kuunna na khɛrra, wɛr yeɲɔra fɛw, wɩ kʋrɛ wɩ. Dɩ mɛ̃ na ti puure anɩ thɩ̃thɩɩn.
23 Ado khebiireekɛ na jɛnɩ kuun pa' hana wɛdaar sɩ kuun kpɩɩ caanaa dɩɩra a phɩnaa, 24 nɩ fʋlɛnɛ wɛr yeɲɔra a thɛna dɩ lõfonɔra a dʋʋrɛ wɩ na bokana a kʋrɛ. Nɩ kɔ khebir gɩdonɩ dɩɩra gɩ, sɩ aa hulǝ̃', a kɔ kuun dakha gɩdonɩ a phɩnanɛ ɔɔ alãkhaa khɛr. Dɩ mɛ̃ na ti puure anɩ thɩ̃thɩɩn. 25 Sɩ ado hʋɔnɔ kuun caanaa a fʋʋ a phɩna, nɩ kɔ kuunile dɩbara. 26 Na n cʋʋ khebiriile thɩ̃a' gɩdonɩ aa cʋʋ dɩɩkɛ teananɩ khirǝ'; gɩ hor mɔ̃ tibil n wunɩ ɔɔ alãkha tibilǝ a kʋ. 27 Gɩdonɩ hʋɔnɔ gɩ, adorakɛ a hulene sɩ tibil na hale a na taa a.