Tibiliikɛ kheni sɩ wa jɩ ntɛ kʋɔna' \ref Ther 35:3034; 2 Fãg 24:4; 1 Kor 4:4
21
1 Ado nɩ yɩ tɩɩ khire hʋɔnɔ dɩɩraakɛ Thãgba Kɔ̃tɩn anɩ Thãgba na ha nɩnɩ, sɩ na jɩ ntɛ kʋɔna', 2 anɩ kɔ̃tɩ̃sɔ na anɩ so gʋʋrdasɔ n jala a mɩɛnɛ ka khirerǝ phɩnɩ gbãʋ a danana dɩɩsɔɔkɛ diǝrǝǝni. 3 Ado nɩ yɩ dɩɩ, dɩɩ do ɔr wɔrɔna ka khire khini kheu, dɩɩlee kɔ̃tɩ̃sɔ n fɔ na phɩɩrɛ, kɛ wa pɛrnɩ kpelele dɩ kʋʋl yɩa', 4 a gbunonǝ po kɔlɔnaakɛ na n ɛna', ka wa kʋʋlnɩ a diir a yɩa', a bɩɛ le ɲʋɔnana bãbiro a kɔ. 5 Dɩ bonɩ jidaraakɛ dɔnɩ Levɩ mǝlsɔ n tɔ dana gɩdonɩ wɛr Thãgba Kɔ̃tɩn anɩ Thãgba phiir pɛ ɔɔ thɔna wa n bɔna tɩbɩla Thãgba Kɔ̃tɩnɩ irǝ. Wɛr hana hʋɛ a na gʋʋr gɩrɛ fɛʋʋkɛ dɔnɩ kɩla na tibiliikɛ wɩ pɛrnɩ kho sɩɛɛ thɩmɩɩ. 6 Dɩ dɩ dɔɔkɛra wɔrɔnanɩ jɔɔ ka tibillə khini, ɔɔ kɔ̃tɩ̃sɔ fɛw n hulo ɲɛ̃ɛ a pɛ na phɩɩrɛraakɛra wɩ benɩ bãbiro a kʋ le poo kɔlɔna, 7 sa sɔ wɔɔ: « Sɛr kɔ tibiliika', dɩ asɩ yi na tʋʋraa kʋ paara'. 8 Thãgba Kɔ̃tɩn ya, faa dɩɩ a hana sɛr afɩ too Ɩjɩrayɛl bɩsanaakɛ fɩ taanɩ; fa n heen sɩ sor tɩɩ sarʋʋkɛɛ kʋdara ga?» Dɩ mɛ̃ sor na hɛl war tɩɩ sarʋʋ kʋdaraale. 9 Dɩ nɛrɛ, na hɛllɛ tɩɩ sarʋʋ kʋ thɩmɩɩraale gɩdonɩ nɩ cʋʋrɛ gɩrɛ telenenɩ Thãgba Kɔ̃tɩnɩ ƴɛra.Khɛraakɛ wɩ fʋlɛnɩ kʋʋraa heda \ref Dǝt. 20:10-14; Thɩ 21:7-11, 15-17; Sokp 23:19-22; 2 Sam 18:14-15, 33
10 Ɔbɔɔkɛ na thenɩ na n kena anɩ lãlaardara kʋʋr, a Thãgba Kɔ̃tɩn gba wɩ dʋ nɩ ɲɛɛna dɩ nɩ fʋlɛ wɩ dɩ wɩ do kasodara, 11 dɩ tibil ʋkha anɩ thɩ̃thɩɩn yɩ khɛr dɩ bɔr, a lʋ̃ʋ haar, dɩ ƴaal a hɩɩ, 12 a kpaa kɔnana ɔɔ cɔ. Khɛrɩle n bela yʋʋ, a dɛna nɛbɩ khʋna na ɲɛ̃bi khʋna, 13 a fʋʋrɛ ɔɔ kaso kẽkẽsɔ, sa tɔɔ kuunɩlee cɔ, a bɛ ɔɔ thɩ na ɔɔ nɩ a cʋɛna sɩpo bɩɛl, a gele pɩ, kuunɩle punone a dãa. 14 Sɩ a khɛrɩle ɩ̃, aa da kuunaale bã, a punone fagʋʋ dɩ jal ka a pɛrnɩ haar. Kũule na hana hʋɛ na dolõo, agɩbo a gbaa a do dea', gɩdonɩ a kɔɔ hɩɩrɛ.
Caca bikuun hʋ hananɛ
15 A kuun hana khɛra yeɲɔ, a na bɩɛl sɩ aa na bɩɛlla', a kɔ̃ kuuminǝ khɛraraalera, sɩɩdo ʋrɛ dɔnɩ caca bikuun khɛrɩkɛ aa nanaa' kɔnaa, 16 ado kuunile ɩ̃ a na tɩnɛ ɔɔ bɩsãsɔ ɔɔ thɩ̃sɔ, aa hana hʋɛ a gba gɩrɛ dɔnɩ caca bikuunida a ha khɛr ʋrɛ a nanɩɩ bikuun sɩ a faa ʋrɛ dɔnɩ ɔɔ caca bə'. 17 Sɩ a teenanɛ a jɛ dɩ khɛr ʋrɛ aa nanaa' bikuun dʋɔn ɔɔ caca bikuun. A hanaa thɩ̃ɛ ɔɔ thɩ̃sɔɔra fɛw a dɛbɩ balaɲɔ; gɩdonɩ ɔr dʋɔn ɔɔ daɓol bi ɔr hɩna caca bikuun hʋ hananɛ.
Mɔ̃ wa cʋʋnɩ bɩsã nũ nʋʋrdaar
18 Ado tibil hana bikuun dɩ do nũ nʋʋrdaar na lãlan, aa n pɛ ɔɔ thɩ na ɔɔ nɩ nũǝ', dɩ wɩ naarʋ a thʋnɔ, 19 thɩrɛ na nɩrɛ n fʋɔnɛɛ a jalana awɩ dɩɩ kɔ̃tɩ̃sɔɔra, le dɩ lõfonʋɔra, 20 a sɔ war: «Asɩ bikuun ha ʋrɛ nɩ yɩnɩ: nũ nʋʋrdaar gɩ na lãlan. Aa n pɛ sɩ nũǝ'; dakhabaa gɩ a dona ta kʋ.» 21 Kona fɛw ɔɔ dʋɔ n dʋrɛɛ na bokana a kɔ. Dɩ mɛ̃ na ti puure anɩ thɩ̃thɩɩn, gɩ do nɔɔ Ɩjɩrayɛl bɩsana fɛw n nɩɛ, gɩ kʋ wɩ maar.
Mɔ̃ wa cʋʋnanɩ wɩrɛ wɩ kʋnɩ a ju thɩrʋra