30
1 Dɩ Mʋɩjɩ mɩɛrɛ Ɩjɩrayɛl bɩsana gɩrɛ fɛʋʋkɛra Thãgba Kɔ̃tɩn kɔɔ sʋʋraanɩ.Jɔfʋ nɔ so thɩmɩɩra
2 Agɩpɩ Mʋɩjɩ sor wɩrɛra dɔnɩ kɔ̃tɩna Ɩjɩrayɛl bɩsanaa casɔɔra ayɩ: «Thãgba Kɔ̃tɩn so ayɩ: 3 "A tibil so nʋɔ Thãgba Kɔ̃tɩnna agɩbo a ʋlfɛrɛ dɩɩ fʋʋ, ntɛ na n phɩlã ga, a cʋɛ gɩrɛ fɛʋʋkɛra ɔɔ nɔ sonɩ.
4 A khebirɩkɛ hanɩ ɔɔ thɩɩ cɔ so nʋɔ Thãgba Kɔ̃tɩnna agɩbo a ʋlfɛrɛ dɩɩ fʋʋ, 5 a ɔɔ thɩ nɩɛ nʋɔɔkɛra a sonɩ agɩbo ʋlfɛrɛɛkɛra a ʋlfɛnɩ dɩɩ fʋʋ sɩ aa sʋʋraa thɩ̃a', khebirɩle n cʋɛ gɩrɛ fɛʋʋkɛra a sonɩ. 6 Sɩ a ɔɔ thɩ bo gɩ dawiikɛra a nɩɛnɩ ɔɔ nɔra a sonɩ agɩbo ɔɔ ʋlfɛra a ʋlfɛnɩ dɩɩ fʋʋ, gɩ kʋɛrɛ. Dɩ Thãgba Kɔ̃tɩn na faarɛ na haa gɩdonɩ ɔɔ thɩ bo ger. 7 Sɩ ado khebir dɔɔ kɔɔ so nʋɔ agɩbo a kɔɔ ʋlfɛrɛ sɩ aa kpɩɛra' dɩɩ fʋʋ, sa he kuun, 8 a ɔɔ ko nɩɛ nʋɔkɛra a sonɩ agɩbo ʋlfɛrɛɛkɛra a ʋlfɛnɩ dɩɩ fʋʋ sɩ aa sʋʋraa thɩ̃ɛ dawiikɛra a nɩɛna', khebirǝ n cʋɛ gɩrɛ fɛʋʋkɛra a sonɩ. 9 Sɩ a ɔɔ ko bʋʋ thɩmɩɩr dawiikɛra a nɩɛnɩ ɔɔ nɔra a sonɩ agɩbo ʋlfɛrɛɛkɛra a kpɩɛrna sa ʋlfɛ dɩɩ fʋʋ, gɩ kʋɛrɛ. Dɩ Thãgba Kɔ̃tɩn na faarɛ na haa. 10 A khikhɛrʋ agɩbo khɛ faana so nʋɔ agɩbo a ʋlfɛrɛ dɩɩ fʋʋ, a te. 11 Ado khɛrɩkɛ hanɩ ɔɔ koo cɔ so nʋɔ agɩbo a ʋlfɛrɛ dɩɩ fʋʋ, 12 dɩ ɔɔ ko nɩɛ sɩ aa sʋʋraa thɩ̃a', a aa bʋʋ thɩmɩɩra', khɛra n cʋɛ gɩrɛ fɛʋkɛra a sonɩ. 13 Sɩ a ɔɔ ko phɩlã gɩ dawiikɛra a nɩɛnɩ ɔɔ nɔra a sonɩ agɩbo ɔɔ ʋlfɛra a ʋlfɛnɩ dɩɩ fʋʋ, gɩ kʋɛrɛ. Thãgba Kɔ̃tɩn na faarɛ na haa gɩdonɩ ɔɔ ko phɩlã gɛr. 14 Kuun punone a tu agɩbo a bo nʋɔɔkɛ ɔɔ khɛr sonɩ agɩbo ʋlfɛrɛɛkɛ a ʋlfɛnɩ dɩɩ fʋʋ. 15 Sɩ a ɔɔ ko nɩɛ sɩ aa sʋʋraa thɩ̃a' dɩɩ cɔ, ɔɔ nɔ pɩrɩɩle nɩnanɛ dɩ a ture nʋɔra ɔɔ khɛr sonɩ agɩbo ʋlfɛrɛra a ʋlfɛnɩ dɩɩ fʋʋ. A tu ger gɩdonɩ dawiikɛ a nɩɛnɩ aa so thɩ̃a'. 16 Sɩ ado ɔ wiikɛ a nɩɛnɩ thɩmɩɩra karɔ sɩ dɩ bir ƴaal ɩnɩ n phɩlã gɩ, ɔɔ khɛrɩ dɩpa na kɛrɛ na heenʋʋ.
17 Gɛr dʋɔn jɔfʋsɔɔkɛ Thãgba Kɔ̃tɩn hanɩ Mʋɩjɩ kuun na ɔɔ khɛrɩdara, thɩrɛ na ɔɔ bikhɛrɩdara ɔbɔɔkɛ a donɩ khebir a ha ɔɔ thɩɩ cɔ.