Ɩjɩrayɛl bɩsana 'lɛr kǝǝre Madɩ̃adarara
31
1 Thãgba Kɔ̃tɩn sor Mʋɩjɩra ayɩ: 2 «Tire Madɩ̃adarara hellu puureraakɛ wɩ cʋʋnɩ Ɩjɩrayɛl bɩsanana, a gele karɔ fɩ the kɛ thɩɩra.» 3 Dɩ Mʋɩjɩ so Ɩjɩrayɛl bɩsana ayɩ: «Tibil ɩkha anɩ thɩ̃thɩɩn n gba koke thɩ̃ɛsɔ a jalla kɛna Madɩ̃adara a tire war hellu mɔna Thãgba Kɔ̃tɩn sonɩ. 4 Nɩ te kona gbɩlanɩ gbɩlanɩ Ɩjɩrayɛl caar fɛw bɩɛlbɩɛlla wɩ jal kʋʋrara. 5 Dɩ wɩ tire kona gbɩlanɩ gbɩlanɩ Ɩjɩrayɛl caar fɛʋʋ sɔrasɩ gbulõsɔɔra, dɩ wɩ gbɛbɩ ha sɔrasɛ gbɩlanɩ yʋɔr yeɲɔ (12.000) kɛ hananɩ koke thɩ̃ɛsɔ. 6 Dɩ Mʋɩjɩ thɔ̃ wɛr fɛw kʋʋra dɩ Eleajaar bonɩ jidaarɩ bikuun Fɩneasɩɩkɛ n fɔrɔnɩ thɩ̃bi sãsɩnanɛsɔ na koke tutuusɔ thɔɔ wɩ dɩ wɩ jal.7 Dɩ wɩ kenanɛ Madɩ̃adarara mɔna Thãgba Kɔ̃tɩn kɔɔ sonɩ Mʋɩjɩra a kʋʋr kona fɛw. 8 Wɩ kʋʋrɛ Madɩ̃adaraa jamana yemɔy a ɓanɔ : Evɩ gɩ na Rekɛm na Suur na Huur na Reba. Wɩ kʋrɛ dakha Bewɔɔrɩ bikuun Balam na bajɩna. 9 Ɩjɩrayɛl bɩsana fʋlɛlɛ Madɩ̃adaraa khɛrsɔ na awɩ bɩsãsɔ a kɔna; wɩ kpar dakha awɩ nʋ̃ kɔ̃tɩ̃sɔ fɛw na awɩ nʋ̃ yɩrasɔ fɛw a khɩɩna awɩ lẽle thɩ̃sɔ fɛw. 10 Wɩ thiire awɩ dɩ kɔ̃tɩ̃sɔ na awɩ dɩ bisɔ fɛw. 11 Dɩ wɩ khɩɩrɛ thɩ̃ɛ fɛʋʋkɛ wɩ taanɩ kʋʋra a fʋlɛna tɩbɩla a kpana nʋma a jalna. 12 Dɩ wɩ jalnanɛ tɩbɩla na thɩ̃ɛ fɛʋʋkɛ wɩ taanɩ kʋʋra Mʋɩjɩra na Eleajaar bonɩ jidaara na Ɩjɩrayɛl bɩsanana awɩ jɛw, Moabɩ bǝ̃ faana Jʋrdɛ̃ mɩɩr nʋɔra kɛ pɛnɩ ƴɩɛ Jeriko dɩɩra.
13 Dɩ Mʋɩjɩ na Eleajaar bonɩ jidaar na Ɩjɩrayɛl bɩsana kɔ̃tɩ̃sɔ ther le jɛw dɩ wa n cãa wɩ le khuirǝ. 14 Dɩ nĩkhii fʋrɛ Mʋɩjɩ sɔrasɩ kɔ̃tɩnanaakɛ dɔnɩ sɔrasɩ gbɩlanɩɩ (1000) kɔ̃tɩ̃sɔ na sɔrasɛ tamaa (100) kɔ̃tɩ̃sɔraakɛ thɛnɩ kʋʋra dɩ wa n bir. 15 Dɩ Mʋɩjɩ so war: «Mɔ̃ dɔ kɩrʋ dɩ nɩ faa khɛra fɛw na yire ? 16 Nɛrɛɛ thɛthɛ jɩrɛ dɩ Madɩ̃a khɛra tuon Balamɩ dɩɩr, a hal Ɩjɩrayɛl bɩsana dɩ wɩ cʋʋ puu kɔ̃tɩ̃ɩ Thãgba Kɔ̃tɩnna Pewɔɔr thɩmɩɩra, dɩɩ ɩna sar thɩlkɩɩr. 17 Dɩ gɛr gɩ nɛnɛ̃ nɩ kʋrɛ kuuminǝ fɛw na khɛra fɛʋʋkɛ jɛnɩ kuun. 18 Sɩ khɛr wɩrɛ na jɛnɩ kuuna', nɩ faa wɩ na yire wɩ do anɩda. 19 Sɩ nɛrkɛ kʋrɛnɩ tɩbɩla na wɩrɛ thaanɩ khera nɩ tɔɔkɛ khuirǝ gɩ dana wire makoɲɔ. Nɩ phʋɔlɛ anɩbara wire yẽther wirera na wire makoɲɔ wirera nɛrɛ na wɩrɛ nɩ fʋlɛnɩ kʋʋra a ɩna. 20 Nɩ phʋɔlɛ dakha kẽkɩɩn wo kẽkɩɩn na thɩ̃ɛ wo thɩ̃ɛɛkɛ wɩ cʋʋnanɩ lʋʋ na thɩ̃ɛ wo thɩ̃ɛɛkɛ wɩ cʋʋnanɩ bʋ suune na thɩ̃ pɛdaa wo thɩ̃ pɛdaakɛ dɔnɩ thɩrdaa.
21 Agɩpɩ dɩ bonɩ jidaar Eleajaar so sɔrasɛraakɛ kɔɔ jalanɩ kʋʋra ayɩ: "Nɩ yɛkɛ jɔfʋʋkɛ Thãgba Kɔ̃tɩn hanɩ Mʋɩjɩ: 22 Thɩ̃ɛsɔɔkɛ wɩ cʋʋnanɩ dɛ na dɛ bulo na ther sɩɛ na ther na 'lãa, na warã 23 kɛ dɔnɩ gɩrɛ wɩ n tonɩ dɔɔ sɩ ga n hã', nɩ tɔ gɩ dɔɔ a phʋɔlɛ gɩ. Sɩ gɩrɛ n hɩnanɩ dɔɔra, nɩ mʋa gɩ phɔphʋɔl ɲʋɔnɔ a phʋɔlɛ gɩ. 24 Wire makoɲɔ wirera nɩ cɔcɔɔnɛ anɩ kẽkẽsɔ dɩ mɛ̃ na phu jɔfʋ hʋɛra, agɩpɩ nɩ kɛr nɩ lõ jɛw.
Mɔ̃ wɩ tɩnɛnɩ thɩ̃ɛɛkɛ wɩ taanɩ kʋʋra
25 Thãgba Kɔ̃tɩn sor Mʋɩjɩra ayɩ: 26 «Thera thɩ̃ɛsɔɔkɛ wɩ khɩɩnɩ kʋʋra fɛw a ɩna, a thera dakha tɩbɩla na nʋma, fɛrɛ na Eleajaar bonɩ jidaar na Ɩjɩrayɛl bɩsanaa cɔdaar kõsɔ. 27 Agɩpɩ tɩnɛnɛ gɩ tɩnɛ paar yeɲɔ, a hana tɩnɛ pa bɩɛl sɔrasɛɛkɛ kɩɛnɩ kʋʋr sɩ a hana bɩɛlɩle Ɩjɩrayɛl bɩsã wɩrɛ sɛnɩ. 28 Gɩrɛ fa hanɩ sɔrasɛɛkɛ jalanɩ kʋʋra, yɛ gɩrɛ fa tironɩ gɩ do mɛr Thãgba Kɔ̃tɩnɩda : Te tɩɩ bɩɛl tɩbɩla taamɔɩra na nʋ̃ bɩɛl nʋma taamɔɩra : nasɔɔra, kũkǝ̃ǝsɔɔra, banasɔɔra na bɔsɔɔra. 29 Gɩrɛra fa tini sɔrasɛɛdara, kɛ dɔnɩ mɛr Thãgba kɔ̃tɩnɩɩda, gba a hana Eleajaar bonɩ jidaar. 30 Sɩ gɩrɛ na hanɩ Ɩjɩrayɛl bɩsana, tero tɩɩ bɩɛl tɩbɩla kpalaɲɔ yʋɔra, nʋ̃ bɩɛl nʋma kpalaɲɔ yʋɔra: Nasɔɔra, kũkǝnǝsɔɔra, banasɔɔra na bɔsɔɔra na gɩ̃ɩ nʋ̃sɔɔra a hana Levɩɩ mǝlsɔɔkɛ wɩ pɛnɩ wa n hɩnɛ mɛr Thãgba Kɔ̃tɩnɩ kẽkẽ wa. 31 Dɩ Mʋɩjɩ na Eleajaar cʋʋ mɔna Thãgba Kɔ̃tɩn kɔɔ sonɩ Mʋɩjɩra. 32 Nʋmaakɛ sɛnɩ nʋmanaakɛ Ɩjɩrayɛl sɔrasɛ kpanɩ kʋʋra har: Banaa na bɔ gbɩlanɩ der paar taamaadõ na kpalãther yʋɔr yemɔy (675000), 33 na nʋ̃ kɔ̃tɩna gbɩlanɩ kpalãther yʋɔr yeɲɔ (72 000) 34 na kũkǝnǝ gbɩlanɩ kpalãther bɩɛl (61.000) 35 na kheminǝǝkɛ na jɛnɩ kuuna' gbɩlanɩ kpelẽ yʋɔr yeɲɔ (32.000).
36 Gɩrɛ wɩ hanɩ sɔrasɛɛkɛ jalanɩ kʋʋra har : Nʋ̃ yɩra gbɩlanɩ der paar tãather na kpelẽ yʋɔr makoɲɔ na taamɔy (337.500), 37 dɩ wɩ tiro taamaadõ na kpalãther yʋɔr yemɔy (675) a ha Thãgba Kɔ̃tɩn. 38 Nʋ̃ kɔ̃tɩna har gbɩlanɩ kpelẽ yʋɔr maadõ (36000) dɩ wɩ tiro kpalãther yʋɔr yeɲɔ (72) a ha Thãgba Kɔ̃tɩn. 39 Kũkǝnǝ ha gbɩlanɩ kpelẽ yʋɔr na taamɔy (30 500) dɩ wɩ tiro kpalãther bɩɛl (61) a ha Thãgba Kɔ̃tɩn. 40 Tɩbɩla har gbɩlanɩ yʋɔr maadõ (16 000) dɩ wɩ tiro tɩbɩla kpelẽ yʋɔr yeɲɔ (32) a ha Thãgba Kɔ̃tɩn. 41 Dɩ Mʋɩjɩ har Eleajaar bonɩ jidaar gɩrɛ wɩ tini kɛ dɔnɩ Thãgba Kɔ̃tɩnɩda mɔ̃kɛra Thãgba Kɔ̃tɩn kɔɔ sʋʋraanɩ.
42 Tɩnɛ pa bɩɛlɩkɛ donɩ Ɩjɩrayɛl bɩsanaada kɛ Mʋɩjɩ leenɩ sɔrasɛɛdara a thɩɩn kpɩɩ, 43 gɩ har : Nʋ̃ yɩra gbɩlanɩ der paar tãather na kpelẽ yʋɔr makoɲɔ na taamɔy (337.500) 44 na nʋ̃ kɔ̃tɩna gbɩlanɩ kpelẽ yʋɔr maadõ (36.000) 45 na kũkǝnǝ gbɩlanɩ kpelẽ yʋɔr na taamɔy (30.500) 46 na tɩbɩla gbɩlanɩ yʋɔr maadõ (16.000). 47 Dɩ Mʋɩjɩ tirore nʋ̃ bɩɛl nʋma kpalaɲɔ yʋɔra, tɩɩ bɩɛl tɩbɩla kpalaɲɔ yʋɔra a ha Levɩɩ mǝlsɔɔkɛ wɩ pɛrnɩ dɩ wa n hɩɩn Thãgba Kɔ̃tɩnɩ kẽkẽ wa mɔna Thãgba Kɔ̃tɩn kɔɔ sʋʋraanɩ.
Sɔrasɛɛ kɔ̃tɩ̃sɔ 'laarɛ khaardaa a fʋɔrna Thãgba Kɔ̃tɩn
48 Sɔrasɛɛ kɔ̃tɩ̃sɔ, kɛ dɔnɩ sɔrasɛ gbɩlanɩ kɔ̃tɩ̃sɔ na sɔrasɛ tamaa kɔ̃tɩ̃sɔ tɔr dã Mʋɩjɩ, 49 a sʋʋraa: «Sɛr afɩ thɔ̃dara therre sɔrasɛɛkɛ sɩ n kʋmãdɩnɩ dɩ tɩɩ bɩɛllakɛ na ɓɔr asɩ thɩ̃thɩɩna'. 50 Dɩ gɛr gɩ sɛrɛ fɛw bɩɛlbɩɛl ɩna khaardaar, kɛ dɔnɩ dɛ thɩ̃ɛsɔ : Sɛnsɔ, na kpẽbiisɔ na yẽbi tʋʋsɔ na nũ tʋʋsɔ na dɛ lẽbiisɔ sɩ ha Thãgba Kɔ̃tɩn a hɛlna asɩ sopuu. 51 Dɩ Mʋɩjɩ na Eleajaar bonɩ jidaar teere thɩ̃ɛsɔɔlera fɛw wɩ cʋʋnanɩ dɛ. 52 Thɩ̃ɛsɔɔlera wɩ cʋʋnanɩ dɛ, kɛ sɔrasɛ gbɩlanɩɩ kɔ̃tɩ̃sɔ na sɔrasɛ tamaa kɔ̃tɩ̃sɔ hanɩ Thãgba Kɔ̃tɩn agɩ dʋbɩ har kilǝ tamaa na kpalãther na yʋɔrsɔ (170). 53 Sɩ sɔrasɩ khɩna wer, ntɛ toonanɛ gɩrɛ a 'lɛnɩ kʋʋra dɩɩ do ɔɔda. 54 Dɩ Mʋɩjɩ na Eleajaar bonɩ jidaar gbaar dɛ thɩ̃ɛsɔɔlera sɔrasɛ gbɩlanɩɩ kɔ̃tɩ̃sɔ na sɔrasɛ tamaa kɔ̃tɩ̃sɔ 'laanɩ a thɩɩn Thãgba cãa waw Thãgba Kɔ̃tɩnɩ ƴɛra gɩ do Ɩjɩrayɛl bɩsanaa jɩ̃jɩna thɩ̃.