Jɔfʋ dɩwɩlʋ koo bonɩ jirǝ
28
1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana aa: Na n ɔrɔ a na hana mɩ khaardaasɔɔkɛ dɔnɩ ɩ̃da agɩ bɔra : kɛ dɔnɩ thɩ̃bi bonɩɛsɔɔkɛ wɩ n thiini dɔɔra dɩ ga n hʋ̃ mɛr Thãgba Kɔ̃tɩn daw.» 3 Sɔ war wɔɔ: «Wire wo wire na n je mar bonɩ thiinǝ na bana ɓolla yeɲɔɔkɛ na hananɩ taana', kɛ hananɩ yɛ bɩɛlbɩɛl. Bonɩɛ gɩɩkɛ na n jini khorr, khu paar na n hala'. 4 Nɩ jenǝ bana ɓol bɩɛl duuro, a jenǝ bɩɛlɩle dʋɔr birǝ bɔɔ. 5 Nɩ ɓana bonɩɛsɔ fɛw bɩɛlbɩɛlla thɩ̃bi bonɩɛ : mɩ̃ phuu kilǝ yẽther kɛ wɩ gbʋrnanɩ olɩvɩ nĩ tɛnanɛ bɔɔbɔɔ litiri bɩɛl na dakuru. 6 Dɩwɩlʋ koo bonɩ thiinǝ gɩ mɔna wɩ n kɔɔ ji gɩnɩ Sɩnayɩ gɔ̃gʋɔnnɔ. Bonɩ thiinǝ gɩ, kɛ n hʋnanɩ mɛr Thãgba Kɔ̃tɩn daw. 7 Nɩ ɓana duur bana ɓol bonɩɛraale dɩvɛ̃ɛkɛ karanɩ litiri bɩɛl na dakuru kɛ na jini mɛr Thãgba Kɔ̃tɩnna pa phuurǝ. 8 Dʋɔr birǝ bɔɔ nɩ jinǝ balaɲɔ bana ɓolʋʋle nɩ ɓanɔ thɩ̃bi bonɩɛ na dɩvɛ̃ bonɩɛ duurda khaara. Bonɩɛ gɩɩkɛ wɩ n thiini dɔɔra dɩ ga n hʋ̃ mɛr Thãgba Kɔ̃tɩn daw.Jɔfʋ hɩɩr wi bonɩ jirə
9 Hɩɩr wire na n je bonɩɛ na bana ɓolla yeɲɔɔkɛ na hananɩ taana', kɛ hananɩ yɛ bɩɛlbɩɛl a je dakha thɩ̃bi bonɩɛ na mɩ̃ phuukɛ kilǝ maadõ, kɛ wɩ gbʋrnanɩ niin na dɩvɛ̃ bonɩɛ. 10 Gɛr dʋɔn hɩɩr wire koo bonɩ thiinǝ gɩ ɓã wire koo bonɩ thiinənǝ na dɩvɛ̃ bonɩɛra.
Jɔfʋ sɩporɩ caca wi bonɩ jirə
11 Sɩpor wo sɩporɩ caca wi, nɩ je mɛr Thãgba Kɔ̃tɩnna bonɩ thiinǝ na nakena yeɲɔ na banakɩɩr na bana ɓolla makoɲɔɔkɛ na hananɩ taana', kɛ cieni yɛ bɩɛlbɩɛl. 12 Nɩ ɓana nakena fɛw bɩɛlbɩɛlla, kɛ na jinəni bonɩ thiinə, thɩ̃bi bonɩɛ : mɩ̃ phuu kilǝ yʋɔr phe bire kɛ wɩ gbʋrnanɩ niin; a ɓana banakɩɩra mɩ̃ phuu kilǝ maadõ kɛ wɩ gbʋrnanɩ niin, 13 a ɓana bana ɓolla fɛw bɩɛlbɩɛlla mɩ̃ phuu kilǝ yẽther yẽther, kɛ wɩ gbʋrnanɩ niin. Gɛr dʋɔn bonɩɛɛkɛ wɩ n thiini dɔɔra dɩ ga n hʋ̃ mɛr Thãgba Kɔ̃tɩn daw. 14 Nɩ ɓananɔ dɩvɛ̃ litiri yẽther nakɩɩr wo nakɩɩraakɛ na jinəni bonɩ thiinə, a ɓananɔ dɩvɛ̃ litiri yeɲɔ banakɩɩra, a ɓananɔ dɩvɛ̃ litiri bɩɛl na dakuru bana ɓolla fɛw bɩɛlbɩɛlla. Gɛr dɔ bonɩ thiinǝsɔɔkɛ na n jini sɩpor wo sɩporɩ caca wirǝ, yɩɛra. 15 Na n je dakha mɛr Thãgba Kɔ̃tɩnna so hɛl bonɩɛ na bʋkɩɩr a ɓana wire fɛʋʋ bonɩ thiinǝnə na agɩ dɩvɛ̃ bonɩra.
Jɔfʋ pakɩ fɛtɩ bonɩ jirə
16 Yɩɛrɩ caca sɩporɩ wire yʋɔr yenãa wirǝ nɩ cʋɛ Pakɩ fɛtɩ mɛr Thãgba Kɔ̃tɩnɩ i dʋbɩra. 17 Wire yʋɔr yemɔy wirerə ɔɔ sɩporaalera fɛtɩ na fʋ. Buruukɛ na hananɩ tabɩɩra' na n kho nɩ cʋʋna wire makoɲɔ. 18 Caca wirera na hananɛ kpa jɛ kɔ̃tɩ̃ɩ nɩ dʋbɩna mɛr Kɔ̃tɩn. Na n cʋʋ thɔ̃ bɩɛllakɛ ɔ wiila'. 19 Nɩ je mɛr Thãgba Kɔ̃tɩnna bonɩ thiinǝ na nakena yeɲɔ na banakɩɩr na bana ɓolla makoɲɔɔkɛ na hananɩ taana' kɛ cieni yɛ bɩɛlbɩɛl. 20 Nɩ ɓana nʋma fɛw bɩɛlbɩɛllaakɛ na jinəni bonɩ thiinə thɩ̃bi bonɩɛ : mɩ̃ phuukɛ wɩ gbʋrnanɩ niin. Nɩ ɓana mɩ̃ phuu kilǝ yʋɔr phe bire nakena fɛw bɩɛlbɩɛlla, a ɓana kilǝ maadõ banakɩɩra, 21 a ɓana kilǝ yẽther bana ɓolla makoɲɔraale bɩɛlbɩɛlla fɛw. 22 Nɩ je dakha sopuu faa bonɩɛ na bʋkɩɩr a hɛlana anɩ sopuu. 23 Nɩ je ga bonɩsɔɔkɛra a na ɓana duur bonɩ thiinenǝǝkɛ dɔnɩ wire koo bonɩ. 24 Na n je gɩ wire wo wire, wire makoɲɔraale gɩ do dikorɩɩkɛ wɩ n thiini dɔɔra ga n hʋna mɛr Thãgba Kɔ̃tɩn daw. Wɩ je gɩ a na ɓana wire koo bonɩ thiinǝnǝ na agɩ dɩvɛ̃ bonɩra. 25 Wire makoɲɔ wirerə na hananɛ kpa jɛ kɔ̃tɩ̃ɩ a na dʋbɩna mɛr Kɔ̃tɩn. Na n cʋʋ thɔ̃ bɩɛllakɛ ɔ wiila'.
Jɔfʋ Pãtɩkɔtɩ fɛtɩ bonɩ jirə
26 Pãtɩkɔtɩ fɛtɩ wire, kɛ dɔnɩ lɛ thɩ̃ gba fɛtɩ, ɔbɔɔkɛ na ɩnanɩ mɛr Thãgba Kɔ̃tɩnna bonɩ ji thɩ̃ɛ caca thɩɛnaakɛ na gbanɩ, na hananɛ kpa jɛ kɔ̃tɩ̃ɩ ɩ̃ i dʋbɩra. Na n cʋʋ thɔ̃ bɩɛllakɛ ɔ wiila'. 27 Nɩ je bonɩ thiinǝǝkɛ n hʋnanɩ mɛr Thãgba Kɔ̃tɩn daw na nake ɓolla yeɲɔ na banakɩɩr na bana ɓolla makoɲɔɔkɛ hananɩ yɛ bɩɛlbɩɛl. 28 Nɩ ɓana nʋma fɛw bɩɛlbɩɛllaakɛ na jinəni bonɩ thiinə thɩ̃bi bonɩ thɩ̃ɛ : mɩ̃ phuukɛ wɩ gbʋrnanɩ niin. Nɩ ɓana mɩ̃ phuukɛ wɩ gbʋrnanɩ niin kilǝ yʋɔr phe bire nakena bɩɛlbɩɛlla, a ɓana kilǝ maadõ banakɩɩra, 29 a ɓana kilǝ yẽther bana ɓolla makoɲɔraale fɛw bɩɛlbɩɛlla. 30 Nɩ je dakha so hɛl bonɩɛ na bʋkɩɩr a hɛlana anɩ sopuu. 31 Nɩ je ga bonɩsɔɔkɛra a na ɓana wire koo bonɩ thiinǝnə na thɩ̃bi bonɩɛra. Na n jenǝ nʋmaakɛ na hananɩ taana' na dɩvɛ̃ mɔ̃ teananɩ.