Jɔfʋ kheminəə khĩdi thɩ̃ gba thɩmɩɩra
27
1 Kuun bɩɛl gɩ da n do Selofehadɩ, Hefɛɛr kɔnaa; Hefɛɛr thɩ wɩ n we Galaad dɩ Galaadɩ thɩ na n do Makɩɩr, dɩ Makɩɩrɩ thɩ na n do Manase, Manasee mǝlsɔ wɩ do a the Jojɛfɩɩ cara. Dɩ Selofehadɩɩ bikhɛrsɔ yemɔy kɛ wɩ n wenɩ: Maala na Noa na Hogɩla na Mɩlka na Tɩɩrsa, 2 ɩɩrɛ jal Thãgba cãa wa lõfonʋɔra a yɩ Mʋɩjɩ na Eleajaar bonɩ jidaar na Ɩjɩrayɛl bɩsanaa kɔ̃tɩ̃sɔ na Ɩjɩrayɛl bɩsana fɛw a so war: 3 Asɩ thɩ khire bǝ̃ kparara. Aa kɔɔ ha Kooree gbulonaakɛ ɩrɛnanɩ lãʋ Thãgba Kɔ̃tɩnna ga, ɔɔ thɛthɛɛ sopuu dɔ nɔɔ dɩ khi sɩ aa kɔɔ kɔ̃ kũubirǝ'. 4 Dɩ ɔɔ i teenanɛ gɩ te ɔɔ caa thɩ̃thɩɩn gɩdonɩ aa hana kũubirǝ' ya? Nɩ hana sɩ thɩɩ asɩ thɩɩ omɩsɔɔ thɩ̃thɩɩn. 5 Dɩ Mʋɩjɩ gbaar awɩ thɩmɩɩra a dana Thãgba Kɔ̃tɩnɩ ƴɔɔ. 6 Dɩ Thãgba Kɔ̃tɩn so Mʋɩjɩra: 7 «Selofehadɩɩ bikhɛrsɔ hananɛ hʋɛ. Hana wɩ thɩɩ awɩ thɩɩ omɩsɔɔ thɩ̃thɩɩn. Hana wɩ thɩɩkɛ na kɔɔ dɔnɩ awɩ thɩɩda. 8 Sɔ Ɩjɩrayɛl bɩsanana ayɛ: Ɔbɔɔkɛ kuun khini sɩ aa hana kũubirǝ', nɩ hana ɔɔ bikhɛr ɔɔ khĩdi thɩ̃. 9 Ado aa hana bikhɩɛna' nɩ hana ɔɔ õkũusɔ ɔɔ khĩdi thɩ̃. 10 Ado aa hana õkuuna' nɩ hana ɔɔ thɩɩ õkũusɔ ɔɔ khĩdi thɩ̃. 11 Ado ɔɔ thɩɩ õkũusɔ na hala', nɩ hana tibil ɔɔ cara ɔɔ khĩdi thɩ̃ a hɩ̃. Ɔr na gbaan. Khĩdi thɩ̃ gba jɔfʋ ga do Ɩjɩrayɛl bɩsanana mɔna mɛr Thãgba Kɔ̃tɩn sonɩ fɛr Mʋɩjɩra».Thãgba phiire Jojue a dɔ Mʋɩjɩɩ dedee
12 Thãgba Kɔ̃tɩn sor Mʋɩjɩra: «Jʋnɛ Abarɩm gɔ̃gɔnana sa hɩnɛ dɩɩkɛra ma hanɩ Ɩjɩrayɛl bɩsana. 13 Hɩnɛ dɩɩra, agɩpɩ fɛrɛ dakha fa khiri na gbũ afɩ thɩ kɔ̃tɩ̃sɔɔra mɔ̃kɛra afɩ õkuun Aarɔ̃ kɔɔ gbuni, 14 gɩdonɩ nɩ nʋʋrɛ nũu ɩ̃ nɔ thɩmɩɩra Sɩn bǝ̃ kparara ɔbɔɔkɛ Ɩjɩrayɛl bɩsana kɔɔ ɩɩrna mɩnɩ kɛ̃kɛrɛnɛ. Na kɔɔ nɩna Ɩjɩrayɛl bɩsana dɩ wɩ jɩ dɩ mɩ dor Thãgbaakɛ phonɩ Meriba ɲɔ thɩmɩɩra ga». Kɩlaakɛ kɔɔ kanɩ ɲɔ thɩmɩɩra, Kadɛsɩ, Sɩn bǝ̃ kparara, gaa thɩmɩɩr gɩ. 15 Dɩ Mʋɩjɩ so Thãgba Kɔ̃tɩnna ayɩ: 16 «Thãgba Kɔ̃tɩnɩkɛ thɩ̃ tinǝne fɛʋʋ fesu n theronɩ n pɩɛr tibil a do Ɩjɩrayɛl bɩsanaa ƴɛkʋʋlda, 17 kɛ na n kʋlɛna wɩnɩ ƴɩɛ kʋʋra, a kʋʋlna wɩ ƴɩɛ a na n birnə, a na n thɔɔ wɩ gɩ do nɔɔ Thãgba Kɔ̃tɩnɩ too na n ho banasɔɔkɛ na hananɩ khekhaa ga.» 18 Dɩ Thãgba Kɔ̃tɩn birse Mʋɩjɩ: «Kpa Nunii bikuun Jojue, tibil gɩɩkɛ henǝni ɩ̃ Thu a dɛɛnaa afɩ ɲɔ̃ɔ. 19 Kpaa jalana Eleajaar bonɩ jidaarɩ ƴɛra na Ɩjɩrayɛl bɩsana fɛʋʋ ƴɛra a pɩɛraa a do afɩ dedee awɩ yiro. 20 Pɩɛraa cʋʋrɩkɛ fɩ hananɩ, gɩ do nɔɔ Ɩjɩrayɛl bɩsana fɛw na n nɩɩ nũu. 21 Jojue na n jɩlɛ Eleajaar bonɩ jidaarɩ ƴɛra, Eleajaar n gba Urɩm a bulena mɛr Thãgba Kɔ̃tɩn a na n haa. Eleajaarɩ nɔ thɩmɩɩra wa n jal kʋʋra, ɔɔ nɔ thɩmɩɩrara wa kɛr wa n bir. Gɩrɛ Eleajaar na n sʋʋraanɩ, gɛr ɔr na Ɩjɩrayɛl bɩsana na n cʋʋ». 22 Dɩ Mʋɩjɩ cʋʋrɛ mɔna Thãgba Kɔ̃tɩn sʋʋraanɩ. Dɩ a kpar Jojue a jalna Eleajaar bonɩ jidaarɩ ƴɛra na Ɩjɩrayɛl bɩsana fɛʋʋ ƴɛra. 23 Dɩ a dɛɛnaanɛ ɔɔ ɲɔ̃ a pɩɛraa dɩ do ɔɔ dedee mɔna Thãgba Kɔ̃tɩn kɔɔ sʋʋraanɩ.