Ɩjɩrayɛl bɩsana fʋɔrɛ thãgba kpɩɩsɔ.
25
1 Ɩjɩrayɛl bɩsana kɔɔ toore Sɩtɩm ɓɛlɛnɔ, a ma dɩ wa n cʋʋ bɔdɛl thɔma na Moabɩ kheminə. 2 Dɩ Moabɩ kheminəəle n wer Ɩjɩrayɛl bɩsana awɩ bonɩsɔɔraakɛ wɩ n jini awɩ thãgbasɔɔra, dɩ wɩ kho agɩ dɩko a gburõkhunǝ awɩ thãgbasɔɔra a na fʋɔr wɩ. 3 Dɩ Ɩjɩrayɛl bɩsana mar Baal-Pewɔɔr thãgba dɩ wa n fʋɔrʋʋ. Dɩ nĩkhii fʋrɛ Thãgba Kɔ̃tɩn Ɩjɩrayɛl bɩsanana.4 Dɩ Thãgba Kɔ̃tɩn so Mʋɩjɩra: «Fʋlɛnɛ Ɩjɩrayɛl bɩsanaa kɔ̃tɩ̃sɔ fɛw, a jo wɩ ɩtʋɛra mɛr Thãgba Kɔ̃tɩnɩ ƴɛbʋrɔ, gɩ do nɔɔ nĩkhi khɩɩkɛ fɔ mɩnɩ n cɩ». 5 Dɩ Mʋɩjɩ so Ɩjɩrayɛl bɩsanaa sogʋʋrdasɔɔra ayɩ: «Nɛrɛ fɛw bɩɛlbɩɛl ntɛ n kɔ ɔɔ tibil wɩrɛraakɛ fʋɔrɛnɩ Baal-Pewɔɔ thãgba.» 6 Dɩ ga bɔɔlera Ɩjɩrayɛl bɩsã bɩɛl pɔna Madɩ̃a khebir a nɩna ɔɔ omɩsɔ, Mʋɩjɩɩ ƴɛra na Ɩjɩrayɛl bɩsana fɛw ƴɛra, ɔbɔɔkɛ wɩ hanɩle Thãgba cãa wa lõfonʋɔra dɩ wa n bɩ. 7 Dɩ mɔ̃ Eleajaarɩkɛ dɔnɩ Aarɔ̃ bonɩ jidaarɩ bikuun, ɔɔ bikuun Fɩneasɩ na yɩɩnɩ, a ɩɩrɛ Ɩjɩrayɛl bɩsanaa thɩ̃thɩɩn a gba kpɩla, 8 a kpa kuunnaale ɔɔ kẽkẽ wa bɩnɔ, a gʋɔr wɛr yeɲɔra fɛw ƴɔɔrɛra a kʋʋr. Dɩ thɩlkɩɩrɩle kɔɔ hanɩ Ɩjɩrayɛl bɩsanaa thɩ̃thɩɩn khure. 9 Sɩ dɩɩ do thɩlkɩɩrɩle kɔɔ 'lire kʋrɛ tɩbɩla gbɩlanɩ kpelẽ yenã (24.000).
10 Dɩ Thãgba Kɔ̃tɩn so Mʋɩjɩra: 11 «Eleajaarɩkɛ dɔnɩ Aarɔ̃ bonɩ jidaarɩ bikuun, ɔɔ bikuun Fɩneasɩ ɩɛn ɩ̃ nĩkhi Ɩjɩrayɛl bɩsananaa bilo gɩdonɩ a teere ɩ̃ sora a gbana wɩ gbugi-nĩkhii. Dɩ gɛr gɩ ma bũburõ Ɩjɩrayɛl bɩsana ɩ̃ gbugi-nĩkhirə ga.» 12 Dɩ gɛr gɩ sʋɔraa aa: «Mɩ ʋlfɛnaanɛ ha ie nɔ bɩɛl ʋlfɛrɛ. 13 Dɩ nɔ bɩɛl ʋlfɛrɛɛlera mɩ ʋlfɛnaanɩ ga dor dakha ɔɔ mǝlsɔɔkɛ na kpaanɛnɩɩda. Gɛr dʋɔn wɛr na dɔ bonɩ jidara bɔɔ khorr, gɩdonɩ a teere ɩ̃ sora a gbana Ɩjɩrayɛl bɩsana gbugi-nĩkhii, a hɛlna war awɩ sopuu. 14 Ɩjɩrayɛl kuunile wɩ kʋnɩ na Madɩ̃a khebirɩle, ɔɔ i n dʋɔn Jɩmɩrɩ, Saluu bikuun gɩ. A kɔɔ dor kɔ̃tɩ̃ Sɩmeyɔ̃ məlsɔɔ cɔka bɩɛlla. 15 Dɩ Madɩ̃a khebirɩle wɩ kʋnɩ n dʋɔn Kojɩbɩ. Ɔɔ thɩ wɩ n we Suur, a kɔɔ dor kɔ̃tɩn Madɩ̃adaraa ca bɩɛlla. 16 Dɩ Thãgba Kɔ̃tɩn sor Mʋɩjɩra ayɩ: 17 «Nɩ kɛna Madɩ̃adara a kʋrɛ wɩ, 18 gɩdonɩ wɩ do narɛ lãlara, a fɩɩl nɩ Pewɔɔr thɩmɩɩra na awɩ õkhɛr Kojɩbɩɩ thɩmɩɩra, kɛ dɔnɩ Madɩ̃a kɔ̃tɩ̃ bɩɛlɩ bikhɛr, kɛ wɩ kʋnɩ Pewɔɔr thɩlke bɔɔlera.
Thãgba sor wɩ thera Ɩjɩrayɛl bɩsana balaɲɔdaar
19 Mɔ̃ thɩlkɩɩrɩle kanɩ pɩ,