24
1 Mɔ̃ Balam yɩɛnɩ dɩ gɩ dar Thãgba Kɔ̃tɩnna da bɔna Ɩjɩrayɛl bɩsana, aa bule Thãgbaa tuur a hɩ̃ɩ mɔ̃ a n kɔɔ cʋʋnɩ caca khaa ga, a kɛrɛ ƴɩɛ a ee bǝ̃ kparaa. 2 Dɩ mɔ̃ a ɓanɩ ƴɩɛ na hɩɩn a yɩ Ɩjɩrayɛl bɩsana jɛnɩ caar caar, Thãgbaa Thu lʋʋnaanɛ. 3 Dɩ a tire nɩɛ thakɛ ayɩ:«Yɛkɛ gɩrɛ Bewɔɔrɩ bikuun Balamɩ sonɩ,
Yɛkɛ gɩrɛ kuunikɛ n yɛnɩ cãa cãa sonɩ,
4 Yɛkɛ gɩrɛ ʋrɛ n nɩɛnɛnɩ Thãgbaa thɩmɩɩsɔ sonɩ
Yɛkɛ gɩrɛ ʋrɛ n yɛnɩ thɩ̃ yɩrsɔɔkɛ thɛnɩ Punone Fɛw Hɩ̃daarɩ pa sonɩ,
Yɛkɛ gɩrɛ ʋrɛ Thãgba n khɛrnɩ yinə ɔbɔɔkɛ a n gburõkhunɩ da n fʋɔrʋʋ sonɩ.
5 Jakɔbɩɩ mǝlsɔ yaa, anɩ kẽkẽ wasɔ ɓʋ̃ɔ ga do kpãkpalã ga !
Ɩjɩrayɛlɩ məlsɔ yaa, anɩ cɔsɔ ɓʋ̃ɔ ga do kpãkpalã ga !
6 Gɩ phɩnɛ mɛ mɔ̃ ɲɔ n phɩnɩ,
A ha mɔ̃ nãkʋɔrsɔ hanɩ mɩɩr nʋɔra,
Gɩ hʋrɛ alʋɛsɩsɔɔkɛ
Thãgba Kɔ̃tɩn thelnɩ,
A ho sɛdɩrɩ thɩraakɛ hanɩ ɲɔ nʋɔsɔɔra.
7 Ɲʋɔn hiri Ɩjɩrayɛl bɩsanaa ɲɔ cɛdasɔ dɩ ga n deer,
Dɩ wɩ n diire awɩ thɩ̃sɔ lɩɛsɔɔraakɛ huronenɩ a dã.
Awɩ jamana jɔr Agagɩ jamana na punone,
dɩ awɩ jamana dɩ 'lɛr punone da n pɛr.
8 Thãgba cʋɛ wɩ dɩ wɩ the Ejipiti dɩɩra
na fãgaakɛ hɔnɩ larɩ fãga,
Wɩ n cɛcɛbɛrɛ caarsɔɔkɛ dɔnɩ awɩ lãlaardara,
Dɩ wɩ cʋɔr awɩ khubisɔ.
Dɩ wɩ thaar wɩ na sẽesɔ a kʋʋr.
9 Wɩ n sʋrrɛ, wɩ n phɩnɛ sidũ'ũu kha na sidũ'ũ nɩɩ kha.
Amɛ na ɩrɛ wɩ?
Ʋrɛ n bɔna wɩnɩ n 'lɛ bɔnanɛ,
Ʋrɛ n sɔna wɩnɩ n 'lɛ sʋɔn.
10 Dɩ nĩkhii thar Balakɩ Balamɩna dɩ pho ɲɛ̃ɛ sa sʋʋraa : «Mɩ we fer fɩ ɩna sɔna ɩ̃ lãlaardara sɩ balãther ha gɩrɛ fɩ bɔna wɩnɩ fɛw. 11 Nɛnɛ̃, gba hʋɛ ! Na ca! Kɔna afɩ dʋɔ. Mɩ kɔɔ yɩ ma ha fɛr i dʋbɩ thɩ̃ɛ jɔɔ sɩ Thãgba Kɔ̃tɩn tɔ̃ fɛr i dʋbɩ thɩ̃ɛlera.» 12 Dɩ Balam birse Balakɩ ayɩ: «Ga do mɛ̃ mɩ kɔɔ mɩɛ tɩbɩlaakɛ fɩ thɔ̃ marnɩ ayɩ: 13 "A Balakɩ ha mɩnakɛ dɛ bulo fɛw na dɛ fɛʋʋkɛ hanɩ ɔɔ cɔ sɩ ma puno na kəə Thãgba Kɔ̃tɩnɩ nɔkara gaa gaa. Ma puno na cʋʋ bɔɔ dɩ puure gɩ kɛ thɛnɩ ɩ̃ pa ga. Sɩ gɩrɛ Thãgba Kɔ̃tɩn na sonɩ gɛr ma so." 14 Nɛnɛ̃ mɩ n kɛrɛ ɩ̃ toora. Sɩ ɩna ma mɩɛ fɛr gɩrɛ tɩbɩlaakɛ na cʋʋnɩ afɩ too dɩkhõo.»
15 Dɩ Balam a tire nɩɛ thakɛ ayɩ:
«Yɛkɛ gɩrɛ Bewɔɔrɩ bikuun Balamɩ sonɩ,
Yɛkɛ gɩrɛ kuunikɛ n yɛnɩ cãa cãa sonɩ,
16 Yɛkɛ gɩrɛ ʋrɛ n nɩɛnɛnɩ Thãgbaa thɩmɩɩsɔ sonɩ
Yɛkɛ gɩrɛ ʋrɛ n yɛnɩ thɩ̃ yɩrsɔɔkɛ thɛnɩ Punone Fɛw Hɩ̃daarɩ pa sonɩ,
Yɛkɛ gɩrɛ ʋrɛ Thãgba n khɛrnɩ yinə ɔbɔɔkɛ a n gburõkhunɩ da n fʋɔrʋʋ sonɩ.
17 Mɩ yɩrɛ gɩrɛ na dananɩ sɩ gado nɛnɛ̃ ga.
Mɩ n hɩɩnʋʋnɛ,
sɩ aa wɔrɔ̃a'
Ƴepǝlǝ̃bire phãa Jakɔbɩɩ mǝlsɔɔ thɩ̃thɩɩn,
Jamana ther Ɩjɩrayɛlɩ məlsɔɔ thɩ̃thɩɩn,
da n cɔ Moabɩdara ɔtaabe na ɔɔ gbãgalãbir.
da n cʋɔr Sɛtɩɩ mǝlsɔɔ fɛw yʋʋ.
18 A na taarɛ Edɔ̃daraa dɩ
A taa Seyɩɩr, kɛ dɔnɩ ɔɔ sodaraa dɩ.
Ɩjɩrayɛlɩ məlsɔ hinəne fãga.
19 Ʋrɛ thɛnɩ Jakɔbɩra n punone ɔɔ sodara.
Dɩ kʋʋr wɩrɛ sɛnɩ na yire dɩɩsɔɔra.
Balam mɩɩrɛ Ɩjɩrayɛl bɩsanaa sodaraa bũburõ
20 Agɩpɩ Balam yɩrɛ Amalɛkɩɩ mǝlsɔ dɩ a tire nɩɛ thakɛ ayɩ:
«Amalɛkɩɩ mǝlsɔ dʋɔn yʋʋ caarsɔɔra,
sɩrakɛ dikhõo wa bũburone.»
21 Dɩ a yɩrɛ Kayɛ̃ɛ məlsɔ a ti nɩɛ thakɛ ayɩ :
«Nɛr Kayɛ̃ɛ məlsɔ, anɩ cɔ pasɔ tɩrɛ kɩbɩ
a ho mɔ̃ 'lomĩ tɩɛl n hanɩ boka nãabʋʋna ƴũu.
22 Sɩ nɛr Kayɛ̃ɛ məlsɔ, na hɩnɛ
ɔbɔɔkɛ Asɩrɩdara na fʋlɛ nɩnɩ na jalna dɩ kpɩɩra.»
23 Dɩ Balam tire nɩɛ wo ayɩ:
«Hu! Ʋmɔ̃ na hana yire ɔbɔɔkɛ Thãgba na cʋʋnɩ gelela?
24 Batosɔ na ther Kɩtɩma na ɩ̃
wa punone Asɩrɩdara
A na punona Ebɛɛrɩɩ mǝlsɔ, dɩ wa bũburone khorr.»
25 A gele pɩ Balam gbaar hʋɛ a kɛr da n kɔ̃ ɔɔ dʋɔ dɩ Balakɩ dakha jalna ɔɔ bil.