Balam bɔnanɛ Ɩjɩrayɛl bɩsana
23
1 Dɩ Balam so Balakɩra: «Mɛ mɩ kɩɛr bonɩ ji paar makoɲɔ a hana mɩ nakena makoɲɔ na banakena makoɲɔ.» 2 Dɩ Balakɩ cʋʋ gɩrɛ Balam sʋʋraanɩ. Dɩ wɛr yeɲɔ jinǝne nake bɩɛl na banake bɩɛl bonɩɛ bonɩ ji paar fɛw bɩɛlbɩɛla bonɩ ji pa makoɲɔraale. 3 Dɩ Balam so Balakɩra: «Jɩlɛ kɩɛr afɩ bonɩ thiinǝ kɩrɔ sɩ ɩ̃ tɔ ɩ̃ jal ƴɔɔ gbe agakpaana' Thãgba Kɔ̃tɩn na cãa mɛr. Dɩ ma so farɛ gɩrɛ a na so marnɩ. Agɩpɩ dɩ gba jʋʋn gɔ̃gɔ̃ yʋɔ. 4 Dɩ Thãgba pɔr Balamɩna dɩ sʋʋraa: «Mɩ pɛrɛ dɩ wɩ mɩ bonɩ ji paar makoɲɔ dɩ̃ jiro bonɩɛ gɛr fɛw bɩɛlbɩɛla na nakɩɩr na banakɩɩr». 5 Dɩ Thãgba mɩɩrɛ Balam gɩrɛ a na sonɩ sa sʋʋraa: «Kɛrra birǝ a sɔ Balakɩra oti». 6 Dɩ Balamɩ kɛrɛ bir Balakɩra kɛ hanɩle a jɩɩl ɔɔ bonɩ thiinǝ kɩrɔ ɔr na Moabɩ kɔ̃tɩna fɛw. 7 Dɩ Balam pɛ nɩɛ thakɛ ayɩ:«Balakɩ cʋʋ mɛr dɩ̃ the Aram dɩɩra a ɩ̃
Moabɩ jamanana cʋʋ mɛr
dɩ̃ the gɔ̃gɔnanaakɛ hanɩ wi phã paar a ɩ̃.
A sor: «Ɩna sɔna Jakɔbɩɩ mǝlsɔ ha mɩ.
Ɩna deere afɩ nĩkhi Ɩjɩrayɛl bɩsanana».
8 Mɔ̃ ma fʋ sɩ na sɔ̃ ʋrɛ Thãgba na sɔna'?
Mɔ̃ ma fʋ sɩ na gba nĩkhi, ʋrɛraakɛ Thãgba na gbananɩ nĩkhiə'? 9 Mɩ har boka nãabʋ̃ʋsɔɔra ƴũu, sa 'laa yɩɩ,
Mɩ har gɔ̃gɔ̃ bir yʋɔsɔ, sɩ ma n hɩɩnʋʋ;
Caar gɩɩkɛ n cʋɔnɩ kpɩɩ,
A leere ɔɔbara a ha kpɩɩ na gɩ̃ casɔ.
10 Amɛ na punone na ther Jakɔbɩɩ mǝlsɔɔkɛ jʋɔnɔnɩ a ho thɩlãkobe ?
Amɛ na punone na so yemɔ̃ Ɩjɩrayɛlɩ məlsɔɔ nɔ ?
Ɩ̃ khe khi ca bɩɛlla na tɩɩ saraale.
Ɩ̃ khi na awɩda n dɔ kha bɩɛl.
11 Dɩ Balakɩ so Balamɩna ayɩ: «Aɲe fɩ cʋʋ mɩ thaa gɩ dɔ? Mɩ we fer fɩ ɩna a sɔna ɩ̃ sodara, dɩ fɩ ɩ̃ a ka fa n bɔna wɩ ?». 12 Dɩ birsee ayɩ: «Ma teena ɩ̃ mɩa gɩrɛ Thãgba Kɔ̃tɩn so marnaa?»
Balam bire bɔna Ɩjɩrayɛl bɩsana balaɲɔdaa
13 Dɩ Balakɩ sʋʋraa: «Mɩ n bɩɛl fɛr, ɩna sɩ ka pa kpɩɩ ka fa yɩ wɩnɩ. Sɩ fa yɩ wɛr fɛʋa', gbe dɩbara fa yɩ. Jɩlɛ liir sa sɔna wɩ a ha mɩ». 14 Dɩ a kpar Balam a jalna bile gbʋʋlɔ kɛ hanɩ Pɩsɩga gɔ̃gɔ̃ yʋɔ, ka gɩgɩla n jɩɩlnɩ. Dɩ a mɩrɛ le bonɩ ji paar makoɲɔ, a jinǝ nakɩɩr na banakɩɩr bonɩ thiinə bonɩ ji paar fɛw bɩɛlbɩɛla. 15 Dɩ Balam so Balakɩra: «Jɩlɛ kɩɛr a khonǝ afɩ bonɩ thiinǝ sɩ̃ tɔ ɩ̃ jal ɩ̃ cãa Thãgba». 16 Dɩ Thãgba Kɔ̃tɩn pɔr a pɛr ɔɔ thɩmɩɩ Balamɩɩ nɔra sa sʋʋraa a kɛra birǝ a sɔ Bakakɩra oti. 17 Dɩ Balam kɛrɛ bir Balakɩra, kɛ hanɩle a jɩɩl ɔɔ bonɩ thiinǝ kɩrɔ ɔr na Moabɩ kɔ̃tɩna fɛw. Dɩ Balakɩ bulee: «Dɩ aɲe Thãgba Kɔ̃tɩn so ?» 18 Dɩ Balam pɛ nɩɛ thakɛ ayɩ: «Ɩrɛ ya Balakɩ a pɛ nũu, jɩɛ pɛ nũu ya Sɩpɔɔrɩ bikuun!
19 Thãgba na do tibil a na kur sõsora'.
Dɩ tɩɩ huu gɩ a so a ma ja'.
Gɩrɛ a sonɩ ga do gɛra a n cʋaa?
Dɩ gɩrɛ ɔɔ nɔ mɩɩnɩ ga do gɛra a n jɩɩlaa' ?
20 Hɩnɛ wɩ pɛ marɛ ɩ̃ bɔna tɩbɩlaakɛ
Thãgba bɔna wɛr, dɩ ma phɩlã ga.
21 Aa yɩ Jakɔbɩɩ mǝlsɔɔra puurə'.
Aa yɩ Ɩjɩrayɛlɩ məlsɔɔra fɩl gõgolõa'.
Thãgba Kɔ̃tɩn awɩ Thãgba har kha na wɛr.
Dɩ wɩ n kpãgaarɛ mɔ̃ wɩ n kpãganɩ jamana.
22 Thãgba cʋɛ wɩ dɩ wɩ the Ejipiti dɩɩra
na fãgaakɛ hɔnɩ larɩ fãga,
23 Sidumone na n cʋʋ Jakɔbɩɩ mǝlsɔ thɩ̃ɛa'.
Dɩ dɔɔrɛ dakha na n cʋʋ Ɩjɩrayɛlɩ məlsɔ thɩ̃ɛa'.
A bɔɔ dã wa sor Jakɔbɩɩ mǝlsɔɔra,
na Ɩjɩrayɛlɩ məlsɔɔra gɩrɛ Thãgba n cʋʋnɩ.
24 Yɛkɛ caar n ɩrɛnɩ a ho sidũ'ũ nɩɩ
kɛ jɩlɛnɩ sidũ'ũ khaa.
Aa n phɩ̃ saagado nʋmɩ a kʋ a khoa ga,
Dɩ ga do nʋmaakɛ a cɛcɛbɛnɩɩ tɔmɩn a ɲɔaa ga.»
25 Dɩ Balakɩ so Balamɩna: «Dɩ a fa n sɔ̃ wa', fa n bɔna wa'.» 26 Dɩ Balam birsee thakɛ ayɩ: «Ma kɔɔ so far ayɩ gɩrɛ fɛʋʋkɛ Thãgba Kɔ̃tɩn na so marnɩ gɛr ma cʋaa?»
Balam bɔnanɛ Ɩjɩrayɛl bɩsana balãtherdaa
27 Dɩ Balakɩ so Balamɩna: «Mɩ n bɩɛl fɛr, ɩna ɩ̃ kana fɩ pa kpɩɩ agakpaana' liir Thãgba na ture dɩ fa sɔ̃ wɩ na ha mɩ.» 28 Dɩ Balakɩ kpaarɛ a jʋʋna Pewɔɔr gɔ̃gʋɔnna ka eenenɩ bǝ̃ kpara. 29 Dɩ Balam so Balakɩra: «Mɛ mɩ kɩɛr bonɩ ji paar makoɲɔ, a hana mɩ nakena makoɲɔ na banakena makoɲɔ. 30 Dɩ Balakɩ cʋʋrɛ gɩrɛ Balam sʋʋraanɩ, a ji bonɩɛ gɛr fɛw bɩɛlbɩɛla na nakɩɩr na banakɩɩr.