Balakɩ wer Balam a sɔna Ɩjɩrayɛl bɩsana
22
1 Ɩjɩrayɛl bɩsana jaal a jɛ Moabɩ bǝ̃ faana, Jʋrdɛ̃ iiro ka Jeriko dɩɩ pɛnɩ ƴɩɛ. 2 Dɩ Balakɩɩkɛ dɔnɩ Sɩpɔɔrɩ bikuun nɩɛrɛ gɩrɛ fɛʋʋkɛ Ɩjɩrayɛl bɩsana kɔɔ cʋʋnɩ Amɔɔr məlsɔɔra. 3 Dɩ haar fuure Moabɩdara ka tibil jɔraakɛ wɩ yɩnɩ. Dɩ Ɩjɩrayɛl bɩsanaada yaa wɩ jɔɔ ka. 4 Dɩ Moabɩdara sor Madɩã kɔ̃tɩnana ayɩ: "Tɩɩ jɔjʋɔ ca wɩrɛ na kho ser thɩ̃ɛ fɛw mɔ̃ na n khonɩ hʋɔn. Sɩpɔɔrɩ bikuun Balakɩ kɔɔ dʋɔn jamana ga bɔɔlera. 5 Dɩ a thʋɔn thɔ̃thɔna Bewɔɔrɩ bikuun Balamɩnaakɛ hanɩ Petɔɔr dɩɩra Efɩratɩ mɩɩr nʋɔra ka dɔnɩ ɔɔ dɩ, wɩ wɩɛ a pɔ. Dɩ a sʋʋraarɛ ayɩ: "Tɩbɩla wɛɛkɛ thɛnɩ Ejipiti a ɩ̃ a mala bǝǝnnǝ fɛw, a too ɩ̃ dɩ nɔra. 6 Dɩ gɛr gɩ mɩ n bɩɛl fɛr ɩna sɔna wɩ ha mɩ gɩdonɩ wɩ hananɛ punone a jɔ ɩ̃ too. Ado fɩ tu, agakpaana' ma puno wer a na weele dɩɩra; gɩdonɩ mɩ jɩrɛ dɩ ʋrɛ fɩ n bɔnanɩ a n 'lɛr bɔnanɛ dɩ ʋrɛ fɩ n sɔnɩ, sʋɔn n 'liire.7 Dɩ Moabɩ kɔ̃tɩnaale na Madɩ̃a kɔ̃tɩna fʋrɔrɛ khaardaasɔ a jalna wɩ ha bobonɩle. Dɩ wɩ daan Balamɩ pa a sʋʋraa gɩrɛ Balakɩ sonɩ. 8 Dɩ Balam so warɛ: "Nɩ cɔ kɛ, a dɩɩ wɩl ma ha nɛr tuur gɩ the gɩrɛra Thãgba Kɔ̃tɩn na so marnɩ. Dɩ Moabɩ kɔ̃tɩnaale cɔr le Balamɩ pa.
9 Dɩ Thãgba pɔr Balamɩna a bulee: Ana ha tɩbɩlaakɛ hanɩ afɩ cɔ?" 10 Dɩ Balam birse Thãgba: «Sɩpɔɔrɩ bikuun Balakɩɩkɛ dɔnɩ Moabɩ jamana thɔna wɩ wɩ sɔ mar aa, 11 Tɩbɩla wɛ a the Ejipiti a ɩ̃ a mala dɩɩ koo. aa ɩnɩ n bɩɛl mɛr, ɩ̃ pɔ sɔna wɩ hana nɩ. Aa a mɩ tu a pɔ, agakpaana' ɩna puno wer a na weele wɩ. 12 Dɩ Thãgba birsee: "Fa n jal kha na tɩbɩlaaka', fa n sɔ̃ tɩbɩlaala' gɩdonɩ mɩ bɔna wɛr». 13 Dɩ Balam ɩɩrɛ duuro a so kɔ̃tɩnanaakɛ Balakɩ thɔnɩ: «Nɩ kɛra birǝ anɩ dʋɔ gɩdonɩ Thãgba Kɔ̃tɩn na tu ɩ̃ jala kha na nɛra'». 14 Dɩ Moabɩ kɔ̃tɩnaale ɩɩr a kɛr bir Balakɩra a sʋʋraa aa Balam bor ɩna n ɩna sa'.
15 Dɩ Balakɩ bire thɔ̃ kɔ̃tɩ̃ kpɩɩsɔ dɩ wɩ jɔr a jɔ cacadara a dona tɩɩ cʋnanɛ a jɔ cacadara. 16 Dɩ wɩ daan Balamɩ pa a sʋʋraa aa: «Sɩpɔɔrɩ bikuun Balakɩ so thakɛ ayɩ: "Mɩ n bɩɛl fɛr, fa n do thɩ̃ɛ n pɩɛr fɩ fa n ɩ̃ ɩ̃ pa gaa ga. 17 Ma ha fɛr i dʋbɩ thɩ̃ɛ jɔɔ, dɩ gɩrɛ fɛʋʋkɛ fa so marnɩ, ma cʋʋ gɛr. Dɩ gɛr gɩ ɩna sɔna tɩbɩlaakɛ ha mɩ mɩ n phʋʋr fɛr"». 18 Dɩ Balam birse Balakɩɩ thɔ̃daraale aa: «Adorakɛ Balakɩ ha mɩ dɛ bulo fɛw na dɛ fɛw ɔɔ cɔ sɩ ma puno na nʋʋr nũu Thãgba Kɔ̃tɩn ɩ̃ Thãgbaa nɔkara ga. 19 Sɩ nɩ cɔ kɛ dɩtɩnɔɔkɛ nɛrɛ dakha; dɩ ma jɩrɛ gɩrɛ Thãgba Kɔ̃tɩn na so marnɩ wo. 20 Dɩ ga dɩtɩnɔɔle Thãgba pɔr Balamɩna a sʋʋraa: «Gɩdonɩ tɩbɩlaakɛ ɩnɛ a we fɩ, ɩrɛ nɩ jal, sɩ cʋɛ gɩrɛ ma so farnɩ».
Thãgba Kɔ̃tɩn thɔ̃thɔ̃ thu ther Balamɩna
21 Balam ɩɩrɛ duuro a gbɛbɩ ɔɔ kũkə̃ khɛr dɩ wɩ jal kha na Moabɩ kɔ̃tɩnaale. 22 Dɩ nĩkhii fʋrɛ Thãgba. Dɩ Thãgba Kɔ̃tɩnɩ thɔ̃thɔ̃ thu kar a varʋʋ hʋɛ. Balam kɔɔ jʋʋnɛ ɔɔ kũkǝ̃ khɛra, dɩ ɔɔ thɔ̃dara yeɲɔ kɔɔ ha kha na ɔr. 23 Dɩ kũkǝ̃ khɛrɩle yɩrɛ Thãgba Kɔ̃tɩnɩ thɔ̃thɔ̃ thuule jɩlɛnɩ hʋ thɩ̃thɩɩn a phe bajɩna a fʋrɔ ɲɔ̃kɔɔ. Dɩ kũkə̃əle lɩɛn hʋɔnɔ. Dɩ Balam bɩɩrɛ a kɛra gba hʋɛ. 24 Dɩ Thãgba Kɔ̃tɩnɩ thɔ̃thɔ̃ thuule jaal jɩɩl hʋ buuraakɛ lɔanɩ dɩvɛ̃ thɩr lɩɛra a the, go yeɲɔɔ thɩ̃thɩɩn, bɩɛl ʋ̃ billo, bɩɛl ʋ̃ billo, kɛ wɩ mɩnɩ a dii dɩvɛ̃ thɩr lɩɛraale. 25 Dɩ ɔbɔɔkɛ kũkǝ̃ khɛrɩle yɩnɩ Thãgba Kɔ̃tɩnɩ thɔ̃thɔ̃ thuule a hɛbɩnanɛ gʋʋ a ka, a ɓɛrɛna Balamɩ nɔ gʋʋ. Dɩ Balam bir bɩɩ wo. 26 Dɩ Thãgba Kɔ̃tɩnɩ thɔ̃thɔ̃ thuule bire jal ƴɔɔ a jɩɩl hʋ 'luru paar, kãkɛ ka paar na hanɩ ɲɔ̃bɔɔra dɩ ɲɔ̃bɩlana ga. 27 Dɩ ɔbɔɔkɛ kũkǝ̃ khɛrɩle yɩnɩ Thãgba Kɔ̃tɩnɩ thɔ̃thɔ̃ thuule a wurõwure na Balam. Dɩ nĩkhii fʋrɛ Balam dɩ ma da n bɩɩrʋ na gbʋʋl. 28 Dɩ Thãgba Kɔ̃tɩn khɛrɛ kũkǝ̃ khɛrɩle nʋɔ dɩ so Balamɩna: «Aɲe mɩ cʋʋ fɩ dɩ fɩ be mɩ balãther ɓoɓo ?» 29 Dɩ Balam birsee: «Daɓʋʋlɛ fɩ n cʋʋ mar gɛr gɩ. Ado bajɩna mɩ kɔɔ hana, mɩ kɔɔ kʋ fɛr gɩrɛ.» 30 Dɩ birse Balam: «Ga do mɛr dɔ afɩ kũkǝ̃ khɛrɩkɛ fɩ n jʋʋnɩ bɔɔ fɛʋa? Mɩ n kɔɔ cʋʋ farɛ thɩ̃ɛ thaa a yɩɛ ya?» Dɩ birse: «Kpei»!
31 Dɩ Thãgba Kɔ̃tɩn khɛr Balam yinǝ dɩ yɩ Thãgba Kɔ̃tɩnɩ thɔ̃thɔ̃ thurǝ jɩlɛnɩ hʋɛra a phe bajɩna a fʋrɔ ɲɔ̃kɔɔ. Dɩ Balam gburõkhu thɩɩra a gʋɛ ƴɩɛ. 32 Dɩ Thãgba Kɔ̃tɩnɩ thɔ̃thɔ̃ thuule bulee: «Aɲe gɩ dɩ fɩ be afɩ kũkǝ̃ khɛr balãther ɓoɓo? Mɛr thɛ ɩ̃ var fɩ hʋɛ; gɩdonɩ mɩ yɩɛrɛ dɩ hʋɛkɛra fɩ gbanɩ, puurera gɩ n jalna fɩ. 33 Dɩ afɩ kũkǝ̃ khɛrɩkɛ yɩ mɛr a golõ balãther fɛw. Ado aa kɔɔ golõa', ma kɔɔ kʋ fɛr sɩ na fagʋʋ. 34 Dɩ Balam so Thãgba Kɔ̃tɩnɩ thɔ̃thɔ̃ thurǝ: «Mɩ cʋʋrɛ sopuu. Ma kɔɔ jɩ fɩ varɛ hʋɛa'. Dɩ ado ɩ̃ jalla na da fara', mɩ punone kɛr». 35 Dɩ Thãgba Kɔ̃tɩnɩ thɔ̃thɔ̃ thuule sʋʋraa: «Jalla kha na tɩbɩlaala, sɩ gɩrɛ ma so farnɩ dɩbara fa so fa n ha wɩ. Dɩ Balam na Balakɩɩ thɔ̃thɔ̃sɔɔle gbaar dɩ wa n jal.»
Balakɩ caanɛ Balam
36 Dɩ ɔbɔɔkɛ Balakɩ nɩɛnɩ dɩ Balam n daan, a ther a cãa ɩ Aar, Moabɩ dɩ bɩɛlaakɛ hanɩ Arnɔ̃ kɔlɔ̃ nʋɔra, kɛ dɔnɩ pɛl ɔɔ dɩ khu para. 37 Dɩ Balakɩ bule Balam: «Aɲe gɩ dɩ̃ thɔ̃ tɩbɩla cacara wɩ wɛ fɩ fɩ ɩ̃ dɩ fa tuǝ'? Fɩ kpɩɛrɛ ma puno na ha fɩ, i dʋbɩ thɩ̃ɛa' ya?» 38 Dɩ Balam birsee: «Mɛr ha ʋ ɩnanɩ. Sɩ fɩ pɛrɛ haar dɩ ma punone na mɩɩ dɩkharakɛ gɩ the ɩ̃ pa ya ? Gɩrɛ dɩbara Thãgba na pɛnɩ ɩ̃ nɔra, gɛr ma mɩɩ.» 39 Dɩ Balam jaal na Balakɩ a dã Kɩrɩyatɩ-Husɔtɩ dɩɩra. 40 Dɩ Balakɩ jinǝne nasɔ na banaasɔ bonɩɛ, a ti nʋ̃ ɩkha a ha Balam na kɔ̃tɩnaakɛ wɩ hananɩ kha.
41 Ga dɩwɩllɔ duuro Balakɩ kpar Balam dɩ wɩ jal Bamɔtɩ-Baal. Dɩ Balam 'laa yɩ Ɩjɩrayɛl bɩsã ɩkhasɔ.