Ɩjɩrayɛl bɩsana punone Aradɩ jamana
21
1 Aradɩ jamana bɩɛlɩkɛ dɔnɩ Kanãadaar, kɛ hanɩ Negɛvɩ bǝǝnnǝ nɩɛrɛ dɩ Ɩjɩrayɛl bɩsana n pɔr na Atarɩm hʋɛ. Dɩ a kena wɛr, a fʋlɛ ɩkhasɔ awɩ thɩ̃thɩɩn a pɛ kasora. 2 Dɩ Ɩjɩrayɛl bɩsana sor nʋɔ Thãgba Kɔ̃tɩnna ayɩ: Ado fɩ gba tɩbɩlaakɛ a dʋ sɩ ɲɔ̃kɔɔ, sa bũburõ wer na awɩ dɩsɔ a na faa. 3 Dɩ Thãgba Kɔ̃tɩn pɛr Ɩjɩrayɛl bɩsana nũu a gba Kanãadaraale a dʋ wɩ ɲɔ̃kɔɔ. Dɩ Ɩjɩrayɛl bɩsana kʋʋr wɛr cacaca a bũburona awɩ dɩsɔ sa dʋ paarɩle ire "Hɔɔrma", kɩrʋ dʋɔn bũburone.Ther sɛ sii thɩmɩɩ
4 Dɩ Ɩjɩrayɛl bɩsana ther Hɔɔr gɔ̃gʋɔnna a gba kalbi laɲɔ̃ hʋɛ dɩ wa n jal gɩ do nɔɔ wɩ golõ Edɔ̃ dɩɩra. Sɩ mɔ̃ wɩ hanɩ hʋɛra ɲɛ̃ɛ khiir wer. 5 Dɩ wɩ mar dɩ wa n so Thãgba na Mʋɩjɩ ayɩ: Aɲeraakɛ nɩ ti sɩ Ejipiti dɩɩra a thena sɩ khiir bǝ̃ kparara? Dɩkor na ha kɩɛr dɩ ɲʋɔn ga, sɩ bɔkʋ dɩko caarɩkɛ thʋ̃ yaa sɩ ka. 6 Dɩ Thãgba Kɔ̃tɩn thɔna warɛ si puunǝsɔ dɩ wɩ dʋɔn Ɩjɩrayɛl bɩsana dɩ jɔjʋɔ awɩ thɩ̃thɩɩn khiir. 7 Dɩ Ɩjɩrayɛl bɩsã wɩrɛ sɛnɩ jaal yɩ Mʋɩjɩ a sʋʋraa: Sopuu sɩ cʋʋ mɔ̃ sɩ mɩɩnɩ puure Thãgba Kɔ̃tɩnna na fɛrɛra. Ƴɛa Thãgba Kɔ̃tɩn gɩ do nɔɔ a hʋnɔna sɩ si puunəsɔɔkɛ. Dɩ Mʋɩjɩ ƴɛɛrɛ Thãgba a ha wɩ. 8 Dɩ Thãgba Kɔ̃tɩn so Mʋɩjɩra: Gba ther sɩɛ a cʋɛ si puu a pɩɛr thɩr kãkara bir gbaana a ga. Dɩ tibil wo tibilikɛ sii na dɔnɩ aa ɓa ƴɩɛ hɩɩn ther sɛ siile a na ler. 9 Dɩ Mʋɩjɩ cʋʋrɛ ther sɛ sii a pɛ thɩr kãkarã bir gbaana a ga. Dɩ ga bɔɔrale a sii dɔ̃ tibil dɩ ɓa ƴɩɛ a hɩɩn ther sɛ siile a n ler.
ƖJƖRAYƐL BƖSANA HAR MOABƖ DƖƖRA
Paarsɔɔkɛ Ɩjɩrayɛl bɩsana jɛnɩ kpakha kpakha a jalna dana Pɩsɩga gɔ̃gʋɔnna
10 Ɩjɩrayɛl bɩsana gbaar jal a jɛ Obɔtɩ. 11 Agɩpɩ wɩ ther Obɔtɩ a gba jal jɛ Iye-Abarɩm dɩɩra, bǝ̃ kpararaakɛ hanɩ Moabɩ dɩ ƴɛbʋrɔ, wi phã paar. 12 Wɩ ther liir a gba jal jɛ Jerɛdɩ kɔlɔ̃ nʋɔra. 13 Wɩ ther liir a gba jal jɛ Arnɔ̃ kɔlɔ̃ nʋɔra ʋ̃ bilo; Arnɔ̃ ɲʋɔn n cele dɩ the Amɔɔr məlsɔɔ dʋɔ sɩ da n jal bǝ̃ kparara. Ɔrra dɔ pɛl Moabɩ dɩɩra na Amɔɔr məlsɔɔ dɩra. 14 Dɩ gɛr gɩ dɩ wɩ mɩɩ Thãgba Kɔ̃tɩnɩ kosɔɔ sɛbɛra Wahɛbɩ dɩɩda, kɛ hanɩ Sufa bəənnə na ɔɔ posɔɔda na Arnɔ̃ kɔlɔ̃ɔda 15 na ɔɔ nɛsɔɔda, kɛ n celanɩ dɩ ga n gbũ Aar dɩ khɔraada kɛ jallanɩ thʋ Moabɩ dɩ pɛlla.
16 Dɩ Ɩjɩrayɛl bɩsana the liir a jal Beyɛɛr: Kɩrʋ dʋɔn bire. Dɩ le Beyɛɛra Thãgba Kɔ̃tɩn so Mʋɩjɩra: «Kpa Ɩjɩrayɛl bɩsana a jɛ ɩ̃ ha wɩ ɲʋɔn». 17 Dɩ Ɩjɩrayɛl bɩsana tire nɩɛ thakɛ ayɩ: «Bire, phana ɲʋɔn gɩ jʋʋn! Na n kpãganɛ bire ! 18 Bireekɛra asɩ kɔ̃tɩ̃sɔ kpeni, ʋrɛra tɩɩ cʋnanɛsɔ gɔnɩ, na awɩ jamana gbol bir na awɩ gbãgalã bir.
19 Dɩ wɩ ther liir bǝ̃ kparara a jal jɛ Matana a the Matana a jal jɛ Nahalɩɛl a the Nahalɩɛl a jal jɛ Bamɔtɩ, 20 a the Bamɔtɩ a jal ɓɛlɛnaakɛ 'lɔanɩ Moabɩ dɩɩra a the a jal jɛ Pɩsɩga gɔ̃gɔ̃ yʋɔ kɛ eenenɩ bǝ̃ kparaa.
Ɩjɩrayɛl bɩsana punone jamanasɔɔkɛ wɩ n wenɩ Sɩhɔ̃ na Ɔgɩ
21 Ɩjɩrayɛl bɩsana tire tɩbɩla Amɔɔr məlsɔɔ jamana Sɩhɔna dɩ wɩ sʋʋraa: 22 Sɩ ƴaalɛ sɩ lõ afɩ dʋɔ sɩ ka. Sa lõ lɔɔsɔ dɩ dɩvɛ̃ lɩɛsɔɔra ga. Dɩ sa ɲɔ ɲʋɔn biresɔɔra ga, hʋ kɔ̃tɩ̃ɩ sa kana, sɩ jalna sɩ bena afɩ dɩ. 23 Sɩ Sɩhɔ̃ na tu ha Ɩjɩrayɛl bɩsana hʋɛ wɩ kana ɔɔ da'. A kpar ɔɔ sɔrasɩsɔ fɛw a cãa wɩ bǝ̃ kparara, Yahasɩ dɩɩra a kena wɩ kʋʋr. 24 Dɩ Ɩjɩrayɛl bɩsana kʋʋr wɛr na bajɩna sa tee awɩ dɩ, kɛ fɔnɩ Arnɔ̃ kɔlɔna a jal dã Yabɔkɩ kɔlɔ̃, a jal foo a dã Amɔ̃ɔ mǝlsɔɔ pɛllaakɛ dɔnɩ dɩɩsɔɔkɛ wɩ mɩnɩ gʋʋ a kpalalɔ. 25 Dɩ Ɩjɩrayɛl bɩsana taarɛ Amɔɔr məlsɔɔ dɩsɔ fɛw a gbana Hɛsɩbɔ̃ dɩɩ na dɩ biisɔ fɛw kɛ khonəəni a tooro. 26 Hɛsɩbɔ̃ kɔɔ dɔ dɩ kɔ̃tɩ̃ɩ ka Amɔɔr məlsɔɔ jamana Sɩhɔ̃ n kɔɔ cɔnɩ dɩɩ fʋna ɔbɔɔkɛ a kenɩ kʋʋr na Moabɩɩ caca jamana sa taa ɩ dɩɩ fɛw a jalna dana Arnɔ̃ kɔlɔ̃. 27 Gɛra dɔ nɔɔ nɩ pɛdara pɛnɩ nɩɛ wɔɔ:
Nɩ ɩna Hɛsɩbɔ̃ !
Dɔ Sɩhɔ̃ɔ dɩ n bir gɩ mɩ,
Nɩ gbɛbaa !
28 Dɔɔ ther Hɛsɩbɔ̃ dɩɩra,
Dɔ lɩnanɛ ther Sɩhɔ̃ɔ dʋɔ
A hɩ̃ Aar dɩɩkɛ hanɩ Moabɩ dɩɩra,
Na sõso thãgbasɔɔkɛ hanɩ Arnɔ̃ gɔ̃gɔ̃ biisɔɔra.
29 Ga puu farɛ yaa Moabɩ dɩɩ ?
Nɩ buure yaa Kemɔsɩɩ too,
Kemɔsɩ cʋʋrɛ ɔɔ bikũusɔ dɩ wɩ do fufuo,
A faarɛ ɔɔ bikhɛrsɔ dɩ Amɔɔr məlsɔɔ jamana Sɩhɔ̃ fʋlɛ wɩ dɩ wɩ do dea.
30 Sɩ thaarɛ Amɔɔr məlsɔ na sẽe.
Nɛnɛ̃ɛkɛ Hɛsɩbɔ̃ na hale bã,
dɩ dɩɩ fɛw wɩɛllɛ a jal thʋ Dɩbɔ̃ dɩɩ.
Sɩ kʋɛrɛ thɩ̃ɛ fɛw a jalna dana Nofa,
A kʋɛ jalna thʋna Medeba».
31 Thale Ɩjɩrayɛl bɩsana too Amɔɔr məlsɔɔ dʋɔ. 32 Dɩ Mʋɩjɩ thʋɔn tɩbɩla dɩ wɩ jal gɩɩl Yajɛɛr dɩɩ. Agɩpɩ Ɩjɩrayɛl bɩsana taarɛ dɩɩle na ɔɔ dɩ bisɔ sa weele Amɔɔr məlsɔɔkɛ kɔɔ hanɩ le.
33 Agɩpɩ Ɩjɩrayɛl bɩsana faarɛ ka wɩ ganɩ ƴɩɛ sa jʋʋna Basã hʋɛ. Dɩ Ɔgɩɩkɛ dɔnɩ Basã jamana ther na ɔɔ sɔrasɩsɔ fɛw a cãa wɩ kena Ɩjɩrayɛl bɩsana Edɩreyɩ dɩɩra. 34 Dɩ Thãgba Kɔ̃tɩn so Mʋɩjɩra: «Fa n maa ga. Ma gbaarɛ na ɔɔ sɔrasɩsɔ na ɔɔ dɩ fɛw a na dʋ fɩ ɲɔ̃kɔɔ fɩ cʋʋgʋʋ mɔ̃ fɩ cʋʋnɩ Sɩhɔ̃ɔkɛ dɔnɩ Amɔɔr məlsɔɔ jamanaakɛ n kɔɔ hanɩ Hɛsɩbɔ̃ dɩɩra». 35 Dɩ Ɩjɩrayɛl bɩsana kʋʋr wɛr, ɔr na ɔɔ bikũusɔ na ɔɔ sɔrasɩsɔ fɛw wa sɩ bɩɛlla', sa tee awɩ dɩ a hɩ̃.