Ɩjɩrayɛl bɩsana ther Kadɛsɩ bəənnə dɩ wa n jaal Kanaan dɩɩra.
Mɩrɩyamɩɩ khi na Meriba ɲɔ thɩmɩɩ
20
1 Ɩjɩrayɛl bɩsana fɛw daan Sɩn bǝ̃ kparara yɩɛrɩ caca sɩpora, a jɛ Kadɛsɩ bəənnə. 2 Dɩ le Mɩrɩyam khi dɩ wɩ dʋʋ.Ɲʋɔn na hale dɩ Ɩjɩrayɛl bɩsana na ɲʋa', dɩ wɩ kpar kha a jal dɩ wa n kɛ̃kɛrɛna Mʋɩjɩ na Aarɔ̃. 3 Dɩ wɩ ƴaalɛ Mʋɩjɩ kɩla ayɩ: "Aɲera sa kɔɔ khiir ɔbɔɔkɛ asɩ omɩsɔ n kɔɔ khiirnɩ Thãgba Kɔ̃tɩnɩ ƴɛra dɩɩ ba ga? 4 Aɲeraakɛ nɩ ɩna sɛr Thãgba Kɔ̃tɩnɩ too bǝ̃ kpararaakɛ? Nɩ ɩna sɛr sɩ khiire na asɩ nʋ̃sɔ ya? 5 Aɲeraakɛ nɩ ti sɩ Ejipiti a ɩna bǝ̃ puu caaraakɛ? Ga do paar gɩɩkɛ tibil na punoni na diir thɩ̃a'. Fɩgɩ thɩrʋ na hakɛ dɩ dɩvɛ̃ thɩrʋ gɩ dɩ gɩrenadɩ thɩrʋ ga, ɲʋɔnakɛ na hakɛ tibil n ɲɔa'. 6 Dɩ Mʋɩjɩ na Aarɔ̃ faarɛ Ɩjɩrayɛl bɩsana sa gba jal Thãgba cãa wa lõfonɔɔ, a gburõkhu thɩɩra a gʋɛ ƴɩɛ. Dɩ Thãgba Kɔ̃tɩn nɩna wɛr ɔɔ i dʋbɩ.
7 Dɩ Thãgba Kɔ̃tɩn sor Mʋɩjɩra ayɩ: 8 Gba afɩ gbol, fɛrɛ na afɩ õkuun Aarɔ̃; nɩ kpa Ɩjɩrayɛl bɩsana fɛw a jɛ. Agɩpɩ nɩ mɩana boka nãabʋ̃ʋkɛ dɩ a na 'laarɛ ɔɔ ɲɔ. Dɩ mɛ̃ fa cʋʋ ɲʋɔn dɩ ga the boka nãabʋʋnakɛ fɩ ha Ɩjɩrayɛl bɩsana wɩ ɲɔ na awɩ nʋ̃sɔ. 9 Dɩ Mʋɩjɩ gbaar ɔɔ gbola hanɩ Thãgba Kɔ̃tɩnɩ ƴɛra mɔna Thãgba Kɔ̃tɩn kɔɔ sʋʋraanɩ. 10 Dɩ Mʋɩjɩ na Aarɔ̃ kpar Ɩjɩrayɛl bɩsana a jɛ boka nãabʋ̃ʋlee kɩrɔ, dɩ Mʋɩjɩ so war: Nɩ pɛ nũu, mɩ n bɩɛl nɛr, nɛr lãlana ! Boka nãabʋʋnaakɛ sa cʋʋ ɲʋɔn dɩ ga the dɩ na ɲɔ bɛɛ? 11 Agɩpɩ dɩ Mʋɩjɩ ti ɲɔ̃ɔ a be boka nãabʋʋnna balaɲɔ na ɔɔ gbolla. Dɩ ɲʋɔn the jɔɔ dɩ Ɩjɩrayɛl bɩsana ɲɔ na awɩ nʋ̃sɔ dakha.
12 Dɩ Thãgba Kɔ̃tɩn so Mʋɩjɩ na Aarɔna ayɩ: "Gɩdonɩ na pɛ mɩ haar mɔ̃ teananɩ a nɩna Ɩjɩrayɛl bɩsana ɩ̃ phuǝ', na lona tɩbɩlaakɛ dɩɩraakɛ mɩ n ha wɩna'. 13 Gɛr dɔ kɩrʋ dɩ wa n wee ɲʋɔnɩle : "Meriba" ɲʋɔn. Meriba kɩrʋ dʋɔn : "Kɩla". Liir Ɩjɩrayɛl bɩsana ƴaal Thãgba Kɔ̃tɩn kɩla, dɩ nɩna wɩ mɔ̃ a donɩ Thãgbaakɛ phonɩ.
Edɔ̃ jamana na tu Ɩjɩrayɛl bɩsana n kana ɔɔ da'
14 Dɩ le Kadɛsɩ bəənnə Mʋɩjɩ tire tɩbɩla Edɔ̃ jamanaa pa wɩ sʋɔraa: "Yɛ gɩrɛ afɩ omɩsɔ Ɩjɩrayɛl bɩsana sonɩ : Fɩ jɩrɛ bʋɔɔkɛ sɩ gaarnɩ. 15 Asɩ mama thɩ kɔ̃tɩ̃sɔ kɔɔ gbune Ejipiti dɩɩra dɩ sɩ toore le a pʋɔr jɔɔ. Dɩ Ejipitidara gaar sɛr. 16 Dɩ sɩ kɔɔ hulene Thãgba Kɔ̃tɩnna, dɩ a nɩrɛ asɩ hulẽbi a thɔna ɔɔ thɔ̃thɔn thu dɩ ti sɩ Ejipiti dɩ sɩ the. Dɩ sɩ hakɛ Kadɛsɩ dɩɩra, afɩ dɩ pɛl nɔra. 17 Mɩ n bɩɛl fɛr, ha sɩ hʋɛ sɩ kana afɩ dɩ. Sa lõ lɔɔsɔ dɩ dɩvɛ̃ lɩɛsɔɔra ga. Dɩ sa ɲɔ ɲʋɔn biresɔɔra ga, hʋ kɔ̃tɩ̃ɩ sa kana, sa kɛrna ɲɔ̃bɔɔ dɩ ɲɔ̃bɩlã ga phaphapha sɩ thena afɩ dʋɔ». 18 Dɩ Edɔ̃ jamana birse: «Na kana ɩ̃ da', a nɩ bo, bajɩna ma thena nar.» 19 Dɩ Ɩjɩrayɛl bɩsana sʋʋraa: «Hʋɛ dɩbara sa kana. A sɩ ɲɔ ɲʋɔn na asɩ nʋ̃sɔ, gele na khɩɩra' sa lɩmɩnɛ. Nɛɛa sɩ n kana dɩbara». 20 Dɩ birse wɩ: «Na ka ga». Dɩ Edɔ̃dara ther a cãa Ɩjɩrayɛl bɩsana na sɔrasɛ tǝ̃tǝ̃tǝ̃, kɛ hananɩ koke thɩ̃ɛ jɔɔ. 21 Thale Edɔ̃dara tɔ̃ Ɩjɩrayɛl bɩsana hʋɛ wa n kana ɩnɩ da'. Dɩ Ɩjɩrayɛl bɩsana gbaar hʋ kpɩɩ.
Aarɔ̃ɔ khi
22 Ɩjɩrayɛl bɩsana fɛw ther Kadɛsɩ a jal dã Hɔɔr gɔ̃gʋɔnna. 23 Dɩ le Hɔɔr gɔ̃gʋɔnnɔ, Edɔ̃daraa dɩ pɛlla Thãgba Kɔ̃tɩn so Mʋɩjɩ na Aarɔna: 24 Aarɔ̃ na khire. A na lõ dɩɩraakɛ mɩ n hanɩ Ɩjɩrayɛl bɩsana ga gɩdonɩ nɩ kɔɔ nʋʋr marɛ nũu Meriba ɲɔ thɩmɩɩra. 25 Kpa Aarɔ̃ na ɔɔ bikuun Eleajaar a jʋnɛna Hɔɔr gɔ̃gɔ̃ yʋɔ. 26 Fʋrɛ ɔɔ bonɩ ji kẽkẽsɔ a tɔ ɔɔ bikuun Eleajaar. Liir Aarɔ̃ na khi a na gbũ ɔɔ thɩ kɔ̃tɩ̃sɔɔra. 27 Dɩ Mʋɩjɩ cʋʋrɛ mɔna Thãgba Kɔ̃tɩn sʋʋraanɩ. Wɩ jʋʋnɛ Hɔɔr gɔ̃gʋɔnnɔ Ɩjɩrayɛl bɩsana fɛʋʋ yiro. 28 Dɩ Mʋɩjɩ fʋʋrɛ Aarɔ̃ɔ kẽkẽsɔ a to ɔɔ bikuun Eleajaar. Dɩ Aarɔ̃ khire le gɔ̃gɔ̃ yʋɔ. Agɩpɩ Mʋɩjɩ na Eleajaar kɛrɛ gbu. 29 Dɩ Ɩjɩrayɛl bɩsana fɛw jɩrɛ dɩ Aarɔ̃ khire; dɩ wɩ bɩɩrɛ a cʋʋna wire kpelẽ yʋɔr.