Na nɩ sɛ thoo thɩmɩ
19
1 Thãgba Kɔ̃tɩn mɩɩnanɛ Mʋɩjɩ na Aarɔ̃ ayɩ: 2 Nɩ yɛkɛ gɩrɛ mɛr Thãgba Kɔ̃tɩnɩ jɔfʋ sonɩ: Nɩ sɔ Ɩjɩrayɛl bɩsanana wɩ hana nɩ na nɩ sɩɛɛkɛ na hananɩ sɩ paar dɩ tãa ga, kɛ wa pɛrnɩ kpelele fʋɔrɔ a yɩa'. 3 Nɩ gba na nɩ sɩɛra a hana Eleajaar bonɩ jidaar, a kpaa a thena jɛw, khuirǝ, wɩ kʋ ɔɔ yiro. 4 Eleajaar bonɩ jidaar n ɓɛ tɔmɩn na ɲɔ̃bire a jɛba bilo ʋrɛ eenenɩ Thãgba cãa wa lofonʋɔ ɲɛ̃be makoɲɔ. 5 Agɩpɩ wɩ thiǝ na nɩɩlera ɔɔ yiro: Wɩ thiə ɔɔ lo na ɔɔ nʋ̃ na ɔɔ tɔmɩn na pɩba. 6 Bonɩ jidaar n gba sɛdɩrɩ thɩr kuru na ɩjɔpɩ jɔ̃ kuru na lɛn kẽkẽ wi sɩɛ kpakpakpa a tɔ dɔɔraale n hɩnanɩ nara. 7 A gele pɩ bonɩ jidaar n cɔcɔɔnɛ ɔɔ kẽkẽsɔ a hɔna ɲʋɔn agɩpɩ a kɛr a bir jɛw. Sɩ a bisere jɔfʋ hʋɛra gɩ dana dʋɔrɔ. 8 Ʋrɛ na thiǝni naale n cɔcɔɔnɛ ɔɔ kẽkẽsɔ dakha a hɔna ɲʋɔn; sɩ a birere jɔfʋ hʋɛra gɩ dana dʋɔrɔ. 9 Kuun ʋrɛ na bisenɩ jɔfʋ hʋɛra n khɩa na nɩ thoole a dera jɛ khuirǝ, pa phuurə, gɩ too Ɩjɩrayɛl bɩsanaa too, wɩ gba gɩ wɩ cʋʋna phɔphʋɔl ɲʋɔn. Gɛr dʋɔn sopuu hɛl bonɩɛ. 10 Dɩ ʋrɛ na khɩanɩ na nɩ thoole, a cɔcɔɔnɛ ɔɔ kẽkẽsɔ sɩ a bisere jɔfʋ hʋɛra gɩ dana dʋɔrɔ. Jɔfʋ gɩ khorr nɛr Ɩjɩrayɛl bɩsanana na kpakpalalaakɛ hanɩ anɩ thɩ̃thɩɩn.Phʋɔl jɔfʋ
11 Tibilikɛ na thaanɩ tɩɩ khiri woo tɩɩ khirira a bisere jɔfʋ hʋɛra gɩ dana wire makoɲɔ. 12 A phʋɔlɛ ɔɔbara na ɲʋɔnɩlera wire yẽther wirera na wire makoɲɔ wirera. Dɩ a na phuri jɔfʋ hʋɛra. Sɩ a aa phʋɔl ɔɔbara wire yẽther wirera na wire makoɲɔ wirerǝǝla' a na phu jɔfʋ hʋɛra ga. 13 Tibil wo tibilikɛ na thaanɩ tɩɩ khirera, sɩ a aa phʋɔl ɔɔbara ga a n bisere mɛr Thãgbaa kẽkẽ wa. Wɩ hɛlla ntɛɛle Ɩjɩrayɛl caara a faa; gɩdonɩ wa pɩɛraa phɔphʋɔl ɲʋɔna' dɩ a bisere jɔfʋ hʋɛra, dɩ biserera haaraa 'lo.
14 Nɩ yɛ gɩ̃ɩ jɔfʋsɔ : A tibil khi kẽkẽ waw, tɩbɩla fɛʋʋkɛ na lonanɩ le na wɩrɛ kɔɔ hanɩ le wɩ bisere jɔfʋ hʋɛra gɩ dana wire makoɲɔ. 15 Thɩ̃ pɛdaa wo thɩ̃ pɛdaakɛ hanɩ le sɩ a hana thire dɩ wɩ thiroǝ' a biserea jɔfʋ hʋɛra. 16 A tibil tha tɩɩ khirera hʋɔnɔ, kɛ wɩ kʋnɩ, agɩbo kɛ kheni, ntɛɛle na bisere jɔfʋ hʋɛra gɩ dana wire makoɲɔ. Mɛna gɩ na ʋrɛ na thaanɩ tibil khuborǝ agɩbo kaara. 17 Ɔbɔɔkɛ wɩ n phʋɔlnɩ ʋrɛra biseneni jɔfʋ hʋɛra, wɩ gba na nɩɩkɛra wɩ thiinɩ a jinǝ so hɛl bonɩɛ ɔɔ tho, a pɩɛr thɩ̃ pɛdaara a pɩɛn ɲɔ bunǝne. 18 Dɩ kuun ʋrɛ phonɩ jɔfʋ hʋɛra n gba ɩjɔpɩ jɔ̃ kuruu a mʋa ɲʋɔnaalera sa jɛba kẽkẽ waara kãakɛ tibil khini, na thɩ̃besɔɔra na tɩbɩlalaakɛ hanɩ le bɩnɔ. A cʋɛ ɔmɛna tibillǝǝkɛ thaanɩ tibil khubǝrǝ na ʋrɛra thaanɩ tɩɩ khiriraakɛ wɩ kʋnɩ na ʋrɛ thaanɩ tɩɩ khiriraakɛ khenɩ dɩbara na ʋrɛra thaanɩ kaara. 19 Tibil ʋrɛ phonɩ jɔfʋ hʋɛra na jɛba ɲʋɔnɩlera ʋrɛra na phonə', wire balãther na wire makoɲɔ wirerǝ. Sɩ wire makoɲɔ wireraale a phʋɔlʋʋ. Agɩpɩ a cɔcɔɔnɛ ɔɔ kẽkẽsɔ, a hɔna ɲʋɔn; a dɩɩ dʋɔr a phure. 20 A tibil bise jɔfʋ hʋɛra sa bo phʋɔlɛ, wɩ hɛllaa Ɩjɩrayɛl caara a faa gɩdonɩ a bisere mɛr Thãgba Kɔ̃tɩnɩ cɔ jɔfʋ hʋɛra. Mɔ̃ wa jɛbɩraanɩ phɔphʋɔl ɲʋɔna', a bisere jɔfʋ hʋɛra. 21 Jɔfʋ gɩɩkɛ Ɩjɩrayɛl bɩsana na n kparɔnɩ bɔɔ khorr. Ʋrɛ na gbaanɩ phɔphʋɔl ɲʋɔnɩle a na jɛbɩ thɩɛna agɩbo tibiləəkɛ biseneni jɔfʋ hʋɛra, ntɛ cɔcɔɔnɛ ɔɔ kẽkẽsɔ, dɩ tibilikɛ na thaanɩ phɔphʋɔl ɲʋɔnaale a bisere gɩ dana dʋɔrɔ. 22 Thɩ̃ɛ wo thɩ̃ɛɛkɛ tibilikɛ biseneni jɔfʋ hʋɛra tharɔnɩ, thɩ̃doole bisere jɔfʋ hʋɛra. Dɩ tibilikɛ na thaanɩ ʋrɛra biseneni jɔfʋ hʋɛra, ɔr dakha bisere jɔfʋ hʋɛra gɩ dana dʋɔrɔ.