Bonɩ jidara na Levɩɩ mǝlsɔɔ thɔ̃
18
1 Thãgba Kɔ̃tɩn sor Aarɔna: «Fɛrɛ na afɩ bikũusɔ, na anɩ thɩkɔ̃ kɛ donɩ Levɩɩ məlsɔ, dɩɩ wo dɩɩkɛ na cʋɛnɩ pa phuurǝ anɩ thɩmɩɩ gɩ. Dɩ wo, fɛrɛ na afɩ mǝlsɔɔ thɩmɩɩ ga do a dɩɩ cʋʋ anɩ bonɩ ji thɔmana. 2 Kpa dakha afɩ omɩsɔɔkɛ dɔnɩ Levɩɩ ca, kɛ dɔnɩ afɩ thɩɩ ca, nɩ ha kha, gɩ do nɔɔ wa n bul fɩ. Sɩ fɛrɛ na afɩ mǝlsɔ, nɛr na n jɩlɛ Thãgba ƴɔɔ, Thãgba cãa waw, ka nɔ bɩɛl ʋlfɛ thɩmɩɩ hanɩ. 3 Wa n dɔ afɩ thɔ̃, a na dɔna Thãgbaa kẽkẽ wa thɔma fɛw. Sɩ wa n wɔrɔ̃ thɩ̃bi sãasɩnana', dɩ bonɩ ji paar ga; gɩ do nɔɔ wa n khiire. 4 Wɩ ɓana far a na hɩnɛ Thãgba cãa waa wa n do ɔɔ thɔ̃ fɛw. Tɩɩ khɩɩ na hana hʋɛ a na wɔrɔ̃ na'. 5 Nɛr na n hɩnɛ pa phuu na bonɩ ji paar, gɩ do nɔɔ ɩ̃ nĩkhii na n ɩɩr Ɩjɩrayɛl bɩsanana 'lo bã. 6 Nɩ hɩnɛ, mɩ phiire Levɩɩ mǝlsɔɔkɛ dɔnɩ anɩ omɩsɔ Ɩjɩrayɛl bɩsanaa thɩ̃thɩɩn dɩ wɩ do mɛr Thãgba Kɔ̃tɩnɩda, dɩ̃ ha nɩ wa n do thɔma Thãgba cãa waw. 7 Sɩ fɛr Aarɔ̃ na afɩ mǝlsɔ na n dɔ anɩ bonɩ ji thɔma bonɩ ji paara na sãasɩ pa kɔ̃tɩ̃ɩna, du vaar kẽkẽ bilo. Mɛr hana nɩ ga thɔ̃ɔle. Khaardaa gɩɩkɛ mɩ ha nɩnɩ. A tɩɩ khɩɩ tɔ wɔrɔ̃ wɩ kʋɔ.»Gɩrɛ na dɔnɩ bonɩ jidaraada bonɩ thɩ̃ khaasɔɔra
8 Thãgba Kɔ̃tɩn sor Aarɔna ayɩ: «Hɩnɛ, mɩ pɛ farɛ fa n hɩnɛ khaarda phuusɔɔkɛ Ɩjɩrayɛl bɩsana n tini dɩ wa n ha mɩ. Mɩ ha fɛr gɩ dɔ afɩda na afɩ mǝlsɔɔkɛ na kpaanɛnɩɩda. Bɔɔ khorr jɔfʋ gɩ. 9 Yɛkɛ gɩrɛ na dɔnɩ anɩda bonɩ thɩ̃ khaasɔɔraakɛ sɛnɩ ɔbɔɔkɛ wa thiini gɩrɛ dɔnɩ ɩ̃da na pɩ, awɩ khaardasɔɔda fɛw, kɛ wɩ n ha mɩnɩ: Thɩ̃bi bonɩɛ fɛw, na so hɛl bonɩɛsɔ fɛw na dɩpa gbɛbɩ bonɩɛsɔ fɛw kɛ wɩ n ji marnɩ. Thɩ̃ khaasɔ gɩ na sobɔr, kɛ na dɔnɩ fɛrɛ na afɩ mǝlsɔɔda. 10 Nɩ khɔ gɩ pa phuurə. Kona dɩbara na n khɔ gɩ ; thɩ̃ khaasɔ gɩ na sobɔr kɛ dɔnɩ anɩda.
11 Yɛkɛ wo gɩrɛ na dɔnɩ anɩda : Gɩrɛ wɩ n tini Ɩjɩrayɛl bɩsanaa khaardasɔɔra, na gɩrɛ fɛʋʋkɛ wɩ n jɛnanɩ mɩ n ha nɛr, fɛrɛ na afɩ bikũusɔ na afɩ bikhɛrsɔ, jɔfʋ gɩ khorr. Afɩ cɔ kara wɩrɛ fɛʋʋkɛ phonɩ punone kho gɩ. 12 Mɩ n ha nɛr caca thɩ̃ɛsɔɔkɛ wɩ n hanɩ mɛr Thãgba Kɔ̃tɩn: Awɩ nĩ bɔsɔ na awɩ dɩvɛ̃ pha bɔsɔ na bile. 13 Caca thɩ̃ɛ fɛʋʋkɛ wa tini thɩɛnaakɛ wɩ n gbanɩ awɩ lɔɔ a na ha mɛr Thãgba Kɔ̃tɩn, afɩda gɩ. Afɩ cɔ kara, ʋrɛ phonɩ punone kho gɩ. 14 Gɩrɛ fɛʋʋkɛ wɩ kananɩa mɛr Thãgba Kɔ̃tɩn khorr Ɩjɩrayɛl dɩɩra anɩda ga do. 15 Caca be fɛʋʋkɛ wa hanɩ mɛr Thãgba Kɔ̃tɩn a tɩbɩlaa caca bisɔɔ gɩ, a nʋmaa caca bisɔ wɛ nɛr na hɩna. Sɩ nɩ birsene tɩbɩlaa caca bisɔ na nʋ̃ wɩrɛ birseneni jɔfʋ hʋɛra awɩ caca bisɔ. 16 Nɩ pɩɛr wa n birse bɩsanaakɛ hananɩ sɩpo bɩɛl. Awɩ birse nɔ har dɛ bulo be yemɔy mɔ̃ pa phu dɛ bulo mɩɛ nɔ hanɩ. Dɛ bulo bi bɩɛlɩ dʋbɩ har gɩram yʋɔr. 17 Na n birse naa caca bi, dɩ banaa caca gɩ dɩ bʋʋ caca bi ga. Mɛr wɩ therna nʋ̃ wele. Nɩ deere awɩ tɔmɩn bonɩ ji paara, a thiǝ awɩ nĩ dɔɔra gɩ do bonɩ thiinǝǝkɛ n hʋnanɩ mɛr Thãgba Kɔ̃tɩn daw. 18 Agɩpɩ nɛr hɩna agɩ nʋ̃ mɔ̃ nɩ hɩnɩ kũkuneekɛ wɩ n jɛnanɩ na ɲɔ̃bɔ nɔ huure. 19 Thɩ̃ khaasɔ fɛʋʋkɛ Ɩjɩrayɛl bɩsana n tini awɩ khaardasɔɔra a na ha mɛr Thãgba Kɔ̃tɩn, nɛr mɩ ha, fɛrɛ na afɩ bikũusɔ na afɩ bikhɛrsɔ. Jɔfʋ gɩ bɔɔ khorr. Nɔ bɩɛl ʋlfɛrɛ gɩ bɔɔ khorr, kɛ na dɔnɩ dakʋɛna ga mɛr Thãgba Kɔ̃tɩnɩ ƴɛra fɛrɛra na afɩ mǝlsɔɔra. 20 Thãgba Kɔ̃tɩn bire so Aarɔna ayɩ: Na 'lɛ thɩɩ gɩ do anɩda dɩɩraakɛ mɩ n hanɩ Ɩjɩrayɛl bɩsana wɩ tɩnɛna'. Dɩ na 'lɛ thɩ̃ɛ awɩ thɩ̃thɩɩna'. Mɛr na dɔ anɩ thɩ̃ na anɩ lẽle thɩ̃ awɩ thɩ̃thɩɩn.
Gɩrɛ dɔnɩ Levɩɩ mǝlsɔɔda
21 Levɩɩ mǝlsɔ mɩ ha bɩɛl yʋɔr fɛʋʋkɛ n tenɩ Ɩjɩrayɛl dɩɩra gɩ do awɩ lɩmɩ thɔmanaakɛ wɩ n cʋʋnɩ Thãgba cãa waw. 22 Ɩjɩrayɛl bɩsana na n bir wɔrɔ̃ Thãgba cãa waa a pɛ sopuu awɩbara a khiirǝ'. 23 Levɩɩ mǝlsɔ na n dʋɔn thɔma Thãgba cãa waw, a wɩ cʋʋrɔ dɩɩ awɩ thɩmɩɩ gɩ. Bɔɔ khorr jɔfʋ gɩ mǝle wo mǝlela fɛw. Wa 'lɛ thɩɩ Ɩjɩrayɛl bɩsanaa thɩ̃thɩɩna'. 24 Sɩ bɩɛl yʋɔraakɛ Ɩjɩrayɛl bɩsana n tini dɩ wa n ha mɛr Thãgba Kɔ̃tɩn mɩ ha Levɩɩ mǝlsɔ. Gɛr gɩ dɩ̃ so war ayɩ wa 'lɛ thɩɩ Ɩjɩrayɛl bɩsanaa thɩ̃thɩɩna'.
Bɩɛl yʋɔrɩkɛ Levɩɩ mǝlsɔ na n tini
25 Thãgba Kɔ̃tɩn sor Mʋɩjɩra ayɩwɔɔ: 26 «Mɩana Levɩɩ mǝlsɔ a sɔ war wɔɔ: "Ɔbɔɔkɛ nɩ teenɩ Ɩjɩrayɛl bɩsanana bɩɛl yʋɔrsɔɔkɛ mɩ ha nɩnɩ awɩ thɩna gɩ dɔ anɩda, nɛrɛ dakha nɩ tero bɩɛl yʋɔr bɩɛl yʋɔraalera a hana mɛr Thãgba Kɔ̃tɩn. 27 Dɩ gelela na tini wa gba gɩ ho bileekɛ wɩ n tini gbʋʋlɔ na dɩvɛ̃ɛkɛ wɩ n tini dɩvɛ̃ ti paa. 28 Thale nɛrɛ dakha na n ti mɛr Thãgba Kɔ̃tɩnɩ khaarda bɩɛl yʋɔrsɔɔra fɛʋʋkɛ nɩ n 'lɛnɩ Ɩjɩrayɛl bɩsanana kɛ dɔnɩ mɛr Thãgba Kɔ̃tɩnɩda na n ha Aarɔ̃ bonɩ jidaar. 29 Khaardaasɔɔra fɛʋʋkɛ wɩ n ha nɩnɩ nɩ tero da bʋɔ a hana mɛr Thãgba Kɔ̃tɩn. 30 Sɔ war wo ayɛ: Ɔbɔɔkɛ na tini dabʋɔ na pɩ, gɩrɛ sɛnɩ nɛr Levɩɩ mǝlsɔ hɩna', mɔ̃ Ɩjɩrayɛl bɩsana n hɩnɩ awɩ jʋ gɩrɛ sɛnɩ na awɩ dɩvɛ̃ pha gɩrɛ sɛnɩ na awɩ niin gɩrɛ sɛnɩ. 31 Nɩ khɔ gɩ ka nɩ nanɩ nɛrɛ na anɩ cɔdara, gɩdonɩ gɛr dɔ anɩ lɩmɩ thɔmanaakɛ nɩ n donɩ Thãgba cãa waw. 32 Dɩ na hana dɩɩ gɩrɛra sɛnɩ a nɩ kɔɔ ti dabʋɔ a ha ma'. Dɩ mɛ̃ na kpɔ̃kpɔrɔ̃ thɩ̃ khaasɔɔkɛ Ɩjɩrayɛl bɩsana n tini nɩ khiirǝ'.