Kooree too latɩkolo iidasɔɔ thɩmɩɩ
17
1 Thãgba Kɔ̃tɩn sor Mʋɩjɩra ayɩ: 2 Sɔ Aarɔ̃ bonɩ jidaarɩ bikuun Eleajaara a tire latɩkolo iidaasɔ dɔɔraale a deere dɔ khãbeele ƴɔɔ fĩi a faa, gɩdonɩ mɛr Thãgbaada latɩkolo iidaasɔɔle debɩ a do. 3 Nɩ gba tɩbɩlaale cʋɛnɩ sopuurǝ a khiir awɩ latɩkolo iidasɔ a bɛ gɩ phɛphɛl a the bonɩ ji paara gɩdonɩ wɩ kɔɔ gba gɛr a jɩɩlna ɩ̃ ƴɛra dɩɩ debɩ do ɩ̃da. Dɩ ga dor jɩɩn Ɩjɩrayɛl bɩsanana. 4 Dɩ Eleajaar bonɩ jidaar gbaar latɩkolo iidaasɔɔlera wɩ cʋʋnɩ na ther sɩɛ, kɛ konaakɛra dɔɔ kʋrnɩ kɔɔ gbanɩ jɩɩlna Thãgba ƴɔɔ dɩ wɩ be gɩ phɛphɛl a thi bonɩ ji paara. 5 Dɩ gɩ dor jɩ̃jɩna thɩ̃ɛ Ɩjɩrayɛl bɩsanana dɩ tɩɩ khɩɩkɛ na dɔnɩ Aarɔ̃ɔ mǝlǝ' na hana hʋɛ a dã Thãgba Kɔ̃tɩnɩ ƴɔɔ a ii latɩkola'. Tibil wo tibilikɛ na cʋɛ gɩnɩ, gɩrɛ dananɩ Kore na wɩrɛ hanaanɩ kha, gɛrra na danaa mɔna Thãgba Kɔ̃tɩn kɔɔ sonɩ Mʋɩjɩra dɩ so.Ɩjɩrayɛl bɩsana n sor Mʋɩjɩ na Aarɔ̃ dɩ thɩlkɩɩr dã wɩ
6 Ga dɩwɩlɔ Ɩjɩrayɛl bɩsana fɛw mar dɩ wa n so Mʋɩjɩ na Aarɔ̃ aa: «Nɛr cʋɛ dɩ Thãgba Kɔ̃tɩnɩ too khiir». 7 Sɩ mɔ̃ Ɩjɩrayɛl bɩsana kpanɩ jɛ wɩ kɛ̃kɛrɛna Mʋɩjɩ na Aarɔ̃ sa gba na hɩɩn Thãgba cãa wa bilo, hɩnɛ ndɔlɔ̃paar thire Thãgba cãa waara dɩ Thãgba Kɔ̃tɩn i dʋbɩ yɩr. 8 Dɩ Mʋɩjɩ na Aarɔ̃ gbaar jal Thãgba cãa wa lõfonʋɔra. 9 Dɩ Thãgba Kɔ̃tɩn sor Mʋɩjɩra ayɩ: 10 «Nɩ thɛ tɩbɩlaakɛɛ thɩ̃thɩɩn sɩ ɩ̃ bũburõ wɩ dapaara». Dɩ wɩ gburõkhure thɩɩra a gʋɛ ƴɩɛ. 11 Dɩ Mʋɩjɩ so Aarɔna: «Gba latɩkolo iidaa a te dɔɔ bonɩ ji paara a pɩɛr, a pɩɛr latɩkolo, a jala khǝ̃khǝ̃ Ɩjɩrayɛl bɩsanana a khəəfəne war, a hɛlla war sor gɩdonɩ Thãgba Kɔ̃tɩn gbaar nĩkhii dɩ thɩlkɩɩr lʋʋnakɛ pɩ.» 12 Dɩ Aarɔ̃ gbaar latɩkolo iidaa mɔna Mʋɩjɩ sonɩ a ca jal na dã Ɩjɩrayɛl bɩsanaa pa dɩɩ do thɩlkɩɩr 'lire lʋʋn tɩbɩlala pɩ. Dɩ a iire latɩkolo a khəəfə tɩbɩlala a hɛl awɩ sopuu. 13 Dɩ a jɩɩlɛ khe na yidaraa thɩ̃thɩɩn dɩ thɩlkɩɩra khu. 14 Dɩ wɩrɛ thɩlkɩɩra kʋʋrnɩ har tɩbɩla gbɩlanɩ yʋɔr yenã na taamakoɲɔ (14.700) a ɓã wɩrɛra kɔɔ khiireni Koree thɩmɩɩra. 15 Dɩ Aarɔ̃ kɛrɛ bir Mʋɩjɩra Thãgba cãa wa lõfonɔɔ ɔbɔɔkɛ thɩlkɩɩr khuni.
Aarɔ̃ɔ gbolɩ thɩmɩ
16 Thãgba Kɔ̃tɩn sor Mʋɩjɩra ayɩ: 17 «Mɩana Ɩjɩrayɛl bɩsana aa wɩrɛ dɔnɩ kɔ̃tɩna caarsɔɔra n hana fɩ gbol bɩɛlbɩɛl. Tea gbola yʋɔr yeɲɔra caar yʋɔr yeɲɔraale a khera ca dɔɔ kɔ̃tɩ̃ɩ i ɔɔ gbolla. 18 Kherene Aarɔ̃ɔ i Levɩɩ caa gbolla. Wɩrɛ dɔnɩ kɔ̃tɩna caarsɔɔra n hanana awɩ gbol. 19 Agɩpɩ fɩ lona gbolaalera Thãgba cãa waw, kãakɛ mɩ n caana nɩnɩ, fɩ thɩɩn ʋlfɛ khɛɛsʋʋ ƴɛbʋrɔ, kɛ hananɩ nɔ bɩɛl ʋlfɛ thɩmɩɩ. 20 Dɩ tibil ʋrɛ ma phiirni, ɔɔ gbol na gbomine. Dɩ mɛ̃ ma pɛ khu paar hũhuunenaakɛ Ɩjɩrayɛl bɩsana n hũhuun narnɩ.
21 Dɩ Mʋɩjɩ sor Ɩjɩrayɛl bɩsanana dɩ awɩ kɔ̃tɩ̃sɔ fɛw bɩɛlbɩɛl haa gbola bɩɛlbɩɛl caar fɛw bɩɛlbɩɛlɩ irǝ, dɩɩ ha gbola yʋɔr yeɲɔ. Aarɔ̃ɔ gbol kɔɔ har awɩ gbolsɔɔ thɩ̃thɩɩn. 22 Dɩ Mʋɩjɩ thɩɩn gbolala Thãgba Kɔ̃tɩnɩ ƴɛbʋrɔ, Thãgbaa kẽkẽ wara, kãkɛ nɔ bɩɛl ʋlfɛ thɩmɩɩ hanɩ. 23 Dɩ ga dɩwɩlɔ Mʋɩjɩ lʋʋn le a yɩɛ dɩɩ do Aarɔ̃ɔ gbolɩkɛ a thɩɩnɩ Levɩɩ caa irǝ gbomine, a phe, a se amadɩ be, dɩɩ bɩɩ. 24 Dɩ Mʋɩjɩ khɩɩrɛ gbolaalera fɛw Thãgba Kɔ̃tɩnɩ ƴɛra a jalna nɩna Ɩjɩrayɛl bɩsana. Dɩ wɩ yɩ gɛr; dɩ wɛr fɛw bɩɛlbɩɛl tiire awɩ gbolsɔ.
25 Dɩ Thãgba Kɔ̃tɩn so Mʋɩjɩra: «Birǝnǝ Aarɔ̃ɔ gbola a thɩnɛ ʋlfɛ khɛɛsʋ ƴɛbʋrɔ, kɛ hananɩ nɔ bɩɛl ʋlfɛ thɩmɩɩ. Gɩ toole gɩ do jɩɩn lãlanana. Dɩ mɛ̃ fa cʋʋ wɩ khu hũhuuneekɛ wɩ n hũhuunɩ ɩ̃ ƴɛra, dɩ do nɔɔ wa khiirǝ'. 26 Dɩ Mʋɩjɩ cʋʋrɛ ɔmɛna. A cʋʋrɛ gɩrɛra Thãgba Kɔ̃tɩn kɔɔ sʋʋraanɩ.