Kore na ɔɔ too ɩɩrnanɛ lãʋ Mʋɩjɩra
16
1 Kuun bɩɛl gɩ da n do Kore, a do Levɩɩ məl. Yɩtɩseharɩ bikuun gɩ, sɩ ɔɔ thɩ kɔ̃tɩ̃ na n do Kehatɩ. A ɩɩrɛ a kpa Ribɛ̃ɛ məlsɔ yẽther : Elɩabɩɩ bikũusɔ Datã na Abɩram na Pelɛtɩɩ bikuun Ɔn. 2 Dɩ wɩ tiri kpɩɛrɛ wɛr na Ɩjɩrayɛl bɩsanaa kɔ̃tɩ̃sɔ taaɲɔ na kpalaɲɔ yʋɔr (250) kɛ dɔnɩ tɩɩ cʋnanɛsɔɔkɛ wɩ n wenɩ gbɛbɩ khasɔɔra sa ɩɩrna Mʋɩjɩ kɛ̃kɛrɛnɛ. 3 Dɩ wɩ kpar jɛ wa n kɛ̃kɛrɛna Mʋɩjɩ na Aarɔna a so war: «Gɩ thʋnɛ dã mɛ̃ ! Tɩbɩla fɛw phuri, dɩ Thãgba Kɔ̃tɩn har sɛrɛ fɛʋʋ thɩ̃thɩɩn. Sɩ mɔ̃ gɩ dɩ nɩ kpɩɛr dɩ nɛr dɔ kɔ̃tɩna Thãgba Kɔ̃tɩnɩ toora?»4 Ɔbɔɔkɛ Mʋɩjɩ nɩɛnɩ gele, a gburõkhure a gʋɛ ƴɩɛ thɩɩra. 5 Agɩpɩ dɩ so Korera na wɩrɛ fɛʋraakɛ a hananɩ ayɩ: «Cʋɔ duuro Thãgba Kɔ̃tɩn na cʋʋrɛ wɩ jɩ ʋrɛ dɔnɩ ɔɔda na ʋrɛ phoni jɔfʋ hʋɛra. Dɩ a na cʋʋrɛ ʋrɛra a phiirni da wɔrɔnaa. 6 Nɩ yɛkɛ gɩrɛ na cʋʋnɩ: Fɛr Kore na afɩ too fɛw, nɩ gba latɩkolo wiidaasɔ. 7 Cʋɔ, nɩ te dɔɔ a pɩɛn, a pɩɛn latɩkolo Thãgba Kɔ̃tɩnɩ ƴɔɔ. Ʋrɛ Thãgba Kɔ̃tɩn na phiirni, ɔr dɔ tɩɩ phuu. Pha Levɩɩ mǝlsɔ waa gɩ thʋnɛ dã mɛ̃!»
8 Agɩpɩ dɩ Mʋɩjɩ bir so Korera wo ayɩ: Levɩɩ məlsɔ waa nɩ pɛ nũu: 9 «Ɩjɩrayɛlɩ Thãgba lee nɩnɩ kpɩɩ Ɩjɩrayɛl bɩsanana a cʋʋnɩ dɩ nɩ wɔrɔ̃ɔ, na n do ɔr Thãgba Kɔ̃tɩnɩ kẽkẽ wa thɔma dɩ nɩ jɩɩl Ɩjɩrayɛl bɩsanaa ƴɛra a na bul wɩ, ga danɩ pa' ? 10 A cʋʋ nɛr dɩ nɩ wɔrɔnaa fɛrɛ na Levɩɩ mǝlsɔ fɛʋʋkɛ nɩ donanɩ omɩna sɩ dɩ nɩ bir wo dɩ na n ƴaal wɩ ɓana nar bonɩ ji thɔmaa? 11 Dɩ gɛra dɔ kɩrʋ dɩ nɩ ɩɩr a kpa kha fɛrɛ na wɩrɛ nɩ hananɩ kha a ɩɩrna kɛ̃kɛrɛnɛ Thãgba Kɔ̃tɩnna, a mɛ̃ ga aɲe Aarɔ̃ do dɩ na n sʋʋ ?»
12 Agɩpɩ Mʋɩjɩ thʋɔn we Elɩabɩɩ bikũusɔ Datã na Abɩram dɩ wɩ so, ɩna n pɔ la'. 13 Fɛr te sɩ Ejipiti dɩɩra ka naƴɩlɛ̃ na thʋʋr n celnɩ a ɩna bǝ̃ kparara fɩ kʋʋr, dɩ ga dã fɩ pa', dɩ fɩ bir dɩ fa n ƴaal fɩ dɔ sar kɔ̃tɩnɩ ?» 14 Fa lona sɩ dɩɩraakɛ naƴɩlɛ̃ na thʋʋr n celna', kpei Fa lona sɩ la. Fa ha sɩ wo dɩvɛ̃ thɩr lɩɛsɔ gɩ dɔ asɩda ga. Yara fɩ n gba tɩbɩla fɛʋʋkɛra yaa? Sa pɔ la'.» 15 Dɩ nĩkhii fʋrɛ Mʋɩjɩ jɔɔ ka dɩ so Thãgba Kɔ̃tɩnna: «Fa n tee awɩ bona'. Ma tee warakɛ kũkə̃ə a yɩ ga. Ma cʋʋ tɩɩ bɩɛllakɛ puure a yɩ ga.»
Sorɩkɛ na 'lenɩ wɩrɛ ɩrɛnanɩ lãʋ
16 Dɩ Mʋɩjɩ so Korera: «Fɛrɛ na afɩ tookɛ fɩ hananɩ, cʋɔ nɩ caanɛ kha na Aarɔ̃ Thãgba Kɔ̃tɩnɩ ƴɛra. 17 Afɩ tibilisɔ taaɲɔ kpalaɲɔ yʋɔrɩle (250) n gba wɛr fɛw bɩɛlbɩɛl awɩ latɩkolo iidasɔ gɩ gbɛbɩ gɩ ha taaɲɔ kpalaɲɔ yʋɔr (250) a pɩɛn latɩkolo a danana Thãgba Kɔ̃tɩnɩ ƴɛra. Fɛrɛ na Aarɔ̃ dakha nɩ ɛna anɩdasɔ.» 18 Dɩ wɛr fɛw bɩɛlbɩɛl gbaar awɩ latɩkolo iidasɔ a pɛr dɔɔ a dɛɛnɔ latɩkolo a jɩɩlna Thãgba cãa wa lõfonʋɔra nakha Mʋɩjɩ na Aarɔ̃. 19 Dɩ Kore kpar Ɩjɩrayɛl bɩsana fɛw a jɛ Mʋɩjɩ na Aarɔ̃ɔ ƴɛra Thãgba cãa wa lõfonʋɔra. Dɩ Thãgba Kɔ̃tɩnɩ i dʋbɩ yɩrrɛ Ɩjɩrayɛl bɩsanana fɛw.
20 Dɩ Thãgba Kɔ̃tɩn sor Mʋɩjɩra na Aarɔna ayɩ: 21 «Nɩ thɛ tɩbɩlaakɛɛ thɩ̃thɩɩn sɩ n bũburõ wɩ dapaara ɩ̃ faa». 22 Dɩ Mʋɩjɩ na Aarɔ̃ gburõkhure a gʋɛ ƴɩɛ thɩɩra sa so: «Pha Thãgba ! Thãgbaakɛ hananɩ thɩ̃ tinǝne fɛw yire, fa gbananɛ tɩbɩla fɛw nĩkhii tɩɩ bɩɛlɩ sopuurǝǝkɛ a cʋʋnɩ ya?» 23 Dɩ Thãgba Kɔ̃tɩn so Mʋɩjɩra ayɩ: 24 «Sɔ tɩbɩlala wɩ hʋnɔnɛ na Kore na Datã na Abɩramɩsɔɔ cɔsɔ». 25 Dɩ Mʋɩjɩ ɩɩrɛ dɩ Ɩjɩrayɛl bɩsanaa kɔ̃tɩ̃sɔ kpaaraa, dɩ wɩ jal Datã na Abɩramɩ pa. 26 Dɩ a mɩɩnanɛ tɩbɩla a so war: «Mɩ n bɩɛl nɛr, nɩ hʋnɔnɛ na tɩɩ puu caarsɔɔkɛ kẽkẽ wasɔ. Na n tha thɩɛnaakɛrakɛ dɔnɩ awɩda ga, a mɛ̃ ga na khiire gɩ do awɩ sopuu dɔ nɔɔ». 27 Dɩ tɩbɩla tɔr a hʋnɔna Kore na Datã na Abɩramɩsɔɔ cɔsɔ. Dɩ Datã na Abɩram ther a jɩɩl awɩ kẽkẽ wa lõfonɔsɔ na awɩ khɛrsɔ na awɩ bɩsãsɔ na awɩ cɔdara fɛw.
28 Dɩ Mʋɩjɩ so: «Nɩ yɛ gɩrɛ na jɩnanɩ dɩ Thãgba Kɔ̃tɩn thɔna mɩ dɩ ma n cʋʋ gɩrɛ fɛʋʋkɛ mɩ n cʋʋnɩ; ga do ɩ̃ thɛthɛɛ fãga mɩ n cʋʋna ga. 29 A tɩɩ ca wɩrɛ khiir khi bʋɔ mɔna tɩbɩla fɛw n khini, ga do Thãgba Kɔ̃tɩn thɔna ma'. 30 Sɩ a Thãgba Kɔ̃tɩn cʋʋ thɩ̃ɛ dɩɩ kpaa nʋɔ, a thɩɩ ha nʋɔ a dɩɩ wɩ na awɩ thɩ̃sɔ fɛw dɩ wɩ gbunǝ yire khĩdi dʋɔ, na jɩrɛ dɩ Thãgba Kɔ̃tɩn wɩ beesɩ.
31 Dɩ mɔ̃ a mɩɩnɩ ga thɩmɩɩle na pɩ, thɩɩ lɩɛrɛ dapaakɛra Datã na Abɩram jɩɩlnɩ. 32 Thɩɩ ha nʋɔ a dɩɩ wɩ, wɛr na awɩ cɔdara na wɩrɛ hanɩ kha na Kore na awɩ thɩ̃sɔ fɛw. 33 Dɩ wɩ gbune khĩdi dʋɔ na yire wɛr na awɩ thɩ̃sɔ fɛw dɩ thɩɩ thi war. Thale wɩ bũburõ Ɩjɩrayɛl bɩsanaa thɩ̃thɩɩn. 34 Dɩ mɔ̃ wɩ n khɩɩnɩ Ɩjɩrayɛl bɩsana fɛʋʋkɛ khonǝ wɩnɩ caalɛlɛ dɩ wa n sona aa : "thɩɩ na n dɩɩ sɩ dakha gaa koi !" 35 Dɩ dɔɔ ther Thãgba Kɔ̃tɩnɩ pa a hɩ̃ kona taaɲɔ kpalaɲɔ yʋɔr (250), kɛ n iǝnɩ latɩkolo.