Thɩ̃bi bonɩɛsɔ na ta bonɩɛɛ thɩmɩɩ
15
1 Thãgba Kɔ̃tɩn sor Mʋɩjɩra ayɩ: 2 "Mɩana Ɩjɩrayɛl bɩsana a sɔ war wɔɔ: Ɔbɔɔkɛ na lonɩ dɩɩraakɛ mɩ n ha nɩnɩ a na too, 3 ado nɩ ƴaal nɩ ji mɛr Thãgba Kɔ̃tɩnna bonɩɛ na nʋ̃ kɔ̃tɩ̃ɩ agɩbo nʋ̃ yɩra nɩ thii dɔɔra ga n hʋna mɛr Thãgba Kɔ̃tɩn daw, a bonɩ thiinǝ gɩ, a nɔ hɛl bonɩɛ gɩ, a bonɩɛ gɩɩkɛ thɛnɩ tibili ƴaala, agɩborakɛ bonɩɛ gɩ anɩ fɛtɩ ʋkhara, 4 ntɛɛkɛ hɩnanɩ bonɩɛra wɩ n jini Thãgba Kɔ̃tɩnna n ɓananɔ mɩ̃ phuu kilǝ yẽther kɛ wɩ gbʋrnanɩ niin litiri yeɲɔ, 5 na dɩvɛ̃ litiri yeɲɔ. Ntɛ ɓana mɩ̃ phuule wɩ gbʋrnanɩ niin na dɩvɛ̃ɛle banaa wo bananaakɛ wa jinənɩ a bonɩ thiinǝ gɩ, a 'likha bonɩɛ gɩ. 6 A banakɩɩr ntɛ n jinǝ, a ɓananɔ mɩ̃ phuu kilǝ maadõ kɛ wɩ gbʋrnanɩ olivi niin litiri yeɲɔ na dakuru, 7 na dɩvɛ̃ litiri yeɲɔ na dakuru wɩ thii gɩ dɔɔra ga n hʋ̃ mɛr Thãgba Kɔ̃tɩn daw. 8 A na ɓollʋ ntɛ n jinǝ, a bonɩ thiinǝ gɩ, a nɔ hɛl bonɩɛ gɩ, agɩbo a 'likha bonɩɛ gɩ mɛr Thãgba Kɔ̃tɩnna, 9 a ɓana nʋmɩnaale mɩ̃ phuu kilǝ yʋɔr phe bire kɛ wɩ gbʋrnanɩ niin litiri yenã, 10 na dɩvɛ̃ litiri yenã, wɩ thii gɩ dɔɔra ga n hʋ̃ mɛr Thãgba Kɔ̃tɩn daw. 11 Wɩ cʋɛ ɔmɛna ado na ɓollʋ wɩ n jinǝ, a banakɩɩr gɩ, a bana ɓollʋ gɩ agɩbo a bʋ gɩ. 12 A nʋma ha yemɔnakɛ na jinǝni bonɩɛ, nɩ ɓana nʋ̃ dɔɔra mɩ̃ phuukɛ wɩ gbʋrnanɩ niin na dɩvɛ̃ɛ mɔna ga jɔfʋ sonɩ. 13 Wɩrɛ dɔnɩ Ɩjɩrayɛl bɩsã bire fɛw bɩɛlbɩɛl na n kpa ga jɔfʋraakɛ a wa ji bonɩɛkɛ wɩ n thiini dɔɔra ga n hʋna mɛr Thãgba Kɔ̃tɩn daw. 14 A kpakpalɩkɛ tɔɔnɩ anɩ dʋɔ agɩbo kpakpal ʋrɛ pʋɔrnɛnɩ anɩ thɩ̃thɩɩn, a wele ƴaal wɩ ji bonɩ thiinǝ ga n hʋna mɛr Thãgba Kɔ̃tɩn daw, wɩ kpa ga jɔfʋra mɔna nɩ n cʋʋnɩ. Mɛna gɩ na awɩ məlsɔɔkɛ na kpaanɛnɩ. 15 Cʋʋ pa bɩɛlɩɩlera gɩ Ɩjɩrayɛl bɩsanana fɛw na kpakpalalaakɛ hanɩ anɩ dʋɔ. Bɔɔ khorr jɔfʋ gɩ anɩ mǝlsɔɔra fɛw. Cʋʋ pa bɩɛlɩɩlera gɩ nɛrɛra na kpakpalala Thãgba Kɔ̃tɩnɩ ƴɛra. 16 Jɔfʋ bɩɛla gɩ na cʋʋ pa bɩɛl nɛrɛɛra na kpakpalalaakɛ tɔɔnɩ anɩ dʋɔ. 17 Thãgba Kɔ̃tɩn mɩɩnanɛ Mʋɩjɩ a sʋʋraa wɔɔ: 18 Mɩana Ɩjɩrayɛl bɩsana a sɔ war wɔɔ: Ɔbɔɔkɛ na lonɩ dɩɩraakɛ mɩ n jalna nɩnɩ, 19 a na kho dɩɩlee buru nɩ kɔɔ tero khaardaar ɓo a hana mɛr Thãgba Kɔ̃tɩn. 20 Ɔbɔɔkɛ na n hɩnɩ anɩ buru nɩ kɔɔ te caca buruukɛ nɩ hɩnɩ a hana mɩ mɔ̃ nɩ n kɔɔ tini caca bile, bile gbʋʋlɔ. 21 Na n hana mɛr Thãgba Kɔ̃tɩn caca buruukɛ nɩ n kɔɔ tini. Jɔfʋ gɩ khorr nɛrɛɛra na anɩ mǝlsɔɔraakɛ na kpaanɛnɩ.Bonɩɛɛkɛ wa jini a tibil cʋʋ dɩɩ sɩ ga do a jɩrɛ sa cʋa'.
22 A nɩ dɩ jɔfʋ ʋkha bɩɛlla jɔfʋsɔɔraakɛ mɩ sonɩ Mʋɩjɩra sɩ ga do nɩ jɩrɛ sa cʋa', 23 a nɩ dɩ gɩrɛra mɛr Thãgba Kɔ̃tɩn sonɩ Mʋɩjɩra dɩ so nar, fɔnɩrakɛ wireekɛ mɩ so narnɩ a na gbana anɩ mǝlsɔra fɛw, 24 ado sopuu dɔɔra cʋʋrɛ sɩ tɩbɩla na ja', Ɩjɩrayɛl bɩsana fɛw na tire nake ɓol bɩɛl wɩ jinǝ bonɩ thiinǝ kɛ n hʋnanɩ mɛr Thãgba Kɔ̃tɩn daw wɩ ɓanɔ thɩ̃bi bonɩɛ na ta bonɩɛ mɔ̃ ga jɔfʋ hanɩ. Wa jire dakha so hɛl bonɩɛ na bʋkɩɩr. 25 Dɩ bonɩ jidaar na jiri so hɛl bonɩɛl a hɛlna Ɩjɩrayɛl bɩsanaa fɛw so. Dɩ ma faarɛ awɩ sopuu na ha wɩ, gɩdonɩ wa jɩ sa cʋa'. Dɩ wa jiri awɩ bonɩ thiinǝ na awɩ so hɛl bonɩ mɛr Thãgba Kɔ̃tɩnna sopuurǝkɛ wa jɩnɩ sa cʋa'. 26 Dɩ ma faarɛ sopuu na ha Ɩjɩrayɛl bɩsana fɛw na kpakpalalaakɛ tɔɔnɩ awɩ thɩ̃thɩɩn gɩdonɩ sopuu gɩɩkɛ tɩbɩla fɛw na jɩnɩ sa cʋa'. 27 Sɩ ado tɩɩ bɩɛl cʋɛ sopuu sɩ ga do a jɩrɛ sa cʋa', a na jire so hɛl bonɩɛ na bʋʋkɛ hananɩ yɛ bɩɛl. 28 Dɩ bonɩ jidaar na jire so hɛl bonɩɛ a hɛlna ntɛɛ sopuu mɛr Thãgba Kɔ̃tɩnɩ ƴɛra sopuurǝǝkɛra aa jɩnɩ sa cʋa'. Aa hɛl ɔɔ sopuu pɩ, ma faarɛ ɔɔ sopuu na haa. 29 Jɔfʋ bɩɛlla gɩ Ɩjɩrayɛl bɩsananaakɛ dɔnɩ dɩdara na kpakpalalaakɛ tɔɔnɩ le awɩ dʋɔ ado wɩ cʋʋrɛ dɩɩ sɩ gado wɩ jɩrɛ sa cʋa'. 30 Sɩ ado tibil ti kpɩɛrɛ sa cʋʋ sopuu, a Ɩjɩrayɛl bire gɩ, a kpakpal gɩ, mɛr Thãgba Kɔ̃tɩn a nɩɩr, wa hɛllɛ ntɛɛle Ɩjɩrayɛl caara na faa. 31 Mɛr Thãgba Kɔ̃tɩnɩ thɩmɩɩ a beesɩ a kʋɛ ɩ̃ jɔfʋ. Wa hɛla ntɛɛle na faa, ɔɔ yʋɔ thɩmɩɩ ha.
Kuun bɩɛl kʋɛrɛ hɩɩr wire dɩ wɩ kʋʋ
32 Dabɔɔkɛ Ɩjɩrayɛl bɩsana hanɩ bǝ̃ kparara, wɩ phorore kuun bɩɛlla da n khɩɩr dɛɛ hɩɩr wire. 33 Dɩ wɩrɛ yɩɛnɩ, fʋʋrɛ a jalna Mʋɩjɩra na Aarɔna na Ɩjɩrayɛl bɩsana fɛw ƴɛra. 34 Dɩ wɩ thɩɩnʋʋnɛ bɔɔbɔɔ wa n pɩɛrna gɩdonɩ wa so war gɩrɛ wa cʋgʋʋnɩ pa'. 35 Dɩ Thãgba Kɔ̃tɩn sor Mʋɩjɩra: "Nɩ kɔ kuunikɛ". Ɩjɩrayɛl bɩsana fɛw n dʋrɛɛ na bokana a kɔ jɛ khuirǝ. 36 Dɩ Ɩjɩrayɛl bɩsana fɛw fʋʋ a thena jɛ khuirǝ a dʋʋrʋ na bokana a kʋ mɔna Thãgba Kɔ̃tɩn kɔɔ sonɩ Mʋɩjɩra. 37 Thãgba Kɔ̃tɩn sor Mʋɩjɩra ayɩ: 38 Mɩana Ɩjɩrayɛl bɩsana a sɔ war wɔɔ: Nɛrɛ na anɩ mǝlsɔ na n pɩɛn anɩ kẽkẽ nɔsɔɔra pɛ̃ɛ jʋɔljʋɔl. Nɩ pɛ pɛɛnaale kẽkẽ wi sɩɛ khala khala. 39 Dɩ ɔbɔɔkɛ na n yɩnɩ pɛ̃ɛle na jɩnanɛ mɛr Thãgba Kɔ̃tɩnɩ jɔfʋsɔ na n pɛ cʋʋrɛra. Dɩ mɛ̃ na n kpa anɩ thɛthɛɛ kpɩɛra na anɩ yi hɩɩna, gɩ cʋʋ nɩ na n fʋɔr thãgba kpɩɩsɔa'. 40 Dɩ mɛ̃ na jɩna ɩ̃ jɔfʋsɔ na n nɩ gar nũu dɩ mɛ̃ na do mɛr Thãgba Kɔ̃tɩnɩda. 41 Mɛr dɔ Thãgba Kɔ̃tɩn anɩ Thãgbaakɛ te nɩnɩ Ejipiti dɩɩra a thena ɩ̃ do anɩ Thãgba. Mɛr dʋɔn Thãgba Kɔ̃tɩn anɩ Thãgba.