Ɩjɩrayɛl bɩsana bor ɩna n jal Kanãa dɩɩra ga
14
1 Dɩ Ɩjɩrayɛl bɩsana fɛw n hulene wa n khɩɩna ga dɩtɩnɔɔle fɛw a wɩlna dɩɩ. 2 Dɩ wɩ mar fɛw dɩ wa n so Mʋɩjɩ na Aarɔ̃ ayɩ: "A sɩ kɔɔ khiire fɛw Ejipiti dɩɩra agɩbo bǝ̃ kpararaakɛ ga ba gaa! 3 Aɲeraakɛ Thãgba Kɔ̃tɩn n jalna sɩ dɩ caaraale sɩ khiir kʋʋra, sɩ asɩ sodara n fʋlɛ asɩ khɛrsɔ na asɩ bɩsãsɔ? A sɩ kɛr bir Ejipiti ga ba gaa?" 4 Dɩ wɩ mɩɩrɛ kha awɩha aa ɩnɩ n pɩɛn tibil a gbana nɩ ƴɩɛ, ɩnɩ n bir Ejipiti. 5 Dɩ Mʋɩjɩ na Aarɔ̃ jire thɩɩra a sumo Ɩjɩrayɛl bɩsana fɛʋʋ ƴɛra. 6 Dɩ Nunii bikuun Jojue na Yefunee bikuun Kalɛbɩɩkɛ dɔnɩ wɩrɛ kɔɔ jalanɩ kha na wele dɩ gɩɩlʋ ɓǝǝr awɩ kẽkẽsɔ, 7 sa so Ɩjɩrayɛl bɩsanana fɛw ayɩ: "Dɩɩkɛ sɩ kpaarnɩ finǝ a hɩɩn, dɩ bʋɔ gɩ na sobɔr. 8 A Thãgba Kɔ̃tɩn ɓã sar, a na cʋʋ sɛr dɩ sa lõ dɩɩraalera a ha sɩ dɩɩra. Dɩɩ gɩɩkɛ naƴɩlɛ̃ na thʋʋr n celnɩ. 9 Thɩ̃ bɩɛl dɩbara dʋɔn na n ɩɩrna lãʋ Thãgba Kɔ̃tɩnna ga. Dɩ na n ma dɩɩlee toa', sa pa wɛr dapaara gɩdonɩ awɩ thãgbasɔɔkɛ n bɛra wɩnɩ faa wɛr. Thãgba Kɔ̃tɩn har kha na sɛrɛ, na n ma wa'.Mʋɩjɩ ƴɛɛrɛ Thãgba a pɛ Ɩjɩrayɛl bɩsanana
10 Dɩ tɩbɩla n mɩɩrɛ kha aa ɩnɩ n dʋrɛ wɩ na bokana dɩɩ do dapaara Thãgba Kɔ̃tɩnɩ i dʋbɩ yɩrrɛ Thãgba cãa waara ƴũu wɛr fɛʋʋ ƴɛra. 11 Dɩ Thãgba Kɔ̃tɩn sor Mʋɩjɩra wɔɔ: "Ʋmɔ̃ɔ bɔɔ tɩbɩlaakɛra na beesi mɩ na dana ? Ʋmɔ̃ɔ bɔɔ wa bo mɩ ha pɛrɛ na dana ? Narakɛ nɔ kpaa thɩ̃ ca gɩrɛ mɩ cʋʋnɩ awɩ thɩ̃thɩɩn? 12 Ma pɛ warɛ kho mananɛ gɩ kʋʋr wɩ gɩ ti, sɩ ɩ̃ cʋʋ ca nɩ n the fɛrɛra a hana punone a jɔ wɩ. 13 Dɩ Mʋɩjɩ birse Thãgba Kɔ̃tɩn: "Ejipitidara jɩrɛ dɩ fɛr te tɩbɩlaakɛ awɩ dʋɔ na afɩ fãga dɩ wɩ the. 14 Dɩ wɩ mɩɩ gɛr dɩdaraakɛ. Dɩ wɩ nɩɛrɛ dɩ fɛr Thãgba Kɔ̃tɩn har tɩbɩlaakɛ thɩ̃thɩɩn, dɩ fɛr Thãgba Kɔ̃tɩn n nɩnanɛ afɩbara gbelẽ gbelẽ, wɩ nɩɛrɛ dɩ fɛr Thãgba Kɔ̃tɩnɩ ndɔlɔ̃pa n har ƴũu awɩ yʋɔ, dɩ fɩ n har ndɔlɔ̃paara dɩ fɩ gbana wɩ ƴɩɛ dɩwɩlɔ, dɩtɩnɔ dɩ fɩ gbana wɩ ƴɩɛ na dɔɔ. 15 Dɩ nɛnɛ̃ a fɩ bũburõ tɩbɩlaakɛ fɛw babɩɛldaa, caarsɔɔkɛ nɩɛnɛnɩ afɩda dɩ wɩ mɩɩna na sor a na yɩ, 16 Fɛr Thãgba Kɔ̃tɩn fa kɔɔ hana punone a na cʋʋna tɩbɩlaakɛ dɩ wa lõ dɩɩraakɛ fɩ kɔɔ ʋlfɛnɩ a so fa ha wɛra' gɛr gɩ dɩ fɩ kʋʋr wɩ bǝ̃ kparara. 17 Dɩ gɛr gɩ nɛnɛ̃, mɩ n bɩɛl fɛr, nɛna afɩ puno hana gɩ the afɩ wabɩra. Cʋɛ mɔna fɩ kɔɔ sonɩ ayɩ:" 18 "Aa fɛr Thãgba Kɔ̃tɩn, nĩkhi jodaar ha fɩ, aa ha bulole jɔ farɛ ka, dɩ fɩ faa dɩpaar na sopuu, sɩ fa n gba jɔfʋ kʋɛdaar dɩ do tɩɩ sarʋa'. Fɩ n heene bɩsana sor dɩɩ the awɩ thɩsɔɔ dɩpa dɩ fɩ dana balãther na balanã mǝle. 19 Mɩ n bɩɛl fɛr, faa tɩbɩlaakɛ dɩpa wo gɩ the afɩ ha bulo jɔjɔra, mɔna fɩ n kɔɔ faanɩnakɛ dɩ fɩ ha wɩ a fʋna mɔ̃ fɩ ti wɩnɩ Ejipiti a dana kɩɛr. 20 Dɩ Thãgba Kɔ̃tɩn so: "Mɩ faarɛ ha wɩ mɔna fɩ sonɩ. 21 Sɩ mɛrɛ yidaar mɩ do, dɩ mɛr Thãgba Kɔ̃tɩnɩ i dʋbɩ hire thɩɩ fɛw. 22 Tɩbɩla fɛʋʋkɛ yɛnɩ ɩ̃ i dʋbɩ na nɔ kpaa thɩ̃ɛsɔɔkɛ mɩ cʋʋnɩ Ejipiti na bǝ̃ kparara kɛ fifilǝne mɩnɩ gɩrɛ balamɔ̃, wa pɛ ɩ̃ nɔ nũǝ', 23 tibil wele fɛw, na to dɩraakɛ mɩ ʋlfɛnɩ a so awɩ thɩsɔ ɩ̃ ha wɩ. Wɩrɛ fɛʋʋkɛ beesine mɩnɩ, na yɩ dɩɩle na yirǝ'. 24 Sɩ ɩ̃ thɔ̃daar Kalɛbɩ hinǝne thu kpɩɩ. A nɩ mɛr nũu a dana khu paar. Dɩ gɛr gɩ, ma cʋgʋʋrɛ da lõ dɩɩraakɛra a kpaarnɩ ; ɔɔ mǝlsɔ ma ha wɩ hɩ̃. 25 Amalɛkɩɩ mǝlsɔ na Kanãadara tɔɔ ɓɛlɛnɔ. Dɩ gɛr gɩ cʋɔ nɩ kɛra birǝ bǝ̃ kparara a jala kalbi laɲɔ̃ khɔra. 26 Dɩ Thãgba Kɔ̃tɩn sor Mʋɩjɩra na Aarɔna wo ayɩ: 27 "Ʋmɔ̃ɔ bɔɔ ma sɩ tɩɩ puu ca wɩrɛra wɩ hũhuun mar gɩ dana? Mɩ nɩɛrɛ hũhuuneekɛ Ɩjɩrayɛl bɩsana n hũhuun marnɩ. 28 Jala sɔ war ayɛwɔɔ yidaar mɩ do, mɛr Thãgba Kɔ̃tɩn sɔ; ma cʋʋ nɛr gɩ mɩɛ kha na gɩrɛ nɩ mɩɩnɩ to mɩ nuunǝ. 29 Anɩ khisɔ na phɩɩnɛ bǝ̃ kpararaakɛ. Nɛrɛ fɛʋʋkɛ wɩ thernɩ, kɛ hananɩ yɛna kpelẽ a jʋʋna, kɛ hũhuune marnɩ, 30 na lõ dɩɩraakɛ mɩ kɔɔ ʋlfɛnɩ ɩ̃ ha nɩ nɩ toora'. Yefunee bikuun Kalɛbɩ na Nuni bikuun Jojue wɛr dɩbara na lona. 31 Sɩ anɩ bɩsãsɔɔkɛ nɩ kanɩ kɔɔ yɩ anɩ lãlaardara na fʋlɛlɛ, wɛr ma thɔɔ wɩ lõ wɩ jɩ dɩɩkɛra nɩ beesɩnɩ. 32 Sɩ ner wer, kɩɛr na khiir bǝ̃ kpararaakɛra, 33 anɩ bɩsãsɔ na kpaarɔnɩ mɔ̃ nʋ̃ khɛɛ kpaarnɩ wɩ cʋʋna yɛna kpalaɲɔ. Dɩ mɛ̃ ma tiir war helu anɩ nũ nʋʋra gɩ dana bɔɔkɛ na khiirnɩ bǝ̃ kparaara na pɩ wɩbɩ. 34 Wire kpalaɲɔ nɩ gba a gɩɩlna dɩɩra, yɛna kpalaɲɔ ma tiir nar anɩ sopuu hel na cʋʋna. Wi bɩɛl n do yɛ bɩɛl. Dɩ mɛ̃ na jɩ, dɩ a tibil lã Thãgba Kɔ̃tɩnna thɩ̃doo gɩ donɩ. 35 Mɛr Thãgba Kɔ̃tɩn, mɛr sɔ : thale ma cʋʋ tɩɩ puu ca wɩrɛ kpanɩ kha dɩ wa n kɛ̃kɛrɛna mɩ, wa khiire bǝ̃ kpararaakɛ na pɩ wɩbɩ. 36 Dɩ konaakɛ Mʋɩjɩ kɔɔ thɔnɩ dɩ wɩ jal gɩɩl dɩɩ sa kɛr bir ɩ̃ a mɩɩ tɩbɩla fɛw dɩɩleeda, a tɔ wɩ pɛr dɩ wa n sʋʋ 37 konaale mɩanɩ dɩɩleeda a pɛr tɩbɩla maar do kpãkpalã ga, Thãgba Kɔ̃tɩn pɛ warɛ khoo dɩ wɩ khiir ɔɔ ƴɛra. 38 Nunii bikuun Jojue na Yefunee bikuun Kalɛbɩ wɛr dɩbara sɛ na yire konanaakɛ kɔɔ jalanɩ a gɩɩl dɩɩ.
Ɩjɩrayɛl bɩsana bire nʋʋr nũu Thãgbara
39 Ɔbɔɔkɛ Mʋɩjɩ gbanɩ thɩmɩaale a mɩɩ Ɩjɩrayɛl bɩsana fɛw, haar kʋɛ wɛr jɔɔ ka. 40 Dɩ wɩ mãa ɩɩrɛ duuro phiphiphi a gba dɩ wa n jʋʋn gɔ̃gʋɔnɔɔle sa so aa: "Nɛnɛ̃ sa jʋʋnɛ paarɩkɛra Thãgba Kɔ̃tɩn nɩrɔnɩ gɩdonɩ sɩ cʋʋrɛ sopuu." 41 Dɩ Mʋɩjɩ so war: "Aɲe gɩ dɩ na n nʋʋr nũu Thãgba Kɔ̃tɩnɩ jɔfʋraakɛ a pɛnɩ? Haale ! Ga bɔ naraa' dɛ! 42 Na n jal laa dɛ! Thãgba Kɔ̃tɩn na ha kha na nɛra'. Na n jal le anɩ lãlaardara n punona'. 43 Amalɛkɩɩ mǝlsɔ na Kanãadara hale anɩ ƴɛbʋrɔ wa kʋʋr nɛr khaar na bajɩna. Mɔ̃ nɩ faanɩ Thãgba Kɔ̃tɩn a na ha kha na nɛrɛa' dɛ! 44 Dɩ awɩ nũ nʋʋrara wɩ borakɛ sa gba wa n jʋʋn gɔ̃gʋɔnɔɔle. Sɩ Mʋɩjɩ na Thãgba Kɔ̃tɩnɩ ʋlfɛ khɛɛsʋ wer toore le jɛw. 45 Dɩ Amalɛkɩɩ mǝlsɔ na Kanãadaraakɛ hanɩ gɔ̃gʋɔnnɔ gbune a kʋʋr wɩ, a pɛ̃pɛrɛ̃ wɩ, a jalna dana Hɔrma.