Mʋɩjɩ thʋɔn kona yʋɔr yeɲɔ dɩ wɩ jal gɩɩl Kanãa dɩɩ
13
1 Thãgba Kɔ̃tɩn sor Mʋɩjɩra ayɩ: 2 "Thɔna kona wɩ gɩɩl Kanãa dɩɩkɛ mɩ n hanɩ Ɩjɩrayɛl bɩsana. Nɩ te Ɩjɩrayɛl bɩsanaa kɔ̃tɩ̃sɔ bɩɛlbɩɛl caara fɛw a thɔna. 3 Dɩ le Parã bǝ̃ kparara Mʋɩjɩ tire kona Ɩjɩrayɛl bɩsanaa kɔ̃tɩ̃sɔɔra a thɔ̃ wɩ mɔna Thãgba Kɔ̃tɩn sʋʋraanɩ. 4 Yɛkɛ awɩ isɔ: Jakuuri bikuun Samua, kɛ thɛnɩ Ribɛ̃ɛ cara, 5 na Horɩɩ bikuun Safatɩ, kɛ thɛnɩ Simeyɔ̃ɔ cara, 6 na Yefunee bikuun Kalɛbɩ, kɛ thɛnɩ Judaa cara, 7 na Jojɛfɩɩ bikuun Yɩgal, kɛ thɛnɩ Ɩsakaarɩɩ cara, 8 na Nunii bikuun Hose, kɛ thɛnɩ Efɩrayɩmɩ cara, 9 na Rafuu bikuun Paltɩ, kɛ thɛnɩ Bɛ̃jamɛ̃ɛ cara. 10 Na Sodɩɩ bikuun Gadɩɛl, kɛ thɛnɩ Jabʋlɔ̃ɔ cara, 11 na Susii bikuun Gadɩ, kɛ thɛnɩ Jojɛfɩɩ bikuun Manasee cara, 12 na Gemalɩɩ bikuun Amɩlɩɛl, kɛ thɛnɩ Dãa cara, 13 na Mɩkayɛlɩ bikuun Setuur, kɛ thɛnɩ Ajɛɛrɩɩ cara, 14 na Vɔfɩsɩɩ bikuun Nabɩ, kɛ thɛnɩ Nɛfɩtalɩɩ cara, 15 na Makɩɩ bikuun Gewɛl, kɛ thɛnɩ Gadɩɩ cara. 16 Wɛr dɔ tɩbɩlaakɛ Mʋɩjɩ thɔnɩ wɩ jala gɩɩlɛ Kanãa dɩɩ. Mʋɩjɩ har Nunii bikuun Oje ire Jojue. 17 Dɩ Mʋɩjɩ thɔ̃ wɛr wɩ jala gɩɩlɛ Kanãa dɩɩ. A so warɛ ayɩ: "Nɩ jalana Negɛvɩ bə̃ biluu, a jala jʋnɛ gɔ̃gʋɔna. 18 Na yɩrɛ mɔ̃ dɩɩra hanɩ. Nɩ hɩnɛ tɩbɩlaakɛ hanɩ le ado wɩ hananɛ fãga agɩbo ado wa hana fãga ga, ado wɩ jɔrɛ agɩbo wa jɔra'. 19 Nɩ hɩnɛ dɩɩra wɩ harɔnɩ dɩ ca dɔɔ a donɩ, ado dɩ bʋɔ gɩ agɩbo dɩ bʋɔ ga, a hɩnɛ mɔ̃ dɩɩsɔ hanɩ ado wɩ mɩrɛ gʋʋsɔ a kpalalɔ agɩbo ado wa mɩ gʋʋsɔ a kpalalɔa'. 20 Nɩ hɩnɛ mɔ̃ thɩɩ hanɩ ado gɩ bɔrɛ agɩbo ado ga bɔra', ado thɩra hale agɩbo ado thɩra na hala'. Na n do maar n fʋ na', nɩ khʋna dɩɩle thɩr bisɔ a ɛna. Caca dɩvɛ̃ thɩr bi (bɩ̃) bɔɔ kɔɔ gɩ. 21 Dɩ wɩ jʋʋnɛ a gɩɩl dɩɩra, a fʋ Sɩn bǝ̃ kparara a jal dã Rehɔbɩɩkɛ hanɩ Lebo-Hamatɩ dɩ lõ paar. 22 Wɩ jʋʋnɛ Negɛvɩ bǝǝnnǝ a jal dã Ebʋrɔ̃ dɩɩ, ka Anakɩɩ mǝlsɔ: Ahɩmã na Sesayɩ na Talmaɩ hanɩ. Wɩ kɔɔ mɩrɛ Ebʋrɔ̃ dɩɩ, dɩɩ cʋʋ yɛna makoɲɔ sɩ dɩ wɩ mɩ Sõa dɩɩkɛ hanɩ Ejipiti. 23 Dɩ mɔ̃ tɩbɩlaale danɩ Ɛsɩkɔl ɓɛlɛnɔ wɩ kure dɩvɛ̃ thɩr jɔ̃ɔkɛ hananɩ dɩvɛ̃ jaarɛ jɩrkpɩrɩ a pɛ gbʋʋlla dɩ tɩbɩla yeɲɔ gba. Wɩ khʋnɛ dakha gɩrenadɩ be na fɩgɩ be. 24 Dɩ wɩ n wer paarɩlera Ɛsɩkɔl ɓɛlɛ̃, kɩrʋ dʋɔn dɩvɛ̃ jaarɛ, dɩɩ the gɩrɛraakɛ Ɩjɩrayɛl bɩsana khʋnɩ liir dɩvɛ̃ jaarɛ.Gɩgɩla mɩɛnɛ gɩrɛ wɩ yɩnɩ Kanãa dɩɩra.
25 Dɩ mɔ̃ ga cʋʋnɩ wire kpalaɲɔ, tɩbɩlaakɛ wɩ thɔnɩ dɩ wɩ jal gɩɩl Kanãa dɩɩ kɛrɛ bir. 26 Dɩ wɩ jaal yɩ Mʋɩjɩ na Aarɔ̃ na Ɩjɩrayɛl bɩsana fɛw Kadɛsɩ dɩɩra Parã bǝ̃ kparara a mɩɛ wɩ gɩrɛ fɛw wɩ yɩnɩ, a nɩnana wɩ dɩɩle thɩr bisɔ. 27 Yɛkɛ gɩrɛ wɩ sonɩ Mʋɩjɩra: "Sɩ daan dɩɩraakɛra fɩ thɔ̃ sɩnɩ. Dɩɩ gɩɩkɛ naƴɩlɛ̃ na thʋʋr n celonɩ sobɔr, dɩrakɛ ɔɔ thɩr bisɔ ha gɩrɛ. 28 Sɩ tɩbɩlaakɛ hanɩ dɩɩraale wɩ hananɛ punone ka. Awɩ dɩsɔ dor dɩ kɔ̃tɩna kɛ wɩ mɩnɩ gʋʋsɔ a kpalalɔ. Sɩ yɩrɛ lerakɛ Anakɩɩ mǝlsɔ. 29 Amalɛkɩɩ mǝlsɔ tɔɔ Negɛvɩ bǝǝnnǝ, dɩ Hɛtɩɩ mǝlsɔ na Jebusidara na Amɔɔr məlsɔ ha gɔ̃gɔ̃ bǝǝnnǝ, dɩ Kanãadara too Medɩterane laɲɔ̃ nʋɔra na Jʋrdɛ̃ mɩɩr nʋɔra. 30 Dɩ Kalɛbɩ cʋʋrɛ wɩrɛ n khɔnanɩ Mʋɩjɩra dɩ wɩ pɩr nʋɔ sɩ dɩ so: "Sɩ jala, sa taarɛ dɩɩle! Sɩ hananɛ punone!" 31 Sɩ konaakɛ wɩ jalnanɩ kha a gɩɩl dɩɩ so: "Sa puno a na kena tɩbɩlaala' gɩdonɩ wɩ jɔ sɛr na fãga fĩi." 32 Agɩpɩ dɩ wɩ gba dɩɩle wɩ gɩɩlnɩɩ dapuu dɩ wa n mɩɛ Ɩjɩrayɛl bɩsana. Wɩ sor: "Dɩɩle sɩ kpaarnɩ hɩɩn, dor dɩɩkɛ n kʋrɛnɩ ɔɔ too. Dɩ wo tɩbɩlaakɛ sɩ yɩnɩ le, tɩɩ gbana wɛ garã garãa. 33 Sɩ yɩrɛ lerakɛ tɩɩ gbã khenaakɛ dɔnɩ Anakɩɩ mǝlsɔ, kɛ dɔnɩ tɩɩ gbã khena na sobɔr. Dɩ sɩ hɩɩnɛ asɩbara dɩɩ ho ɓãsʋlãsɔ sɩ ho war, dɩ thalera wɩ hɩɩn sɩrakɛ dɩ sɩ ha war.