Thãgba pɛ Mɩrɩyamɩna gbuul khoo
12
1 Mʋɩjɩ kɔɔ her Kusɩ khɛr. Dɩ Mɩrɩyam na Aarɔ̃ mar dɩ wa n koe ɩ gelela. 2 Wɩ sor wɔɔ: "Mʋɩjɩ dɩbara Thãgba Kɔ̃tɩn n gba dɩ mɩɩna ya? A n gba sɩ dakha dɩ mɩɩna gaa? Dɩ Thãgba Kɔ̃tɩn nɩɛrɛ gelela. 3 Sɩ Mʋɩjɩ dor tibilikɛ wuroni dɩbara a jɔ tɩbɩla fɛw thɩɩra. 4 Dɩ dapaara Thãgba Kɔ̃tɩn sor Mʋɩjɩra na Aarɔna na Mɩrɩyamɩna ayɩ: "Nɩ ɩna mɛr Thãgbaa cãa wa kɩrɔ nɛr yẽthera fɛw". Dɩ wɩ gba jal. 5 Dɩ Thãgba Kɔ̃tɩn gbune ndɔlɔ̃paara a jɩɩl Thãgba cãa wa lõfonʋɔra, sa we Aarɔ̃ na Mɩrɩyam. Dɩ wɩ tɔr dã wɛr yeɲɔra. 6 Dɩ Thãgba Kɔ̃tɩn so war: "Mɩ n bɩɛl nɛr, nɩ pɛ gɩrɛ ma so narnɩ nũu bɔɔbɔɔ. A ɩ̃ mɩmɩɩ ha anɩ thɩ̃thɩɩn, thɩ̃ yɩrra mɛr Thãgba Kɔ̃tɩn n nɩnaa ɩ̃bara, dǝǝlela mɩ n mɩɩnaa. 7 Sɩ ga ha mɛ̃ na ɩ̃ thɔ̃daar Mʋɩja'. A dor sobɔr cʋʋ tibil ɩ̃ cɔra fɛw. 8 Gbelẽ gbelẽ mɩ n mɩɩnaa thɩ̃ yɩrra, sɩ ga n do na sokpaa ga, a n yɩrɛ mɔ̃ mɛr Thãgba Kɔ̃tɩn hanɩ. Dɩ mɔ̃ nɩ fʋ sa 'la dɩ na n koe ɩ̃ thɔ̃daar Mʋɩjɩ"? 9 Dɩ nĩkhii fʋrɛ Thãgba Kɔ̃tɩn wɛra, dɩ jal sa faa wɩ. 10 Dɩ ɔbɔɔkɛ ndɔlɔ̃paarɩle ɩɩrnɩ Thãgba cãa waara na pɩ, dɩɩ do gbuul khoo fʋɔrɛ Mɩrɩyam. Pal bulonaakɛ hɔnɩ mɩlɛ tee er tomɩr fɛw. Dɩ Aarɔ̃ kɩɩl na hɩɩn dɩɩ do Mɩrɩyam gbuule. 11 Dɩ so Mʋɩjɩra: «Mɩ n bɩɛl fɛr ɩ̃ kɔ̃tɩ̃ ! Mɩ n bɩɛl fɛr, fa n pɛ sar sor sopuurǝǝkɛ sɩ cʋʋnɩ dǝ̃bǝǝlela ga. 12 Pha! Mɩ n bɩɛl fɛr ! Asɩ õkhɛr na n ho bi tiirnǝǝkɛ nɩrɛ kɔnɩ dɩ tomɩr na n kʋɛa'". 13 Dɩ Mʋɩjɩ hulene Thãgba Kɔ̃tɩnna a so: Mɩ n bɩɛl fɛr yaa Thãgba, kpɛɛnɛɛ! 14 Dɩ Thãgba Kɔ̃tɩn birse Mʋɩjɩ: "Ado ɔɔ thɩ kɔɔ phiǝ ɲɔ̃thɩɩn a pɩɛraa ƴɩɛra, ga kɔɔ dʋʋra yicuru na dana wire makoɲɔa ? Wɩ tie jɛw a the, khuirǝ gɩ dana wire makoɲɔ a gɩ karɔ a kɛr a lõ. 15 Dɩ wɩ tire Mɩrɩyam jɛw dɩ the a cʋʋ wire makoɲɔ khuirǝ. Dɩ Ɩjɩrayɛl bɩsana na jala', dɩɩ dana bɔɔkɛ a kɛrnɩ lõ jɛw. 16 A gele karɔ Ɩjɩrayɛl bɩsana ther Haserɔtɩ a jal jɛ Parã bǝ̃ kparara.