Thãgba Kɔ̃tɩnɩ dɔ hɩnɛ Ɩjɩrayɛl bɩsana jɛ pa bil bɩɛl
11
1 Wi bɩɛl Ɩjɩrayɛl bɩsana mar dɩ wa n khɔ̃ jɔɔ ka. Ɔbɔɔkɛ Thãgba Kɔ̃tɩn nɩɛnɩ gelela, nĩkhii fʋʋrɛ dɩ thɔna war dɔɔ dɩɩ hɩ̃ pa bɩɛl. 2 Dɩ Ɩjɩrayɛl bɩsana bɩɛl Mʋɩjɩ, dɩ Mʋɩjɩ ƴɛɛ Thãgba Kɔ̃tɩn dɩ dɔɔ khiir. 3 Dɩ wɩ dʋrɛ paarɩle ire Tabera kɩrʋ dʋɔn: "Dɔ hɩɩn" gɩdonɩ liir Thãgba Kɔ̃tɩn kɔɔ hɩ̃ awɩ jɛ pa pa bɩɛl na dɔɔ.Ɩjɩrayɛl bɩsana n waalɛ nʋ̃daara
4 Wi bɩɛl, nʋ̃ kho thue fʋrɛ ca kpɩɩsɔɔkɛ manɩ Ɩjɩrayɛl bɩsana; dɩ Ɩjɩrayɛl bɩsanaa thɛthɛrakɛ bire ma dɩ wa n waal dɩ wa n sona: "Amɛ na hana sɩ nʋ̃ʋ dɩ sa kho ya fɛ? 5 Pha! Sɩ jɩnanɛ thʋmaakɛ sɩ n kɔɔ khonɩ Ejipiti dɩɩra thaa pɔy na kɔ̃kɔ̃bʋrʋ na melɔ̃, na pʋaro na jamã na layɩ. 6 Sɩ nɛnɛ̃ sɩ 'leere gele fɛw dɩ sa n kpɛrɛ. Maanna dɔrɔm sɩ n yɩ bɔɔ fɛw.
7 Maan hor korɩ̃adɩrɩ thɩr be sa bulolo a ho bedelɩɔm thɩr khuul. 8 Ɩjɩrayɛl bɩsana n kpaarɛ a khɩɩ gɩ; agɩpɩ dɩ wɩ nã gɩ naanɔ, agɩbo dɩ wɩ thʋ gbõo a cɩɩ kpɛkpɛ cɩɩra, a cʋʋ gɩ gato. Maan daarɛ a ho gatookɛ wɩ cʋʋnanɩ niin. 9 Dabɔɔkɛ mɩ̃ɛ n jini jɛw dɩtɩnɔ dabɔɔlera maan n jɛ dakha.
10 Mʋɩjɩ nɩɛrɛ Ɩjɩrayɛl bɩsanaa khɩɩ, cɔkanasɔɔra, ntɛsɔ awɩ kẽkẽ wa lõfonɔra. Dɩ nĩkhii fʋrɛ Thãgba Kɔ̃tɩn dɩɩ kar dɩɩ puu Mʋɩjɩra. 11 Dɩ a sor Thãgba Kɔ̃tɩnna ayɩ : «Aɲera fɩ n cʋʋ mɛr afɩ thɔ̃daar puure thaa gɩ dɔ? Aɲe gɩ fa jɩ mɩ bʋɔra ga, sa pɛ mar ma n thɔa tibil wɩrɛ fɛw? 12 Mɛr kɔna tɩbɩla fɛʋʋkɛra ya? Mɛr kɔna wɩ dɩ fa so mar ɩ̃ pama wɩ mɔ̃kɛ khɛr n pamɩnɩ bi a jalana danana dɩɩraakɛ fɩ ʋlfɛnanɩ awɩ thɩ kɔ̃tɩ̃sɔ fɩ ha wɩ ya? 13 Kana ma yɩ nʋ̃ʋ a na ha tɩbɩla fɛʋʋkɛ n khɩa marnɩ dɩ wa n sona ɩ̃ ha wɩ nʋ̃ʋ wɩ kho? 14 Ma mar mɛr bɩɛl ma n hɩɩn tɩbɩlaakɛ fɛʋʋda ga, gɩ dʋbɩrɔrɛ jɔ mar. 15 Ado thale fa cʋʋ mɩ, mɩ n bɩɛl fɛr ka kɔ mɩ; ado fɩ jɩ mɛr bʋɔra fa n faa mɩ ma n yɩ ɩ̃ kharra'.
Tɩbɩlaakɛ n bulonɩ Mʋɩjɩ.
16 Dɩ Thãgba Kɔ̃tɩn so Mʋɩjɩra: «Kpa Ɩjɩrayɛl bɩsanaa kɔ̃tɩ̃sɔ kpalãther yʋɔr, wɩrɛraakɛ fɩ jɩnɩ dɩ wɛr dɔ kɔ̃tɩna sobɔr na thɔ̃thɔa a ɛna mɛr Thãgbaa cãa wa lõfonʋɔra nɩ jɩɩl kha le. 17 Ma gbune le a na mɩɩna fɩ. Ma tire thueekɛ mɩ ha fɩnɩ gbe a na pɛ war, gɩ do nɔɔ na n hɩ̃ɩ kha Ɩjɩrayɛl bɩsana thɩmɩɩ ga n do fɛr dɩbara n hɩnɛ ga. 18 Sɔ Ɩjɩrayɛl bɩsanana wer, ayɛ wɔɔ: «Nɩ phʋɔlɛ anɩbara cʋɔdaara. Na 'lɛr nʋ̃ʋ na kho gɩdonɩ nɩ n khɩɩrɛ mɛr Thãgba Kɔ̃tɩnna aa, amɛ na hana nɩ nʋ̃ʋ dɩ na kho ya ? Aa gɩ kɔɔ bɔ narɛ nɩ kɔɔ hanɩ Ejipiti. Mɛr Thãgba Kɔ̃tɩn na ha nɛr nʋ̃ʋ dɩ na kho. 19 Ga do wi bɩɛl dɩbara na kho, dɩ wire yeɲɔ gɩ, dɩ wire yemɔy gɩ dɩ wire yʋɔr gɩ, dɩ wire kpelẽ gɩraka'. 20 Sɩ sɩpo bilǝni na kho na cʋʋna ga n thenanɩ mɩ̃kana, gɩ hʋ̃ nɩ, gɩdonɩ nɩ beesire mɛr Thãgba Kɔ̃tɩnnɩkɛ hanɩ anɩ thɩ̃thɩɩn dɩ na n khɩɩ mar aa aɲeraakɛ nɩ the Ejipiti dɩɩra ya"?» 21 Dɩ Mʋɩjɩ so: «Tɩbɩlaakɛ diə marnɩ wɩ har kona gbɩlanɩ der paar taamaadõ (600.000) kɛ na punonenɩ na ke kʋʋr, sɩ dɩ fɩ yɩ fa ha wɛr nʋ̃ʋ wɩ kho wɩ cʋʋna sɩpo bilǝnii! 22 A sɩ kʋʋrakɛ asɩ banasɔ fɛw na bɔ na na sɩ ga dã wa'. Dɩ a sɩ fʋlɛlakɛ thʋma fɛw laɲʋɔnɔ sɩ ga dã wa'». 23 Dɩ Thãgba Kɔ̃tɩn birse Mʋɩjɩ: «Mɛr Thãgba Kɔ̃tɩnɩ puno na dã gaa ya? Nɛnɛ̃ fa yɩ gɛr ado gɩrɛ mɩ so farnɩ na cʋʋrɛ agɩbo ga cʋa'».
Thãgba pɛr ɔɔ thu Ɩjɩrayɛl bɩsanaa kɔ̃tɩ̃sɔ kpalãther yʋɔra.
24 Dɩ Mʋɩjɩ ther Thãgba cãa waw a mɩɛ Ɩjɩrayɛl bɩsana Thãgba Kɔ̃tɩnɩ thɩmɩɩsɔɔle. Agɩpɩ a kpar Ɩjɩrayɛl bɩsanaa kɔ̃tɩ̃sɔ kpalãther yʋɔra a cʋʋ wɩ dɩ wɩ jɛ a dii Thãgba cãa waara. 25 Dɩ Thãgba Kɔ̃tɩn gbune ndɔlɔ̃paara a mɩɩna Mʋɩjɩ. Dɩ a tire Mʋɩjɩra thueekɛ haaraanɩ gbe a pɛ kɔ̃tɩna kpalãther yʋɔraale. Dɩ dabɔɔkɛ thueele lõ warnɩ pɩ, wɩ mar dɩ wa n bobon thɩmɩa. Sɩ babɩɛlɩlera dɩbara thɩ̃ɛɛle cʋʋ.
26 Kona yeɲɔ hale wɩ n wenɩ Ɛldadɩ na Medadɩ kɔ̃tɩna kpalãther yʋɔraale, wa kɔɔ jal le Thãgba cãa waʋa', wɛr wɩ kɔɔ toore le jɛw. Thãgbaa thu lõ warɛ dakha dɩ wɩ mar dɩ wa n mɩɩ bobon thɩmɩa. 27 Dɩ daɓolbir bɩɛl ca jal a so Mʋɩjɩra aa Ɛldadɩ na Medadɩ hale jɛw dɩ wa n mɩɩ bobon thɩmɩa. 28 Dɩ Nunii bikuun Jojueekɛ dɔnɩ Mʋɩjɩ khukhu a fʋna ɔɔ daɓolbir bɔɔ, so: «Ɩ̃ kɔ̃tɩ̃ Mʋɩjɩ, pɩɛrɛ wɩ»! 29 Dɩ Mʋɩjɩ birsee: «Gbugi fɩ n gbana mɩ ya? A Thãgba Kɔ̃tɩn pɛrakɛ ɔɔ thu ɔɔ toora fɛw wɩ dɔ ɔɔ mɩmɩɩsɔ, aɲe hãale?» 30 Agɩpɩ Mʋɩjɩ na Ɩjɩrayɛl bɩsanaa kɔ̃tɩ̃sɔɔle kɛrɛ bir jɛw.
Thãgba ha Ɩjɩrayɛl bɩsana kpɩkpɛ nʋʋn.
31 Dɩ Thãgba Kɔ̃tɩn cʋʋrɛ jɩɛ dɩɩ the laɲʋɔnɔ a kpa kpɩkpɛ a ɩna mala jɛw. Wɩ malalɛ jɛ khuirəsɔ a jal dã ka tibil na ɩɩrnɩ wi bɩɛl a na khu; sa dɛ̃dɛɛ kha thɩɩra a jʋʋn dã mɛtɛrɛ bɩɛl. 32 Dɩ Ɩjɩrayɛl bɩsana ɩɩrɛ a khɩɩ 'lominǝǝle owiile fɛw na ɔɔ dɩtɩnɔ fɛw na ga dɩwɩlɔ fɛw dakha. Ʋrɛɛkɛ na khɩanɩnakɛ jɔa' sɩ a n khɩɩrɛ dɩ hi kpona kpalaɲɔ yʋɔrsɔ. Dɩ wɩ lɩɩrɛ a dii jɛw gɩ khɩ. 33 Mɔ̃ wɩ hanɩ nʋ̃ khoraale wa khorakɛ pa', nĩkhii fʋrɛ Thãgba Kɔ̃tɩn wɛra, dɩ gba kho mananɛ a pɛ war. 34 Dɩ wɩ dʋrɛ paarɩle ire Kɩbʋrɔtɩ-Taava kɩrʋ dʋɔn «wɩrɛ nʋ̃ kho thui fʋnɩɩ kasɔ» gɩdonɩ liir wɩ dʋ Ɩjɩrayɛl bɩsanaakɛ nʋ̃ kho thue fʋnɩ dɩɩ kar.
35 Dɩ Ɩjɩrayɛl bɩsana ther Kɩbʋrɔtɩ-Taava a jal jɛ Haserɔtɩ.