Mʋɩjɩ cʋʋrɛ dɛ bulo tutuu yeɲɔ.
10
1 Thãgba Kɔ̃tɩn sor Mʋɩjɩra ayɩ: 2 Pɩɛr wɩ be dɛ bulo tutuu yeɲɔ, gɩ do gɩrɛ wa n wenanɩ Ɩjɩrayɛl bɩsana wa n der, na gɩrɛ wa n ɩɩrna wɩnɩ jɛw. 3 Ɔbɔɔkɛ wa kperenɩ tutuu yeɲɔɔle a na ʋ̃, Ɩjɩrayɛl bɩsana fɛw n kpa dera afɩ kɩrɔ Thãgba cãa wa lõfonʋɔra. 4 Sɩ a wɩ ʋ̃ tutuu bɩɛl dɩbara, wɩrɛ dɔnɩ Ɩjɩrayɛl bɩsanaa kɔ̃tɩ̃sɔ na Ɩjɩrayɛl sɔrasɩ kɔ̃tɩna wɛr na kpa na der afɩ kɩrɔ. 5 Dɩ ɔbɔɔkɛ na ʋnɩ tutuu khãkhãkhã, ca wɩrɛ jɛnɩ wi phã paar n ɩɩrɛ na jala. 6 Dɩ a nɩ bir ʋ̃ ɔmɛna balaɲɔdaa wɩrɛ jɛnɩ ka wire na n jalnɩ dɩ pɛ ɲɔ̃bɩlã n ɩɩrɛ na kpaan. Tutuu wa ʋ̃ khãkhãkhã ga n ha wɩ hʋɛ wa n ɩɩr wa n jal. 7 Sɩ ado na ƴaal nɩ kpa tɩbɩla nɩ der nɩ ʋna tutuu, sɩ na n ʋ̃ gɩ khɩɩra'. 8 Bonɩ jidaraakɛ dɔnɩ Aarɔ̃ɔ mǝlsɔ dɩbara na n ʋna tutuu. Jɔfʋ gɩ khorr nɛrɛra na anɩ mǝlsɔraakɛ na kpaanɛnɩ. 9 Dɩ ɔbɔɔkɛ na hanɩ anɩ dʋɔ, a nɩ jal kʋʋra a na kena anɩ lãlaardara, nɩ ʋna tutuusɔ khãkhãkhã, dɩ mɛr Thãgba Kɔ̃tɩn anɩ Thãgba na jɩna nɛr, a na taa nɩ anɩ lãlaardarara. 10 Anɩ kãka wisɔɔra na anɩ fɛtɩ kpa jɛsɔɔra na anɩ sɩpo pha ɓolsɔɔra, nɩ ʋna tutuusɔ a na jenǝ anɩ bonɩ thiinǝsɔ na anɩ 'likha bonɩsɔ, ga cʋʋrɛ dɩ mɛr anɩ Thãgba na jɩna nɩ. Mɛr dʋɔn Thãgba Kɔ̃tɩn anɩ Thãgba.Ɩjɩrayɛl bɩsana ɩɩrɛ Sɩnayɩ bǝ̃ kparara
11 Ɔbɔɔkɛ Ɩjɩrayɛl bɩsana thenɩ Ejipiti, balaɲɔ yɩɛrɩ balaɲɔ sɩporɩ wire kpelena ndɔlɔ̃paar ɩɩrɛ Thãgbaa kẽkẽ waraakɛ hananɩ nɔ bɩɛl ʋlfɛ thɩmɩɩr da n jal. 12 Dɩ Ɩjɩrayɛl bɩsana ɩɩrɛ Sɩnayɩ bǝ̃ kparara a gba hʋɛ mɔna wɩ yɩnɩ wa n jala. Dɩ ndɔlɔ̃paarɩle jɩɩlɛ Parã bǝ̃ kparara. 13 Gɛr dʋɔn caca ber wɩ benɩ jɛw mɔna Thãgba Kɔ̃tɩn sonɩ Mʋɩjɩra dɩ so war. 14 Judaa məlsɔɔ gbulõ dɔ cacadaraakɛ bɛnɩ awɩ jɛw na awɩ koke dɩrapo dɩ wa n jal na awɩ sɔrasɩ gbulõsɔ. Judaa məlsɔɔ sɔrasɩ gbulonǝ, Amɩnadabɩɩ bikuun Nasɔ̃ dʋɔn awɩ ƴɛkʋʋlda, 15 dɩ Suaarɩɩ bikuun Netaneɛl do Ɩsakaarɩ mǝlsɔɔ sɔrasɩsɔɔ ƴɛkʋʋlda, 16 dɩ Helɔ̃ɔ bikuun Elɩabɩ do Jabʋlɔ̃ɔ mǝlsɔɔ sɔrasɩsɔɔ ƴɛkʋʋlda.
17 Dɩ wɩ wɩɛrɛ Thãgbaa kẽkẽ wa, dɩ Gɛɛrsɔ̃ɔ mǝlsɔ na Merarɩɩ mǝlsɔ gba dɩ wa n kpaana.
18 Agɩpɩ dɩ Ribɛ̃ɛ məlsɔ gbulõ na n kpaan dɩ awɩ koke dɩrapo kʋʋl wɩ yɩɛ dɩ wa n jal na awɩ sɔrasɩ gbulõsɔ. Ribɛ̃ɛ məlsɔɔ sɔrasɩ gbulonǝ, Sedewuuri bikuun Elisuur dʋɔn awɩ ƴɛkʋʋlda, 19 dɩ Surisadayɩɩ bikuun Selumɩɛl do Simeyɔ̃ɔ mǝlsɔɔ sɔrasɩsɔɔ ƴɛkʋʋlda, 20 dɩ Dewɛlɩ bikuun Elɩasafɩ do Gadɩɩ mǝlsɔɔ sɔrasɩsɔɔ ƴɛkʋʋlda.
21 Agɩpɩ dɩ Kehatɩɩ mǝlsɔɔkɛ n gbaanɩ thɩ̃ sãsɩnanɛsɔ na n kpaan. Dɩ wɩ dʋrɛ Thãgbaa kẽkẽ wa dɩ wa n pɩɛrna wɩ. 22 Agɩpɩ Efɩrayɩmɩ məlsɔɔ gbulõ na n kpaan dɩ awɩ koke dɩrapo kʋʋl wɩ ƴɩɛ dɩ wa n jal na awɩ sɔrasɩ gbulõsɔ. Efɩrayɩmɩ məlsɔɔ gbulonǝ, Amɩhudii bikuun Elɩsama dʋɔn awɩ sɔrasɩsɔɔ ƴɛkʋʋlda, 23 dɩ Pedasuuri bikuun Gamɩlɩɛl do Manasee mǝlsɔɔ sɔrasɩsɔɔ ƴɛkʋʋlda, 24 dɩ Gɩdeonɩɩ bikuun Abɩdã do Bɛ̃jamɛ̃ɛ mǝlsɔɔ sɔrasɩsɔɔ ƴɛkʋʋlda.
25 Pɩpɩɩ paar, Dãa məlsɔɔ gbulõokɛ dɔnɩ sɔrasɛɛkɛ n hanɩ khiro na n kpaan, dɩ awɩ koke dɩrapo kʋʋl wɩ ƴɩɛ dɩ wa n jal na awɩ sɔrasɩ gbulõsɔ. Dãa məlsɔɔ sɔrasɩ gbulonǝ, Amɩsadayɩ bikuun Ahiejɛɛr dʋɔn awɩ ƴɛkʋʋlda, 26 dɩ Okɩrãa bikuun Pagɩɛl do Ajɛɛrɩ mǝlsɔɔ sɔrasɩsɔɔ ƴɛkʋʋlda, 27 dɩ Einãa bikuun Ahɩra do Nɛfɩtalɩɩ mǝlsɔɔ sɔrasɩsɔɔ ƴɛkʋʋlda. 28 Thale Ɩjɩrayɛl bɩsana n kɔɔ gba hʋɛ kpakha kpakha ɔbɔɔkɛ wɩ n benɩ dɩ wa n jal, sɔrasɩ gbulonǝ gbulonǝ.
29 Mʋɩjɩ sor ɔɔ thɛɛ Hobabɩraakɛ dɔnɩ Madɩ̃adaar, a dona Rewɛlɩ bikuun, ayɩ: «Sɩ n jaal dɩɩraakɛ Thãgba Kɔ̃tɩn yɩnɩ ɩna ha sɛr. Ɩna sɩ jal kha, fɩ 'lɛ bɔnanɛɛkɛ Thãgba Kɔ̃tɩn yɩnɩ ɩna ha sɛr .» 30 Dɩ Hobabɩ birsee: «Ma jal la', ma kɛrɛ na bir ɩ̃ dʋɔ, ɩ̃ toora. 31 Dɩ Mʋɩjɩ sʋʋraa: «Mɩ n bɩɛl fɛr, fa n kɛr bir sa faa sa', gɩdonɩ fɩ jɩrɛ paarsɔɔkɛ sa punonɩ na jɛ bǝ̃ kparara. Dɔ asɩ hʋ nɩrɔdaar. 32 A sɩ jal kha, sa cʋʋ fɛr dɩ fa 'lɛ bɔnanɛɛkɛ Thãgba Kɔ̃tɩn na ha sɩnɩ»
33 Dɩ Ɩjɩrayɛl bɩsana ther Thãgba Kɔ̃tɩnɩ gɔ̃gɔna a gba hʋɛ a ɩɩr cʋʋna wire yẽther. Wire yẽtheraale Thãgba Kɔ̃tɩnɩ ʋlfɛ khɛɛsʋ n kʋlɛna wɩ ƴɩɛ, dɩ ƴaal ka dɔnɩ jɛ pa bʋɔ dɩ ha wɩ. 34 Ɔbɔɔkɛ wɩ n benɩ jɛw dɩwɩlʋla dɩ wa n jal, Thãgba Kɔ̃tɩnɩ ndɔlɔ̃pa n har thãgbara ƴũu awɩ yʋɔ.