Bɔɔraakɛ Pakɩ fɛtɩ teenanɩ gɩ cʋɛ
9
1 Ɔbɔɔkɛ Ɩjɩrayɛl bɩsana thenɩ Ejipiti dɩɩra ɔɔ balaɲɔ yɛɛ caca sɩporra, Thãgba Kɔ̃tɩn mɩɩnanɛ Mʋɩjɩ Sɩnayɩ bǝ̃ kparara a sʋʋraa: 2 «Ɩjɩrayɛl bɩsana na n cʋɛ Pakɩ fɛtɩ ɔɔ bɔraakɛra mɩ pɛnɩ. 3 Na n cʋɛ Pakɩ fɛtɩra ɔɔ bɔɔkɛra mɩ pɛnɩ, sɩporɩkɛɛ wire yʋɔr yenãa wirǝ, dʋɔr birǝ bɔɔ. Na n cʋɛ gɩ mɔna ɔɔ cʋʋ ƴɛ na ɔɔ jɔfʋ hanɩ.»4 Mʋɩjɩ so Ɩjɩrayɛl bɩsanana wɩ cʋɛ Pakɩ fɛtɩ. 5 Dɩ Ɩjɩrayɛl bɩsana cʋʋrɛ Pakɩ fɛtɩ Sɩnayɩ bǝ̃ kparara caca sɩporɩɩ wire yʋɔr yenãa wirǝ dʋɔr birǝ bɔɔ. Wɩ cʋʋrɛ gɩrɛ fɛʋʋkɛra Thãgba Kɔ̃tɩn kɔɔ sonɩ Mʋɩjɩra. 6 Sɩ kona ɩkha hale biseneni jɔfʋ hʋɛra dɩɩ do mɔ̃ wɩ thanɩ khirera dɔ nɔɔ, dɩ ga do wa punone na cʋʋ Pakɩ fɛtɩ owiila'. Dɩ wɩ gbaar jal ga wiilera Mʋɩjɩ na Aarɔna, 7 a so war: Sɩ thar khirera wer a bise jɔfʋ hʋɛra, sɩ aɲeraakɛ ga pɩɛr sɩ khaarda 'laarɛra Thãgba Kɔ̃tɩnna Ɩjɩrayɛl bɩsã welee kha wireraakɛra a pɛrnɩ ?» 8 Dɩ Mʋɩjɩ so war: «Nɩ jɩlɛ ɩ̃ bule Thãgba Kɔ̃tɩn ɩ̃ jɩ gɩrɛ a na sonɩ anɩdara.» 9 Dɩ Thãgba Kɔ̃tɩn sor Mʋɩjɩra ayɩ : 10 «Sɔ Ɩjɩrayɛl bɩsanana wɔɔ: Ado tibil anɩ thɩ̃thɩɩn agɩbo anɩ mǝlsɔraakɛ na kpaanɛnɩ lɩ, a bise jɔfʋ hʋɛra dɩɩ do khirera a thanɩ dɔ nɔɔ agɩbo a kpaar paar a ha ƴɔɔ fĩi Pakɩ fɛtɩ cʋʋ bɔɔ, ntɛ punone cʋʋ Pakɩ fɛtɩ a dʋbɩna mɛr Thãgba Kɔ̃tɩn. 11 Balaɲɔ sɩporɩɩ wire yʋɔr yenãa wirǝ dʋɔr birǝ bɔɔ wa cʋʋ gɩ. Wɩ khɔ bonɩ ji bana ɓollʋ na buruukɛ wa pɛnɩ tabɩɩra' na faakɛ kharanɩ. 12 Wa n kho sa sɩ dɩkha gɩ dã duuroǝ', dɩ wa n cɔ khubi bɩɛllaka'. Wɩ cʋɛ Pakɩ mɔ̃kɛra ɔɔ jɔfʋ fɛw sonɩ. 13 Ado tibil hale dɩ ga do a bisere jɔfʋ hʋɛra ga, dɩ ga do a kpaara', sa bo Pakɩ cʋʋrɛ, wɩ hɛlla ntɛɛle ɔɔ toora a faga. Ntɛɛlee sopuu ɔɔ yʋɔra gɩ ha gɩdonɩ aa 'laa khaardaa mɛr Thãgba Kɔ̃tɩnna bɔɔraakɛ wɩ pɛna'. 14 Ado kpakpalɩkɛ hanɩ anɩ thɩ̃thɩɩn ƴaal a cʋʋ Thãgba Kɔ̃tɩnɩ Pakɩra, a cʋɛ gɩ mɔ̃kɛra ɔɔ cʋʋ ƴɛ na ɔɔ jɔfʋ hanɩ. Jɔfʋ bɩɛlɩlera gɩ tɩbɩla fɛʋra: Ɩjɩrayɛl bɩsanana na kpakpalala.
ƖJƖRAYƐL BƖSANAA KPAAR SƖNAƖ BƎ̃ KPARARA
Ndɔlɔ̃paakɛ n theni Thãgbaa kẽkẽ wara
15 Ga wiikɛ wɩ dʋnɩ Thãgbaa kẽkẽ waakɛ hananɩ nɔ bɩɛl ʋlfɛ thɩmɩɩ, ndɔlɔ̃paar thiirǝǝre. Dʋɔrɔ a n har Thãgbaa kẽkẽ wara yũu dɩ do dɔɔ dɩ dana duuro. 16 Dɩ a fʋna ga bɔɔle thalera gɩ n ha dɩwɩlʋ koo; dɩwɩlɔ a n dor ndɔlɔ̃paar dɩtɩnɔ dɩ do dɔɔ. 17 Bɔɔ wo bɔɔkɛ ndɔlɔ̃paarɩle n ɩɩrnɩ kẽkẽ waara ƴũu, Ɩjɩrayɛl bɩsana n ɩɩrɛ dakha; dɩ bɔɔ wo bɔɔkɛ ndɔlɔ̃paarɩle n jɩɩlnɩ Ɩjɩrayɛl bɩsana n jɩɩlɛ dakha dapaakɛ a jɩɩlnɩ. 18 A Thãgba Kɔ̃tɩn yɩ wɩ ɩɩrɛ, Ɩjɩrayɛl bɩsana n ɩɩrɛ, dɩ wɩ jɛ dabɔɔkɛ Thãgba Kɔ̃tɩn yɩnɩ wɩ jɛ. A ndɔlɔ̃paarɩle hanɩ Thãgbaa kẽkẽ wara ƴũu na pʋɔr, ɔmɛ̃ wɩ n pʋɔr dakha. 19 A ndɔlɔ̃paarɩle pʋɔr mɔnakɛ kẽkẽ waara ƴũu, Ɩjɩrayɛl bɩsana n nɩrɛ Thãgba Kɔ̃tɩnɩ jɔfʋ nũu, wa n ɩɩra'. 20 A wire gbe dɩbara a jɩɩl kẽkẽ waara ƴũu, wɩ n jɩɩlɛ mɔna Thãgba Kɔ̃tɩn sonɩ, dɩ wɩ jal mɔna Thãgba Kɔ̃tɩn sonɩ. 21 A dɩtɩnɔ fɛw ndɔlɔ̃paar jɩɩl sa ɩɩr duuro, Ɩjɩrayɛl bɩsana n jaal. A dɩwɩl bɩɛl na dɩtɩ̃ bɩɛl ndɔlɔ̃paar cʋʋ sa ɩɩr Ɩjɩrayɛl bɩsana n jaal. 22 A wire yeɲɔ ndɔlɔ̃paar jɩɩl a cʋʋ kẽkẽ waara ƴũu, a sɩpo bɩɛl gɩ, a yɛ bɩɛl gɩrakɛ sɩ Ɩjɩrayɛl bɩsana n jɛr, wa n jala'; Ɔbɔɔkɛ ndɔlɔ̃paarɩle ɩɩrnɩ gɛrra wɩ n jal. 23 Wɩ n jɛr a Thãgba Kɔ̃tɩn yɩ wɩ jɛ, dɩ wɩ jal a Thãgba Kɔ̃tɩn yɩ wɩ jala. Wɩ n nɩrɛ Thãgba Kɔ̃tɩnɩ jɔfʋ nũu, dɩ wa n cʋʋ mɔna Thãgba Kɔ̃tɩn n kɔɔ sonɩ Mʋɩjɩra.