Mɔ̃ wa dɛɛnɩ dɔ carãsɔ dɔ carã dɛ̃ɛ paara
8
1 Thãgba Kɔ̃tɩn sor Mʋɩjɩra ayɩ: 2 «Sɔ Aarɔna ayɛ : ɔbɔɔkɛ a na n dɛɛnɩ dɔ carãa makoɲɔɔle dɔ carã dɛ̃ɛ paara, a dɛɛnɛ gɩ ga n carã ka dɔ carã dɛ̃ɛ paar pɛnɩ ƴɩɛ.» 3 Dɩ Aarɔ̃ cʋʋrɛ ɔmɛna. Dɩ a dɛɛnɛ dɔ carãsɔɔra dɔ carã dɛ̃ɛ paara ka dɔ carã dɛ̃ɛ paar pɛnɩ ƴɩɛ mɔna Thãgba Kɔ̃tɩn kɔɔ sonɩ Mʋɩjɩra. 4 Dɔ carã dɛ̃ɛ paarɩlera dɛ haar wɩ be, a fʋ nɔɔra a dana thɩ̃ɛsɔɔkɛ hɔnɩ phɩ̃ɩ. Wɩ cʋʋrɛ dɔ carã dɛ̃ɛ paara cʋʋ ƴɛ ʋrɛɛkɛra Thãgba Kɔ̃tɩn kɔɔ nɩnɩ Mʋɩjɩra.Wɩ pɛr Levɩɩ mǝlsɔ Thãgba ƴɔɔ
5 Thãgba Kɔ̃tɩn sor Mʋɩjɩra ayɩ: 6 «Lea Levɩɩ mǝlsɔ kpɩɩ Ɩjɩrayɛl bɩsanana a phʋɔlɛ wɩ. 7 Yɛkɛ mɔ̃ fa phʋɔl wɩnɩ: Jɛba war phɔphʋɔl ɲʋɔn a hɛlla awɩ sopuu agɩpɩ wɩ bel suune fɛw tomɩra wɩ cɔcɔɔna awɩ kẽkẽsɔ; dɩ mɛ̃ wa phu. 8 Agɩpɩ wɩ fɔ nake ɓollʋ a gbana mɩ̃ phuukɛ wɩ gbʋrnanɩ niin, kɛ dɔnɩ gɩrɛ wa gbɛbɩnanɩ bonɩɛɛle a na ji, sɩ fɛrɛ fɩ fʋ nake ɓol kpɩɩ kɛ na dɔnɩ so hɛl bonɩdaa. 9 Agɩpɩ kpa Levɩɩ mǝlsɔɔra a danana Thãgba cãa wa ƴɛbʋrɔ sa wɛ Ɩjɩrayɛl bɩsana fɛw wɩ pɔ, 10 fɩ kpa Levɩɩ mǝlsɔ fɩ dana mɛr Thãgba Kɔ̃tɩnɩ ƴɛbʋrɔ Ɩjɩrayɛl bɩsana fɛw n dɛ̃ɛ war ɲɛ̃ɛ. 11 Dɩ Aarɔ̃ na gba wɛr Ɩjɩrayɛl bɩsanaa irə na pɛ mɛr Thãgba Kɔ̃tɩnɩ ƴɔɔ, wɩ ho bonɩɛɛkɛ wɩ n jɛnanɩ, wa n cʋʋ mɛr Thãgba Kɔ̃tɩnɩ thɔ̃. 12 Agɩpɩ Levɩɩ mǝlsɔ n dɛɛnɛ awɩ ɲɛ̃ nakenaalee yʋɔ, sɩ fɩ kʋ bɩɛl a do sopuu hɛl bonɩdaa, fɩ kʋ ole a do bonɩ thiinǝdaa, mɛr Thãgba Kɔ̃tɩnna dɩ mɛ̃ a na phʋɔl Levɩɩ mǝlsɔ. 13 Agɩpɩ cʋɛ Levɩɩ mǝlsɔ wɩ jɩɩl Aarɔ̃ na ɔɔ bikũusɔɔ ƴɛra sɩ fɩ gba wɩ fɩ pɛ mɛr Thãgba Kɔ̃tɩnɩ ƴɔɔ, wɩ ho bonɩɛɛkɛ wɩ n jɛnanɩ. 14 Thale fa lee Levɩɩ mǝlsɔ Ɩjɩrayɛl bɩsanana kpɩɩ wɩ do mɛr Thãgba Kɔ̃tɩnɩda. 15 A gele pɩ dɩphã Levɩɩ mǝlsɔ punone a fʋ thɔma Thãgba cãa waw. Thale fa phʋɔl wɩ, fɩ gbana wɩ fɩ pɛ mɛr Thãgbaa ƴɔɔ, 16 gɩdonɩ wɩ gba wɛr khorr Ɩjɩrayɛl bɩsanana a ha mɩ. Dɩ wɛr mɩ gba dɩ wɩ debɩ Ɩjɩrayɛl bɩsanaa caca bisɔ fɛw, 17 gɩdonɩ ɩ̃da Ɩjɩrayɛl bɩsanaa caca be fɛw do; tɩbɩlaa caca bisɔ na nʋmaa caca bisɔ. Dawiikɛ mɩ kʋʋrnɩ caca be fɛw Ejipiti dɩɩra, ga wi mɩ lee wɩ kpɩɩ dɩ wɩ do ɩ̃da. 18 Dɩ mɩ gbaar Levɩɩ mǝlsɔ dɩɩ do wɛr deba Ɩjɩrayɛl bɩsanaa caca bisɔ fɛw. 19 Mɩ gba wɛr a ha Aarɔ̃ na ɔɔ bikũusɔ wa n cʋʋ Ɩjɩrayɛl bɩsanaa thɔ̃ Thãgbaa cãa waw, wa n cʋʋna phɔphʋɔl thɔma Ɩjɩrayɛl bɩsanana gɩ do nɔɔ Ɩjɩrayɛl bɩsana na n wɔrɔ̃ pa phuu ɩ̃ pɛ war thɩlke bɩɛllaka'.
20 Dɩ Mʋɩjɩ na Aarɔ̃ na Ɩjɩrayɛl bɩsana fɛw cʋʋrɛ Levɩɩ mǝlsɔɔra gɩrɛ fɛʋʋkɛra Thãgba Kɔ̃tɩn kɔɔ sonɩ Mʋɩjɩra awɩdara. 21 Dɩ Levɩɩ mǝlsɔ phʋɔlɛ awɩbara a cɔcɔɔna awɩ kẽkẽsɔ, agɩpɩ Aarɔ̃ gba wɛr a pɛ Thãgba Kɔ̃tɩnɩ ƴɔɔ, a cʋʋ war so hɛl thɔma a phʋɔl wɩ. 22 A gele pɩ Levɩɩ mǝlsɔ fʋrɛ thɔma Thãgba cãa waw dɩ Aarɔ̃ na ɔɔ bikũusɔ na n hɩɩn wɩ mɔna Thãgba Kɔ̃tɩn kɔɔ sonɩ Mʋɩjɩra awɩdara.
Yɛ nʋɔɔkɛ Levɩɩ mǝlsɔ na hananɩ sɩ na lõ thɔmana
23 Thãgba Kɔ̃tɩn bire so Mʋɩjɩra wo ayɩ: 24 «Yɛkɛ gɩrɛ telenenɩ Levɩɩ mǝlsɔ. Levɩɩ mǝl wo Levɩɩ mǝlɩkɛ hananɩ yɛna kpelẽ yemɔy a jʋʋna n fɔ thɔma ga bɔɔle Thãgba cãa waw a na dɔ. 25 Sɩ ɔɔ yɛna kpalaɲɔ yʋɔra a na khure ɔɔ thɔ̃ a na do thɔma bã. 26 A na n bulle ɔɔ omɩsɔ wa n hɩɩn gɩrɛ wɩ pɛ warnɩ wa n hɩnɛ le Thãgba cãa waw, sɩ a na do thɔma wer bã. Gɛr dɔ gɩrɛ fa cʋʋnɩ Levɩɩ mǝlsɔɔra thɔmanaakɛra wɩ pɛ warnɩ.