Tibilikɛ gbaanɩ ɔɔbara a ha Thãgba Kɔ̃tɩn
6
1 Thãgba Kɔ̃tɩn sor Mʋɩjɩra ayɩ: 2 Mɩana Ɩjɩrayɛl bɩsana a sɔ war wɔɔ: Ɔbɔɔkɛ kuun agɩbo khɛr sonɩ nʋɔ a gba ɔɔbara koo a ha Thãgba Kɔ̃tɩn, 3 a na n ɲɔ dɩvɛ̃ ga, a na n ɲɔ ta khaa ga. A na n ɲɔ thɩ̃ ƴʋ̃ɔɔkɛ wɩ cʋʋnanɩ dɩvɛ̃ dɩ thɩ̃ ƴʋ̃ɔɔkɛ wɩ cʋʋnanɩ ta khaa ga. A na n ɲɔ dɩvɛ̃ thɩr bi ɲʋɔn ga, a na n kho dɩvɛ̃ thɩr bi hunǝ dɩ dakhɩna ga. 4 Bɔɔraale fɛw a gbanɩ ɔɔbara a ha Thãgba, a na n kho thɩ̃ɛɛkɛ thɛnɩ dɩvɛ̃ thɩrʋra, dɩ dɩvɛ̃ thɩr bire gɩ, dɩ dɩvɛ̃ thɩr bi khʋrɛra ga. 5 Bɔɔraale fɛw a gbanɩ ɔɔbara a ha Thãgba Kɔ̃tɩn, bakaa na n kaa yʋɔ gɩ dana ɔbɔɔkɛ bɔ dɔɔra a cana'. Tɩɩ phuub a na do; a sɛrɔ ɔɔ yʋsuun thale. 6 Bɔɔraale fɛw a gbanɩ ɔɔbara a ha Thãgba Kɔ̃tɩn, a na n tha khirera ga. 7 A ɔɔ thɩ khe, a ɔɔ nɩ gɩ, a ɔɔ õkuun gɩ, a ɔɔ õkhɛr gɩ, a na n tha khirera a la', gɩdonɩ a hananɛ jɩɩn ɔɔ yʋɔ kɛ n nɛnanɩ a gbaar ɔɔbara a ha mɛr ɔɔ Thãgba. 8 Bɔɔraale fɛw a gbanɩ ɔɔbara a ha mɛr Thãgba, tɩɩ phuu a na do mɛr Thãgba Kɔ̃tɩnna.9 A tibil phuroro a khi ɔɔ kɩrɔ, dɩ tha khirera a lɩ, dɩ ɔɔ yʋsũule kʋɛ, a bela yʋʋ ɔɔ phʋɔl wi, wire makoɲɔ wirera. 10 Wire makõther wirera a jalana puusɛna yeɲɔ agɩbo kulãpubǝ yeɲɔ bonɩ jidaara Thãgba cãa wa lõfonʋɔra. 11 Bonɩ jidaar n gba bɩɛl a jinǝ so hɛl bonɩɛ, sɩ a gba bɩɛl a jinǝ bonɩ thiinǝ. Dɩ a na phʋɔlʋʋlɛ dɩpaakɛra a cʋʋnɩ dɩɩ the khireraakɛ a thanɩ, sɩ a bir a gba ɔɔbara wo ga wiile a ha mɛr Thãgba. 12 Gba phaa a na bir na gba ɔɔbara a na ha mɛr Thãgba Kɔ̃tɩn, sɩ a jenǝ yɛ bɩɛl bana ɓollʋ so gbɛbɩ bonɩɛ. Caca wiresɔɔle a kɔɔ cʋʋnɩ na hara' gɩdonɩ ɔɔ caca dɩbara gba 'laale kʋɛrɛ.
13 Yɛkɛ jɔfʋʋkɛ wɩ pɛrnɩ tibiləəkɛ gbaanɩ ɔɔbara koo a ha Thãgba Kɔ̃tɩn : Ga wiikɛ ʋrɛra gbaanɩ ɔɔbara koo a ha mɛr Thãgba ɔɔ wisɔ na canɩ, wɩ kpaa danana Thãgba cãa wa lõfonʋɔra. 14 A je mɛr Thãgba Kɔ̃tɩnna bonɩ thiinǝ na yɛ bɩɛl bana ɓollʋʋkɛ na hananɩ taana', a je so hɛl bonɩɛ na yɛ bɩɛl bana khɛrɩkɛ na hananɩ taana', na 'likha bonɩɛ na banakɩɩrɩkɛ na hananɩ taana'. 15 A pɔna dakha buruukɛ wa cʋʋnanɩ tabɩɩra' kpɛ̃kpɛrɛ̃ bir nɔ bɩɛl, kɛ wɩ cʋʋnanɩ mɩ̃ phuu, na gatookɛ wɩ gbʋrnanɩ niin sɩ wa pɛr tabɩɩra' na gatookɛ hɔnɩ daƴʋ̃ɔ, kɛ wa pɛnɩ tabɩɩra' kɛ wɩ jajalalɔnɩ niin na dakha thɩ̃bi bonɩ thɩ̃ɛ na dɩvɛ̃ɛkɛ wa jinǝni bonɩɛsɔ. 16 Bonɩ jidaar n gba fɛw a dana mɛr Thãgba Kɔ̃tɩnɩ ƴɛ a jinə so hɛl bonɩɛ na bonɩ thiinǝ. 17 A je dakha mɛr Thãgba Kɔ̃tɩnna 'likha bonɩɛ na banakɩɩrɩle, na buruukɛ wa cʋʋnanɩ tabɩɩra', kɛ wɩ pɔnanɩ kpɛ̃kpɛrɛ̃ bir nɔ bɩɛl, a je dakha thɩ̃bi bonɩɛ na dɩvɛ̃ bonɩɛ. 18 Ga bɔɔle ʋrɛra gbaanɩ ɔɔbara a ha mɛr Thãgba n bela ɔɔ yʋra a hanɩ mɛr Thãgba le mɛr Thãgbaa cãa wa lõfonɔɔ a khɩa yʋ suuneelera a tɔ 'likha bonɩ dɔɔra. 19 Bonɩ jidaar n te banake khɩɛrʋ ɔbɔɔkɛ gɩ bɩnɩ a tenǝ buruukɛ wa cʋʋnanɩ tabɩɩra' bɩɛl kpɛ̃kpɛrɛ̃ biro, a tenǝ gatookɛ hɔnɩ daƴʋ̃ɔ, kɛ wa cʋʋnanɩ tabɩɩra' bɩɛl; a hana ʋrɛ gbaanɩ ɔɔbara a ha Thãgba, dabɔɔkɛ a belnɩ ɔɔ yʋsuunə a faanɩ bɔɔkɛ a kɔɔ gbanɩ ɔɔbara a ha Thãgba. 20 Agɩpɩ bonɩ jidaar n gba a jɛna mɛr Thãgba Kɔ̃tɩnɩ ƴɔɔ. Thɩ̃ khaa gɩ, bonɩ jidaar hɩna a ɓã kũkunenəəkɛ wɩ n jɛnanɩ, na huurerǝǝkɛ wɩ n tini. A gele karɔ ʋrɛra gbaanɩ ɔɔbara a ha mɛr Thãgba punone a ɲɔ dɩvɛ̃ dɩphã.
21 Gɛr dʋɔn jɔfʋʋkɛ hanɩle tibilǝǝkɛ sɔnɩ nʋɔ a gba ɔɔbara a ha Thãgba. Gɛr dɔ bonɩɛɛkɛ a na jini mɛr Thãgba Kɔ̃tɩnna ɔɔ nɔ sora a ɓã khaardaarsɔraakɛ a na ha mɩnɩ mɔ̃ ɔɔ puno hanɩ. A 'laanɛ gɩrɛra a sonɩ, mɔna a sonɩ nʋɔ, mɔna dɩbara gba 'laarɛ Thãgbaraa jɔfʋ hanɩ.
Mɔ̃ Bonɩ jidara na bɔnanɩ Ɩjɩrayɛl bɩsana
22 Thãgba Kɔ̃tɩn sor Mʋɩjɩra ayɩ: 23 Sɔ Aarɔ̃ na ɔɔ bikũusɔɔra wɔɔ: Na n bɔna Ɩjɩrayɛl bɩsana thakɛ a na yɛ: 24 Thãgba Kɔ̃tɩn n bɔna nɩ, a bɛra nɩ! 25 Thãgba Kɔ̃tɩn na n hɩnɛ nɩ na yi bʋɔ, a jɛ nɩ bʋɔra. 26 Thãgba Kɔ̃tɩn n fe ƴɩɛ a pɛ nar, a na hana nɩ ha ɩɩ. 27 Wɩ gba ɩ̃ i thale a na bɔnana Ɩjɩrayɛl bɩsana, dɩ ma bɔna wɛr.