Jɔfʋ thɩ̃ caar dɩɩdɩɩra
Wɩrɛ biseneni jɔfʋ hʋɛraada
5
1 Thãgba Kɔ̃tɩn sor Mʋɩjɩra ayɩ: 2 Sɔ Ɩjɩrayɛl bɩsanana wɩ te gbulo fɛw jɛw na tibil wo tibilikɛ hananɩ khɛr khoo na tibilikɛ lɛnɩ dɩɩ the mɔ̃ a thanɩ khirera. 3 A kuun gɩ a khɛr gɩ nɩ tie jɛw a faa, gɩ do nɔɔ wa n cʋʋ awɩ jɛ pa kãkɛ mɩ n cɔnɩ, gɩ bise jɔfʋ hʋɛra ga. 4 Dɩ Ɩjɩrayɛl bɩsana nɩrɛ nũu a tiir tibil ca welela jɛw a faa, mɔna Thãgba Kɔ̃tɩn kɔɔ sonɩ Mʋɩjɩra.Jɔfʋ dɩpa gbɛbɩrɛra
5 Thãgba Kɔ̃tɩn sor Mʋɩjɩra ayɩ: 6 Mɩana Ɩjɩrayɛl bɩsana a yɛ: A kuun agɩbo khɛr cʋʋ dɩɩ tibillǝ, a cʋʋrɛ puure Thãgba Kɔ̃tɩnna, a hananɛ dɩɩ, 7 a cana dɩpa dɔɔra a cʋʋnɩ, sɩ a birsene thɩ̃doora a dɩrɔnɩ; a tɩnɛnɛ thɩ̃doo nɔra tɩnɛ paar yemɔy a gba tɩnɛ pa bɩɛl a ɓana thɩ̃doorara a hana ʋrɛ a cʋʋrɔnɩ dɩɩ. 8 Sɩ ado ʋrɛ a dɩrɔnɩ khire, sɩ dɩ aa hana tibil da birse thɩ̃doora na haa ga, a na birse ger gɩ do Thãgba Kɔ̃tɩnɩda, kɩrʋ dʋɔn bonɩ jidaar hɩna. A ɓananɔ so hɛl bana kʋʋr kɛ wa jinǝni so hɛl bonɩɛ wɩ hɛl ɔɔ sopuu. 9 Khaarda wo khaardaakɛ Ɩjɩrayɛl bɩsana na tini dɩ ga do Thãgbaada a na jalna bonɩ jidaara, bonɩ jidaar dɔɔ na hɩna. 10 Gɩrɛ tibil tini dɩɩ do Thãgbaada a hana bonɩ jidaar, dɩ gɩrɛ tibil hanɩ bonɩ jidaar, bonɩ jidaar n hɩna.
Gɩrɛ wa cʋʋnɩ khɛrraakɛ wɩ n baalnɩ dɩ a phɩnanɛ kuun kpɩɩ
11 Thãgba Kɔ̃tɩn sor Mʋɩjɩra ayɩ: 12 Mɩana Ɩjɩrayɛl bɩsana a sɔ war ayɛ: A kuun hana khɛr dɩ fii khiro, aa dʋʋraa sobɔdaara'; 13 dɩ kuun kpɩɩ phɩnaa dɩ bise ɔɔbara jɔfʋ hʋɛra sɩ ɔɔ ko na ja', gɩdonɩ wolonena gɩ cʋʋ, dɩ tibil na hale a toro yirə', dɩ wa fʋʋraa ga, 14 dɩ a gɩ ɩ̃ a hʋ̃ lõ kuun dɩ gbugi fʋʋ, dɩ gba gbugi ɔɔ khɛraakɛ ƴɔ̃ƴɔɔnɛnɩ dɩbara, agɩbo a gbaar gbugi ɔɔ khɛra sɩ ga do mɛ̃ ga, 15 kuunile n kpa ɔɔ khɛrra a jalana bonɩ jidaara. A 'laanɛ ɔɔjɩ mɩɩn kilǝ yẽther. A na n pɛ niin mɩɩnaala', dɩ a na n dɛɛnɔ dakha latɩkoloa' gɩdonɩ gbugi bonɩɛ gɩ, bonɩɛ gɩɩkɛ na nɛrɔnɩ dɩ paar. 16 Bonɩ jidaar n kpar khɛrɩle a danana a jɩɩl Thãgba Kɔ̃tɩnɩ ƴɔɔ. 17 Agɩpɩ a cɛ ɲʋɔnɩkɛ hanɩ Thãgba ƴɔɔa a pɛ bilẽsiro, a kpɛ thɩn thɩɩra Thãgbaa kẽkẽ waw a pɩɛr. 18 A cʋɛ khɛrɩlera a jɩɩl Thãgba Kɔ̃tɩnɩ ƴɔɔ, a ɲaɲaanʋʋ yʋsuuneaa gba dɩpa jɩna bonɩ thɩ̃ɛɛlera, kɛ dɔnɩ gbugi bonɩɛ a thɛbʋʋ ɲɛɛna, sɩ bonɩ jidaar thɛthɛ n fʋrɔ ɲɔ khaakɛ n 'laanɛnɩ sʋɔn ɔɔ ɲɔ̃kɔɔ. 19 Agɩpɩ a cʋɛ khɛrra a ʋlfɛ, a sʋɔraa: Ado kuun kpɩɩ na phɩna fɩ yuuǝ', dɩ a fɩ hanɩ afɩ koo ɲɔ̃kɔɔ, fa fii khiro a ƴɔ̃ƴɔ̃ɔ afɩbara ga, ɲɔ khaakɛ n 'laanɛnɩ sʋɔn na n pɛ far sora'. 20 Sɩ ado fɩ hanɩ afɩ koo ɲɔ̃kɔɔ, fɩ fiire khiro, dɩ kuun kpɩɩ phɩna fɩ, dɩ fɩ ƴɔ̃ƴɔ̃ɔ afɩbara, 21 ʋlfɛnɛ ayɛ, Thãgba Kɔ̃tɩn n pɛ far sʋɔn afɩ too thɩ̃thɩɩn, a cʋɛ fɩ fɩ bʋ̃, fɩ kõbo. 22 Ɲʋɔnɩkɛra n 'laanɛnɩ sʋɔn n lona afɩ bɩnɔ a cʋɛ fɩ fɩ bʋ̃, fɩ kõbo. Khɛrra n birse ayɩ: "Ɔɔ, gɩ hana ɔmɛ̃!" 23 Bonɩ jidaar n khera sɔ̃ thɩmɩaalera sɛbɛra a mʋa ɲɔ khaaraale gɩ pɩɩnɔ. 24 Agɩpɩ a hana khɛrra ɲʋɔnɩlera n 'laanɛnɩ sʋɔn, a ɲɔ, dɩ ɲɔ khaalera na gbuune bɩnɔ gɩ ɩnanaa sʋɔn. 25 Dɩ bonɩ jidaar na teere gbugi bonɩɛɛlera khɛrɩ ɲɛna a jɛna Thãgba Kɔ̃tɩnɩ ƴɛra sɩ a thɩɩn bonɩ ji paarra. 26 A kpɛ mɩ̃ɩlera ɲɔ̃kor hire gɩ do jɩ̃jɩna thɩ̃ɛ a thii bonɩ ji paarra. Ado a cʋʋ gele pɩ, gɛr a na harɔ khɛrɩlera ɲʋɔnɩlera a ɲɔ. 27 Dabɔɔkɛ a na ɲɔnɩ ɲʋɔnɩle n 'laanɛnɩ sʋɔn, ado a ƴɔ̃ƴɔɔnɛ ɔɔbara, aa do sobɔdaar ɔɔ kora ga, ɲɔ khaale gbunəəni bɩnɔ na ɩnanaanɛ sʋɔn. Ɔɔ bɩ̃ na bʋnɛ, a kõbo. Dɩ a na 'lɛ sʋɔn ɔɔ too thɩ̃thɩɩn. 28 Sɩ ado khɛrɩle na ƴɔ̃ƴɔ̃ɔ ɔɔbara ga, aa hana dɩa', a na 'lɛ sora', a na kʋɔn bɩsana. 29 Gɛr dɔ jɔfʋʋkɛ wɩ pɛrnɩ ado kuun na baal ɔɔ khɛra khaakhaa cʋʋrɛra dɩ gbugi fʋʋ. Jɔfʋ gɩɩkɛ telenenɩ khɛrɩkɛ n cʋɛnɩ khaakhaar, a ƴɔ̃ƴɔ̃ɔ ɔɔbara aa do sobɔrdaar ɔɔ kora ga, 30 agɩbo khɛrɩkɛ ɔɔ ko n baalɔnɩ khaakhaar cʋʋrɛra dɩ gbugi fʋʋ pɔy sɩ ga do sobɔr ga. Kuunna na cʋʋrɛ ɔɔ khɛr a jɩɩl Thãgba Kɔ̃tɩnɩ ƴɛra, bonɩ jidaar n cʋʋra gɩrɛ fɛʋʋkɛ jɔfʋʋkɛ sonɩ. 31 Dɩ khɛrɩ ko na 'lɛ sora', sɩ khɛr na 'lɛ sor ɔɔ dɩpara.