Levɩɩ məlsɔɔ thɔ̃
4
1 Thãgba Kɔ̃tɩn sor Mʋɩjɩ na Aarɔna ayɩ: 2 Nɩ therra Kehatɩɩ mǝlsɔ thɩ kʋ̃ɔ thɩ kʋ̃ɔ na cɔ kana cɔ kana Levɩɩ məlsɔɔra, 3 fɔnɩ yɛna kpelẽ yʋɔrdarara gɩ dana yɛna kpalaɲɔ yʋɔrdara, kɛ dɔnɩ wɩrɛ fɛʋʋkɛ hananɩ punone a na cʋʋ dɩkhaa thɔ̃ Thãgba cãa waw.Kehatɩɩ mǝlsɔɔ thɔ̃
4 Yɛkɛ Kehatɩɩ mǝlsɔɔ thɔ̃ Thãgba cãa waw; wɛr na n hɩnɛ gɩrɛ dɔnɩ thɩ̃ sãasɩnanɛsɔ. 5 Ado Ɩjɩrayɛl bɩsana na ɩɩr wɩ jal pa kpɩɩ, Aarɔ̃ na ɔɔ bikũusɔ na pʋɔn a na ti du vaar kẽkɩɩn, 6 wɩ thi ʋlfɛ khɛɛsʋʋraakɛ hananɩ nɔ bɩɛl ʋlfɛ thɩmɩɩ, wɩ gba kẽkẽ nɩɩkɛ wɩ cʋʋnɩ na dofɛ̃ lʋʋ wɩ bel wɩ thiro, wɩ gba kẽkẽ nɩ sɩɛ khala khala wɩ thi dofɛ̃ lʋʋraale agɩpɩ, wɩ pɛr ʋlfɛ khɛɛsʋ gba ɓalãɓɔna. 7 Wɩ gba dakha kẽkẽ nɩ sɩɛ khala khala a the Thãgba buru tabalɩla, a gba tasasɔ na thɩ̃ ɲɔdaasɔ na gɩrɛ hɔnɩ bʋla minǝsɔ na dɩvɛ̃ bonɩ ji bilẽsesɔ wɩ dɛɛnɔ ƴũu. Buruukɛ wɩ n ha mɩnɩ bɔɔ fɛw n tɔɔ le tabalɩla, 8 wɩ gba kẽkẽ nɩ sɩɛ kpa kpa a the thɩ̃berǝǝle ƴũu, a thero kẽkẽ nɩɩkɛ wɩ cʋʋnɩ na dofɛ̃ lʋʋ, agɩpɩ wɩ pɛr tabal gba ɓalãɓɔna. 9 Wɩ gba kẽkẽ nɩ sɩɛ khala khala a the dɔ carã dɛ̃ɛ paara na ɔɔ dɔ carãsɔɔra, na dɔ carã khɩɛrdaasɔɔra na tho tɛdaasɔɔra na ɔɔ nĩ pɛdasɔɔra fɛʋʋkɛ dɔnɩ ɔɔ thɔ̃ do thɩ̃bisɔɔ. 10 Wɩ gba kẽkẽ nɩɩkɛ wɩ cʋʋnɩ na dofɛ̃ lʋʋ a paranaa na ɔɔ thɔ̃do thɩ̃bisɔɔlera fɛw, a gba dɛ̃ɛnɛ thɩ̃ gbadaara. 11 Wɩ gba kẽkẽ nɩɩkɛ dɔnɩ dasɩɛ khala khala a the bonɩ ji paaraakɛ wɩ cʋʋnɩ na dɛ, a gba kẽkẽ nɩɩkɛ wɩ cʋʋnɩ na dofɛ̃ lʋʋ a thero; agɩpɩ wɩ tɔrɔ bonɩ ji pa gba ɓalãɓɔna. 12 Agɩpɩ wɩ gba thɩ̃be fɛʋʋkɛ wɩ n cʋʋnanɩ bonɩ ji thɔma pa phuurə, a pɩɛr kẽkẽ nɩɩrakɛ dɔnɩ dasɛ khala khala, a parana kẽkẽ nɩɩkɛ wɩ cʋʋnɩ na dofɛ̃ lʋʋ agɩpɩ wɩ gba wɩ dɛ̃ɛ thɩ̃ gbadaara. 13 Wɩ khɩɛrɛ bonɩ nʋ̃ nĩikɛ maarɛnɩ bonɩ ji paar a khɩana thoo fɛw, sa bela kẽkẽ nɩ sɩɛ kpa kpa kpa a the bonɩ ji paara. 14 Wɩ gba thɩ̃be fɛʋʋkɛ wɩ n cʋʋnanɩ thɔma bonɩ ji paara: Tho tɛdaasɔ na nʋ̃ gɔdaasɔ na pɛlsɔ na gborminǝ; thɩ̃be fɛʋʋkɛ dɔnɩ bonɩ ji padaa a dɛɛnɔ ƴũu, a thero kẽkẽ nɩɩkɛ wɩ cʋʋnɩ na dofɛ̃ lʋʋ, agɩpɩ, wɩ toro bonɩ ji pa gba ɓalãɓɔna. 15 Dabɔɔkɛ Ɩjɩrayɛl bɩsana na n benɩ jɛw wɩ jal, a Aarɔ̃ na ɔɔ bikũusɔ thiro Thãgbaa kẽkẽ wa na ɔɔ thɔ̃do thɩ̃bisɔ fɛw a pɩ, Kehatɩɩ mǝlsɔ n pɔ gba a jalana. Sɩ wa n tha Thãgbaa kẽkẽ wara ɲɔ̃a', a mɛ̃ ga wa khiire. Gɛr dɔ Kehatɩɩ mǝlsɔɔ thɔ̃ Thãgba cãa waw. 16 Aarɔ̃ bonɩ jidaarɩ bikuun Eleajaar na n hɩnɛ dɔ carã nĩ thɩmɩɩ na latɩkolookɛ n hʋnanɩ daw na thɩ̃bi bonɩɛɛkɛ wɩ n jini dɩwɩlʋ koo, na nĩ sãsɩnanɛ. Ɔr na n hɩnɛ Thãgba cãa waa fɛw na gɩrɛ hanɩ ɔɔ bɩnɔ; Thãgbaa kẽkẽ wa na ɔɔ thɩ̃bisɔ fɛw.
17 Thãgba Kɔ̃tɩn bire so Mʋɩjɩra na Aarɔna ayɩ: 18 Levɩɩ mǝlsɔɔra, na n cʋʋ Kehatɩɩ mǝlsɔ n bũburõa'. 19 Nɩ yɛ gɩrɛ na cʋʋnɩ ɔbɔɔkɛ wa n wɔrɔnɩ thɩ̃ sãasɩnanɛsɔ gɩ do nɔɔ wa n khiirə' : Fɛr Aarɔ̃ na afɩ bikũusɔ, nɩ thɔa ntɛ a nɩɛraa gɩrɛ a na gbanɩ na mɔ̃ a na cʋʋnɩ. 20 Gɩ do nɔɔ wa n lõ dɩbara a yɩ thɩ̃ɛsɔɔkɛ n sãasɩnɛnɩ ɔbɔɔkɛ wɩ n thiironi a khiirə'.
Gɛɛrsɔ̃ɔ mǝlsɔɔ thɔ̃
21 Thãgba Kɔ̃tɩn sor Mʋɩjɩ ayɩ: 22 Therra dakha Gɛɛrsɔ̃ɔ mǝlsɔ, thɩ kʋ̃ɔ thɩ kʋ̃ɔ na cɔ kana cɔ kana. 23 Therra kona fɛʋʋkɛ hananɩ yɛna kpelẽ yʋɔr a jalna dana kpalaɲɔ yʋɔr, kɛ dɔnɩ wɩrɛ fɛʋʋkɛ na punonenɩ a na cʋʋ thɔma Thãgba cãa waw. 24 Yɛkɛ gɩrɛ dɔnɩ Gɛɛrsɔ̃ɔ mǝlsɔɔ thɔ̃ na gɩrɛ wa n gbanɩ : 25 Wɛr na n gbaan Thãgbaa kẽkẽ wa kẽkẽ gborõbesɔ, na Thãgba cãa wa kẽkẽ gborõbe na kẽkẽ nɩɩ na kẽkẽ nɩɩkɛ wɩ cʋʋnanɩ dofɛ̃ lʋʋ kɛ n theronɩ ƴũu, na Thãgba cãa wa lõfonɔ kẽkɩɩn, 26 na gbasa kẽkẽ gborõbeekɛ diǝni Thãgbaa kẽkẽ wara na bonɩ ji paara na gbasa lõfonɔ kẽkɩɩn na agɩ pɛ̃sɔ na agɩ thɩ̃bisɔ fɛw. Gɛr na dɔ awɩ thɔ̃. 27 Aarɔ̃ na ɔɔ bikũusɔ na n hɩnɛ Gɛɛrsɔ̃ɔ mǝlsɔ awɩ thɔna fɛw thɩ̃ gɩrɛra wɩ teenanɩ wa n gba na thɔmaakɛ wɩ teenanɩ wa n cʋɛ. Wɛr na n sɔ war thɔmaakɛ wɩ teenanɩ wa n cʋɛ na thɩ̃ɛ fɛʋʋkɛ wɩ teenanɩ wa n gba. 28 Gɛr dɔ Gɛɛrsɔ̃ɔ mǝlsɔɔ thɔ̃ Thãgba cãa waw. Aarɔ̃ɔ bonɩ jidaarɩ bikuun Ɩtamaar na n hɩnɛ wɩ awɩ thɔmana.
Merarɩɩ mǝlsɔɔ thɔ̃
29 Therra Merarɩɩ mǝlsɔɔ thɩ kʋ̃ɔ thɩ kʋ̃ɔ na cɔ kana cɔ kana. 30 Therra kona fɛʋʋkɛ hananɩ yɛna kpelẽ yʋɔr a jalna dana yɛna kpalaɲɔ yʋɔr, kɛ dɔnɩ wɩrɛ fɛʋʋkɛ hananɩ punone a na cʋʋ thɔma Thãgba cãa waw.
31 Yɛkɛ gɩrɛ dɔnɩ awɩ thɔ̃ Thãgba cãa waw : wɛr na n gbaan Thãgbaa kẽkẽ wa thɩr pɛna na agɩ ɓal gbãsɔ, na thɩr gbuunǝsɔ na agɩ jǝǝdasɔ, 32 na thɩr gbuunǝsɔɔkɛ diǝni gbasara na agɩ jǝǝdasɔ na kpaasɔ na pɛ̃ɛsɔ na thɔ̃do thɩ̃be fɛʋʋkɛ wɩ n cʋʋnanɩ ga thɔ̃ɔle. Bonɩ jidara n sɔ wɛr fɛw bɩɛlbɩɛlla thɩ̃bi dɔɔsɔɔkɛ ntɛ teenanɩ a na n gba. 33 Gɛr dɔ Merarɩɩ mǝlsɔɔ thɔ̃, kɛ dɔnɩ thɔmaakɛ wa donɩ Thãgba cãa waw. Aarɔ̃ bonɩ jidaarɩ bikuun Itamaar na n hɩnɛ awɩ thɔ̃.
Wɩ therre Levɩɩ mǝlsɔɔkɛ hanɩ thɔmana
34 Dɩ Mʋɩjɩ na Aarɔ̃ na Ɩjɩrayɛl bɩsanaa kɔ̃tɩ̃sɔ therre Kehatɩɩ mǝlsɔ, thɩ kʋ̃ɔ thɩ kʋ̃ɔ, na cɔ kana cɔ kana. 35 Wɩ therre kona fɛʋʋkɛ hananɩ yɛna kpelẽ yʋɔr a jalna dana yɛna kpalaɲɔ yʋɔr, kɛ na punonenɩ a na do thɔma Thãgba cãa waw. 36 Dɩ wɩrɛ wɩ thernɩ mɔ̃ awɩ thɩ kɔ̃ hanɩ fɛw har kona gbɩlanɩ yeɲɔ na taamakoɲɔ na kpalaɲɔ yʋɔr (2750). 37 Wɛr dɔ Kehatɩɩ mǝlsɔɔkɛ wɩ thernɩ mɔ̃ awɩ thɩ kɔ̃ hanɩ kɛ dɔnɩ wɩrɛ fɛʋʋkɛ n dɔnɩ thɔma Thãgba cãa waw. Mʋɩjɩ na Aarɔ̃ ther wer mɔna Thãgba Kɔ̃tɩn kɔɔ sonɩ Mʋɩjɩra.
38 Dɩ wɩrɛ fɛʋʋkɛ wɩ thernɩ Gɛɛrsɔ̃ɔ məlsɔɔra mɔ̃ awɩ thɩ kɔ̃sɔ na awɩ cɔ kasɔ hanɩ. 39 kɛ hananɩ yɛna kpelẽ yʋɔr a jalna dana yɛna kpalaɲɔ yʋɔr, kɛ hananɩ punone a na do thɔma Thãgba cãa waw, 40 wɩrɛ fɛʋʋkɛ wɩ thernɩ mɔ̃ awɩ thɩ kɔ̃sɔ na cɔ kasɔ hanɩ har kona gbɩlanɩ yeɲɔ na taamaadõ na kpelẽ yʋɔr (2630). 41 Wɛr dɔ Gɛɛrsɔ̃ɔ mǝlsɔɔkɛ wɩ thernɩ mɔ̃ awɩ thɩ kɔ̃sɔ hanɩ kɛ dɔnɩ wɩrɛ fɛʋʋkɛ n dɔnɩ thɔma Thãgba cãa waw. Mʋɩjɩ na Aarɔ̃ ther wer mɔna Thãgba Kɔ̃tɩn kɔɔ sonɩ.
42 Wɩrɛ fɛʋʋkɛ wɩ thernɩ Merarɩɩ məlsɔɔra mɔ̃ awɩ thɩ kɔ̃sɔ na awɩ cɔ kasɔ hanɩ, 43 kɛ hananɩ yɛna kpelẽ yʋɔr a jalna dana yɛna kpalaɲɔ yʋɔr, kɛ hananɩ punone a na dona thɔma Thãgba cãa waw, 44 wɩrɛ wɩ thernɩ mɔna awɩ thɩ kɔ̃sɔ hanɩ har kona gbɩlanɩ yẽther na taaɲɔ (3.200). 45 Wɛr dɔ Merarɩɩ mǝlsɔɔkɛ wɩ thernɩ mɔ̃ awɩ thɩ kɔ̃sɔ hanɩ. Mʋɩjɩ na Aarɔ̃ ther wer mɔna Thãgba Kɔ̃tɩn kɔɔ sonɩ Mʋɩjɩra.
46 Levɩɩ mǝlsɔ fɛʋʋkɛ Mʋɩjɩ na Aarɔ̃ na Ɩjɩrayɛl bɩsanaa kɔ̃tɩ̃sɔ thernɩ mɔ̃ awɩ thɩ kɔ̃sɔ na awɩ cɔ kasɔ hanɩ, 47 kɛ hananɩ yɛna kpelẽ yʋɔr a jalna dana yɛna kpalaɲɔ yʋɔr, kɛ hananɩ punone a na do thɔma, a na gbana thɩ̃be Thãgba cãa waw 48 wɛr fɛʋʋkɛ wɩ thernɩ har kona gbɩlanɩ makõther na taamɔy na kpalanã (8 580). 49 Wɩ ther wer mɔna Thãgba Kɔ̃tɩn kɔɔ sonɩ Mʋɩjɩra, a nɩ wɛr fɛw bɩɛlbɩɛlla thɔ̃ gɩrɛ ntɛ na n cʋʋnɩ na thɩ̃bi gɩrɛ ntɛ na n gbanɩ ; wɩ ther wer mɔna Thãgba Kɔ̃tɩn kɔɔ sonɩ Mʋɩjɩra.